ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ (Dialogue with Environment)

ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ ꓐꓯꓹ ꓟ ꓠꓬ ꓢꓲꓽ ꓫꓬ ꓕꓳꓽ ꓶ ꓢꓳ ꓢꓴ꓾ ꓪꓴ-ꓢ ꓟꓸ ꓟꓲꓽ ꓔꓯ ꓢꓲ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓣꓱꓽ ꓡꓹ ꓟ ꓫꓸ ꓪ ꓘꓶꓽ ꓕꓲꓽ ꓘꓶꓽ ꓥˍ ꓡꓳ= ꓕꓱ ꓟ ꓔꓯ ꓔꓧꓰꓳꓡꓳꓖꓲꓚꓮꓡ ꓔꓰꓣꓟ ꓐꓯˍ ꓟ ꓢꓳ ꓢꓴ ꓣꓱꓹ ꓟ ꓫꓸ ꓪ ꓘꓶꓽ ꓕꓲꓽ ꓘꓶꓽ ꓥˍ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓫꓸ ꓕꓱꓹ ꓟ ꓐꓯꓹ ꓟ ꓓꓲꓮꓡꓳꓖꓴꓰ ꓐꓯꓹ ꓟ ꓕꓱ ꓕꓲꓽ ꓘꓶ ꓠꓬ ꓫꓸ ꓕꓱ ꓡꓯꓽ ꓘꓳꓹ ꓟ ꓔꓯ ꓡꓰ ꓐꓯꓹ ꓟ ꓟꓽ ꓥ= ꓗꓳꓸ ꓑꓳ ꓔꓸ ꓑꓳꓸ ꓢꓷꓸ ꓡ ꓠꓹ ꓟ꓾ ꓧꓪ ꓟꓲꓹ ꓠꓬꓲꓹ ꓟ꓾ ꓡꓳꓸ ꓙ ꓑꓳꓽ ꓙ ꓔ ꓙˍ ꓟ ꓕꓱ ꓡꓰꓳ ꓫꓵꓽ ꓕꓲꓽ ꓫꓵꓽ ꓡꓰ ꓕ꓾ꓽ ꓫꓵꓽ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓕꓱ ꓕꓲꓽ ꓘꓴꓸ ꓗꓪ ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ ꓐꓯˍ ꓟ ꓠꓬ ꓮ ꓡꓲꓳ ꓫꓵꓽ ꓔꓯ ꓐꓯꓹ ꓡ? ꓐꓯ ꓠꓬ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓪꓴꓸ ꓠꓬꓲ ꓙꓬ ꓝꓲꓸ ꓞ ꓝꓲꓸ ꓟꓶꓽ ꓦ ꓦ ꓝꓲꓸ ꓕꓱ ꓡꓰ ꓙꓳˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓟꓲꓸ ꓟꓲ ꓟꓲ ꓠꓯ ꓞꓳ ꓤꓽ ꓪꓴꓸ ꓠꓬꓲ ꓟꓵꓽ ꓘꓳꓼ ꓠꓬ ꓒꓳꓹ ꓡꓰꓹ ꓟ ꓗꓶ ꓡꓰꓺꓳ= ꓞ ꓝꓲꓸ ꓕꓯ ꓮꓽ ꓘꓶꓸ ꓞ꓾ ꓙꓬ ꓝꓲꓸ ꓕꓯꓽ ꓮꓽ ꓘꓶꓸ ꓙꓬ꓾ ꓟꓶꓽ ꓦ ꓦ ꓝꓲꓸ ꓗꓪ ꓠꓬ ꓬꓲꓺ ꓙꓬ  ꓮꓽ ꓘꓶꓸ ꓙꓵꓽ꓾ ꓟꓶꓽ ꓦꓲ ꓓꓽ ꓟ ꓙꓱꓼ ꓟꓶꓽ ꓙꓴꓽ ꓚꓵꓹ ꓕꓱ ꓡꓰ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓮ ꓘꓶꓽ ꓗ ꓡˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤꓽ ꓪꓴꓸ ꓠꓬꓲ ꓟꓵꓽ ꓘꓳꓼ ꓒꓳꓹ ꓡꓰˍ ꓟ ꓪꓴꓸ ꓠꓬꓲ ꓗꓶ ꓡꓹ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓕꓱ ꓡꓰ ꓟꓵꓽ ꓘꓳꓼ ꓒꓳꓹ ꓡꓹ ꓟ ꓔꓯ ꓗꓽ ꓕꓸ ꓠꓹ ꓟ ꓚꓬꓴꓹ ꓙ ꓠꓹ ꓟ ꓡꓳꓸ ꓙ ꓑꓳꓽ ꓙ ꓖꓶꓽ ꓠˍ ꓟ ꓐꓱ ꓶ ꓣꓳꓽ ꓠꓯꓸꓼ ꓗꓪ ꓶ ꓓꓽ ꓟ ꓟꓯ ꓠ ꓗˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓣꓳ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓕꓱ ꓟ ꓟꓬꓱꓽ ꓓꓽ ꓟ ꓔꓯ ꓟꓯ ꓠ ꓗˍ ꓡꓳ=

ꓟꓲ ꓠꓯ ꓕꓱ ꓟ ꓠꓬ ꓣꓳ ꓔꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓠꓴꓹ ꓠꓴꓼ ꓔꓳ ꓖꓶ ꓡ ꓢꓴꓹ ꓮꓸ ꓚꓵꓸ ꓔꓳ ꓖꓶ ꓶ ꓢꓴ ꓬꓰ ꓚꓸ ꓧꓪ ꓚꓸ ꓡ ꓢꓴ ꓟꓹ ꓟ ꓕꓲꓽ ꓣꓳ ꓡꓰ ꓐꓰ ꓥˍ ꓡꓳ= ꓣꓳ ꓕꓶ ꓕꓶ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓰ= ꓟꓲ ꓠꓯ ꓕꓱ ꓟ ꓟꓽ ꓙꓳꓹ ꓡꓰ ꓠꓬ ꓮ ꓡꓰ ꓗꓶ ꓡ ꓓꓴ ꓥ ꓡ?