ꓟꓵꓽ ꓘꓳꓼ ꓐꓰ ꓫꓸ ꓕꓱ_ ꓟ (Dialogue with environment)

 ꓠꓬꓲꓸ ꓠꓬꓲ ꓞꓳ ꓤ ꓢꓯꓸ ꓔꓬ ꓟ ꓠꓹ ꓟ ꓐꓱ ꓶ ꓟꓽ ꓓ ꓞꓳ ꓤ ꓔꓯ ꓐꓬ ꓡꓰ ꓝꓲ_ ꓟ ꓠꓯꓼ ꓗꓪ ꓬꓲꓻ ꓙꓬ ꓟꓽ ꓙꓳ ꓡꓰ_ ꓟ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓟꓽ ꓓ ꓟꓲ ꓠꓯ ꓠꓯꓼ ꓗꓪ ꓫꓵꓽ ꓪꓴ ꓓꓽ ꓟ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓠꓬꓲꓸ ꓠꓬꓲ ꓬꓲꓻ ꓙꓬ ꓕꓱ ꓟ ꓗꓪ ꓫꓵꓺ ꓙꓴꓸ ꓪꓰꓸ ꓙꓴꓸ ꓕꓲ ꓫꓵ ꓡꓲ ꓕꓲ ꓫꓵ ꓬꓰ_ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓠꓬ ꓟꓽ ꓫꓬ ꓬꓰ_ ꓟ ꓥꓳ= ꓡꓳ-ꓟꓲ ꓗꓪ ꓐꓰ ꓐꓯ ꓠꓬ ꓐ-ꓓꓸ ꓐꓯ_ ꓟ ꓕꓱ ꓫꓵ ꓣꓱ_ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓕꓱ ꓟ ꓠꓬ ꓓꓳ ꓟꓽ ꓓ_ ꓟ ꓕꓱ ꓡꓱ ꓗꓷ ꓡꓰ_ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ ꓗꓴꓷꓼ ꓕꓲ ꓐꓱ ꓗꓪ ꓠꓬ ꓬꓲꓻ ꓙꓬ ꓓꓳ ꓟꓽ ꓙꓲ ꓣꓱꓽ ꓟꓽ ꓙꓲ ꓗꓷ ꓡꓰ_ ꓟ ꓥꓳ= ꓖꓳ ꓟ ꓡꓰ ꓐꓰ ꓟꓲ ꓠꓯ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞ ꓡ ꓟ ꓥꓳ= ꓧꓶꓸ ꓕꓯ ꓪꓽ ꓙꓳ_ ꓟ꓾ ꓧꓶꓸ ꓕꓯ ꓠꓬꓲ ꓙꓳ_ ꓟ ꓠꓯꓼ ꓗꓪ ꓠꓬꓲ ꓟꓽ ꓙꓳ ꓡꓰ ꓪꓽ ꓟꓽ ꓙꓳ ꓡꓰ ꓕꓱ ꓡꓱ ꓞ ꓡ_ ꓟ꓾ ꓕꓱ ꓡꓱ ꓪꓽ ꓟꓽ ꓥ ꓠꓬ ꓠꓬꓲ ꓠꓬ ꓙꓵꓻ ꓡꓰ_ ꓟ ꓪꓴꓸ ꓠꓬꓲ ꓬꓲꓻ ꓡꓳ ꓐꓱ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓲꓻ ꓙꓬ ꓙꓵ _ ꓟ ꓗꓷ ꓡꓰ ꓢꓲ꓾ ꓟꓵꓽ ꓟꓲ ꓠꓯ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓲꓻ ꓙꓬ ꓘꓴꓽ ꓗꓪ ꓗꓷ ꓡꓰ ꓟ ꓥꓳ= ꓖꓳ ꓟ ꓡꓰ ꓟ ꓞꓲ Nitrogen ꓐꓯ_ ꓟ ꓕꓱ ꓟ ꓑꓶ ꓓꓴ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓼ ꓦ_ ꓟ꓾ ꓔꓬ ꓟ ꓟꓲꓽ ꓦꓲ ꓥ ꓟꓲ ꓟꓽ ꓢꓲ ꓟꓽ ꓫꓬ ꓗꓷ ꓡꓰ_ ꓟ ꓥ ꓡꓳ= ꓟꓲ ꓠꓯ ꓕꓱ ꓟ ꓔꓯ ꓢꓲꓹ ꓜꓲ ꓘꓶꓹ ꓗꓷ ꓟ ꓑꓶ ꓓꓴ ꓠꓱꓸ ꓦꓱ ꓛꓵ ꓟꓲ ꓠꓯ ꓛꓵ ꓕꓱ ꓟ ꓐꓬ ꓡꓰ ꓢꓲ ꓔꓶꓻ ꓞꓼ ꓕꓶꓻ ꓓꓳ ꓓꓴ ꓟꓽ ꓙꓲ ꓡꓰ_ ꓟ ꓬꓲꓻ ꓙꓬ ꓙꓵ ꓡ ꓕꓯ ꓠꓬ ꓕꓲ ꓔꓷꓹ ꓙꓵ ꓡ_ ꓟ ꓗꓷ ꓡ_ ꓟ ꓥꓳ= ꓕꓱ ꓡꓱ ꓟꓵꓽ ꓛꓵ ꓡꓰ ꓟ ꓠꓱꓸ ꓦꓱ ꓟꓽ ꓙꓲ ꓡꓰ ꓟ ꓪꓴꓸ ꓠꓬꓲ ꓔꓶꓻ ꓜ ꓔꓶꓻ ꓓꓴ ꓥ ꓟꓲ ꓮ ꓘꓸ ꓟꓽ ꓙꓲ꓾ ꓔꓶꓻ ꓜ ꓔꓶꓻ ꓚꓱꓹ ꓥ ꓟꓲ ꓧꓶꓸ ꓕꓯ ꓰ ꓐꓰ ꓟꓽ ꓪ_ ꓟ ꓕꓱ ꓡꓱ ꓗꓷ ꓡꓰ_ ꓟ ꓥꓳ= ꓟꓲ ꓠꓯ ꓕꓯ ꓢꓲ ꓗꓪ ꓞꓳ ꓤ ꓣꓳ 1999 ꓘꓳꓼ 10 ꓦ ꓕꓯ ꓢꓳꓼ ꓠꓬꓲ ꓠꓬ ꓟꓲ ꓠꓯ ꓞꓳ ꓤ ꓵ ꓣꓳ ꓠꓬ 6 ꓟꓶꓽ ꓫꓬꓹ ꓗꓷ ꓡꓰꓳ ꓐꓰ ꓕꓱ ꓡꓱ ꓐꓯ_ ꓡꓳ= 1990 ꓘꓳꓼ ꓕꓯ ꓟꓲ ꓠꓯ ꓞꓳ ꓤ ꓵ ꓣꓳ ꓠꓬ 5 ꓟꓶꓽ ꓫꓬꓹ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ 10 ꓘꓳꓼ ꓠꓬꓲ ꓖꓳꓸ ꓚ ꓗꓪ ꓕꓲ ꓟꓶꓽ ꓫꓬꓹ ꓬꓲꓸ ꓐꓶꓹ ꓟꓬ ꓡ ꓟ ꓥ ꓡꓳ= ꓠꓬꓲꓸ ꓠꓬꓲ 2022 ꓘꓳꓼ ꓗꓪ ꓠꓬ 8 ꓟꓶꓽ ꓫꓬꓹ ꓗꓷ ꓡꓰ ꓪ꓾ ꓖꓳ ꓟ ꓪꓴꓸ ꓠꓬꓲ ꓞꓳ ꓤ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓟꓬ ꓡ ꓔꓬ ꓟ ꓪꓴꓸ ꓠꓬꓲ ꓬꓲꓸ ꓟꓶꓽ ꓗꓪ ꓞꓳ ꓤ ꓐꓲ ꓡꓰ ꓢꓲ꓾ ꓜ ꓪꓳꓼ ꓡꓳꓸ ꓪꓳꓼ ꓫꓸ ꓡ_ ꓟ ꓕꓱ ꓡꓱ ꓗꓷ ꓡ ꓓꓴ ꓥꓳ= ꓞꓳ ꓤ ꓟꓬ ꓡ ꓠꓬ ꓟꓲ ꓠꓯ ꓗꓪ ꓟ ꓢꓲꓹ ꓜꓲ ꓡꓳ ꓜꓲ ꓟꓬ ꓠꓬꓲ ꓐꓬ ꓡꓰ ꓧꓪ ꓜ ꓧꓪ ꓓꓳ ꓬꓰ_ ꓟ ꓕꓱ ꓟ ꓥ ꓟꓲ ꓟꓬ ꓠꓬꓲ ꓬꓰ ꓡ_ ꓟ ꓪꓴꓸ ꓠꓬꓲ ꓟꓲ ꓠꓯ ꓠꓬ ꓟꓬ ꓠꓬꓲ ꓐꓬ ꓡ ꓓꓴ ꓥꓳ= ꓟꓲ ꓠꓯ ꓕꓱ ꓟ ꓠꓬ ꓬꓲꓸ ꓟꓶꓽ ꓗꓪ ꓞꓳ ꓤ ꓡꓰ ꓐꓬ ꓡꓰ ꓝꓲ_ ꓟ ꓠꓯꓼ ꓗꓪ ꓗꓷ ꓡꓰ ꓢꓲ ꓟꓲ ꓠꓯ ꓠꓬ ꓟꓶꓽ ꓡꓰ ꓓꓴ ꓥꓳ ꓐꓰ ꓕꓱ ꓡꓱ ꓢꓪꓼ ꓔꓬ ꓟ ꓥ ꓡꓳ= ꓠꓬꓲꓸ ꓠꓬꓲ ꓞ ꓟꓵꓽ ꓗꓪ ꓠꓬ ꓢꓲꓹ ꓜꓲ ꓡꓳ ꓜꓲ ꓟꓽ ꓙꓳ ꓡꓰ_ ꓟ ꓢꓲꓹ ꓜꓲ ꓡꓳ ꓜꓲ ꓔꓯ ꓣꓴ ꓠ ꓗꓷ_ ꓟ ꓕꓯ ꓢꓲ ꓮ ꓟꓬ ꓣꓴ ꓗꓷ_ ꓟ ꓕꓱ ꓡꓱ ