ꓟꓲ ꓠꓯ ꓞꓻ ꓡ꓾ ꓡꓱ ꓡ ꓟ ꓑꓶꓸ ꓓꓴ ꓬꓲꓻ ꓡꓴꓽ ꓐꓱ ꓗꓪ ꓬꓲꓻ ꓙꓬ ꓟꓴꓺ ꓓꓯ ꓡ ꓟ

ꓟꓲ ꓠꓯ ꓞꓻ ꓡˍ ꓟ꓾ ꓡꓱ ꓡˍ ꓟ ꓑꓶꓸ ꓓꓴ ꓟꓲ ꓠꓯ ꓗꓪ ꓫꓵꓽ ꓪꓴ ꓓꓽ ꓟ ꓓꓳ ꓡˍ ꓟ꓾ ꓖꓳ ꓟ ꓡꓰꓽ ꓟꓽ ꓞꓲꓺ ꓕꓲ ꓞꓲꓼ ꓕꓲ ꓟꓳꓽ ꓙꓳˍ ꓟ ꓪꓽ ꓐꓴ ꓥˍ ꓟꓲ ꓙꓲꓺ ꓡꓰ ꓢꓲ ꓠꓬꓲ꓾ ꓬꓲꓻ ꓡꓴꓽ ꓐꓱ ꓗꓪ ꓬꓲꓻ ꓙꓬ ꓟꓬꓽ ꓡ ꓙꓵꓽ ꓡ ꓢꓲ ꓠꓬꓲ꓾ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓔꓬꓹ ꓟ ꓞꓳ ꓤ ꓮ ꓟꓬꓹ ꓠꓬ ꓚꓵꓸ ꓠ ꓗꓷ ꓡꓰ꓾ ꓛꓰꓹ ꓙꓰ ꓠ ꓗꓷ ꓡꓰˍ ꓟ ꓚꓱꓹ ꓔꓯ ꓟꓳꓸ ꓡꓳꓹ ꓬꓰ ꓟ ꓙꓵꓹ ꓗꓪ ꓐꓯ ꓟꓸ ꓖꓶ ꓓꓳꓻ ꓡꓰꓳ=

ꓠꓬꓲꓸ ꓠꓬꓲ ꓟꓲ ꓠꓯ ꓞꓻ ꓡ꓾ ꓡꓱ ꓡˍ ꓟ ꓪꓴꓸ ꓠꓬꓲ ꓬꓲꓻ ꓡꓴꓽ ꓐꓱ ꓗꓪ ꓟ ꓬꓲꓻ ꓙꓬ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓴ ꓡˍ ꓟ ꓥ ꓪ= ꓕꓱ ꓡꓱ ꓟꓴ ꓡˍ ꓟ ꓠꓬ ꓕꓲ ꓞꓲꓼ ꓕꓲ ꓟꓳꓽ ꓟꓽ ꓙꓲꓺ ꓙꓳˍ ꓟ ꓪꓽ ꓐꓴ ꓠꓬ ꓙꓲꓺ ꓡꓰ ꓢꓲ ꓬꓲꓻ ꓙꓬ ꓠꓬ ꓟꓴ ꓡˍ ꓟ ꓑꓶꓸ ꓓꓴ ꓥ ꓡꓳ= ꓕꓱ ꓡꓱ ꓬꓲꓻ ꓙꓬ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓵꓽ ꓡ꓾ ꓟꓴ ꓡˍ ꓟ ꓪꓴꓸ ꓠꓬꓲ ꓬꓲꓻ ꓡꓴꓽ ꓐꓱ ꓗꓪ ꓟ ꓬꓲꓻ ꓡꓯꓼ ꓟꓰꓽ ꓬꓲꓻ ꓒ ꓐꓴ ꓠꓬ ꓭꓸ ꓒꓲꓼ ꓠꓯꓸ ꓘꓴ ꓗꓪ ꓓꓶꓽˍ ꓟ ꓕꓱ ꓡꓱ ꓗꓷ ꓡˍ ꓡꓳ=

