ꓞꓳ ꓢꓲꓽ ꓔꓶꓺ ꓚꓱꓹ

ꓞꓳ ꓢꓲꓽ ꓐꓯ ꓟ ꓠꓬ ꓐꓶ-ꓬꓲ ꓟꓵꓽ ꓐꓰ ꓟꓴ-ꓖꓴ ꓡꓳ ꓒꓱ ꓗꓪ ꓔꓬ ꓟ ꓡꓲ-ꓢꓴ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓘꓴˍ ꓟ ꓟꓬꓱꓺ ꓥ ꓡꓳ= ꓝꓮꓲ ꓟꓲ-ꓚꓲ-ꓠ ꓗꓪ ꓠꓬ ꓗꓪ ꓢꓱꓽ ꓐꓯ ꓡꓳ= ꓖ-ꓟꓶ-ꓓꓲ ꓗꓪ ꓠꓬ ꓖꓳꓽ ꓡꓳꓻ ꓧꓪ ꓢꓲꓽ ꓐꓰ ꓐꓯ ꓟ ꓥ ꓢꓲ ꓠꓬꓲ꓾ Lisu English Dictionary ꓗꓪ ꓠꓬ ꓖꓳꓽ ꓡꓳꓻ ꓢꓲꓽ ꓢꓲꓽ ꓐꓰ ꓐꓳ ꓔ ꓡꓳ=

ꓞꓳ ꓢꓲꓽ ꓬꓲ ꓚꓰꓺ ꓔꓶ ꓖꓴ ꓠꓬ ꓲ-ꓓꓲ-ꓬ ꓗꓴꓷꓼ ꓐꓶ ꓓꓵꓽ ꓖꓴ ꓪꓴꓸ ꓕꓲ ꓛꓱꓽ꓾ ꓮ-ꓩ-ꓖꓯ-ꓠꓯ-ꓢ-ꓔꓯ ꓗꓴꓷꓼ ꓐꓰ ꓩꓱ-ꓡꓲ-ꓫꓵ ꓗꓴꓷꓼ ꓐꓴ ꓗꓪ ꓐꓰ ꓔꓶ ꓪꓴꓸ ꓔꓴ ꓗꓷ ꓟ ꓥꓳ=

ꓞꓳ ꓢꓶꓽ ꓠꓬ ꓬꓲꓻ ꓙꓬ ꓢꓯꓼ ꓮ ꓟꓬꓹ ꓣꓱꓽ ꓞꓹ ꓟ ꓪꓳꓽ ꓕꓲ ꓙꓰꓽ ꓥ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓢꓯꓼ ꓮ ꓟꓬꓹ ꓙꓳˍ ꓟ ꓗꓪ ꓔꓶ ꓒꓬꓱꓼ ꓡ ꓢˍ ꓟ ꓥ ꓡꓳ= ꓩꓲꓸ ꓛꓲ ꓟꓵꓽ ꓛꓵꓽ ꓡꓳꓼ ꓠ ꓧꓳꓽ ꓖꓶ ꓢꓲ ꓬꓲꓻ ꓙꓬ ꓢꓯꓼˍ ꓟꓲ ꓡꓳꓼ ꓠ ꓛꓲꓺ ꓧꓳꓽ ꓖꓶ ꓠ ꓔ ꓟ ꓥꓳ= ꓝꓮꓲ ꓠꓬ ꓟꓵꓽ ꓘꓳꓼ ꓮ ꓘꓶꓸ ꓟꓽ ꓛ꓾ ꓮ ꓘꓶꓸ ꓟꓽ ꓙꓬ ꓟ ꓗꓪ ꓪ ꓜꓲ ꓔꓶꓺ ꓒꓬꓱꓼ ꓡ ꓢˍ ꓡꓳ ꓐꓰ ꓐꓯ ꓔ ꓡꓳ=

ꓕꓲ ꓰ-ꓗꓸ ꓔꓶꓺ ꓓꓴ ꓐꓱ ꓶ ꓬꓲ ꓫꓵꓸ 2-4 ꓒꓰꓽ ꓣꓱꓽ ꓠ ꓗꓹ ꓡꓳ= ꓬꓲ ꓟꓲ ꓫꓬꓹ ꓕꓯ ꓠꓱꓸ ꓐꓯ ꓔꓶꓺ ꓙꓰꓽ ꓐꓱ ꓶ ꓙ ꓖꓶˍ ꓟ ꓗꓪ ꓬꓲ ꓟꓲ ꓔꓯ ꓘꓪ ꓗꓷ ꓢꓲ ꓠꓬꓲ ꓬꓲ ꓟꓲ ꓗꓪ ꓮ ꓠꓬꓲꓸ ꓛꓲꓽ ꓐꓰ ꓟꓵꓽ ꓛꓵꓽ ꓩꓲꓸ ꓛꓲꓻ ꓧꓳꓽ ꓖꓶ ꓠ ꓔ ꓥ= ꓙ ꓖꓶ ꓓꓳ ꓡꓰ ꓠꓬ ꓬꓲ ꓫꓵꓸ ꓒꓬꓸ ꓗꓷ ꓢꓲ ꓮ ꓠꓬꓲꓸ ꓛꓲꓽ (ꓥ ꓠꓬ) ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓽ ꓐꓹ ꓑꓲꓸ ꓗꓷ= ꓗ ꓠꓯꓸ ꓠꓬ ꓜ ꓪꓵꓽ꓾ ꓫꓵꓸ ꓪꓵꓽ꓾ ꓢꓲꓹ ꓡꓯꓼ ꓗꓸ ꓐꓰ ꓑꓲꓸ ꓗꓷ=

ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡ ꓢꓲ ꓬꓲ ꓜꓲ ꓚꓵꓹ ꓔꓶꓺˍ ꓕꓯ ꓬꓲ ꓜꓲ ꓡꓲ ꓤ ꓚꓵꓹ ꓔꓶ ꓖꓴ ꓬꓲ ꓟꓲ ꓔꓯ ꓩꓲꓸ ꓛꓲꓻ ꓟꓵꓽ ꓛꓵꓽ꓾ ꓮꓸ ꓠꓬꓲꓽ ꓛꓲꓽ ꓟꓬꓽ ꓟꓬꓽ ꓧꓳꓽ ꓖꓶ ꓠ ꓗꓹ ꓡꓳ= ꓞꓳ ꓢꓲꓽ ꓠꓬ ꓬꓲ ꓛꓵꓻ ꓛꓵꓻ ꓝꓳꓽ ꓥ ꓟ ꓪꓴꓸ ꓠꓬꓲ ꓮ ꓠꓯꓸ ꓠꓯꓸ ꓘꓪꓻ ꓖꓶ ꓠ ꓗꓹ ꓟ ꓥ ꓡꓳ= ꓬꓲ ꓜꓲ ꓡꓲꓸ ꓤ ꓔꓯ ꓠꓬ ꓕꓲ ꓚꓬꓸ ꓐꓰ ꓕꓲ ꓚꓬꓸ 4” ꓗꓶꓹ ꓢꓲ ꓕꓲ ꓜꓲ ꓐꓰ ꓕꓲ ꓜꓲ 3” ꓗꓶꓹ ꓢꓲ ꓠꓬꓲ ꓔꓶ ꓠ ꓔ ꓥ=

ꓔꓶ ꓗꓷ ꓗ ꓠꓯꓸ ꓬꓲꓻ ꓙꓬ ꓧꓳꓽ ꓖꓶ ꓠ ꓔ ꓥ= ꓬꓲꓻ ꓙꓬ ꓧꓳꓽ ꓖꓶˍ ꓟ ꓠꓲꓸ ꓡꓰ ꓕꓯ ꓠꓽ꓾ ꓬꓲꓻ ꓙꓬ ꓟꓽ ꓡꓳꓼ ꓕꓯ ꓠꓽ ꓬꓲ ꓒꓬꓽ ꓪꓰꓼ ꓡꓰ ꓙꓴꓺ ꓡꓰˍ ꓟ ꓡꓰꓽ ꓟꓽ ꓞꓲꓺ꓾ ꓬꓲ ꓟꓲꓺ ꓔꓯ ꓬꓲꓻ ꓙꓬ ꓟꓽ ꓧꓳꓽ ꓟ ꓟꓶ ꓫꓵ ꓡꓰ ꓢꓲ ꓬꓲ ꓟꓲ ꓙꓴꓺ ꓡꓰ ꓐꓶꓽ ꓡꓰ ꓕꓯ ꓢꓲꓽ ꓡꓰꓽ ꓬꓲꓻ ꓙꓬ ꓧꓳꓽ ꓖꓶˍ ꓠꓬ ꓞꓳ ꓢꓲꓽ ꓬꓲ ꓛꓵꓻ ꓗꓴꓹ ꓙꓲ ꓐꓶꓽ ꓡꓰ ꓗꓴꓸˍ ꓡꓳ=

