ꓟꓲ ꓠꓯ ꓞ ꓡˍ ꓟ ꓡꓱ ꓡˍ ꓟ (1) Environment

ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓡꓳꓹ ꓬꓰ ꓟ ꓙꓵꓹ ꓧꓶꓸ ꓕꓯꓽ ꓙꓵꓹ ꓕꓯꓽ ꓢꓲ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓞ ꓡˍ ꓡꓳ= ꓖꓳ ꓟ ꓠꓬ ꓣꓳꓽ ꓟꓲ ꓠꓯ ꓞꓳ ꓤꓽ ꓐꓱ ꓶ ꓙꓳ ꓠꓬꓲ ꓔ ꓟ ꓕꓲꓽ ꓫꓵꓽ ꓥ ꓢꓲ ꓖꓳ ꓡꓰ ꓟꓲ ꓠꓯ ꓞ ꓡꓰ ꓝꓲˍ ꓟ ꓗꓪ ꓐꓰ ꓡꓲꓹ ꓙꓲ ꓐ ꓡ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓠꓬ ꓟꓬꓱꓽ ꓓꓽ ꓕꓲꓽ ꓟ ꓒꓬꓱꓼ ꓡˍ ꓟ ꓥ ꓪ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓞꓳ ꓐꓳ ꓢꓲꓽ ꓕꓯꓸ ꓥˍ ꓟꓲ ꓫꓸ ꓢꓴ ꓟꓶꓽ ꓢꓴ ꓥˍ ꓟꓲ ꓖꓡꓳꓐꓮꓡ ꓪꓮꓣꓟꓲꓠꓖ ꓐꓯˍ ꓟ ꓟꓲ ꓠꓯ ꓕꓲꓽ ꓡꓰ ꓕꓲꓽ ꓠꓬꓲ ꓬꓲ ꓐꓶꓹ ꓞ ꓡˍ ꓟ ꓚꓱꓹ ꓔꓯ ꓟꓳꓸ ꓠꓲꓹꓟ ꓫꓸ ꓢꓴ ꓠꓲꓹ ꓟ ꓟꓽ ꓢ ꓢꓴ ꓠꓬ ꓟꓽ ꓙꓳꓹ ꓐꓯ ꓓˍ ꓟ ꓥ ꓪ=

ꓕꓲꓽ ꓦꓲ ꓡꓰ ꓕꓲꓽ ꓦꓲ ꓕꓲꓽ ꓦꓲ ꓡꓽ ꓞꓳ ꓐꓴ ꓠꓬ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓚꓵꓸ ꓚꓬ ꓬꓰ ꓜꓼ ꓠꓬꓲ ꓔ ꓟ ꓟꓬꓱꓽ ꓖꓳ ꓟ ꓡꓰ ꓟꓽ ꓞꓲ ꓚꓵꓸ ꓛꓬꓽ ꓕꓲꓽ ꓦꓲꓡꓽ ꓞꓳ ꓔꓳꓹ ꓜꓳˍ ꓟ ꓥ ꓕ ꓑꓳꓸ ꓫꓵꓽ ꓪꓴ ꓥ ꓕ ꓑꓳꓸ ꓕꓱ ꓟ ꓔꓯ ꓟꓬꓽ ꓠꓬꓲ ꓓꓵꓽ ꓙꓽ ꓔꓬˍ ꓟ ꓪꓴꓸ ꓠꓬꓲ ꓕꓱ ꓡꓲꓳ ꓫꓵꓽ ꓟꓲ ꓠꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓞ ꓡˍ ꓟ ꓔꓯ ꓠꓬ ꓮꓸ ꓫꓵꓽ ꓥˍ ꓟꓲ ꓟꓽ ꓙꓽ ꓫꓸ ꓔꓬˍ ꓟ ꓥ ꓪ=

ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓬꓲꓸ ꓠꓬꓲ ꓟꓲ ꓠꓯ ꓞꓳ ꓤꓽ ꓐꓴ ꓙꓽ ꓫꓸ ꓔ ꓟ ꓠꓬ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓣꓱꓽ ꓠꓬꓲ ꓔ ꓟ ꓒꓴ ꓠꓬ ꓟꓬꓽ ꓠꓬꓲ ꓣꓱꓽ ꓠ ꓟꓬꓽ ꓡ ꓐꓶꓹ ꓡˍ ꓟ ꓪꓴꓸ ꓠꓬꓲ ꓒꓴ ꓔꓯ ꓮ ꓡꓰ ꓢꓲ ꓣꓱꓽ ꓓꓴ ꓥˍ ꓡꓽ ꓐꓰ ꓕꓱ ꓫꓵꓽ ꓔꓯ ꓢꓲ ꓓꓵꓽ ꓙꓽ ꓔꓬ ꓟ ꓡꓰ ꓟꓽ ꓞꓲ ꓦꓲ ꓥꓪꓸ ꓒꓵꓽ ꓬꓲ ꓐꓶꓹ ꓟꓬꓽ ꓡˍ ꓟ꓾ ꓢꓷꓸ ꓠꓲꓹ ꓢꓳ ꓒꓵꓽ ꓬꓲ ꓐꓶꓹ ꓟꓬꓽ ꓡˍ ꓟ꓾ ꓧꓪꓸ ꓧꓪꓹ ꓔꓬ ꓟꓶ ꓠꓹ ꓟ ꓠ ꓓꓴ ꓒꓬꓽ ꓓꓴ ꓒꓬꓽ ꓓꓴ ꓔꓯ ꓠ ꓫꓬ ꓒꓬꓽ ꓫꓬ ꓠꓹ ꓟ ꓒꓴ ꓤꓼ ꓫꓵꓽ ꓤꓼ ꓬꓲ ꓐꓶꓹ ꓣꓱꓽ ꓠ ꓗꓶ ꓡꓰˍ ꓟ ꓟꓬꓱꓽ ꓟꓽ ꓙꓳˍ ꓟ ꓪꓴꓸ ꓠꓬꓲ ꓟꓬꓱꓽ ꓧꓪ ꓠꓹ ꓟ꓾ ꓒꓴ ꓤꓼ ꓫꓵ ꓤꓼ ꓧꓪ ꓠꓹ ꓟ꓾ ꓟꓬꓱꓽ ꓪ ꓠˍ ꓟ ꓕꓱ ꓡꓰ ꓢꓯꓼ ꓕꓵꓼ ꓠꓹ ꓟ ꓚꓱꓹ ꓖꓳ ꓟ ꓡꓰ ꓟꓽ ꓞꓲ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓜꓽ ꓪꓳ ꓡꓳꓸ ꓪꓳ ꓐꓱ ꓶ ꓬꓲ ꓙꓵꓹ ꓖꓶ ꓠ ꓗꓶ ꓡꓰˍ ꓟ꓾ ꓞꓲꓼ ꓪꓴ ꓡ ꓢꓲ ꓟꓬꓱꓽ ꓗꓪ ꓐꓰ ꓠꓽ ꓡꓰ ꓕꓯ ꓠꓸ ꓦˍ ꓟ ꓒꓴ ꓤꓼ ꓫꓵ ꓤꓼ ꓮ ꓡꓰ ꓢꓲ ꓣꓱꓽ ꓠꓹ ꓟ꓾ ꓮ ꓡꓰ ꓢꓲ ꓒꓴ ꓠꓸ ꓠˍ ꓟ ꓕꓱ ꓡꓲꓳ ꓫꓵꓽ ꓔꓯ ꓡꓰ ꓙꓽ ꓟꓶ ꓔꓬ ꓟ ꓪꓴꓸ ꓠꓬꓲ ꓟꓲ ꓠꓯ ꓬꓲ ꓐꓶ ꓞꓲ ꓡˍ ꓟ ꓬꓲ ꓐꓶ ꓡꓱ ꓡˍ ꓟ ꓔꓯ ꓠꓬ ꓬꓲ ꓙꓵ ꓖꓶ ꓢꓲ ꓓꓵꓽ ꓙ ꓓꓴ ꓟꓽ ꓙꓳ= 

ꓖꓳ ꓡꓰ ꓥˍ ꓟꓲ ꓟꓲ ꓠꓯ ꓬꓲ ꓐꓶꓹ ꓞ ꓡˍ ꓟ ꓟꓲ ꓠꓯ ꓟꓬꓽ ꓠꓬꓲ ꓬꓲ ꓐꓶ ꓡꓱ ꓡˍ ꓟ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓫꓵꓽ ꓪꓴ ꓓꓽ ꓟ ꓕꓲꓽ ꓟ ꓥˍ ꓡꓳ= 1998 ꓘꓳꓼ 11 ꓦ ꓔꓯ ꓮ-ꓣꓲ-ꓗ ꓟꓵꓽ ꓬꓲ ꓔꓲꓹ ꓫꓵ ꓗꓪ ꓐꓬ ꓡꓰ ꓝꓲˍ ꓟ ꓧ-ꓣꓲ-ꓗꓲꓠ ꓐꓯꓹ ꓟ ꓟꓶꓽ ꓦꓲ ꓓꓽ ꓟ ꓚꓱꓹ ꓡ ꓢꓲ ꓮꓽ ꓙꓵꓽ ꓐꓬ ꓡꓰ ꓝꓲˍ ꓟ ꓞꓳ ꓤꓽ ꓮꓽ ꓟꓬꓹ ꓫꓸ ꓙꓵ ꓟꓶꓽ ꓙꓵ ꓓꓴ ꓔꓳꓹ ꓜꓳ ꓡꓰ ꓟ ꓕꓱ ꓡꓲꓳ ꓫꓵꓽ ꓡꓳ ꓬꓲ ꓟ ꓙꓵꓹ ꓗꓪ ꓒꓬꓱꓼ ꓡꓰꓳ= ꓕꓱ ꓡꓰ ꓟꓲ ꓠꓯ ꓗꓪ ꓐꓬ ꓡꓰ ꓓꓴ ꓮꓽ ꓟꓬꓹ ꓔꓳꓹ ꓜꓳ ꓡ ꓥˍ ꓟꓲ ꓟꓲ ꓠꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓞ ꓡˍ ꓟ ꓡꓱ ꓡˍ ꓟ ꓚꓱꓹ ꓔꓯ ꓠꓬ ꓓꓵꓽ ꓙꓽ ꓓꓴ ꓬꓲ ꓙꓵꓹ ꓟꓽ ꓖꓶ=