ꓕꓱ ꓡꓰ ꓭꓸ ꓔꓯ ꓓꓶꓽˍ ꓕꓯ ꓭꓸ ꓕꓲ ꓟ ꓡꓱꓸꓼ ꓠꓬ ꓡꓵꓺ ꓡˍ ꓗꓪ ꓛꓲ ꓓꓶꓽ ꓐ ꓡˍ ꓡꓳ= Saint Patrick College ꓐꓯˍ ꓟ ꓢꓳ ꓦꓲꓻ ꓗꓪ ꓚꓳꓸ ꓟꓸ ꓒ ꓓꓽ Doctor John ꓡꓰ ꓐꓯˍ ꓟ ꓠꓬ꓾ ꓟꓲ ꓠꓯ ꓞꓻ ꓡ ꓡꓱ ꓡˍ ꓟ ꓪꓴꓸ ꓠꓬꓲ ꓔ-ꓐ-ꓡꓲ ꓐꓯˍ ꓟ ꓕꓲ ꓘꓴ ꓗꓪ ꓢꓴꓠꓠꓬ ꓟꓳꓴꓠꓔ ꓕꓲ ꓔꓶꓸ ꓗꓪ ꓬꓲꓻ ꓙꓬ ꓙꓵꓽ ꓡˍ ꓟ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓒꓬꓱꓼ ꓡˍ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓡˍ ꓟ ꓥ ꓪ꓾ ꓐꓰ ꓕꓱ ꓡꓰ ꓐꓯˍ ꓡꓳ=

ꓟꓲ ꓠꓯ ꓞꓻ ꓡ ꓡꓱ ꓡˍ ꓟ ꓠꓬ ꓟꓵꓽ ꓘꓳꓼ ꓔꓯ ꓥˍ ꓟꓲ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓒꓳꓹ ꓙꓰˍ ꓟ꓾ ꓧꓶꓸ ꓕꓯ ꓡꓰ ꓐꓰ ꓟꓽ ꓥ= ꓮ ꓟꓶ ꓠꓬ ꓬꓲꓸ ꓙꓵꓹ ꓑ ꓡꓰˍ ꓟ ꓥˍ ꓟꓲ ꓒꓬꓱꓼ ꓡˍ ꓡꓳ=

1990 ꓘꓳꓼ ꓕꓯ ꓟꓲ ꓠꓯ ꓗꓪ ꓟꓽ ꓓ ꓪꓴꓽ ꓖꓴ ꓡꓰˍ ꓟ ꓢꓯꓼ ꓟꓬ ꓐꓱ ꓶ ꓮ-ꓟꓸ-ꓘꓽˍ ꓟ꓾ ꓢꓯꓼ ꓟꓬ ꓐꓱ ꓶ ꓒꓴꓻ ꓛꓬꓹ ꓢꓲ ꓬꓰˍ ꓟ ꓗꓳ-ꓑ-ꓠꓲ꓾ ꓕꓱ ꓡꓱ ꓢꓯꓼ ꓟꓬ ꓐꓱ ꓶ ꓒꓴꓻ ꓛꓬꓹ ꓢꓲ ꓬꓰˍ ꓟ ꓗꓳ-ꓑ-ꓠꓲ ꓐꓯ ꓟ ꓮ ꓡꓰ ꓫꓵꓽ ꓥˍ ꓐꓯ ꓠꓬ꓾ ꓠꓻ ꓓꓴ ꓒꓬꓽ ꓓꓴ ꓔꓳꓹ ꓜꓳꓽ ꓡˍ ꓕꓯ ꓠꓯꓻ ꓞꓲꓼ ꓫꓬꓹ ꓖꓶ ꓠꓹ ꓟ꓾ ꓞꓳ ꓤꓲ ꓕꓲ ꓫꓵꓽ ꓕꓲ ꓫꓵꓽ ꓪꓴꓸ ꓠꓬꓲ ꓢꓰꓼˍ ꓕꓯ ꓥˍ ꓟꓲ ꓬꓲ ꓪ ꓕꓲ ꓦꓲ ꓢꓴ ꓔꓯ ꓒꓴꓻ ꓚꓱꓹ ꓖꓶ ꓠꓹ ꓟ ꓕꓱ ꓡꓱ ꓫꓵꓽ ꓔꓯ ꓐꓯˍ ꓟ ꓥ ꓪ =

ꓗꓳ-ꓑ-ꓠꓲ ꓕꓱ ꓟ ꓡꓰ ꓐꓳ ꓔ ꓟ ꓕꓳꓽ ꓶ ꓗꓪ ꓠꓬ ꓕꓱ ꓟ ꓢꓯꓼ ꓟꓬ ꓐꓱ ꓶ ꓮ-ꓟꓸ-ꓘꓽ ꓐꓱ ꓶ ꓠꓬ ꓟꓲ ꓠꓯ ꓞꓻ ꓡ ꓡꓱ ꓡ ꓟ ꓪꓴꓸ ꓠꓬꓲ ꓧꓶꓸ ꓕꓯ ꓡꓰ ꓐꓰ ꓟꓽ ꓗꓹ꓾ ꓒꓳꓹ ꓡꓰˍ ꓟ ꓙꓳˍ ꓡꓳ꓾ ꓐꓰ ꓕꓱ ꓡꓰ ꓐꓯˍ ꓡꓳ= ꓬꓲꓻ ꓙꓬ ꓠꓬ ꓛꓲꓺ ꓡˍ ꓟ ꓬꓲ ꓞꓲꓺ ꓘꓳꓼ ꓕꓯ °ꓚ ꓕꓲ ꓐꓶꓽ ꓗꓪ ꓐꓰ 1°ꓚ ꓗꓪ ꓛꓲꓺ ꓡꓱ ꓡ ꓢꓲ ꓠꓬꓲ ꓧꓴꓣꓣꓲꓚꓮꓠꓰ ꓐꓯˍ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓟ ꓕꓲ ꓟ ꓒꓬꓱꓼ ꓡ ꓓꓴ ꓥꓳ= ꓖꓳ ꓟꓲꓽ ꓦꓲ ꓕꓳꓽ ꓥꓳꓽ ꓓꓽ ꓟ ꓙꓱꓼˍ ꓟ ꓕꓱ ꓟ ꓠꓬ ꓬꓲ ꓫꓵꓽ ꓠꓽ ꓙꓱꓼˍ ꓟ ꓒꓬꓱꓼ ꓡ ꓢꓲ ꓠꓬꓲ꓾ ꓖꓳ ꓟ ꓙꓱꓼˍ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓓꓶꓽ ꓢꓯꓼ ꓪꓴꓸ ꓠꓬꓲ ꓟꓲ ꓠꓯ ꓠꓬ ꓓꓵꓺ ꓡ ꓢꓲ ꓧꓴꓣꓣꓲꓚꓮꓠꓰ ꓐꓯˍ ꓟ ꓟꓲꓽ ꓦꓲ ꓓꓽ ꓟ ꓝꓮꓲ ꓬꓲ ꓐꓷꓹ ꓕꓲ ꓟ ꓓꓳꓻ ꓡ ꓓꓴ ꓥꓳ꓾ ꓐꓰ ꓕꓰ ꓡꓰ ꓐꓯˍ ꓡꓳ=

 ꓧꓴꓣꓣꓲꓚꓮꓠꓰ ꓐꓯˍ ꓟ ꓟꓲꓽ ꓦꓲ ꓓꓽ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓟ ꓒꓬꓱꓼ ꓡˍ ꓟ ꓠꓬ ꓟꓲ ꓠꓯ ꓗꓪ ꓕꓱ ꓡꓱ ꓢꓯꓼ ꓟꓬ ꓔꓯ ꓮ-ꓟꓸ-ꓘꓽ ꓖꓶˍ ꓟ ꓕꓱ ꓟ ꓠꓬ ꓙꓽ ꓫꓸ ꓓꓴ ꓓꓽ ꓟ ꓒꓬꓱꓼ ꓡꓺꓳ= ꓮ ꓡꓲꓳ ꓐꓯˍ ꓠꓬ ꓢꓯꓼ ꓟꓬ ꓔꓯ ꓮ-ꓟꓸ-ꓘꓽ ꓖꓶˍ ꓟ ꓪꓴꓸ ꓠꓬꓲ ꓫꓵꓻ ꓢꓴ ꓮ ꓟꓬꓹ ꓓꓳꓻ ꓡ ꓓꓴ ꓥꓳ꓾ ꓐꓰ ꓓꓵꓽ ꓙꓽˍ ꓟ ꓪꓴꓸ ꓠꓬꓲ ꓬꓲ ꓪ ꓮ-ꓟꓸ-ꓘꓽ ꓖꓶˍ ꓟ ꓠꓬ ꓛꓳꓸ ꓡꓰ ꓡ ꓓꓴ ꓥꓳ ꓐꓰ ꓕꓰ ꓡꓰ ꓓꓵꓽ ꓙˍ ꓡꓳ=

