ꓟꓵꓽ ꓘꓳꓼ ꓐꓬ ꓡꓰˍ ꓟ ꓔꓯ ꓗꓽ ꓕꓸ ꓠˍꓟ ꓶ (Dialogue with Environment)

Greening the Christian Millennium ꓕꓳ ꓶ ꓑꓷꓠ ꓔꓯ ꓐꓳ ꓢꓴ ꓠꓬ ꓓꓽ ꓪꓴꓸ ꓠꓬ ꓟꓸ ꓟꓲ ꓚˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤꓽ ꓮꓽ ꓟꓬꓹ ꓠꓬ ꓙꓲ-ꓢꓴ ꓢꓲꓺ ꓤꓼ ꓐꓴ ꓙꓵ ꓠꓲꓹ ꓐꓰ ꓟꓵꓽ ꓘꓳꓼ ꓐꓬ ꓡꓰˍ ꓟ ꓚꓱꓹ ꓔꓯ ꓟꓳꓸ ꓝꓸ ꓡꓯꓽ ꓘꓳꓹ ꓟ ꓙꓳˍ ꓟ ꓚꓱꓹ ꓔꓯ ꓟꓳꓸ ꓕꓳ ꓶ ꓑꓷꓠ ꓐꓳ ꓠꓹ ꓟ ꓞꓳ ꓤꓽ ꓮꓽ ꓟꓬꓹ ꓡꓰ ꓕꓱ ꓡꓰ ꓢꓯꓼ ꓖꓶˍ ꓟ ꓙꓳˍ ꓡꓳ= ꓬꓲ ꓡꓰ ꓟꓸ ꓟꓲꓽ ꓚꓸ ꓟ ꓠꓬ ꓞꓳ ꓤꓽ ꓮꓽ ꓟꓬꓹ ꓔꓯ ꓮ' ꓡꓰ ꓝꓲˍ ꓟ ꓗꓷˍ ꓡꓰꓳ= ꓮ ꓡꓲꓳ ꓐꓯ ꓠꓬ ꓞꓳ ꓤꓽ ꓮꓽ ꓟꓬꓹ ꓠꓬ ꓟꓵꓽ ꓘꓳꓼ ꓒꓳꓹ ꓡˍ ꓟ ꓪꓴꓸ ꓠꓬꓲ ꓟꓲ ꓠꓯ ꓐꓬ ꓡꓰˍ ꓟ ꓚꓱꓹ ꓔ ꓚ ꓢꓴ ꓟꓽ ꓙꓳ= ꓕꓱ ꓡꓰ ꓟꓵꓽ ꓘꓳꓼ ꓒꓳꓹ ꓡˍ ꓟ ꓠꓬ ꓞꓳ ꓤꓽ ꓡꓰ ꓐꓬ ꓡꓰ ꓝꓲˍ ꓟ ꓖꓳ ꓡꓰ ꓢꓲ ꓟꓵꓽ ꓘꓳꓼ ꓒꓳꓹ ꓡˍ ꓟ ꓪꓴꓸ ꓠꓬꓲ ꓟꓲ ꓠꓯ ꓠꓬ ꓐꓬ ꓡꓰˍ ꓟ꓾ ꓟꓲ ꓠꓯ ꓐꓬ ꓡꓰˍ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓐꓬ ꓡꓰˍ ꓟ ꓥˍ ꓟ ꓪꓴꓸ ꓠꓬ ꓕꓱ ꓟ ꓠꓬ ꓟꓲ ꓠꓯ ꓞꓳ ꓤꓽ ꓝꓴꓲꓸ ꓓꓽ ꓟ ꓥˍ ꓡꓳ ꓐꓯˍ ꓟ ꓔꓯ ꓚ ꓢꓴ ꓟꓽ ꓙꓳ= ꓬꓲ ꓡꓰ ꓢꓲꓽ ꓫꓬ ꓕꓳ ꓶ ꓐꓰ ꓟꓵꓽ ꓘꓳꓼ ꓒꓳꓹ ꓡˍ ꓟ ꓟꓲ ꓠꓯ ꓐꓬ ꓡꓰˍ ꓟ ꓚꓱꓹ ꓔꓯ ꓚꓸ ꓠꓬ ꓞꓳ ꓤꓽ ꓮꓽ ꓙꓵꓽ ꓐꓱ ꓶ ꓮ' ꓡꓰ ꓓꓴ ꓓꓽ ꓟ ꓗꓷˍ ꓡꓰꓳ=

