ꓟꓯ-ꓣꓲ-ꓖꓳ ꓢꓲꓹ ꓪꓰ ꓔꓶꓺ ꓚꓱꓹ

ꓟꓯ-ꓣꓲ-ꓖꓳ ꓢꓲꓹ ꓪꓰ ꓠꓬ ꓟꓲ ꓠꓯ ꓞꓳ ꓤ ꓮ ꓟꓬꓹ ꓠꓲꓹ ꓠꓵˍ ꓟ ꓢꓲꓹ ꓪꓰ ꓥ ꓟ ꓡꓰꓽ ꓟꓽ ꓞꓲꓺ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓶꓺ ꓔꓬ ꓟ ꓢꓲꓹ ꓪꓰˍ ꓟꓲ ꓥ ꓡꓳ= ꓢꓲꓹ ꓪꓰ ꓕꓱ ꓟ ꓔꓯ ꓠꓬ ꓕꓲ ꓘꓳꓼ ꓡꓱꓸꓼ ꓔꓶꓺ ꓐ ꓡˍ ꓟ ꓥ ꓢꓲ ꓠꓬꓲ ꓢꓲꓹ ꓪꓰ ꓬꓲ ꓧꓪꓺ ꓠꓬ ꓢꓲꓹ ꓪꓰ ꓟꓲ꓾ ꓐꓱ ꓔꓯ ꓐꓲꓻ ꓡꓰ ꓝꓲˍ ꓟ ꓥ ꓡꓳ= ꓐꓬꓱꓽ ꓓꓶꓽ ꓢꓴ꓾ ꓢꓯꓸ ꓐꓬꓱꓽ ꓓꓶꓽ ꓢꓴ ꓮ ꓟꓬꓹ ꓥˍ ꓟꓲ ꓟꓯ-ꓣꓲ-ꓖꓳ ꓢꓲꓹ ꓪꓰ ꓟꓲ ꓗꓪ ꓓꓶꓽ ꓣꓴ ꓔꓬ ꓟ ꓥ ꓡꓳ= ꓟꓯ-ꓣꓲ-ꓖꓳ ꓢꓲꓹ ꓪꓰ ꓔꓯ ꓡꓳ-ꓟꓲꓽ ꓥꓳꓽ ꓗꓪ ꓐꓰ ꓕꓯꓸ-ꓔ-ꓬ ꓢꓲꓹ ꓪꓰ ꓐꓰ ꓐꓯ ꓟ ꓥ ꓡꓳ= ꓕꓯꓸ-ꓔ-ꓬ ꓢꓲꓹ ꓪꓰꓻ ꓘꓴꓽ ꓗꓪ 33 ꓙꓰꓽ ꓛꓲꓺ ꓙꓳˍ ꓡꓳ=

ꓢꓲꓹ ꓪꓰ ꓪꓴꓽ ꓡ ꓓꓴ ꓐꓱ ꓶ ꓛꓺ ꓢꓯꓼ 18°C ꓐꓰ 20°C ꓗꓪ ꓛꓲꓺ ꓙꓳˍ ꓟ ꓟꓵꓽ ꓘꓳꓼ ꓗꓪ ꓪ ꓜꓲ ꓔꓶꓺ ꓒꓬꓱꓼ ꓡ ꓢˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓛꓺ ꓢꓯꓼ ꓮ ꓘꓶꓸ ꓠꓲꓸ ꓢꓲꓸ ꓠꓬꓲ ꓠꓲꓺ ꓮ ꓟꓬꓹ ꓖꓪꓺˍ ꓟ ꓗꓪ ꓠꓬ ꓬꓲ ꓪꓰ ꓐꓬ ꓡꓰ ꓗꓴˍ ꓡꓳ= ꓟꓯ-ꓣꓲ-ꓖꓳ ꓢꓲꓹ ꓪꓰ ꓔꓯ ꓬꓲ ꓫꓵꓸ ꓗꓪ ꓐꓰ ꓔꓶˍ ꓟ꓾ ꓬꓲ ꓡꓯꓼ ꓗꓸ ꓬꓲ ꓜꓲ ꓓꓶꓺ ꓢꓲ ꓔꓶˍ ꓟ꓾ ꓥ ꓠꓬ ꓬꓲ ꓜꓲ ꓡꓲꓸ ꓤ ꓔꓶˍ ꓟ ꓕꓱ ꓟꓬ ꓚꓱꓹ ꓗꓪ ꓐꓰ ꓔꓶꓺ ꓐ ꓡˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓫꓵꓸ ꓫꓵꓸ ꓢꓲ ꓔꓶˍ ꓟ ꓠꓬ ꓮ ꓜꓲ ꓙꓲˍ ꓟ ꓥ ꓡꓳ=

ꓔꓶꓺˍ ꓟ ꓗꓪ ꓠꓱꓸ ꓐꓯ ꓔꓶˍ ꓟ ꓡꓰ ꓐꓰ ꓬꓲ ꓟꓲꓺ ꓔꓯ ꓘꓪꓺ ꓗꓷ꓾ ꓬꓲ ꓟꓲꓺ ꓗꓪ ꓭꓸ ꓛꓲ ꓙꓳˍ ꓠꓬ ꓣꓴ ꓦ ꓗꓷ= ꓬꓲ ꓫꓵꓸ ꓫꓵꓸ ꓓꓴ ꓐꓱ ꓶ ꓬꓲ ꓟꓲꓺ ꓫꓬ, ꓗꓷ ꓗ ꓠꓯꓸ ꓬꓲ ꓟꓲꓺ ꓗꓪ ꓩꓲꓸ ꓛꓲꓺ ꓟꓵꓽ ꓛꓵꓽ ꓧꓳꓽ ꓖꓶ ꓠ ꓔ ꓥ꓾ ꓧꓳꓽ ꓓꓳ ꓡꓰ ꓠꓬ ꓬꓲ ꓟꓲꓺ ꓗꓪ ꓬꓲ ꓫꓵꓸ ꓔꓶꓺ ꓗꓷ= ꓔꓶꓺ ꓓꓳ ꓡꓰ ꓕꓯ ꓬꓲꓻ ꓙꓬ ꓧꓳꓽ ꓖꓶꓽ= ꓬꓲꓻ ꓙꓬ ꓧꓳꓽ ꓖꓶˍ ꓕꓯ ꓮ ꓟꓬꓹ ꓕꓽ ꓟꓬꓽ ꓡꓰ ꓝꓲ= ꓬꓲ ꓜꓲ ꓠꓬ ꓫꓵꓸ ꓗꓷ ꓟ 5-6 ꓠꓬꓲ ꓙꓳˍ ꓕꓯ ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡꓻꓳ= 10 ꓠꓬꓲ ꓙꓳ ꓡˍ ꓕꓯ ꓬꓲ ꓒꓬꓽ 4 ꓒꓬꓽ ꓛꓲꓺ ꓓꓳ ꓡꓻꓳ= ꓔꓶꓺ ꓔ ꓟ 30 ꓠꓬꓲ ꓙꓳ ꓡˍ ꓕꓯ ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶꓺ ꓐ ꓡꓻꓳ= ꓬꓲ ꓜꓲ ꓪꓴꓽ ꓓꓰ ꓡꓰ ꓢꓲ 1' ꓙꓳ ꓡˍ ꓕꓯ ꓬꓲ ꓪꓳꓸ ꓠꓳ ꓔꓯ ꓞꓲꓼ ꓖꓶ ꓗꓷ= ꓕꓱ ꓡꓱ ꓬꓰˍ ꓟ ꓠꓬ ꓬꓲ ꓪꓰ ꓮ ꓟꓬꓹ ꓪꓰ ꓡ ꓓꓴ ꓐꓱ ꓶ ꓬꓲ ꓡꓯꓼ ꓗꓸ ꓮ ꓟꓬꓹ ꓣꓱꓻ ꓡ ꓓꓴ ꓥ ꓡꓳ=

ꓬꓲ ꓜꓲ ꓗꓪ ꓬꓲ ꓪꓰ ꓪꓰ ꓡ ꓢꓲ ꓬꓲ ꓪꓰ ꓪꓴꓽ ꓓꓰꓺ ꓡˍ ꓕꓯ ꓧꓼ ꓓ ꓡꓻꓳ= ꓬꓲ ꓪꓰ ꓔꓯ ꓠꓯꓼ ꓙꓵꓹ ꓥ ꓠꓬ ꓡꓬꓽˍ ꓟ ꓕꓲ ꓙꓵꓹ ꓗꓪ ꓧꓼ ꓠꓯꓹ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓢꓲꓹ ꓪꓰ ꓟꓽ ꓧꓼ ꓕꓯ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓧꓳꓽ ꓖꓶˍ ꓠꓬ ꓬꓲ ꓪꓰ ꓧꓼ ꓗꓷ ꓗ ꓠꓯꓸ ꓬꓲ ꓜꓲ ꓟꓽ ꓪꓰꓼ ꓡꓰ꓾ ꓬꓲ ꓜꓲ ꓔꓯ ꓢꓰꓺ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=