ꓟꓳꓸ ꓗꓪ ꓢꓶꓽ ꓙꓲꓻ ꓖꓴ ꓙꓳˍ ꓟ

ꓢꓲꓹ ꓢꓶꓽ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓬꓳꓸ ꓚꓵˍ ꓟ ꓬꓲ ꓗꓳꓹ ꓕꓲ ꓗꓳꓹ ꓡꓰ ꓐꓰ ꓕꓲ ꓑꓶꓸ ꓕꓲ ꓡꓯꓼ ꓗꓪ ꓐꓰ ꓣꓱꓽ ꓬꓯꓼ ꓔꓬ ꓟ ꓥ ꓡꓳ= ꓢꓲꓹ ꓢꓶꓽ ꓘꓴꓽ ꓗꓪ ꓧꓪꓽ ꓖꓳ ꓓꓱꓽ ꓔꓬ ꓢ ꓝꓲ ꓓꓴ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳ ꓔꓬ ꓟ ꓥ ꓡꓳ= ꓟꓳꓸ ꓟꓳ ꓢꓶꓽ꓾ ꓧꓪꓽ ꓗꓳꓼ ꓢꓶꓽ꓾ ꓬ ꓟ ꓢꓶꓽ꓾ ꓚꓬꓽ ꓳꓹ ꓢꓶꓽ(ꓔꓼ ꓡꓼ ꓛꓱꓼ ꓢꓶꓽ)꓾ ꓛꓱꓼ ꓡꓱꓼ ꓢꓶꓽ ꓕꓱ ꓡꓱ ꓫꓵꓽ ꓢꓲꓹ ꓢꓶꓽ ꓐꓴ ꓔꓯ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓜꓽ ꓔꓬ ꓥ ꓟꓲ꓾ ꓟꓳꓸ ꓗꓪ ꓢꓶꓽ ꓡꓰ ꓐꓰ ꓮ ꓘꓶꓸ ꓚꓱꓸˍ ꓟ ꓢꓲꓹ ꓢꓶꓽ ꓔꓯ ꓠꓬ ꓕꓲ ꓠꓬꓲꓹ ꓡꓰ ꓜꓽ ꓠꓹ ꓟ ꓟꓽ ꓢ=

ꓕꓲ ꓠꓬꓲꓹ ꓡꓰ ꓜꓽ ꓠꓹ ꓟ ꓟꓽ ꓢ ꓟ ꓟꓳꓸ ꓗꓪ ꓢꓶꓽ ꓘꓴꓽ ꓗꓪˍ ꓟꓲ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓮ ꓟꓹ ꓙꓳˍ ꓟ ꓥ ꓡꓳ= ꓕꓱ ꓕꓲ ꓧꓪꓹ ꓗꓪ ꓠꓬ ꓞꓳ ꓤ ꓮ ꓟꓬꓹ ꓟꓽ ꓢꓷꓸ ꓔ ꓟ ꓟꓳꓸ ꓗꓪ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓖꓶ ꓩꓴ ꓡˍ ꓥꓳ=

ꓟꓳꓸ ꓗꓪ ꓢꓶꓽ ꓔꓯ ꓠꓬ ꓐꓽˍ ꓠꓲ ꓪꓳ ꓗꓷ ꓢꓲ꓾ ꓬꓲ ꓙꓴꓺ ꓡꓱꓸ ꓗꓷ ꓢꓲ ꓠꓬꓲ ꓪꓳꓽ ꓒꓬꓽ ꓬꓲꓻ ꓔꓲꓹ ꓓꓳˍ ꓟˍ ꓟꓲ ꓙꓳ꓾ ꓬꓲ ꓢꓶꓽ ꓔꓯ ꓡꓹ-ꓝꓲꓼ ꓐꓰ ꓑꓯꓸ ꓗꓷ ꓢꓲ ꓜꓽˍ ꓟˍ ꓟꓲ ꓙꓳ꓾ ꓟꓳꓸ ꓗꓪ ꓢꓶꓽ ꓪꓲꓠꓰ ꓫꓬꓹ ꓢꓲ ꓓꓳˍ ꓟ ꓡꓰꓽ ꓟꓽ ꓞꓲꓺ ꓬꓳ ꓫꓬꓹ ꓢꓲ ꓥˍ ꓟꓲ ꓜꓽˍ ꓟ ꓙꓳˍ ꓡꓳ=

ꓟꓳꓸ ꓗꓪ ꓢꓶꓽ ꓠꓬ ꓪꓳꓽ ꓒꓬꓽ ꓐꓴ ꓔꓯ ꓚꓱ ꓚꓱ ꓡꓰꓽ ꓐꓰ ꓜꓽ ꓟꓲ꓾ ꓜꓽ ꓙꓲꓻ ꓝꓲˍ ꓟ ꓢꓯꓼ ꓡꓰꓽ ꓟꓽ ꓞꓲꓺ ꓬꓲ ꓢꓶꓽ ꓗꓪ vitamin C꓾ Zinc꓾ Potassium꓾ Copper꓾ Iron꓾ Phosphorus꓾ Vitamin (A) ꓐꓰ ꓠꓱꓸ ꓐꓯ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓝꓮꓲ ꓟꓳꓸ ꓗꓪ ꓢꓶꓽ ꓠꓬ ꓖꓳ ꓓꓱꓽ ꓗꓪ ꓟ ꓫꓵꓽ ꓢꓯꓼ ꓔꓯ ꓔꓲ ꓟꓴꓸ ꓗꓷ ꓡꓰ ꓝꓲˍ ꓡꓳ= ꓬꓲ ꓢꓶꓽ ꓗꓪ ꓑꓳ-ꓔꓯ-ꓢꓲ-ꓬꓯ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓢꓴ ꓫꓵꓽ ꓢꓯꓼ ꓔꓯ ꓔꓲ ꓟꓴꓸ ꓗꓷ ꓡꓰ ꓝꓲ ꓢꓲ ꓠꓬꓲ ꓫꓵꓽ ꓓꓯꓻ ꓗꓴꓸ ꓢꓴ ꓐꓱ ꓶ ꓮ ꓗꓶꓸ ꓙꓲˍ ꓡꓳ= ꓝꓮꓲ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓥˍ ꓟꓲ ꓔꓲ ꓟꓴꓸ ꓗꓷ ꓡꓰ ꓝꓲˍ ꓟ ꓝꓲꓐꓰꓣ ꓢꓯꓼ ꓙꓳˍ ꓟ ꓑꓶꓸ ꓓꓴ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓙꓲˍ ꓟ ꓢꓲꓹ ꓢꓶꓽ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓳꓸ ꓗꓪ ꓢꓶꓽ ꓘꓴꓽ ꓗꓪ ꓮꓠꓔꓲꓳꓫꓲꓓꓮꓠꓔꓢ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓢꓲ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡ ꓝꓲ ꓢꓲ ꓠꓬꓲ ꓠꓻ ꓤ ꓒꓬꓽ ꓤ ꓟꓽ ꓓꓵꓽ ꓡ ꓠ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓝꓮꓲ ꓟꓳꓸ ꓗꓪ ꓢꓶꓽ ꓗꓪ ꓓꓯꓹ ꓟ ꓝꓲꓐꓰꓣ ꓢꓯꓼ ꓠꓬ ꓬꓲ ꓪꓴꓻ ꓔꓯ ꓔꓬ ꓢ ꓡꓰ ꓝꓲ ꓢꓲ ꓜꓽ ꓓꓴ ꓙꓲꓺˍ ꓟ ꓗꓪ ꓬꓰ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓳꓸ ꓗꓪ ꓢꓶꓽ ꓠꓬ ꓐꓶꓽ ꓓꓲꓻ ꓐꓴ ꓔꓯ ꓗꓽ ꓙ ꓖꓶ ꓐ ꓡˍ ꓡꓳ= ꓠꓯꓻ ꓞꓲꓼ ꓔꓯ ꓟꓳꓸ ꓧꓪ ꓟꓰꓹ ꓠꓬꓲ ꓔ ꓟ ꓗꓪ ꓟꓳꓸ ꓗꓪ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓠꓱ ꓫꓳꓸ ꓟꓸ ꓗꓪ ꓐꓰ ꓡˍ ꓟ ꓐꓶꓽ ꓓꓲ ꓐꓴ ꓔꓯ ꓗꓽ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓟꓶꓽ ꓠꓷꓹ ꓘꓴꓽ ꓗꓪ ꓬꓲ ꓑ ꓒꓬꓱꓼ ꓡ ꓟ ꓔꓯ ꓥ ꓟꓲ ꓓꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓦꓰꓼ ꓟ ꓦꓰꓽ ꓛꓲꓽ ꓬꓲ ꓘꓴꓽ ꓗꓪˍ ꓟꓲ ꓔꓬꓹ ꓢ ꓡꓰ ꓝꓲ ꓐ ꓡˍ ꓡꓳ=

ꓠꓲꓹ ꓟ ꓔꓯ ꓥ ꓟꓲ ꓔꓬꓹ ꓢ ꓡꓰ ꓝꓲˍ ꓟ ꓢꓯꓼ ꓙꓳˍ ꓡꓳ= ꓟꓳꓸ ꓗꓪ ꓢꓶꓽ ꓠꓬ ꓫꓵꓽ ꓢꓯꓼ ꓔꓯ ꓔꓲ ꓟꓴꓸ ꓗꓷ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓠꓲꓹ ꓟ ꓔꓬꓹ ꓢ ꓓꓴ ꓐꓱ ꓶˍ ꓟꓲ ꓢꓯꓼ ꓡꓴꓽ ꓖꓶꓽˍ ꓡꓳ= ꓫꓵꓽ ꓘꓴꓽ ꓗꓪ ꓟ ꓙꓲꓻ ꓖꓴ ꓟꓽ ꓙꓳ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓬꓯꓼ ꓡꓰ ꓝꓲ ꓢꓲ ꓠꓲꓹ ꓟ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ=

ꓬꓲ ꓑꓻ ꓐꓴ ꓔꓯ ꓥˍ ꓟꓲ ꓞ ꓞ ꓓꓻ ꓡꓰ ꓝꓲˍ ꓡꓳ=

ꓮ ꓠꓱ ꓕꓯ ꓡꓰ ꓟꓳꓸ ꓗꓪ ꓢꓶꓽ ꓬꓲ ꓫꓵꓸ ꓔꓯ ꓬꓲ ꓑꓻ ꓓ ꓡꓰ ꓠꓹ ꓟ ꓐꓱ ꓶ ꓣꓱꓽ ꓩꓴ ꓡ ꓗꓷ ꓟ ꓥ ꓡꓳ= ꓬꓲ ꓑꓻ ꓓ ꓡꓰ ꓢˍ ꓟ ꓡꓰꓽ ꓟꓽ ꓞꓲꓺ ꓧꓪꓽ ꓗꓴꓹ ꓙꓲ ꓔꓲ-ꓫꓬꓴꓸ ꓔꓯ ꓥˍ ꓟꓲ ꓔꓬꓹ ꓢ ꓡ ꓠꓹ ꓟ ꓢꓯꓼ ꓡꓴꓽ ꓖꓶˍ ꓡꓳ=

ꓬꓲ ꓑꓻ ꓕꓯꓽ ꓢꓲ ꓗꓪ ꓟꓳꓸ ꓗꓪ ꓢꓶꓽ ꓬꓲ ꓫꓵꓸ ꓗꓪ ꓐꓰ ꓟꓶˍ ꓟ ꓬꓲ ꓞꓶꓻ ꓔꓯ ꓟꓲꓺ ꓖꓶ꓾ ꓦꓲꓽ ꓖꓶˍ ꓕꓯ ꓬꓲ ꓑꓻ ꓓꓻ ꓡꓰ ꓢ ꓡ ꓢꓲ ꓔꓲ-ꓫꓬꓴꓸ ꓬꓲ ꓫꓵꓼ ꓓꓳ ꓡ ꓝꓲˍ ꓡꓳ= ꓬꓲꓻ ꓛ꓾ ꓮ ꓔꓳꓸ ꓕꓸ ꓗꓷ ꓟ꓾ ꓬꓲ ꓑꓻ ꓓꓴ ꓡꓰ ꓟ ꓔꓯ ꓓꓻ ꓡꓰ ꓝꓲˍ ꓟ ꓠꓯ ꓞꓲꓼ ꓕꓲ ꓙꓰꓽ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓳꓸ ꓗꓪ ꓢꓶꓽ ꓗꓪ ꓙꓳˍ ꓟ calcium ꓐꓰ phosphorus ꓢꓯꓼ ꓐꓴ ꓠꓬ ꓪꓳꓽ ꓔꓳ ꓐꓰ ꓢꓶꓽ ꓛꓲ ꓔꓬꓹ ꓢ ꓓꓴ ꓐꓱ ꓶ ꓣꓱꓽ ꓬꓯꓼˍ ꓡꓳ=

ꓠꓱꓸ ꓐꓯ ꓙꓲꓻ ꓖꓴ ꓐꓴ ꓠꓬ

ꓟꓳꓸ ꓗꓪ ꓢꓶꓽ ꓔꓯ ꓐꓽ ꓐꓽ ꓤ ꓪꓳ ꓗꓷ ꓢꓲ ꓬꓲꓻ ꓛ ꓗꓪ ꓔꓲꓹ ꓢꓲ ꓠꓬꓲ ꓕꓲ ꓠꓬꓲ ꓗꓪ ꓕꓲ ꓗꓶꓸ ꓓꓳ ꓖꓶˍ ꓠꓬ ꓬꓲ ꓞꓶꓻ ꓐꓴ ꓔꓯ ꓠꓲꓸ ꓡꓰ ꓝꓲ ꓐ ꓡ ꓢꓲ꓾ ꓕꓲ ꓖꓳꓽ ꓓꓱꓽ ꓪꓳꓽ ꓧꓶꓽ ꓢꓲ ꓖꓳ ꓓꓱꓽ ꓖꓳ ꓟꓲ ꓘꓳꓼ ꓠꓻˍ  ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓝꓮꓲ ꓠꓬ ꓟꓳꓸ ꓗꓪ ꓢꓶꓽ ꓔꓯ ꓐꓽ ꓐꓽ ꓡꓰꓽ ꓪꓳ ꓗꓷ ꓢꓲ ꓞꓼ ꓐꓳ ꓮ ꓔꓲꓸ꓾ ꓐꓬꓽ ꓬꓲꓻ ꓐꓰ ꓔꓲꓹ ꓗꓷ ꓢꓲ ꓕꓲ ꓠꓬꓲ ꓛꓲ ꓗꓶꓹ ꓔ= ꓝꓮꓲ ꓕꓲ ꓠꓬꓲ ꓗꓪ ꓬꓲ ꓖꓴ 1 ꓬꓲ ꓖꓴ (ꓮ ꓙꓴ 1 ꓙꓴ) ꓔꓯ ꓠꓯꓼ ꓠꓯꓼ ꓕꓲ ꓧꓪꓹ꓾ ꓟꓶꓽ ꓘꓶꓼ ꓕꓯ ꓕꓲ ꓧꓪꓹ ꓜꓽ ꓖꓶˍ ꓠꓬ ꓟꓲꓽ ꓦꓲ ꓪꓴꓸ ꓠꓬꓲ ꓦꓰꓽ ꓛꓲꓽ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓳꓸ ꓗꓪ ꓢꓶꓽ ꓔꓯ ꓮꓽ ꓟ ꓜꓽ ꓟꓽ ꓓ ꓡ ꓐꓯ ꓠꓬ꓾ ꓠꓻ ꓓꓽ ꓟ ꓙꓳ ꓢꓴ ꓐꓴ꓾ ꓫꓵꓽ ꓢꓯꓸ ꓠꓲꓸˍ ꓟ ꓠꓻ ꓙꓳ ꓢꓴ ꓐꓴ꓾ ꓖꓳ ꓓꓱꓽ ꓡꓲꓽ ꓔꓬ ꓢꓴ/ꓤ ꓠꓱ ꓶꓻ ꓔꓬ ꓢꓴ ꓐꓴ ꓐꓰ ꓮ ꓚꓵꓹ ꓛꓵꓼ ꓤ ꓙꓳˍ ꓟ ꓟꓹ ꓟ ꓐꓴ ꓠꓬ ꓠꓯꓻ ꓞꓲꓼ ꓟꓸ ꓒ ꓐꓴ ꓐꓰ ꓖꓪ ꓙꓱꓻ ꓢꓲ ꓡꓰꓽ ꓜꓽ ꓠꓯꓹ ꓡꓳ꓾ ꓐꓰ ꓢꓷꓸ ꓪ ꓡꓳ=