ꓟꓳꓸ ꓟꓳ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓟꓳꓸ ꓟꓳ ꓢꓶꓽ ꓠꓬ ꓜꓽ ꓟꓲ꓾ ꓜꓽ ꓙꓲˍ ꓟ ꓡꓰꓽ ꓟꓽ ꓞꓲꓺ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓟꓳꓸ ꓟꓳ ꓢꓶꓽ ꓔꓯ ꓜꓽˍ ꓟ ꓗꓪ ꓐꓰ ꓕꓱ ꓡꓱ ꓙꓲꓻ ꓖꓴ ꓙꓳˍ ꓟ ꓥꓳ=

ꓟꓳꓸ ꓟꓳ ꓢꓶꓽ ꓗꓪ Vitamin A꓾ C꓾ E꓾ Potassium꓾ Folic Acid ꓐꓰ ꓜꓽ ꓓꓴ ꓙꓲꓺˍ ꓟ ꓗꓪ ꓬꓰ ꓙ ꓖꓶˍ ꓟ Fiber ꓐꓴ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬꓹ ꓙꓳˍ ꓡꓳ= ꓟꓳꓸ ꓟꓳ ꓢꓶꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓟꓳꓽ ꓡꓰ ꓢꓻˍ ꓟ ꓔꓯ ꓗꓽ ꓕꓸ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ ꓠꓲꓹ ꓟ ꓐꓰ ꓚꓮꓠꓚꓰꓣ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲ ꓐ ꓡˍ ꓡꓳ=

ꓟꓳꓸ ꓟꓳ ꓢꓶꓽ ꓜꓽˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓔꓯ ꓟꓴ ꓓꓯꓻ ꓡ ꓝꓲˍ ꓡꓳ= ꓦꓲꓔꓮꓟꓲꓠ ꓚ ꓒ ꓐꓲ ꓙꓳˍ ꓟ ꓢꓲꓹ ꓢꓶꓽ ꓥ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓢꓯꓼ ꓐꓴ ꓔꓯ ꓟꓴ ꓓꓯꓻ ꓡ ꓝꓲ ꓢꓲ꓾ ꓠꓻ ꓢ ꓢˍ ꓟꓽ ꓓꓵꓽ ꓡ ꓠꓽ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓝꓮꓲ ꓟꓳꓸ ꓟꓳ ꓢꓶꓽ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓡꓰ ꓐꓰ Enzyme ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓑꓣꓳꓔꓰꓲꓠ ꓙꓲꓺ ꓡꓰ ꓝꓲˍ ꓟ ꓗꓪ ꓬꓰ ꓙ ꓖꓶˍ ꓡꓳ= ꓦꓰꓼ ꓟ (ꓦꓰꓽ ꓛꓲꓽ) ꓐꓰ ꓬꓲ ꓪꓴꓻ ꓐꓴ ꓔꓯ ꓥˍꓟꓲ ꓫꓬ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓦꓲꓔꓮꓟꓲꓠ ꓮ ꓐꓰ ꓐꓰꓔꓮ-ꓚꓮꓣꓳꓔꓰꓠꓰ ꓐꓴ ꓠꓬ ꓟꓳꓸ ꓟꓳ ꓢꓶꓽ ꓗꓪ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓟꓬ ꓐꓲ ꓗꓺ ꓡꓰˍ ꓟ ꓐꓰ ꓟꓶꓽ ꓘꓶꓼ ꓙꓵꓹ ꓕꓯ ꓟꓬ ꓢꓶꓽ ꓢꓯꓼ ꓐꓽˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓟ ꓑꓶꓸ ꓓꓴ ꓟꓬ ꓢꓶꓽ ꓐꓱ ꓶˍ ꓟꓲ ꓮ ꓘꓶꓸ ꓙꓲˍ ꓟ ꓥ ꓡꓳ=

ꓝꓮꓲ ꓠꓬ ꓟꓳꓸ ꓟꓳ ꓢꓶꓽ ꓗꓪ ꓦꓲꓔꓮꓟꓲꓠ ꓚ꓾ ꓮꓠꓔꓲꓳꓫꓲꓓꓮꓠꓔ ꓐꓴ ꓐꓹ ꓟ ꓪꓴꓸ ꓠꓬꓲ ꓧꓪꓽ ꓗꓴꓹ ꓙꓲꓻ ꓘꓴꓽ ꓗꓪ ꓚꓳꓡꓡꓰꓖꓰꓠ ꓔꓯ ꓮ ꓟꓬꓹ ꓓꓳ ꓡ ꓝꓲ ꓢꓲ ꓧꓪꓽ ꓗꓴꓹ ꓙꓲꓻ ꓙꓴꓺ ꓡꓰˍ ꓟ ꓐꓰ ꓞꓲꓼ ꓟꓽ ꓙꓳ ꓕꓯ ꓡꓰꓽ ꓟꓳꓽ ꓡꓰˍ ꓟ ꓐꓴ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ=

ꓬꓲꓻ ꓙꓬ ꓢꓯꓼ ꓐꓰ electrolyte ꓔꓯˍ ꓟꓲ ꓟꓳꓸ ꓟꓳ ꓢꓶꓽ ꓜꓽˍ ꓟ ꓗꓪ ꓐꓰ ꓟꓶˍ ꓟ ꓥ ꓡꓳ= ꓟꓲꓸˍ ꓟ ꓟꓳꓸ ꓟꓳ ꓢꓶꓽ ꓗꓪ ꓬꓲꓻ ꓙꓬ ꓢꓯꓼ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓟꓳꓸ ꓟꓳ ꓢꓶꓽ ꓜꓽˍ ꓟ ꓗꓪ ꓐꓰˍ ꓟꓲ ꓧꓪꓽ ꓖꓳ ꓓꓱꓽ ꓗꓪ ꓣꓱꓽ ꓞꓹ ꓟ ꓬꓲꓻ ꓙꓬ ꓢꓯꓼ ꓐꓴ ꓔꓯ ꓟꓶ ꓡꓰ ꓝꓲ ꓐ ꓡˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓑꓳꓔꓮꓢꓢꓲꓴꓟ ꓐꓰ ꓟꓮꓖꓠꓰꓢꓲꓴꓟ ꓐꓹ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓠꓲꓸˍ ꓟ ꓪꓴꓸ ꓠꓬꓲ ꓒꓬꓱꓼ ꓡˍ ꓟ ꓫꓵꓽ ꓪꓴ ꓐꓴ ꓔꓯ ꓓꓻ ꓡꓰ ꓝꓲ ꓢꓲ꓾ ꓧꓪꓽ ꓘꓴꓸ ꓧꓪꓽ ꓐꓴ ꓐꓴ ꓔꓯ ꓔꓲ ꓟꓴꓸˍ ꓗꓷ ꓡꓰ ꓠ ꓬꓰ ꓙ ꓖꓶˍ ꓡꓳ=

ꓧꓪꓽ ꓖꓳ ꓓꓱꓽ ꓮ ꓘꓶꓸ ꓟꓽ ꓒꓸ ꓡ ꓠˍ ꓟꓲ ꓗꓽ ꓙ ꓖꓶˍ ꓡꓳ= ꓟꓳꓸ ꓟꓳ ꓢꓶꓽ ꓠꓬ ꓬꓲ ꓛꓵ ꓢꓯꓼ ꓮ ꓟꓬꓹ ꓙꓳˍ ꓐꓯ ꓥ ꓟꓲ ꓟꓳꓸ ꓟꓳ ꓢꓶꓽ ꓗꓪ ꓚꓮꓡꓳꓣꓲꓰꓢ ꓢꓯꓼ ꓠꓲꓸ ꓢꓲ ꓝꓲꓐꓰꓣ ꓢꓯꓼ ꓮ ꓟꓬꓹ ꓓꓹ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓜꓽ ꓔ ꓟ ꓮ ꓙꓵꓽ ꓔꓯ ꓙꓲꓺ ꓖꓶˍ ꓟ ꓡꓰꓽ ꓟꓽ ꓞꓲꓺ ꓔꓲ ꓟꓴꓸ ꓗꓷ ꓡꓰ ꓠ ꓬꓰ ꓙ ꓖꓶˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓮ ꓘꓶꓸ ꓟꓽ ꓘꓪꓽ ꓡ/ ꓟꓽ ꓒꓸ ꓡ ꓠ ꓬꓰ ꓙ ꓖꓶ ꓐ ꓡˍ ꓟ ꓥ ꓡꓳ=

