ꓟꓲ ꓠꓯ ꓕꓱ ꓟ ꓔꓯ ꓞꓳ ꓤ ꓡꓰ ꓠꓻ ꓡꓰ ꓝꓲˍ ꓟ ꓑꓶ ꓓꓴ ꓬꓲ ꓚꓲ. ꓛꓬ ꓠꓻ ꓫꓬˍ ꓡꓳ꓾

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓟꓶ ꓬꓲꓻ ꓙꓬ ꓙꓵ_ ꓟ꓾ ꓡꓳꓽ ꓓꓳ ꓧꓳꓹ ꓟ ꓔꓯ ꓡꓳꓸ ꓟꓳ_ ꓡꓳ꓾ ꓟꓶꓽ ꓦ ꓦ ꓟ ꓑꓶ ꓓꓴ ꓟꓲꓽ ꓦꓲꓻ ꓕꓳꓽ ꓥꓳꓽ ꓑꓶ ꓓꓴ ꓕꓱ ꓡꓱ ꓬꓲꓻ ꓙꓬ ꓓꓽ ꓟ ꓙꓵ ꓡ ꓟ ꓔꓯ ꓡꓳꓸ ꓟꓳ_ ꓡꓳ꓾ ꓕꓱ ꓡꓱ ꓬꓲꓻ ꓙꓬ ꓙꓵ ꓡ ꓕꓯ ꓫꓸ ꓙꓵ ꓡꓰ ꓟ ꓠꓬ ꓫꓸ ꓢꓴ ꓟꓶꓽ ꓢꓴ ꓥ ꓡꓳ꓾ ꓕꓱ ꓟ ꓔꓯ ꓣꓳ ꓙ ꓜꓲꓼ ꓠꓬ ꓣꓳ ꓟꓲ ꓠꓯ ꓞꓳ ꓤ ꓠꓬ ꓟꓬ ꓠꓯꓹ ꓟ ꓗꓪ ꓐꓰ ꓢꓲꓹ ꓜꓲ ꓘꓶꓹ ꓠꓬꓲ ꓟꓲ ꓠꓯ ꓚꓴꓸ ꓠꓬꓲ ꓕꓱ ꓡꓱ ꓬꓰ_ ꓟ ꓑꓶ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓕꓱ ꓡꓱ ꓒꓬꓱꓼ ꓡ ꓕꓯ ꓬꓲ ꓟꓶꓽ ꓗꓪ ꓫꓸ ꓙꓵ ꓡꓰ ꓟ ꓠꓬ ꓫꓸ ꓢꓴ ꓟꓷ ꓢꓴ ꓐꓰ ꓟꓲ ꓠꓯ ꓞꓳ ꓤ ꓡꓰ ꓥꓳ ꓐꓯ_ ꓟ ꓣꓳ ꓢꓷꓸ_ ꓡꓳ꓾

