ꓟꓲ ꓠꓯ ꓕꓱ ꓟ ꓔꓯ ꓫꓱ. ꓤ ꓗꓴ. ꓠꓹ ꓟ꓾ ꓠꓵꓻ ꓠꓲꓹ ꓡꓰ ꓣꓱ: ꓗꓴ. ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓡꓰ ꓟ. ꓖꓶ ꓔꓬ ꓡꓳ꓾

ꓕꓲ ꓧꓪꓹ ꓙꓳ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓟꓸ ꓟꓲ ꓚꓺ ꓪꓴꓸ ꓔꓴ ꓕꓯ ꓟꓴ ꓗꓪ ꓟꓴ ꓪꓴ ꓗꓪ ꓠꓬꓹ ꓤ ꓐꓴ ꓐꓱ ꓣ ꓔꓬ ꓟ ꓔꓯ ꓬꓲ ꓟꓳ_ ꓡꓳ= ꓕꓱ ꓡꓱ ꓬꓲ ꓟꓳ ꓕꓯ ꓟꓴ ꓪꓴ ꓤ ꓠꓬꓹ ꓤ ꓔꓯ ꓡꓳꓸ ꓠꓬꓲ ꓬꓲ ꓪ ꓠꓬ ꓜ ꓟꓲ ꓟꓽ ꓫꓵꓸ꓾ ꓜ ꓟꓲ ꓟꓽ ꓶꓼ꓾ ꓜ ꓒꓱ ꓗꓪ ꓥ ꓟꓲ ꓜ ꓟꓽ ꓫꓺ꓾ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓔꓯ ꓠꓬ ꓟꓴ ꓗꓪ ꓗꓪ ꓠꓴ ꓪ ꓐꓹ ꓐ ꓡꓰ ꓬꓲ ꓪ ꓐꓴ ꓔꓯ ꓖꓶ ꓜ ꓖꓶ ꓓꓳ ꓡꓳ ꓐꓰ ꓢꓲ ꓒ ꓬꓰ-ꓢꓴ ꓟꓸ ꓖꓶ_ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓞꓳ ꓤ ꓔꓯ ꓡꓰ ꓟꓽ ꓞꓲ ꓠꓬꓹ ꓫꓵ ꓠꓬꓹ ꓙꓰ꓾ ꓙꓱ ꓤ ꓙꓱ ꓟꓲ꓾ ꓢꓲꓹ ꓜꓲ ꓢꓲꓹ ꓟꓲ ꓔꓯ ꓥ ꓟꓲ ꓠꓲꓹ ꓠꓵ_ ꓡꓳ ꓐꓯ_ ꓟ ꓣꓳ ꓡꓳꓸ ꓟꓳ_ ꓡꓳ= ꓝꓮꓲ ꓬꓲ ꓡꓰ ꓕꓱ ꓡꓱ ꓙ ꓖꓴ ꓫꓱꓽ ꓔꓬ ꓕꓯ ꓮ ꓘꓶꓸ ꓐꓲ_ ꓟ ꓓꓰ ꓟꓲ꓾ ꓐꓵꓸ ꓫꓴꓸ ꓟꓲ ꓔꓯ ꓬꓲ ꓟꓳ ꓕꓯ ꓜ ꓫꓺ ꓓꓴ ꓠꓬ ꓮ ꓟꓬꓹ ꓙꓳ_ ꓡꓳ= ꓖꓳ ꓡꓱ ꓠꓬꓲ ꓟꓴ ꓗꓪ ꓗꓪ ꓟ ꓐꓹ ꓐ ꓐꓱ ꓢꓲ ꓒꓽ ꓔꓯ ꓟꓬꓱꓽ ꓬꓰ ꓢꓴ ꓝꓲ ꓩꓴ ꓡ ꓠꓹ ꓟ ꓐꓱ ꓶ ꓪꓽ ꓘꓳꓹ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓟꓸ ꓘꓶꓽ ꓗꓳ_ ꓡꓳ= ꓕꓲ ꓚꓱꓹ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓕꓲ ꓘꓹ ꓐꓰ ꓕꓲ ꓘꓹ ꓟꓸ ꓟꓲꓽ ꓟꓸ ꓪꓴꓸ ꓔꓴ ꓬꓰ ꓕꓯ ꓙ ꓖꓴ ꓙ ꓐ ꓗꓪ ꓟꓳ_ ꓟ ꓠꓬꓹ ꓤ ꓐꓴ ꓙꓱ ꓤ ꓐꓴ ꓢꓲꓹ ꓜꓲ ꓢꓲꓹ ꓟꓰ ꓔꓯ ꓡꓳꓸ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓟꓸ ꓖꓶ_ ꓡꓳ=

ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓙꓳ_ ꓟ ꓢꓯꓸ ꓫꓵ ꓢꓯꓸ ꓙꓰ ꓮ ꓙꓵ ꓠꓬ ꓞꓳ ꓤ ꓐꓱ ꓶ ꓚꓰꓼ ꓔ ꓖꓶ_ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓠꓲꓹ ꓡꓱ ꓠꓹ ꓟ ꓢꓲ ꓒ ꓬꓰ-ꓢꓴ ꓬꓲ ꓚꓲ ꓛꓬ ꓬꓲ ꓟꓷꓼ ꓠꓷꓹ ꓗꓪ ꓐꓰ ꓟꓴ ꓪꓴ ꓗꓪ ꓟ ꓬꓲ ꓠꓬꓹ ꓤ ꓔꓯ ꓡꓳꓸ ꓠꓬꓲ ꓐꓰ ꓐꓯ ꓗꓷ ꓟ ꓢꓲ ꓒ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓠꓴ ꓥꓪ ꓔꓯ ꓟꓲ ꓠꓯ ꓕꓱ ꓟ ꓔꓯ ꓫꓱꓸ ꓤ ꓠꓲꓹ ꓡꓰ ꓡꓳꓸ ꓠꓬꓲ ꓗꓴꓸ ꓠꓹ ꓟ꓾ ꓠꓵ ꓠꓲꓹ ꓡꓰ ꓟꓲ ꓠꓯ ꓕꓱ ꓟ ꓔꓯ ꓣꓱꓽ ꓗꓴꓸ ꓠꓹ ꓟ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ= ꓝꓮꓲ ꓕꓲ ꓫꓵ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓮ ꓘꓶꓸ ꓟꓬ ꓠꓯꓸ ꓟ ꓟꓽ ꓙꓳ ꓠꓹ ꓟ꓾ ꓚꓲꓸ ꓛꓬ ꓦꓲꓻ ꓘꓴ ꓐꓱ ꓶ ꓚꓲꓸ ꓛꓬ ꓕꓲ ꓣꓳ ꓐꓱ ꓶ ꓡꓰ ꓓꓵꓽ ꓙ ꓢꓲ ꓠꓬꓲ ꓮ ꓫꓵ ꓔꓯ ꓥ ꓟꓲ ꓜꓲ ꓜꓲ ꓑꓲꓹ ꓑꓲꓹ ꓟꓽ ꓬꓰ ꓠꓹ ꓟ ꓢꓲ ꓒ ꓬꓰ-ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓐꓬ ꓡꓰ ꓔꓬ ꓟ ꓠꓬ ꓣꓳ ꓬꓲ ꓑꓶꓸ ꓟꓽ ꓙꓳ ꓙꓳ ꓟꓬ ꓠꓯꓹ ꓟ ꓑꓶ ꓓꓴ ꓥ ꓡꓳ= ꓟꓴ ꓗꓪ ꓗꓪ ꓟ ꓠꓬꓹ ꓤ ꓔꓯ ꓡꓰ ꓖꓶ ꓜ ꓖꓶ ꓓꓳ ꓟ ꓪꓴ-ꓢ ꓠꓬ ꓣꓳ ꓮ ꓙꓵ ꓔꓯ ꓣꓱꓽ ꓡꓳꓼ ꓗꓪ ꓛꓲ ꓬꓲꓸ ꓖꓶ_ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓗꓪ ꓣꓳ ꓙꓰ ꓚꓱꓹ ꓕꓲ ꓕꓳꓼ ꓡꓲ ꓕꓲ ꓕꓳꓼ ꓬꓲ ꓚꓱꓹ ꓙꓳ ꓙꓳ ꓡꓰ ꓕꓳꓼ ꓗꓴꓸ ꓠꓹ ꓟ ꓣꓳ ꓬꓰ ꓟ ꓮ ꓙꓵ ꓗꓪ ꓣꓳ ꓬꓰ_ ꓟ ꓥ ꓕ ꓑꓳꓸ ꓗꓪ ꓟꓸ ꓟ ꓟꓲ ꓟꓯ ꓔꓯ ꓠ ꓡꓰ ꓝꓲ_ ꓟ ꓠꓬꓲꓸ ꓡꓰ ꓕ ꓑꓳꓸ ꓠꓬꓲꓸ ꓐ ꓡ ꓠꓹ ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ=