ꓟꓲ ꓛꓬ ꓮꓸ ꓠꓳ ꓔꓶꓺ ꓚꓱꓹ

ꓟꓲ ꓛꓬ ꓮꓸ ꓠꓳ ꓞꓶꓻ ꓐꓰ ꓮꓸ ꓠꓳ ꓔꓯ ꓮ ꓘꓶꓸ ꓜꓽ ꓟꓬꓽˍ ꓟ ꓪꓴꓸ ꓠꓬꓲ ꓟꓬ-ꓟ ꓗꓴꓷꓼ ꓗꓪ ꓠꓬ ꓟꓲ ꓛꓬ ꓮꓸ ꓠꓳ ꓔꓯ ꓮ ꓘꓶꓸ ꓔꓶ ꓔꓬ ꓟ ꓥ ꓡꓳ= ꓕꓲ ꓰ-ꓗꓸ ꓗꓪ ꓟꓲ ꓛꓬ ꓮꓸ ꓠꓳ 100 ꓕꓱꓹ ꓓꓳꓻ ꓡ ꓓꓹ ꓟ ꓪꓴꓸ ꓠꓬꓲ ꓧꓪꓽ ꓞꓶꓻ ꓓꓳꓻ ꓡˍ ꓟ ꓔꓶꓺ ꓜꓵꓽ ꓔꓶꓺ ꓙꓰꓽ ꓮ ꓙꓵꓽ ꓘꓴꓽ ꓗꓪ ꓟꓲ ꓛꓬ ꓮꓸ ꓠꓳ ꓔꓯ ꓟꓬꓽ ꓠꓬꓲ ꓔꓶ ꓔꓬ ꓟ ꓥ ꓡꓳ= ꓟꓬ-ꓟ ꓗꓴꓷꓼ ꓗꓪ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓔꓶꓺˍ ꓟ ꓔꓶꓺ ꓙꓵꓹ ꓟꓽ ꓫꓱꓸ ꓡꓯ ꓘꓳ= ꓕꓲ ꓐꓱ ꓠꓬ ꓥꓪꓽ ꓦ ꓓꓵꓽ ꓡˍ ꓟ ꓗꓪ ꓐꓰ ꓛꓳꓼ ꓦ ꓬꓲ ꓪꓴꓸ ꓕꓲ ꓠꓽ ꓘꓴꓽ ꓗꓪ ꓔꓶꓺ ꓢꓲ ꓠꓬꓲ ꓕꓲ ꓐꓱ ꓠꓬ 9 ꓦ ꓬꓲꓸ ꓪꓴꓸ ꓕꓲ ꓠꓽ ꓗꓪ ꓐꓰ ꓛꓲꓺ ꓦ ꓬꓲ ꓪꓴꓸ ꓕꓲ ꓠꓽ ꓗꓪ ꓘꓴꓽ ꓗꓪ ꓔꓶˍ ꓟ ꓥ ꓡꓳ= ꓝꓮꓲ ꓕꓲ ꓐꓱ ꓠꓬ 10 ꓦ ꓗꓪ ꓐꓰ 11 ꓦ ꓬꓲ ꓪꓴꓸ ꓕꓲ ꓠꓽ ꓘꓴꓽ ꓗꓪ꓾ ꓝꓮꓲ ꓠꓬ 11 ꓦ ꓗꓪ ꓐꓰ 12 ꓦ ꓢꓺ ꓠꓽ ꓕꓲ ꓠꓽ ꓘꓴꓽ ꓗꓪ ꓛꓲꓺ ꓔꓶꓺ ꓔꓬ ꓟ ꓥ ꓡꓳ= ꓗꓴꓷꓼ ꓘꓴꓽ ꓗꓪ ꓔꓶˍ ꓟ ꓟꓲ ꓛꓬ ꓮꓸ ꓠꓳ ꓠꓬ 14 ꓙꓰꓽ ꓙꓳˍ ꓡꓳ ꓐꓰ ꓢꓷꓸ ꓪˍ ꓡꓳ=

ꓬꓲ ꓟꓲ ꓔꓯ ꓘꓪꓺˍ ꓕꓯ ꓮ ꓠꓯꓸ ꓠꓯꓸ ꓐꓰ ꓘꓪ ꓗꓷ ꓢꓲ ꓠꓬꓲ ꓬꓲ ꓟꓲ ꓗꓪ ꓟ ꓠꓱꓸ ꓦꓱꓽ ꓔꓯ ꓮ ꓘꓶꓸ ꓧꓶꓽ ꓡꓰ ꓠ ꓬꓰ ꓗꓷ ꓢꓲ ꓬꓲ ꓟꓲꓺ ꓔꓰꓹ ꓡꓰ ꓠ ꓟ ꓕꓱꓻ (ꓥ ꓠꓬ) ꓢꓲꓹ ꓑ ꓕꓱꓻ ꓐꓰ ꓬꓲ ꓟꓲꓺ ꓕꓯꓽ ꓢꓲ ꓗꓪ ꓲꓼ ꓖꓶ ꓠ ꓔ ꓥ= ꓕꓱ ꓡꓱ ꓬꓰˍ ꓟ ꓠꓬ ꓬꓲ ꓟꓲ ꓮ ꓘꓶꓸ ꓟꓽ ꓙꓴꓺ ꓡꓰ ꓠ ꓗꓽ ꓔ ꓐ ꓡˍ ꓟ ꓥ ꓢꓲ ꓬꓲ ꓪꓰꓻ ꓪꓰˍ ꓗꓪ ꓛꓲꓺ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓢꓯꓼ ꓔꓯ ꓚꓵꓹ ꓔ ꓐ ꓡˍ ꓟ ꓪꓴꓸ ꓠꓬꓲ ꓬꓲ ꓕꓴꓽ ꓮ ꓟꓬꓹ ꓓꓱꓼ ꓡˍ ꓥꓳ= ꓝꓮꓲ ꓠꓬ ꓬꓲ ꓟꓲ ꓗꓪ ꓟ ꓠꓱꓸ ꓦꓱꓽ ꓔꓯ ꓧꓶꓽ ꓡꓰ ꓠ ꓬꓰ ꓖꓶˍ ꓕꓯ ꓟꓲ ꓛꓬ ꓮ ꓠꓳ ꓜꓲ ꓔꓯ ꓠꓻ ꓮ ꓟꓬꓹ ꓟꓽ ꓙꓳ ꓐꓰ ꓐꓯ ꓔ ꓡꓳ=

ꓬꓲ ꓟꓲꓺ ꓫꓬꓹ ꓖꓶˍ ꓕꓯ ꓬꓲꓻ ꓙꓬ ꓧꓳꓽ ꓓꓴ꓾ ꓟꓶꓽ ꓦ ꓡꓲꓺ ꓟꓬꓽ ꓡꓰ ꓕꓯ ꓬꓲꓻ ꓙꓬ ꓬꓲꓻ ꓓꓳ ꓙꓰ ꓓꓴ ꓬꓲꓻ ꓙꓬ ꓚꓱꓹ ꓫꓬꓹ ꓖꓶ ꓠ ꓔ ꓡꓳ= ꓕꓱ ꓡꓱ ꓬꓰ ꓖꓶˍ ꓟ ꓠꓬ ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡ ꓢ ꓡꓰ ꓝꓲˍ ꓡꓳ= ꓝꓮꓲ ꓬꓲ ꓜꓲ ꓔꓯ ꓞꓼ ꓞꓼ ꓪꓴꓽ ꓡ ꓝꓲ ꓢꓲ ꓬꓲ ꓕꓴꓽ ꓫꓸ ꓕꓯ ꓥˍ ꓟꓲ ꓢ ꓡꓰ ꓝꓲ ꓢꓲ ꓟꓲ ꓛꓬ ꓮꓸ ꓠꓳ ꓬꓲ ꓕꓴꓽ ꓬꓲ ꓟꓲꓺ ꓠꓯꓸꓼ ꓗꓪ ꓮ ꓟꓬꓹ ꓟꓽ ꓤꓰꓻ ꓡꓰ ꓠ ꓬꓰ ꓖꓶˍ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓟ ꓥꓳ=