ꓞꓳ ꓤꓽ ꓮꓽ ꓟꓬꓹ ꓓꓵꓽ ꓙˍ ꓟ ꓠꓬ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓢꓳ ꓣꓴˍ ꓟ ꓰꓚꓳꓡꓳꓖꓬ ꓐꓯˍ ꓟ ꓐꓰ ꓪꓴ-ꓢ ꓔꓯ ꓙꓵˍ ꓟ ꓙꓵ ꓚꓱꓹꓔꓧꓰꓳꓡꓳꓖꓬ ꓐꓯˍ ꓟ ꓠꓬ ꓝꓸ ꓡꓯꓽ ꓘꓳˍ ꓟ ꓟꓽ ꓙꓳ ꓐꓰ ꓕꓱ ꓡꓰ ꓓꓵꓽ ꓙˍ ꓡꓳ= ꓧꓪꓽ ꓞꓷ ꓐꓰ ꓬꓲ ꓙꓬ ꓫꓳꓹ ꓟꓽ ꓠꓸ ꓟ ꓡꓰ ꓐꓰ ꓕꓲꓽ ꓡꓰꓹ ꓝꓸ ꓡꓯꓽ ꓘꓳꓹ ꓟ ꓟꓽ ꓙꓳ ꓐꓰ ꓕꓱ ꓡꓰ ꓓꓵꓽ ꓙˍ ꓡꓳ= ꓖꓳ ꓡꓰ ꓥˍ ꓟꓲ ꓬꓲ ꓡꓰ ꓕꓱ ꓡꓰ ꓟꓵꓽ ꓘꓳꓼ ꓚꓱꓹ ꓐꓰ ꓪꓴ-ꓢ ꓟꓸ ꓟꓲ ꓐꓯˍ ꓟ ꓔꓧꓰꓳꓡꓳꓖꓬ ꓝꓸ ꓡꓯꓽ ꓘꓳˍ ꓟ ꓐꓯ ꓟꓸ ꓖꓶ ꓠꓬ ꓞꓳ ꓤꓽ ꓮꓽ ꓟꓬꓹ ꓮ' ꓡꓰ ꓓꓴ ꓓꓽ ꓟ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓪꓴꓸ ꓠꓬ ꓢꓰꓮꓠ ꓟꓚꓓꓳꓠꓮꓖꓧ ꓠꓬ ꓓꓽ ꓪꓴꓸ "ꓔꓳ ꓚꓮꓣꓰ ꓝꓳꓣ ꓔꓧꓰ ꓰꓮꓣꓔꓧ" ꓐꓯˍ ꓟ ꓟꓲ ꓠꓯ ꓕꓱ ꓟ ꓔꓯ ꓡꓳꓸ ꓙ ꓑꓳꓽ ꓙ ꓔ ꓙ ꓠꓹ ꓟ ꓚꓱꓹ ꓔꓯ ꓟꓳꓸ ꓕꓳ ꓶ ꓑꓷꓠ ꓕꓲꓽ ꓑꓷꓠ ꓐꓳ ꓗꓷꓳ= ꓖꓳ ꓡꓰ ꓥˍ ꓟꓲ ꓕꓳ ꓶ ꓑꓷꓠ ꓕꓱ ꓟ ꓔꓯ ꓧꓶꓽ ꓧꓶꓽ ꓞꓽ ꓞꓽ ꓕꓳ ꓶ ꓑꓷꓠ ꓒꓬꓱꓼ ꓡ ꓠˍ ꓟ ꓕꓳ ꓶ ꓑꓷꓠ ꓫꓹ ꓒꓽ ꓐꓴ ꓠꓬ ꓢꓯꓼ ꓕꓵꓼ ꓢꓴ ꓟꓽ ꓙꓳ= ꓖꓳ ꓟ ꓕꓳ ꓶ ꓑꓷ• ꓗꓪ ꓠꓬ ꓟꓲ ꓠꓯ ꓐꓬ ꓡꓰꓹ ꓟ ꓪꓴꓸ ꓠꓬꓲ ꓒꓬꓱꓼ ꓡˍ ꓟ ꓫꓵꓽ ꓪꓴ ꓢꓲꓹ ꓛꓵꓽ ꓐꓰ ꓙꓲ-ꓢꓴ ꓢꓲꓺ ꓤꓼ ꓐꓴ ꓙꓵ ꓠꓲꓹ ꓮ ꓟꓬ ꓗꓪ ꓛꓲ ꓝꓸ ꓡꓯꓽ ꓘꓳˍ ꓟ ꓙꓳˍ ꓟ ꓐꓯˍ ꓟ ꓔꓯ ꓖꓪ ꓙꓱ ꓦˍ ꓟ ꓚꓱꓹ ꓢꓯꓼ ꓕꓵꓼˍ ꓟ ꓚꓱꓹ ꓐꓳ ꓔ ꓟ ꓥ ꓪ= ꓖꓳ ꓟ ꓓꓳ ꓡꓰ ꓠꓬ ꓬꓲ ꓠꓬ ꓘꓴ ꓜꓲꓼ ꓞꓳ ꓡꓰ ꓢꓯꓼ ꓕꓵꓼ ꓔꓬ ꓟ ꓟꓲ ꓠꓯ ꓕꓱ ꓟ ꓮꓽ ꓕꓯꓽ ꓥˍ ꓟꓲ ꓠꓲꓹ ꓛꓵꓼ ꓚꓵꓼ ꓐꓰ ꓐꓲ ꓞꓲꓹ ꓟ ꓙꓳ ꓠˍ ꓟ ꓐꓱ ꓶ ꓢꓯꓼ ꓕꓵꓼˍ ꓟ ꓐꓯˍ ꓟ ꓚꓱꓹ ꓔꓯ ꓟꓳꓸ "ꓔꓧꓰ ꓖꓣꓰꓰꓠꓲꓠꓖ ꓳꓝ ꓔꓧꓰ ꓚꓧꓴꓣꓚꓧ" ꓐꓯˍ ꓟ ꓕꓳ ꓶ ꓑꓷꓠ ꓔꓯ ꓥˍ ꓟꓲ ꓬꓲ ꓠꓬ ꓐꓳ ꓚꓱ ꓩꓴ ꓡꓺꓳ= ꓖꓳ ꓟ ꓕꓳ ꓶ ꓑꓷꓠ ꓗꓪ ꓠꓬ ꓢꓲꓹ ꓜꓲ ꓡꓳ ꓜꓲ ꓡꓳ ꓗꓸ ꓬꓲ ꓙꓬ ꓚꓱꓹ ꓐꓰ ꓔꓱꓹ ꓚꓵˍ ꓟ ꓐꓯˍ ꓟ ꓔꓯ ꓧꓪꓸ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓳ ꓗꓷꓳ= ꓖꓳ ꓕꓲꓽ ꓘꓴꓹ ꓗꓪ ꓞ ꓟꓵꓽ ꓗꓪ ꓙꓳˍ ꓟ ꓢꓲꓹ ꓜꓲ ꓡꓳ ꓜꓲ ꓥ ꓕ ꓑꓳꓸ ꓔꓯ ꓐꓬ ꓡꓰ ꓝꓲˍ ꓟ ꓪꓴꓸ ꓠꓬ ꓟꓲ ꓠꓯ ꓕꓱ ꓟ ꓠꓬ ꓞ ꓡˍ ꓟ ꓐꓬ ꓡꓰˍ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤꓽ ꓵ ꓣꓳ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓟꓬꓽ ꓡˍ ꓟ ꓪꓴꓸ ꓠꓬꓲ ꓟꓲ ꓠꓯ ꓕꓱ ꓟ ꓔꓯ ꓥˍ ꓟꓲ ꓫꓸ ꓡꓰ ꓝꓲˍ ꓟ ꓐꓯ_ ꓟ ꓚꓱꓹ ꓔꓯ ꓬꓲ ꓠꓬ ꓐꓳ ꓗꓷꓳ=

"ꓔꓳ ꓚꓮꓣꓰ ꓝꓳꓣ ꓔꓧꓰ ꓰꓮꓣꓔꓧ" ꓐꓯˍ ꓟ ꓕꓳ ꓶ ꓑꓷꓠ ꓗꓪ ꓟꓵꓽ ꓘꓳꓹ ꓒꓳꓹ ꓡˍ ꓟ ꓚꓱꓹ ꓔꓯ ꓮ ꓡꓰ ꓢꓲ ꓗꓽ ꓕꓸ ꓓꓴ ꓥ ꓡ꓾ ꓮ ꓡꓰ ꓢꓲ ꓝꓮꓲ ꓙꓲ ꓡ ꓠ ꓢꓯꓼ ꓕꓵꓼ ꓓꓴ ꓥˍ ꓡ ꓐꓰ ꓕꓱ ꓡꓰ ꓐꓳ ꓔꓸ ꓟ ꓥ ꓪ= ꓔꓧꓰ ꓖꓣꓰꓰꓠꓲꓠ ꓳꓝ ꓔꓧꓰ ꓚꓧꓴꓣꓚꓧ ꓐꓯˍ ꓟ ꓕꓳ ꓶ ꓑꓷꓠ ꓗꓪ ꓠꓬ ꓟꓵꓽ ꓘꓳꓹ ꓐꓰ ꓢꓲꓽ ꓫꓬ ꓕꓳ ꓶ ꓮ ꓡꓰ ꓢꓲ ꓝꓸ ꓡꓯꓽ ꓘꓳꓹ ꓟ ꓙꓳˍ ꓟ ꓔꓯ ꓬꓲ ꓠꓬ ꓐꓳ ꓗꓷꓳ= 1990 ꓘꓳꓼ ꓕꓯ ꓠꓬ ꓟꓲ ꓠꓯ ꓕꓱ ꓟ ꓐꓱ ꓶ ꓠꓱ ꓠꓲꓹ ꓐꓯˍ ꓟ "ꓑꓮꓢꓢꓲꓳꓠ ꓝꓳꓣ ꓔꓧꓰ ꓰꓮꓣꓔꓧ ꓐꓯˍ ꓟ ꓕꓳ ꓶ ꓑꓷꓠ ꓔꓯ ꓐꓳ ꓗꓷꓳ= ꓕꓱ ꓟ ꓕꓳ ꓶ ꓑꓷꓠ ꓗꓪ ꓠꓬ ꓟꓲ ꓠꓯ ꓕꓱ ꓟ ꓕꓯꓽ ꓢꓲ ꓗꓪ ꓶ ꓡꓯꓼ ꓟꓴˍ ꓟ ꓚꓱꓹ ꓠꓯꓸꓼ ꓗ  ꓪ ꓶ ꓡꓯꓼ ꓟꓴˍ ꓟ ꓪꓴꓸ ꓠꓬꓲ ꓢꓲꓹ ꓜꓲ ꓡꓳ ꓜꓲ ꓐꓬ ꓡꓰˍ ꓟ ꓟꓵꓽ ꓘꓳꓼ ꓐꓬ ꓡꓰˍ ꓟ꓾ ꓟꓵꓽ ꓘꓳꓹ ꓐꓬ ꓡꓰˍ ꓟ ꓪꓴꓸ ꓠꓬꓲ ꓟꓲ ꓠꓯ ꓥˍ ꓟꓲ ꓐꓬ ꓡꓰˍ ꓟ ꓚꓱꓹ ꓾ ꓕꓱ ꓡꓰ ꓐꓬ ꓡꓰˍ ꓟ ꓚꓱꓹ ꓔꓯ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓠꓬ ꓮ ꓡꓰ ꓢꓲ ꓗꓽ ꓕꓸ ꓠꓹ ꓟ꓾ ꓡꓳꓸ ꓙ ꓑꓳꓽ ꓙ ꓠꓹ ꓟ ꓬꓰ ꓠꓹ ꓟ ꓔꓯ ꓟꓳꓸ ꓖꓶ ꓦꓹ ꓟ ꓕꓳ ꓶ ꓥˍ ꓡꓳ=

ꓟꓬꓽ ꓠꓬꓲ ꓐꓶꓹ ꓠꓬꓲ ꓬꓲ ꓠꓬ ꓢꓮꓚꓣꓮꓟꓰꓠꓔꓢ ꓐꓯˍ ꓟ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓪꓴ-ꓢ ꓣꓱꓽ ꓛꓲꓽ ꓑꓯꓹ ꓟꓶ ꓠꓹ ꓟ ꓐꓱ ꓶ ꓘꓳꓹ ꓣꓴˍ ꓟ꓾ ꓔꓯ ꓥꓳ ꓐꓯ ꓠꓬ ꓖꓳ ꓓꓱꓽ ꓔꓲꓹ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶˍ ꓡꓳ ꓐꓯˍ ꓟ ꓡꓰ ꓐꓰ ꓣꓱꓽ ꓛꓲꓽ ꓑꓯꓹ ꓟꓶˍ ꓟ ꓕꓱ ꓟ ꓐꓰ ꓟꓵꓽ ꓘꓳꓼ ꓮ ꓡꓰ ꓝꓸ ꓡꓯꓽ ꓘꓳˍ ꓟ ꓔꓯ ꓬꓲ ꓠꓬ ꓟꓸ ꓖꓶˍ ꓟ ꓐꓳ ꓔ ꓡꓳ= ꓖꓳ ꓟ ꓪꓴꓸ ꓠꓬ ꓬꓲ ꓠꓬ ꓢꓮꓚꓣꓰꓓꓠꓰꓢꓢ ꓳꓝ ꓔꓧꓰ ꓰꓮꓣꓔꓧ ꓢꓲꓽ ꓫꓬˍ ꓟ ꓟꓲ ꓠꓯ ꓥˍ ꓠꓬ ꓟꓲ ꓠꓯ ꓙꓲ ꓚꓱꓹ ꓐꓯˍ ꓟ ꓬꓲ ꓟꓸ ꓟꓲ ꓓꓳˍ ꓟ ꓕꓱ ꓟ ꓔꓯ ꓐꓳ ꓔ ꓟ ꓥ ꓪ= ꓬꓲ ꓡꓰ ꓐꓯˍ ꓟ ꓠꓬ ꓣꓳꓽ ꓟꓲ ꓠꓯ ꓞꓳ ꓤꓽ ꓡꓰ ꓐꓬ ꓡꓰ ꓝꓲˍ ꓟ ꓬꓲꓺ ꓙꓬ ꓟꓽ ꓫꓬ ꓡꓰ ꓝꓲˍ ꓟ ꓬꓲꓺ ꓙꓬ ꓡꓰ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓠ ꓗꓳ ꓓꓱꓽ ꓔꓲꓹ ꓖꓶˍ ꓟ ꓕꓱ ꓡꓲꓳ ꓫꓵꓽ ꓬꓰ ꓐ ꓡ ꓓꓴ ꓥ ꓡ ꓐꓰ ꓬꓲ ꓟꓸ ꓟꓲ ꓓꓳˍ ꓟ ꓔꓯ ꓬꓲ ꓠꓬ ꓐꓳ ꓔ ꓟ ꓥ ꓪ= ꓐꓯ ꓟꓵ ꓢꓪ ꓟ ꓠꓬ ꓟꓲ ꓠꓯ ꓞꓳ ꓤꓽ ꓡꓰ ꓟꓲ ꓠꓯ ꓔꓯ ꓥˍ ꓟꓲ ꓐꓬ ꓡꓰ ꓝꓲ꓾ ꓬꓲꓺ ꓙꓬ ꓔꓯ ꓥˍ ꓟꓲ ꓐꓬ ꓡꓰ ꓝꓲ ꓢꓲ ꓠꓬꓲ ꓠꓴ ꓠꓬ ꓗꓳ ꓓꓱꓽ ꓔꓲ ꓔ ꓠꓬ ꓚꓵ ꓚꓵ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓐꓯˍ ꓟꓶ ꓡ ꓐꓯˍ ꓟ ꓪꓴ-ꓢ ꓡꓰ ꓚꓰꓼ ꓔ ꓟ ꓮꓽ ꓙꓵꓽ ꓔꓯ ꓐꓬ ꓡꓰ ꓝꓲ ꓢꓲ ꓠꓴ ꓠꓬ ꓚꓬꓴꓹ ꓙˍ ꓟ ꓣꓱꓽ ꓛꓲꓽ ꓐꓯꓹ ꓟꓶ ꓡ ꓐꓯˍ ꓟ ꓬꓲ ꓟꓸ ꓟꓲ ꓓꓳˍ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓳ ꓔ ꓟ ꓥ ꓪ=