ꓠꓬꓲꓸ ꓠꓬꓲ ꓟꓵꓽ ꓘꓳꓼ ꓐꓰ ꓫꓸ ꓕꓱ ꓟ ꓙꓵꓹ ꓗꓪ nature purifying itself ꓐꓯ_ ꓟ ꓔꓯ ꓠ ꓠꓹ ꓠꓬꓲ ꓡꓯ꓾ ꓟꓲ ꓠꓯ ꓕꓱ ꓟ ꓠꓬ ꓞꓳ ꓤ ꓡꓰ ꓬꓰ ꓗꓷ ꓟ ꓞꓳ ꓤ ꓡꓰ ꓠꓻ ꓡꓰ ꓝꓲ_ ꓟ ꓑꓶ ꓓꓴ ꓬꓲ ꓚꓲꓸ ꓛꓬ ꓬꓲ ꓓꓻ ꓡꓰ ꓠꓹ ꓟ ꓐꓱ ꓶ ꓬꓲ ꓚꓲ ꓛꓬ ꓠꓯꓺ ꓞꓲꓼ ꓫꓬꓹ ꓡꓳ ꓐꓯ_ ꓟ ꓥ ꓡꓳ꓾ ꓮ ꓡꓰꓳ ꓐꓯ ꓠꓬ ꓣꓳ ꓟꓬ ꓠꓬꓲ ꓐꓷ ꓠꓬꓲ ꓗꓸ ꓚꓵ ꓢꓯꓼ ꓐ_ ꓟ ꓗꓴꓷꓼ ꓗꓪ ꓟꓬ ꓠꓬꓲ ꓕꓱ ꓡꓱ ꓫꓵ ꓦꓬꓼ ꓠꓬꓲ ꓔꓳꓹ ꓜꓳ_ ꓡꓳ꓾ ꓢꓲꓹ ꓜꓲ ꓬꓲ ꓧꓪꓹ ꓧꓪꓹ ꓘꓶꓹ ꓪꓴ_ ꓟ꓾ ꓫꓵꓺ ꓚꓴꓸ_ ꓟ꓾ ꓕꓱ ꓡꓱ ꓫꓵ ꓟ ꓑꓶ ꓓꓴ ꓟꓲ ꓠꓯ ꓠꓬ ꓮ ꓘꓶꓸ ꓠꓻ ꓓꓴ ꓡꓰ ꓟ ꓥꓳ꓾ ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓣꓳ ꓞꓳ ꓤ ꓗ ꓕ ꓟꓽ ꓐ ꓡ ꓕꓯ ꓟꓲ ꓠꓯ ꓬꓲ ꓔꓱꓹ ꓬꓲ ꓗꓽ ꓕ ꓡꓳ꓾ ꓐꓰ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓟ ꓙꓳ_ ꓡꓳ꓾ ꓮ ꓡꓰꓳ ꓐꓯ ꓠꓬ ꓗꓸ ꓛꓵ ꓕꓱ ꓟ ꓟꓽ ꓙꓳ ꓟ ꓑꓶ ꓓꓴ ꓢꓷꓸ ꓠꓲꓹ ꓙꓳ ꓢꓴ ꓙꓵꓽ ꓪ ꓙꓳ ꓢꓴ ꓠꓬ ꓬꓲ ꓪ ꓮ ꓡꓰ ꓠꓲꓹ ꓫꓵ ꓮ ꓡꓰ ꓟꓲ ꓠꓯ ꓔꓯ ꓓꓵ_ ꓟ ꓥ ꓡꓳ꓾ ꓕꓱ ꓡꓱ ꓬꓰ ꓕꓯ ꓟꓲ ꓠꓯ ꓕꓱ ꓟ ꓠꓬ ꓬꓲ ꓔꓯ ꓠꓻ ꓡꓰ ꓝꓲ_ ꓕꓯ ꓬꓲ ꓚꓲ ꓛꓬ ꓬꓲ ꓢꓲ ꓫꓬꓹ ꓡꓳ꓾ ꓟꓶꓽ ꓦ ꓜꓯꓼ ꓟ ꓗꓪ ꓐꓰ ꓥ ꓟꓲ ꓡꓳꓽ ꓓꓳ ꓧꓳꓹ ꓟ ꓗꓪ ꓐꓰ ꓥ ꓟꓲ ꓬꓲ ꓚꓲ ꓛꓬ ꓬꓰ_ ꓡꓳ꓾

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓹ ꓟ ꓟꓲ ꓠꓯ ꓐꓰ ꓣꓳ ꓐꓯ ꓕꓯ ꓬꓲ ꓠꓬ ꓚꓵ ꓚꓵ ꓢꓯꓼ ꓟꓬ ꓙꓳ_ ꓡꓳ꓾ꓐꓯ ꓟ ꓣꓳ ꓢꓷꓸ ꓠ ꓗꓹ ꓡꓳ꓾ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓟꓲ ꓠꓯ ꓔꓯ ꓗꓪ ꓫꓵ ꓠꓹ ꓟ ꓐꓱ ꓶ ꓠꓬꓲ ꓡꓳꓸ ꓠꓹ ꓟ ꓐꓱ ꓶ ꓶꓻ ꓖꓶ ꓔ ꓟ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓠꓴ ꓥꓪ ꓠꓬ ꓮ ꓡꓰ ꓐꓰ ꓟꓲ ꓠꓯ ꓕꓱ ꓟ ꓔꓯ ꓗꓪ ꓫꓵ ꓠꓹ ꓟ ꓐꓱ ꓶ ꓶꓻ ꓙꓳ_ ꓟ ꓐꓯ_ ꓟ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ=

Add new comment

4 + 5 =