ꓡꓳꓹ ꓬꓰ ꓟ 200 ꓘꓳꓼ ꓬꓲꓸ ꓘꓴꓽ ꓗꓪ ꓮꓟꓰꓣꓲꓚꓮ ꓘꓴꓽ ꓗꓪ ꓙꓱꓼ ꓡˍ ꓟ ꓟꓲꓽ ꓦꓲ ꓓꓽ ꓠꓬ ꓟꓲ ꓠꓯ ꓗꓪ ꓟꓽ ꓓ ꓪꓴꓽ ꓖꓴ ꓡꓰˍ ꓟ꓾ ꓐꓬ ꓡꓰ ꓝꓲˍ ꓟ ꓕꓲ ꓟ ꓥ ꓪ꓾ ꓐꓰ ꓕꓰ ꓡꓰ ꓐꓯˍ ꓡꓳ= ꓟꓲ ꓠꓯ ꓞꓻ ꓡ ꓡꓱ ꓡ ꓢꓲ ꓒꓬꓱꓼ ꓡˍ ꓟ ꓫꓵꓽ ꓪꓴ ꓓꓽ ꓟ ꓠꓬ ꓟꓶꓽ ꓦ ꓦˍ ꓟ ꓥˍ ꓟꓲ꓾ ꓧꓶꓸ ꓕꓯ ꓟꓶꓽ ꓦ ꓦˍ ꓟ ꓡꓰ ꓐꓰ ꓟꓽ ꓥ꓾ ꓟꓽ ꓫꓱꓸ ꓡꓯ ꓘꓳꓹ ꓟ ꓕꓱ ꓡꓱ ꓒꓬꓱꓼ ꓡˍ ꓡꓳ ꓐꓰ ꓢꓷꓸ ꓠꓲꓹ ꓙꓳ ꓒ ꓐꓴ ꓡꓰ ꓕꓰ ꓡꓰ ꓐꓯˍ ꓡꓳ=

ꓕꓱ ꓡꓰ ꓟꓶꓽ ꓦ ꓦˍ ꓟ ꓧꓶꓸ ꓕꓯ ꓡꓰ ꓐꓰ ꓟꓽ ꓗꓷ ꓡꓰ꓾ ꓒꓳꓹ ꓡꓶꓸ ꓡꓰˍ ꓕꓯ ꓠꓬ ꓜꓽ ꓪꓳꓽ ꓡꓳ ꓪꓳꓽ ꓐꓱ ꓶ ꓥˍ ꓟꓲ ꓙꓽ ꓫꓸ ꓓꓴ꓾ ꓜꓽ ꓪꓳꓽ ꓡꓳ ꓪꓳꓽ ꓔꓶ ꓫꓵꓽ ꓔꓶ ꓙꓰꓽ ꓔꓯ ꓐꓬ ꓡꓰ ꓝꓲˍ ꓟ ꓒꓬꓱꓼ ꓡ ꓓꓴ ꓥꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓟꓲ ꓠꓯ ꓕꓱ ꓟ ꓕꓯꓽ ꓢꓲ ꓗꓪ ꓜꓽ ꓪꓳꓽ ꓡꓳ ꓪꓳꓽ ꓮ ꓟꓬꓹ ꓓꓳ ꓡˍ ꓟ ꓖꓴ ꓪꓴꓸ ꓮꓟꓰꓣꓲꓚꓮ ꓗꓪ ꓟ꓾ ꓟꓰꓣꓲ ꓐꓯˍ ꓟ ꓟꓵꓽ ꓗꓪ ꓠꓬ ꓟꓶ ꓞꓻ ꓮ ꓟꓬꓹ ꓞꓻ ꓡ ꓢꓲ ꓠꓬꓲ ꓢꓲꓹ ꓜꓲ ꓡꓳ ꓜꓲ ꓥˍ ꓟꓲ ꓐꓬ ꓡꓰ꓾ ꓠꓱꓸ ꓦꓱꓽ ꓥˍ ꓟꓲ ꓙꓴꓺ ꓡꓰ ꓢꓲ ꓬꓲꓻ ꓙꓬ ꓟꓽ ꓪ ꓟ ꓕꓰ ꓡꓰ ꓗꓷ ꓡꓰ ꓡ ꓓꓴ ꓥꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓔꓱꓹ ꓫꓵ ꓔꓶꓸ ꓗꓪ ꓔꓶꓺ ꓫꓵꓽ ꓔꓶꓺ ꓙꓰꓽ ꓔꓶꓺ ꓜꓽ ꓟꓽ ꓙꓲꓻˍ ꓟ꓾ ꓧꓶꓽ ꓚꓲꓺ ꓟꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓽ ꓡ ꓓꓴ ꓥꓳ꓾ ꓢꓷꓸ ꓠꓲꓹ ꓙꓳ ꓒ ꓐꓴ ꓡꓰ ꓕꓱ ꓡꓱ ꓐꓯˍ ꓡꓳ=