ꓟꓲ ꓛꓬ ꓮꓸ ꓠꓳ ꓔꓯ ꓠꓬ ꓬꓲꓸ ꓫꓵꓸ ꓗꓪ ꓐꓰ ꓡꓰꓽ ꓔꓶꓺˍ ꓟ ꓥ ꓢꓲ ꓠꓬꓲ ꓟꓽ ꓔꓶ ꓧꓶꓸ ꓕꓯ ꓬꓲ ꓫꓵꓸ ꓬꓲ ꓜꓲ ꓟꓽ ꓐꓵꓼ ꓡꓰ ꓠ ꓬꓲ ꓫꓵꓸ ꓔꓯ ꓟꓽ ꓐꓵꓼ ꓠꓯꓻ ꓞꓲꓼ ꓟꓲꓺ ꓗꓷ ꓢꓲ ꓔꓶ ꓠꓯꓹ ꓟ ꓥ ꓡꓳ= ꓩꓲꓸ ꓛꓲꓻ ꓐꓱ ꓶ ꓠꓬ ꓙꓱꓽ ꓤ ꓛꓲꓽ ꓐꓰ ꓢꓲꓹ ꓒꓬꓽ ꓛꓵꓽ꓾ ꓜꓻ ꓚꓬꓸ ꓖꓴ ꓗꓪ ꓐꓰ ꓓꓳꓻ ꓡˍ ꓟ ꓟꓶ ꓡˍ ꓟ ꓬꓲ ꓛꓵꓽ ꓬꓲ ꓐꓯ ꓐꓴ ꓔꓯˍ ꓟꓲ ꓣꓱꓽ ꓐ ꓡˍ ꓟ ꓥ ꓡꓳ= ꓬꓲ ꓫꓵꓸ ꓔꓶˍ ꓕꓯ ꓬꓲ ꓟꓲꓺ ꓮ ꓠꓯꓸ ꓠꓯꓸ ꓗꓪ ꓕꓽ ꓔꓶꓺ꓾ ꓬꓲ ꓟꓲꓺ ꓕꓯꓽ ꓢꓲ 2” ꓗꓪ ꓛꓲˍ ꓡꓰꓽ ꓔꓶꓺ ꓔ ꓠꓬ ꓮ ꓘꓶꓸ ꓣꓱꓻ ꓡ ꓢˍ ꓟ ꓥꓳ= ꓬꓲ ꓟꓲꓺ ꓗꓪ ꓫꓬꓹ ꓡꓲꓸ ꓖꓶ꓾ ꓘꓪꓺ ꓫꓴ ꓖꓶ ꓠꓲꓹ ꓫꓵˍ ꓠꓬ ꓬꓲ ꓜꓲ ꓣꓳˍ ꓕꓯ ꓡꓰ ꓬꓰ ꓖꓶ ꓠ ꓗˍ ꓟ ꓥ ꓡꓳ= ꓬꓲ ꓪꓰꓻ ꓪꓰ ꓝꓲ ꓕꓯ ꓫꓬꓹ ꓡꓲꓸ ꓖꓶˍ ꓠꓬ ꓬꓲ ꓪꓰꓻ ꓬꓲ ꓡꓯꓼ ꓗꓸ ꓔꓯ ꓕꓲꓺ ꓡꓰˍ ꓟ ꓪꓴꓸ ꓠꓬꓲ ꓬꓲ ꓕꓴꓽ ꓮ ꓟꓬꓹ ꓟꓽ ꓟꓶ ꓗꓷ ꓡꓰˍ ꓥꓳ= ꓬꓲ ꓜꓲ ꓣꓱꓻ ꓡ ꓟ 55 ꓠꓬꓲ ꓐꓰ 75 ꓠꓬꓲ ꓘꓴꓽ ꓗꓪ ꓬꓲꓻ ꓙꓬ ꓧꓳꓽ ꓖꓶ ꓠ ꓗꓹ ꓡꓳ= ꓬꓲ ꓜꓲꓽ ꓪꓴꓽ ꓡ ꓗ ꓠꓯꓸ ꓬꓲ ꓒꓬꓽ ꓧꓪꓼ ꓡ ꓕꓯ ꓠꓬ ꓬꓲ ꓜꓲ ꓚꓵꓹ ꓢꓲ ꓬꓲ ꓕꓴꓽ ꓧꓼ ꓗꓷ ꓢꓲ ꓬꓲ ꓙꓴꓺ ꓡꓱꓸ ꓗꓷ= ꓬꓲ ꓫꓵꓸ ꓫ ꓠꓲꓹ ꓫꓵˍ ꓠꓬ ꓟꓶ ꓛ ꓮ ꓘꓶꓸ ꓟꓽ ꓛ ꓟ꓾ ꓛ ꓗꓴꓸ ꓮ ꓔꓲꓸ ꓙꓳˍ ꓟ ꓗꓪ ꓡꓱꓸ ꓗꓷ ꓢꓲ ꓬꓲ ꓕꓴꓽ ꓔꓯ ꓘꓳꓼ ꓠꓬꓲˍ ꓕꓯ ꓬꓲ ꓢꓯꓼ ꓕꓼˍ ꓟꓶ ꓡ ꓕꓯ ꓠꓬ ꓟꓲꓽ ꓦꓲꓻ ꓓꓵꓽ ꓡꓰ ꓟꓽ ꓓ ꓟ ꓬꓲ ꓕꓴꓽ ꓕꓲ ꓕꓴꓽ ꓗꓪ ꓧꓳꓽ ꓢꓲ ꓫ ꓗꓷ ꓠꓯꓹ ꓡꓳ=