ꓜꓲꓺ ꓞꓹ ꓟ ꓔꓶ ꓐꓬꓱꓽ ꓙꓳ ꓠꓬꓲ ꓔ ꓟ (Dialogue with Environment)

ꓟꓲ ꓠꓯ ꓗꓪ ꓟꓵꓽ ꓘꓳꓼ ꓒꓳꓹ ꓡꓹ ꓟ ꓮꓽ ꓟꓬꓹ ꓟꓬꓽ ꓡꓰ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞ ꓢꓯꓼ ꓔꓯ ꓗꓽ ꓕꓸ ꓟ ꓳ-ꓜꓳꓠꓰ ꓐꓯꓹ ꓟ ꓖꓳ ꓟ ꓥˍ ꓟꓲ ꓐꓬ ꓡꓰ ꓢꓲ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓮꓽ ꓘꓶꓸ ꓞ ꓡꓹ ꓟ ꓥˍ ꓟꓲ ꓗꓶ ꓡꓰ ꓡ ꓓꓴ ꓥꓳ=  ꓖꓳ ꓟ ꓡꓰ ꓟꓽ ꓞꓲ ꓟꓲ ꓠꓯ ꓞꓳ ꓤꓽ ꓠꓬ ꓟꓽ ꓤ ꓟꓳ ꓟꓳ ꓢꓲ ꓜꓲ ꓘꓶꓹ ꓠꓲ꓾ ꓟꓲ ꓠꓯ ꓔꓯ ꓥˍ ꓟꓲ ꓚꓴꓸ ꓠꓲ ꓕꓱ ꓡꓰ ꓕꓲꓽ ꓫꓵ ꓡꓰ ꓕꓲꓽ ꓫꓵꓽ ꓬꓰ ꓗꓶꓹ ꓠꓬ ꓟꓲ ꓠꓯ ꓕꓱ ꓟ ꓥˍ ꓟꓲ ꓬꓲ ꓓꓳꓼ ꓟꓬ ꓡꓰ ꓢꓲ ꓟꓶꓽ ꓦꓲ ꓥˍ ꓟꓲ ꓣꓳ ꓐꓱ ꓶ ꓙꓲ ꓖꓴ ꓟꓽ ꓙꓳ ꓬꓲ ꓓꓳꓼ ꓢꓲ ꓗꓶ ꓡꓰ ꓢꓲ꓾  ꓟꓲ ꓠꓯ ꓞꓳ ꓤꓽ ꓔꓬꓹ ꓫꓸ ꓟ ꓗꓶ ꓡ ꓓꓴ ꓥꓳ= ꓖꓳ ꓟ ꓡꓰ ꓟꓽ ꓞꓲ ꓬꓲ ꓙꓬ ꓥˍ ꓟꓲ ꓬꓲ ꓓꓳꓼ ꓗ ꓡꓰ ꓢꓲ ꓓꓳ ꓟꓽ ꓙꓲꓹ ꓟ ꓕꓱ ꓡꓰ ꓗ ꓡꓰ ꓓꓴ ꓥꓳ= ꓖꓳ ꓟ ꓑꓶ ꓓꓴ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓮ ꓡꓰ ꓐꓯ ꓔꓬ ꓡ? ꓐꓯꓹ ꓠꓬ ꓕꓱ ꓡꓰ ꓬꓰꓹ ꓟ ꓠꓬ ꓟꓲ ꓠꓯ ꓗꓪ ꓒꓴ ꓤꓼ ꓫꓵ ꓤꓼ ꓔꓯ ꓧꓪ ꓢꓲ ꓠꓲꓹ ꓦꓬꓸ ꓙꓵꓽ ꓢꓲ ꓕꓱ ꓡꓰ ꓬꓰꓹ ꓟ ꓥ ꓪ= ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓢꓲ ꓜꓲ ꓕꓽ ꓜꓲꓹ ꓡꓰ ꓙꓳ ꓡꓰ꓾ ꓥꓪꓸ ꓥˍ ꓟꓲ ꓕꓲꓽ ꓟꓹ ꓡꓰ ꓙꓳ ꓡꓰ꓾ ꓬꓲ ꓙꓬ ꓥˍ ꓟꓲ ꓓꓳ ꓟꓽ ꓙꓲ ꓡꓰ ꓟꓶꓽ ꓦꓲ ꓥˍ ꓟꓲ ꓬꓲ ꓓꓳꓼ ꓗ ꓡꓰ ꓕꓯ ꓠꓴ ꓧꓪꓹ ꓟ ꓒꓴ ꓠꓬ ꓬꓲ ꓟꓸ ꓟꓲ ꓟꓽ ꓓꓳꓹ ꓟ ꓙꓲ ꓖꓴ ꓟꓽ ꓙꓳˍ ꓟ ꓥˍ ꓟ ꓔꓯ ꓢꓷꓸ ꓡ ꓓꓴ ꓥꓳ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓕꓱ ꓟ ꓔꓯ ꓢꓷꓸ ꓡꓹ ꓟ ꓮꓽ ꓟꓬꓹ ꓙꓳˍꓡꓳ=

ꓖꓳ ꓟ ꓑꓶꓸ ꓓꓴ ꓰꓚꓳꓠꓳꓟꓲꓚꓮꓡ ꓰꓚꓳꓠꓲꓟꓲꓚꓢ ꓐꓯꓹ ꓟ ꓟꓲ ꓠꓯ ꓗꓪ ꓟꓶꓽ ꓘꓴꓽ ꓟꓽ ꓟꓬꓽ ꓡ ꓠ꓾ ꓟꓲ ꓠꓯ ꓔꓯ ꓟꓽ ꓐꓬ ꓡꓰ ꓠ꓾ ꓬꓲ ꓙꓬ ꓥˍ ꓟꓲ ꓟꓽ ꓐꓬ ꓡꓰ ꓠ꓾ ꓗꓶ ꓡꓰ ꓝꓲꓹ ꓟ ꓶ ꓡꓯꓼ ꓟꓴꓹ ꓟ ꓚꓱꓹ ꓔꓯ ꓟꓬꓽ ꓠꓬꓲ ꓢꓯꓼ ꓕꓵꓼ ꓡꓹ ꓟ ꓙꓳˍ ꓡꓳ= ꓶ ꓤꓼ ꓶ ꓟꓲ ꓥˍ ꓟꓲ ꓟꓲ ꓠꓯ ꓕꓱ ꓟ ꓔꓯ ꓟꓽ ꓒꓳꓹ ꓡꓰ ꓝꓲꓹ ꓟ ꓶ ꓤꓼ ꓶ ꓟꓲ ꓔꓯ ꓥꓳꓽ ꓐꓯ ꓠꓬ ꓢꓳ ꓡ ꓶ ꓤꓼ ꓤꓱꓹ ꓟ ꓐꓮꓔꓔꓰꓣꓬ ꓣꓱꓹ ꓟ꓾ ꓬꓲ ꓙꓬ ꓗꓪ ꓐꓰ ꓪꓸ ꓟ ꓮꓸ ꓔꓳꓸ ꓔꓯ ꓣꓱꓹ ꓟ ꓕꓱ ꓡꓲꓳ ꓫꓵꓽ ꓣꓱꓽ ꓡꓹ ꓟ ꓥˍ ꓡꓳ= ꓢꓲꓹ ꓜꓲ ꓡꓳ ꓜꓲ ꓔꓯ ꓥˍ ꓟꓲ ꓮꓽ ꓟꓬꓹ ꓔꓶ ꓢꓲꓹ ꓜꓲ ꓡꓳ ꓜꓲ ꓔꓯ ꓙꓲ ꓖꓴ ꓙꓳˍ ꓟ ꓒꓬꓱꓼ ꓡ ꓠ ꓬꓰꓹ ꓟ ꓕꓱ ꓡꓲꓳ ꓫꓵꓽ ꓮꓽ ꓟꓬꓹ ꓕꓱ ꓡꓰ ꓬꓰ ꓡꓹ ꓟ ꓥ ꓪ= ꓜꓽ ꓪꓳ ꓡꓳꓸ ꓪꓳ ꓡꓰ ꓠꓲ ꓙꓼ ꓗꓪ ꓐꓰ ꓫꓹ ꓦꓹ ꓟ ꓟꓵꓽ ꓛꓲ ꓕꓱ ꓡꓲꓳ ꓫꓵꓽ ꓟꓽ ꓣꓱꓽ ꓣꓱꓽ ꓟꓲ ꓠꓯ ꓗꓪ ꓟ ꓚꓵ ꓚꓵ ꓟꓵꓽ ꓛꓲ ꓚꓵ ꓚꓵ ꓥˍ ꓟ ꓙꓶꓽ ꓘꓲꓽ ꓚꓵ ꓚꓵ ꓥˍ ꓟ ꓕꓱ ꓟ ꓔꓯ ꓢꓲ ꓣꓱ ꓢꓲ ꓠꓬꓲ ꓔꓶ ꓡꓹ ꓟ ꓕꓱ ꓡꓰ ꓬꓰˍ ꓡꓳ= ꓖꓳ ꓡꓰ ꓙꓶꓽ ꓘꓲꓽ ꓣꓱꓽ ꓚꓵ ꓚꓵ ꓟꓵꓽ ꓛꓲꓽ ꓔꓯ ꓣꓱꓽ ꓢꓲ ꓔꓶꓹ ꓟ ꓠꓬ ꓬꓲ ꓒꓵꓽ ꓮꓽ ꓟꓬꓹ ꓒꓵꓽˍ ꓟ ꓕꓱ ꓡꓰ ꓗꓶ ꓡꓹ ꓟ ꓙꓳˍ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰꓺ ꓚꓮꓣꓐꓳꓠ ꓰꓟꓲꓢꓢꓲꓳꓠꓢ ꓐꓯꓹ ꓟ ꓟꓲ ꓠꓯ ꓗꓪ ꓞꓳ ꓤꓽ ꓔꓯ ꓢꓯꓼ ꓦ ꓟꓽ ꓙꓲ ꓡꓰ ꓝꓲꓹ ꓟ ꓬꓲ ꓙꓬ ꓔꓯ ꓥˍ ꓟꓲ ꓐꓬ ꓡꓰ ꓝꓲꓹ ꓟ꓾ ꓚꓮꓣꓐꓳꓠ ꓢꓯꓼ ꓔꓯ ꓟꓬꓽ ꓡꓰ ꓝꓲꓹ ꓟ ꓕꓱ ꓡꓲꓳ ꓫꓵꓽ ꓥ ꓕꓯ ꓑꓳ ꓔꓯ ꓟꓽ ꓟꓬꓽ ꓡ ꓠ ꓮꓽ ꓘꓶ ꓢꓯꓼ ꓕꓵꓼ ꓢꓲ ꓬꓰ ꓔꓬꓹ ꓟ ꓥ ꓪ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓠꓬꓲꓸ ꓠꓬꓲ ꓠꓬ ꓢꓴꓢꓔꓮꓲꓠꓮꓐꓲꓡꓲꓔꓬ ꓢꓔꓣꓮꓔꓰꓖꓬ ꓮ ꓕꓯꓽ ꓥˍ ꓟꓲ ꓤꓲ ꓞꓹ ꓟ ꓔꓶ ꓐꓬꓱꓽ ꓐꓳꓹ ꓟ ꓐꓯꓹ ꓟ ꓕꓱ ꓟ ꓙꓳ ꓠꓬꓲ ꓔ ꓡꓳ= ꓢꓲꓹ ꓜꓲ ꓡꓳ ꓜꓲ ꓔꓯ ꓟꓽ ꓐꓬ ꓡꓰ ꓠ ꓟꓽ ꓟꓶꓽ ꓡꓰ ꓠ ꓟꓲ ꓠꓯ ꓗꓪ ꓟꓶ ꓦꓲ ꓢꓯꓼ ꓥˍ ꓟ ꓳꓫꓬꓖꓰꓠ ꓔꓯ ꓥˍ ꓟꓲ ꓟꓽ ꓟꓶꓽ ꓡꓰ ꓠ꓾ ꓚꓮꓣꓐꓳꓠ ꓢꓯꓼ ꓟꓽ ꓟꓬꓹ ꓡ ꓠ꓾ ꓬꓲ ꓙꓬ ꓔꓯ ꓥˍ ꓟꓲ ꓬꓲ ꓓꓳꓼ ꓟꓽ ꓗꓶ ꓡꓰ ꓠ ꓕꓱ ꓡꓲꓳ ꓫꓵꓽ ꓮ ꓡꓰ ꓢꓲ ꓬꓰ ꓠ ꓗꓹ ꓡ? ꓐꓯꓹ ꓟ ꓔꓶ ꓐꓬꓱ ꓐꓳ ꓠ ꓗꓹ ꓡꓳ= ꓖꓳ ꓕꓯ ꓢꓲ ꓟꓵꓽ ꓘꓳꓹ ꓒꓳꓹ ꓡꓹ ꓟ ꓟꓽ ꓙꓳ ꓟꓵꓽ ꓘꓳꓼ ꓒꓳꓹ ꓡꓹ ꓟ ꓕꓯ ꓔꓳꓹ ꓧꓪꓸ ꓡꓰ ꓢꓲ ꓟꓲ ꓠꓯ ꓕꓱ ꓟ꓾ ꓠꓬ ꓔꓬꓹ ꓢꓹ ꓟ ꓗꓸ ꓛꓲꓹ ꓟ꓾ ꓙꓳ ꓢ ꓔꓬꓹ ꓢꓹ ꓟ ꓕꓱ ꓡꓰ ꓒꓬꓱꓼ ꓡ ꓓꓴ ꓥꓳ=

ꓠꓬꓲꓸ ꓠꓬꓲ ꓞꓳ ꓤꓽ ꓟꓽ ꓓ ꓙꓳ ꓔꓬꓹ ꓟ ꓠꓬ ꓕꓱ ꓟ ꓥˍ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓢꓯꓼ ꓦ ꓟꓽ ꓙꓲ ꓡꓰ꓾ ꓟꓶꓽ ꓘꓴꓽ ꓟꓬꓽ ꓡꓰ꓾ ꓬꓲ ꓙꓬ ꓥˍ ꓟꓲ ꓓꓳ ꓟꓽ ꓙꓲ ꓡꓰ꓾ ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓮꓽ ꓟꓬꓹ ꓗꓴꓷꓼ ꓗꓪ ꓬꓲ ꓙꓬ ꓓꓳ ꓟꓽ ꓙꓲꓹ ꓟ ꓕꓱ ꓡꓰ ꓗ ꓡꓹ ꓓꓴ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓬꓲ ꓙꓬ ꓡꓰ ꓪꓴꓽ ꓤꓹ ꓟ꓾ ꓪꓴ ꓤꓹ ꓤꓹ ꓠꓹ ꓟ ꓗꓶ ꓡꓰꓹ ꓟ ꓕꓱ ꓡꓲꓳ ꓫꓵ ꓗꓶ ꓡꓰꓹ ꓓꓴ ꓟ ꓥ ꓪ= ꓕꓲꓽ ꓐꓱ ꓗꓴꓷꓼ ꓠꓬ ꓬꓲ ꓙꓬ ꓡꓰ ꓠꓲ ꓟꓽ ꓙꓳ ꓗꓶ ꓡꓰ ꓢꓲ ꓢꓳ ꓗꓴꓷꓼ ꓗꓪ ꓚꓳ ꓬꓲ ꓙꓬ ꓪꓴ ꓤꓼ ꓠ ꓗꓶ ꓡꓲꓳ ꓫꓵꓽ ꓗꓵꓷꓼ ꓮꓽ ꓟꓬꓹ ꓙꓳˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓓꓳꓹ ꓟ ꓒꓴ ꓤꓼ ꓫꓵ ꓤꓼ ꓑꓳꓽ ꓪꓰꓸ ꓕꓱ ꓡꓲꓳ ꓫꓵꓽ ꓒꓴꓽˍ ꓟ ꓶ ꓤꓼ ꓶ ꓟꓲ ꓖꓳ ꓟ ꓡꓰ ꓟꓽ ꓞꓲ ꓟꓲ ꓠꓯ ꓕꓱ ꓟ ꓔꓶ ꓤꓼ ꓔꓶꓸ ꓕꓱ ꓡꓲꓳ ꓫꓵꓽ ꓟꓲ ꓠꓯ ꓞꓳ ꓤꓼ ꓣꓱꓽ ꓠꓬꓲ ꓔ ꓟ ꓶ ꓤꓼ ꓶ ꓟꓲ ꓮꓽ ꓙꓵꓽ ꓣꓱꓽ ꓫꓵꓽ ꓣꓱꓽ ꓟꓶꓸ ꓮꓽ ꓙꓲꓽ ꓕꓱ ꓟ ꓔꓯ ꓕꓲꓽ ꓢꓯꓹ ꓡꓰ ꓥˍ ꓟ    ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓡꓰ ꓕꓱ ꓟ ꓔꓯ ꓗꓪꓽ ꓫꓵꓹ ꓟ ꓬꓲ ꓪꓽ ꓢꓲ ꓬꓲ ꓢꓲꓺ ꓒꓽ ꓡꓰ ꓐꓰ ꓣꓱꓽ ꓔꓬꓹ ꓟ ꓙꓳˍ ꓡꓳ= ꓞꓳ ꓤꓽ ꓮꓽ ꓟꓬꓹ ꓠꓬ ꓕꓲꓽ ꓢꓯꓹ ꓟ ꓔꓯ ꓡꓰ ꓣꓱꓽ ꓔꓬꓹ ꓟ ꓥ ꓪ= ꓔꓯ ꓥꓳꓽ ꓐꓯ ꓠꓬ ꓟꓲ ꓠꓯ ꓕꓲꓽ ꓟꓲ ꓠꓯ ꓡꓱꓼ ꓞꓳ ꓤꓽ ꓵ ꓣꓳ ꓮꓽ ꓙꓵꓽ ꓠꓬ 80ꓹ000 ꓫꓯꓹ ꓔꓬꓹ ꓡꓳ= ꓖꓳ ꓟ ꓠꓯꓸꓼ ꓗꓪ ꓚꓳꓸ 16ꓹ000 ꓫꓯꓹ ꓛꓲ ꓠꓬ 1ꓸ5% ꓔꓯꓹ ꓢꓲ ꓣꓱꓽ ꓔꓬꓹ ꓟ “ꓽ ꓔꓬꓹ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓗꓪ ꓟ ꓡꓳꓺ ꓑ 16ꓹ000 ꓫꓯꓹ ꓛꓲ ꓠꓬ ꓟꓲ ꓠꓯ ꓗꓪ ꓟ ꓣꓱꓽ ꓫꓵꓽ ꓣꓱꓽ ꓟꓶꓸ ꓜꓽ ꓫꓵꓽ ꓜꓽ ꓙꓵꓽ ꓒꓴ ꓤꓼ ꓫꓵ ꓤꓼ ꓮꓽ ꓙꓵꓽ 76% ꓛꓲ ꓔꓯ ꓣꓱꓽ ꓔꓬꓹ ꓟ ꓥ ꓪ= ꓖꓳ ꓡꓰ ꓐꓰ ꓕꓲꓽ ꓡꓰ ꓞꓳ ꓤꓽ 46ꓹ000 ꓫꓯꓹ ꓛꓲ ꓠꓬ 21% ꓛꓲ ꓔꓯ ꓡꓰꓽ ꓢꓲ ꓣꓱꓽ ꓔꓬꓹ ꓟ ꓥ ꓪ=ꓖꓳ ꓡꓰ ꓠꓬꓲ ꓕꓱ ꓕꓲꓽ ꓘꓴꓸ ꓗꓪ ꓖꓴꓽ ꓙꓴꓽ ꓠꓲꓹ ꓫꓬꓹ ꓒꓴ ꓤꓼ ꓫꓵ ꓤꓼ ꓜꓽ ꓪꓳ ꓡꓳꓸ ꓪꓳ ꓔꓯ ꓐꓱ ꓡꓯꓽ ꓘꓳꓹ ꓟ ꓠꓯꓸꓼ ꓗꓪ ꓠꓬ ꓮꓽ ꓘꓶꓸ ꓟꓽ ꓜꓳꓽ ꓡꓰꓹ ꓟ ꓥ ꓐꓶ= ꓞꓳ ꓤꓽ ꓕꓲꓽ ꓢꓯꓹ ꓟ ꓠꓬ ꓮꓽ ꓟꓬꓹ ꓔꓯ ꓣꓱꓽ ꓔꓬ ꓢꓲ ꓞꓳ ꓤꓽ ꓮꓽ ꓟꓬꓹ ꓠꓬ ꓕꓲꓽ ꓢꓯꓹ ꓟ ꓔꓯ ꓣꓱꓽ ꓔꓬꓹ ꓟ ꓡꓳꓸ ꓟꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓫꓸ ꓔꓬꓹ ꓟ ꓥ ꓪ= ꓛꓲ ꓡꓹ ꓟ ꓙꓵꓹ ꓗꓪ ꓠꓬ ꓐꓱ ꓡꓯꓽ ꓘꓳꓹ ꓟ ꓕꓱ ꓡꓰ ꓟꓽ ꓗꓶ ꓡꓰ ꓠꓹ ꓟ ꓞꓳ ꓤꓽ ꓮꓽ ꓙꓵꓽ ꓣꓱꓽ ꓐ ꓡ ꓠ ꓮ ꓡꓰ ꓢꓲ ꓬꓰ ꓕꓯ ꓜꓳꓽ ꓡ? ꓕꓱ ꓡꓰ ꓐꓱ ꓡꓯꓽ ꓘꓳꓹ ꓟ ꓠꓯꓸꓼ ꓗꓪ ꓮꓽ ꓟꓬꓹ ꓟꓽ ꓪꓽ ꓡꓯꓽ ꓘꓳꓹ ꓟ ꓔꓯ ꓮꓽꓟꓬꓹ ꓟꓽ ꓪ ꓡꓯꓽ ꓘꓳꓹ ꓟ ꓟꓽ ꓗꓶ ꓡꓰ ꓠꓹ ꓟ ꓮ ꓡꓰ ꓢꓲ ꓬꓰ ꓓꓴ ꓥꓹ ꓡ? ꓐꓯꓹ ꓟ ꓔꓯ ꓥˍ ꓟꓲ ꓣꓳꓽ ꓟꓽ ꓐꓬ ꓡꓰ ꓞꓲ ꓞꓹ ꓟ ꓔꓶ ꓐꓬꓱꓽ ꓐꓳ ꓢꓲ ꓮ ꓡꓰ ꓬꓰ ꓓꓴ ꓥꓹ ꓡ ꓐꓰ ꓣꓳꓽ ꓢꓪꓼ ꓠ ꓗˍ ꓡꓳ=