ꓟꓳꓸ ꓟꓳ ꓢꓶꓽ ꓗꓪ ꓙꓲꓻ ꓖꓴ ꓮ ꓟꓬꓹ ꓙꓳˍ ꓐꓯ ꓥ ꓟꓲ ꓜꓽ ꓓꓴ ꓜꓽ ꓙꓰꓽ ꓐꓴ ꓠꓬ ꓣꓳ ꓮ ꓡꓰ ꓜꓽ ꓟꓲˍ ꓮ ꓡꓰ ꓮ ꓟꓬꓹ ꓜꓽ ꓟꓽ ꓓ ꓟ ꓥ ꓡꓳ= ꓟꓳꓸ ꓟꓳ ꓢꓶꓽ ꓜꓽ ꓓꓳ ꓡꓰ ꓗ ꓠꓯꓸ ꓠꓲꓹ ꓟ ꓠꓻ ꓙꓳ ꓢꓴ ꓐꓴ ꓠꓬ ꓪ ꓜꓲ ꓪꓴꓽ ꓧꓶ ꓡ ꓗꓴꓸˍ ꓡꓳ= ꓚꓮꓠꓚꓰꓣ ꓠꓻ ꓙꓳ ꓢꓴ ꓐꓴ ꓗꓪ ꓬꓲ ꓙꓴꓽ ꓬꓲ ꓟꓲ ꓐꓴ ꓩꓴ ꓡꓰ ꓝꓲˍ ꓡꓳ= ꓟꓶ ꓤ ꓫꓵꓽ ꓟꓽ ꓓꓯ ꓠꓯꓻ ꓞꓲꓼ ꓓꓳ ꓔꓬ ꓪ ꓢꓴ ꓐꓴˍ ꓟꓲ ꓟꓳꓸ ꓟꓳ ꓢꓶꓽ ꓮ ꓟꓬꓹ ꓜꓽ ꓟꓽ ꓓ ꓐꓰ ꓐꓯ ꓔ ꓡꓳ= ꓢꓰꓲꓠ-ꓔ-ꓡꓳꓠꓰ ꓢꓶꓽ ꓠꓬ ꓮ ꓘꓶꓸ ꓛꓵ ꓢꓯꓼ ꓙꓳˍ ꓟ ꓑꓶꓸ ꓓꓴ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ꓾ ꓠꓲꓹ ꓟ ꓠꓻ ꓙꓳ ꓢꓴ ꓐꓴ ꓠꓬ ꓟꓽ ꓜꓽ ꓕꓯ ꓪ ꓜꓲ ꓙꓲˍ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓧꓷꓹ ꓚ ꓢꓲ ꓐꓯ ꓪ ꓠꓬ ꓙꓲˍ ꓟ ꓟꓳꓸ ꓟꓳ ꓢꓶꓽ ꓔꓯ ꓮ ꓔꓲꓸ ꓤ ꓜꓽ ꓖꓶˍ ꓕꓯ ꓮ ꓢꓳ ꓕꓯ ꓐꓯ ꓡꓳꓹ ꓬꓰ ꓟ ꓡꓰ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓟꓶˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓜꓽ ꓟꓬꓽ ꓡꓰ꓾ ꓜꓽ ꓢ ꓡꓰ ꓟ꓾ ꓟꓳꓸ ꓟꓳ ꓢꓶꓽ ꓐꓰ ꓟꓽ ꓕꓽ ꓢꓴ꓾ ꓟꓳꓸ ꓟꓳ ꓢꓶꓽ ꓜꓽ ꓟꓽ ꓓ ꓢꓴ ꓐꓴ ꓜꓽ ꓗꓷ ꓕꓯꓽ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓟꓽ ꓟꓶ꓾ ꓟꓽ ꓙꓲꓻ ꓟ ꓒꓬꓱꓼ ꓡˍ ꓥꓳ꓾ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=