ꓬꓲ ꓟꓲ ꓗꓪ ꓟꓳꓼ ꓜꓲ ꓣꓱꓻ ꓡˍ ꓕꓯ ꓫꓬꓹ ꓡꓲꓸ ꓖꓶ ꓠ ꓔ ꓥ= ꓟꓽ ꓫꓬꓹ ꓡꓲꓸ ꓖꓶ ꓕꓯ ꓠꓽ ꓟꓳꓼ ꓠꓯꓸ ꓡˍ ꓕꓯ ꓬꓲ ꓟꓲ ꓕꓲ ꓟ ꓡꓱꓸꓼ ꓐꓬ ꓡꓰ ꓗꓴꓸˍ ꓟ ꓪꓴꓸ ꓠꓬꓲ ꓥ ꓡꓳ= ꓝꓮꓲ ꓬꓲ ꓜꓲ ꓪꓴꓽ ꓡ ꓔꓬ ꓕꓯ ꓬꓲ ꓟꓲ ꓔꓯ ꓡꓳꓸ ꓢꓲ ꓩꓲꓸ ꓛꓲ ꓟꓵꓽ ꓛꓵꓽ꓾ ꓮꓸ ꓠꓬꓲꓽ ꓛꓲꓽ ꓧꓳꓽ ꓖꓶ ꓠ ꓔ ꓥ= ꓬꓲ ꓟꓲ ꓗꓪˍ ꓟꓲ ꓘꓪ ꓫꓴ꓾ ꓚꓪꓹ ꓫꓴ ꓖꓶ ꓠꓯꓹ ꓟ ꓥ ꓡꓳ= ꓞꓳ ꓢꓲꓽ ꓬꓲ ꓕꓳꓹ ꓔꓯ ꓕꓲ ꓠꓽ ꓕꓲ ꓧꓪꓹ ꓞꓲꓼ ꓖꓶ꓾ ꓧꓼ ꓖꓶ ꓠꓯꓹ ꓡꓳ=

ꓬꓲ ꓜꓲ ꓪꓴꓽ ꓓꓰ ꓡꓰ ꓢꓲ ꓠꓬꓲ ꓬꓲ ꓜꓲ ꓗꓪ ꓬꓲ ꓓꓳꓽ ꓗꓪ ꓟ ꓬꓲ ꓒꓬꓽ ꓡꓲꓺ ꓒꓬꓽ ꓥꓪꓽ ꓒꓬꓽ ꓛꓲꓺ ꓙꓴꓺ ꓡˍ ꓕꓯ ꓬꓲ ꓛꓵꓻ ꓚꓵꓹ ꓫ ꓐ ꓡꓺꓳ= ꓬꓲ ꓛꓵꓻ ꓚꓵꓹ ꓗꓷ ꓕꓯ ꓬꓲ ꓜꓲ ꓔꓯ ꓟꓽ ꓓꓶ ꓓꓶ ꓾ ꓛ ꓗꓴꓸ ꓗꓪ ꓗꓷ ꓢꓲ ꓬꓲ ꓛꓵꓻ ꓗꓪ ꓐꓰ ꓬꓲ ꓜꓲ ꓔꓯ ꓕꓲ ꓡꓯꓼ ꓟ ꓚꓰꓺ ꓢꓲ ꓓꓶ ꓗꓷ= ꓕꓲ ꓰ-ꓗ ꓗꓪ ꓞꓳ ꓢꓲꓽ ꓬꓲ ꓕꓱ 6000-8000 ꓗꓪ ꓛꓲꓺ ꓓꓳ ꓡˍ ꓡꓳ=