= ꓟꓲ ꓠꓯ ꓕꓱ ꓟ ꓟ ꓙꓳ ꓡꓰ ꓠꓬ ꓣꓳ ꓟꓲ ꓠꓯ ꓞꓳ ꓤꓽ ꓮ ꓡꓰ ꓕꓲꓽ ꓘꓴ ꓗꓪ ꓔꓬ ꓓꓴ ꓥ ꓡ?= ꓔꓬꓹ ꓖꓴ ꓟꓽ ꓙꓳ ꓗꓶ ꓡꓰ ꓓꓴ ꓥꓳ= ꓖꓳ ꓟ ꓡꓰ ꓟꓽ ꓞꓲ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓜꓽ ꓔꓬꓹ ꓟ ꓜꓽ ꓪꓳ ꓡꓳꓸ ꓪꓳ ꓥˍ ꓟꓲ ꓟꓲ ꓠꓯ ꓕꓱ ꓟ ꓗꓪ ꓚꓳꓸ ꓓꓳ ꓡꓹ ꓟ ꓥ ꓪ= ꓟꓲ ꓠꓯ ꓕꓱ ꓟ ꓟꓽ ꓙꓳ ꓡꓰ ꓠꓬ ꓜꓽ ꓪꓳ ꓡꓳꓸ ꓪꓳ ꓥˍ ꓟꓲ ꓟꓽ ꓙꓳ ꓡꓰ= ꓬꓲꓺ ꓙꓬ ꓓꓳ ꓠꓹ ꓟ ꓥˍ ꓟꓲ ꓟꓽ ꓙꓳ ꓡꓰ ꓗꓶ ꓡꓰˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓕꓱ ꓟ ꓠꓬ ꓟꓹ ꓟ ꓕꓲꓽ ꓣꓳꓹ ꓡꓰ ꓐꓰ ꓥˍ ꓡꓳ= ꓣꓳꓽ ꓟꓲ ꓠꓯ ꓞꓳ ꓤꓽ ꓮꓽ ꓙꓵ ꓐꓱ ꓶ ꓟꓹ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓠꓬ ꓟꓲ ꓠꓯ ꓟꓹ ꓟ ꓐꓰ ꓕꓱ ꓡꓰ ꓣꓱꓽ ꓔꓬꓹ ꓘꓴ ꓔꓬꓹ ꓟ ꓥ ꓪ= ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓬꓲꓸ ꓠꓬꓲ ꓣꓳꓽ ꓙꓲ-ꓢꓴ ꓢꓲꓺ ꓤꓽ ꓐꓴ ꓠꓬ ꓟꓲ ꓠꓯ ꓕꓱ ꓟ ꓕꓯ ꓚꓬꓴꓹ ꓙ ꓠꓹ ꓟ꓾ ꓗꓽ ꓕꓸ ꓠꓹ ꓟ꓾ ꓡꓳꓸ ꓙ ꓑꓳꓽ ꓙ ꓠꓹ ꓟ ꓬꓳꓸ ꓚꓵˍ ꓡꓳ= ꓕꓱ ꓡꓰ ꓟꓽ ꓬꓰꓹ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳꓹ ꓟ ꓝꓴꓲꓸ ꓓꓰ ꓡꓰꓹ ꓟ ꓗꓶ ꓡꓰ ꓓꓴ ꓥꓳ= ꓮ ꓡꓲꓳꓹ ꓐꓯ ꓠꓬ ꓬꓲ ꓚꓰꓺ ꓬꓲ ꓪꓴꓸ ꓕꓳꓽ ꓶ 1ꓽ 31 ꓗꓪ ꓖꓳ ꓡꓰ ꓢꓲ ꓬꓲ ꓚꓰꓼ ꓔ ꓟ ꓠꓬ ꓮꓽ ꓘꓶꓸ ꓙꓲꓹ ꓟ ꓥˍ ꓡꓳ ꓐꓰ ꓪꓴ-ꓢ ꓡꓳꓸ ꓟꓳˍ ꓡꓳ ꓐꓰ ꓕꓱ ꓶꓰ ꓐꓯˍ ꓡꓳ= ꓪꓴ-ꓢ ꓚꓰꓼ ꓔ ꓟ ꓠꓬ ꓮꓽ ꓘꓶꓸ ꓐꓲ ꓠ꓾ ꓮꓽ ꓘꓶꓸ ꓙꓲ ꓠ꓾ ꓮꓽ ꓘꓶꓸ ꓔꓬ ꓢ ꓠ꓾ ꓮꓽ ꓘꓶꓸ ꓙꓲ ꓖꓴ ꓙꓳ ꓠ ꓕꓱ ꓡꓰ ꓚꓰꓼ ꓔ ꓟ ꓥ ꓪ=  ꓖꓳ ꓡꓰ ꓥˍ ꓟꓲ ꓠꓬꓲꓸ ꓠꓬꓲ ꓟꓲ ꓠꓯ ꓞꓳ ꓤꓽ ꓡꓰ ꓐꓬ ꓡꓰ ꓠ ꓕꓱ ꓡꓰ ꓬꓰꓹ ꓟ ꓪꓴꓸ ꓠꓬꓲ ꓟꓲ ꓠꓯ ꓠꓬ ꓞꓲ ꓡ ꓟꓽ ꓞꓲ ꓡꓼ ꓙꓳ ꓟ ꓶ ꓤꓼ ꓕꓲꓽ ꓟ ꓡꓰ ꓐꓰ ꓗꓹ ꓡꓳ= ꓐꓬ ꓡꓰ ꓠꓹ ꓟ ꓬꓲ ꓙꓵꓹ ꓛꓲ ꓡ ꓓꓴ ꓬꓰˍ ꓡꓳ= ꓖꓳ ꓡꓰ ꓠꓬꓲ ꓣꓳ ꓕꓱ ꓟ ꓔꓯ ꓤ ꓟꓴ ꓓꓴ ꓬꓰ ꓡꓯ= ꓢꓲꓺ ꓒꓽ ꓬꓰ-ꓢꓴ ꓡꓰ ꓬꓲ ꓟꓶꓽ ꓕꓲꓽ ꓠꓬꓲ ꓐꓯˍ ꓟ ꓠꓬ ꓟꓲ ꓠꓯ ꓐꓬ ꓡꓰˍ ꓟ ꓦꓬ ꓠꓬꓲ ꓥ ꓡ ꓐꓶˍ ꓥꓳ= ꓮ ꓡꓲꓳꓹ ꓐꓯ ꓠꓬ ꓟꓲ ꓠꓯ ꓕꓱ ꓟ ꓠꓬ ꓣꓳꓽ ꓟꓲ ꓠꓯ ꓞꓳ ꓤꓽ ꓪꓴꓸ ꓠꓬ ꓐꓬ ꓡꓰ ꓓꓴ ꓬꓰ ꓪ= ꓣꓳꓽ ꓤ ꓟꓴ ꓓꓴ ꓬꓰ ꓡꓰ=

ꓣꓳ ꓟꓲ ꓠꓯ ꓔꓯ ꓡꓳꓸ ꓙ ꓠꓹ ꓟ ꓮ ꓕꓯꓽ ꓥˍ ꓟꓲ ꓢꓯꓼ ꓕꓵˍ ꓟ ꓠꓯꓹ ꓗꓪ ꓟꓬꓱꓽ ꓓꓽ ꓟ 3 ꓝꓸ ꓙꓳ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= 1ꓸ ꓚꓵꓸ ꓛꓬꓽ ꓐꓱ ꓶ ꓣꓱꓽ ꓬꓯꓼˍ ꓟ ꓔꓯ ꓚꓵꓸ ꓛꓬ ꓜꓽ 2ꓸ ꓜꓽ ꓓꓳ ꓡꓰ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓬꓰ ꓠ ꓗꓹ ꓡꓳ= 3ꓸ ꓫꓵꓽ ꓕꓲꓽ ꓫꓵꓽ ꓠꓬ ꓛꓲ ꓡꓹ ꓟ ꓪꓰ ꓤꓽ ꓐꓱ ꓶ ꓙꓽ ꓖꓶꓽ ꓠ ꓗˍ ꓡꓳ= ꓚꓵꓸ ꓛꓬꓽ ꓐꓱ ꓶ ꓪꓽ ꓙꓵꓽ ꓪꓽ ꓙꓳꓹ ꓟ ꓔꓯ ꓡꓰ ꓜꓽ ꓐꓯꓹ ꓟ ꓠꓬ꓾ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓠꓬꓲ ꓠꓬꓲ ꓟꓲ ꓠꓯ ꓗꓪ ꓠꓯꓸ ꓦꓬꓸ ꓙꓵꓽ ꓟꓽ ꓓ= ꓧꓶꓸ ꓕꓯꓽ ꓕꓲꓽ ꓞꓲꓼ ꓗꓪ ꓠꓬ ꓶ ꓡꓯꓼ ꓟꓴˍ ꓟ꓾ ꓪꓴꓽ ꓤꓹ ꓟ ꓮ ꓘꓶꓸ ꓟꓽ ꓙꓳꓹ ꓕꓯ ꓠꓬ ꓚꓵꓸ ꓛꓬꓽ ꓣꓱꓽ ꓬꓯꓹ ꓟ ꓐꓱ ꓶ ꓡꓰ ꓢꓲ ꓧꓪ ꓜꓽꓹ ꓟ ꓥ ꓪ= ꓠꓬꓲꓸ ꓠꓬꓲ ꓠꓬ ꓠꓯꓸ ꓦꓬꓸ ꓙꓵꓽ ꓢꓲ ꓪꓴꓽ ꓤꓽ ꓠꓹ ꓟ ꓐꓱ ꓶ ꓗꓪ ꓛꓲ ꓓꓵꓽ ꓙꓽ ꓢꓲ ꓧꓪ ꓗꓶꓹ ꓟ ꓪꓴꓸ ꓠꓬꓲ ꓥꓪꓸ ꓥˍ ꓟꓲ ꓬꓲ ꓛꓴ ꓞꓲꓹ ꓡꓰ ꓓꓴ ꓬꓰˍ ꓪ= ꓟꓵꓽ ꓗꓪ ꓟ ꓜꓽ ꓫꓵꓽ ꓜꓽ ꓪꓳ ꓥˍ ꓟꓲ ꓬꓲ ꓛꓵ ꓞꓲꓹ ꓡꓰ ꓓꓴ ꓬꓰˍ ꓪ= ꓟꓵꓽ ꓗꓪ ꓟ ꓒꓴꓺ ꓫꓵꓺ ꓪꓲꓸ ꓑꓳꓽ ꓥˍ ꓟꓲ ꓬꓲ ꓛꓴ ꓞꓲꓹ ꓡꓰ ꓓꓴ ꓬꓰˍ ꓪ= ꓖꓳ ꓟ ꓠꓬ ꓚꓵꓸ ꓛꓬꓽ ꓣꓱꓽ ꓬꓯꓼˍ ꓟ ꓚꓵꓸ ꓛꓬꓽ ꓪ ꓒꓵꓹ ꓟ ꓡꓰ ꓧꓪꓸ ꓟ ꓟꓽ ꓥ= ꓠꓯꓸ ꓦꓬꓸ ꓙꓵꓽ ꓢꓲ ꓧꓪꓸ ꓟ ꓥˍ ꓡꓳ= ꓠꓬꓲ ꓠꓬꓲ ꓪꓴ-ꓢ ꓠꓲꓹ ꓫꓵˍ ꓟ ꓠꓬ ꓚꓵꓸ ꓛꓬ ꓣꓱꓽ ꓬꓯꓼ ꓟ ꓔꓯ ꓡꓰ ꓢꓲ ꓧꓪ ꓢꓲ ꓜꓽ ꓐꓯˍ ꓟ ꓥ ꓪ= ꓜꓽ ꓓꓳ ꓡꓰ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓬꓰ ꓠꓬꓲ ꓔ ꓥ ꓐꓰ ꓕꓱ ꓐꓯˍ ꓡꓳ= ꓠꓬꓲ ꓠꓬꓲ ꓟꓲ ꓠꓯ ꓗꓪ ꓢꓲꓸ ꓜꓲ ꓡꓳ ꓜꓲ ꓮꓽ ꓟꓬꓹ ꓘꓶꓹ ꓗꓷꓳ= ꓖꓳ ꓡꓰ ꓥꓳ ꓟꓲ ꓖꓳ ꓟ ꓪꓴꓸ ꓛꓲ ꓝꓮꓲ ꓔꓶ ꓑꓱ ꓔ ꓟ ꓬꓲ ꓡꓲꓸ ꓤꓽ ꓔꓶꓹ ꓟ ꓟꓽ ꓙꓳ꓾ ꓮꓽ ꓙꓵꓽ ꓧꓪ ꓟꓶꓹ ꓗꓶ꓾ ꓫꓵꓺ ꓪꓲꓸ ꓚꓴꓸ ꓢꓲꓸ ꓠꓬꓲ ꓮꓽ ꓙꓵꓽ ꓟꓶꓹ ꓢꓴ ꓗꓶ ꓝꓮꓲ ꓕꓲꓽ ꓧꓪꓹ ꓟꓲ ꓠꓯ ꓑꓲꓸ ꓔ ꓟ ꓟꓽ ꓙꓳ= ꓖꓳ ꓟ ꓪꓴꓸ ꓠꓬꓲ ꓭꓸ ꓓꓲ ꓗꓶ ꓡꓰ ꓢꓲ ꓬꓰ ꓜꓽ ꓟꓽ ꓙꓲ꓾ ꓔꓶ ꓜꓽ ꓟꓽ ꓙꓲ ꓕꓱ ꓡꓰ ꓗꓶꓹ ꓓꓴ ꓟ ꓥ ꓪ= ꓕꓱ ꓟ ꓠꓬ ꓮꓸ ꓫꓵꓽ ꓔꓯ ꓐꓯꓹ ꓡ? ꓐꓯ ꓠꓬ ꓧꓪ ꓜꓽ ꓓꓳ ꓡꓰ ꓗꓸ ꓠꓯ ꓢꓲꓽ ꓢꓲꓽ ꓫꓬ ꓫꓬ ꓬꓰꓹ ꓟ ꓟꓽ ꓙꓳꓹ ꓟ ꓬꓲ ꓟꓸ ꓟꓲ ꓥˍ ꓡꓳ= ꓠꓬꓲꓸ ꓠꓬꓲ ꓣꓳ ꓧꓪ ꓜꓽ ꓓꓳ ꓡꓰ ꓠꓬ ꓢꓲꓽ ꓫꓬꓹ ꓟꓬꓱꓽ ꓬꓰ ꓠ ꓡꓳꓹ ꓥ= ꓔꓶ ꓜꓽ ꓔꓶ ꓓꓳ ꓙꓲ ꓠ ꓢꓲꓽ ꓫꓬ ꓠ ꓡꓳꓹ ꓥ= ꓑꓶꓸ ꓛꓵꓽ ꓑꓶꓸ ꓟꓲ ꓔꓯ ꓥˍ ꓟꓲ ꓮ ꓚꓵꓸ ꓐꓰ ꓫ ꓠ ꓡꓳˍ ꓥ= ꓪꓲꓸ ꓗ ꓐꓰ ꓑ-ꓡ-ꓢꓲ-ꓔꓲꓚ ꓔꓯ ꓫ ꓠ ꓡꓳˍ ꓥ= ꓛꓲ ꓡꓹ ꓟ ꓪꓰ ꓤꓼ ꓐꓱ ꓶ ꓙꓽ ꓖꓶꓽ ꓠ ꓡꓳˍ ꓥ= ꓛꓲ ꓡꓹ ꓟ ꓪꓰ ꓤꓼ ꓠꓬ ꓣꓳ ꓤꓼ ꓠꓱ ꓐꓰ ꓡꓲꓸ ꓑ ꓡꓸ ꓟ ꓡꓲ ꓒꓲꓽ ꓐꓴ ꓥˍ ꓡꓳ= ꓣꓳꓽ ꓤꓼ ꓠꓱ ꓐꓴ ꓡꓲꓸ ꓑ ꓡꓸ ꓟ ꓡꓲ ꓒꓲꓽ ꓐꓴ ꓠꓬ ꓛꓲ ꓡꓹ ꓟ ꓪꓰ ꓤꓼ ꓥˍ ꓡꓳ= ꓬꓲ ꓪꓽ ꓐꓱ ꓶ ꓙꓽ ꓖꓶꓽ ꓖꓴ ꓠ ꓗꓹ ꓡꓳ= ꓣꓳ ꓠꓬ ꓠꓯꓸ ꓦꓬꓸ ꓙꓵꓽ ꓢꓲ ꓮꓽ ꓙꓵꓽ ꓧꓪ ꓜꓽ ꓗꓷꓳ= ꓗꓸ ꓠꓯꓸ ꓛꓲ ꓡꓹ ꓟ ꓡꓲꓸ ꓑꓸ ꓡꓲ ꓒꓲ ꓐꓴ ꓐꓱ ꓶ ꓣꓳꓽ ꓠꓬ ꓙꓽ ꓖꓶꓽ ꓖꓴˍ ꓟ ꓟꓽ ꓙꓳ= ꓣꓳ ꓠꓬ ꓮꓽ ꓙꓵꓽ ꓒꓬ ꓗꓶ ꓢꓲ ꓐꓬ ꓡꓰ ꓠ ꓬꓰ ꓗꓶ ꓢꓲ ꓣꓳꓽ ꓡꓲꓸ ꓑꓸ ꓡꓲꓸ ꓒꓲ ꓐꓴ ꓔꓯ ꓛꓹ ꓖꓶꓽ ꓦ ꓔ ꓠꓬ ꓡꓲꓸ ꓑꓸ ꓡꓲꓸ ꓒꓲꓽ ꓐꓴ ꓫꓸ ꓡꓰ ꓓꓴ ꓥꓳ= ꓐꓬ ꓡꓰꓹ ꓟ ꓠꓯꓸꓼ ꓗꓪ ꓗꓶ ꓡꓰ ꓓꓴ ꓥꓳ= ꓖꓳ ꓟ ꓪꓴꓸ ꓠꓬꓲ ꓛꓲ ꓡꓹ ꓟ ꓪꓰ ꓤꓽ ꓐꓯꓹ ꓟ ꓡꓲꓸ ꓑꓸ ꓡꓲꓸ ꓒꓲꓽ ꓐꓴ ꓐꓱ ꓶ ꓣꓳꓽ ꓤꓼ ꓠꓱ ꓐꓴ ꓐꓱ ꓶ ꓓꓵꓽ ꓙꓽ ꓢꓲ ꓟꓬꓱꓽ ꓬꓰ ꓠ ꓗˍ ꓡꓳ=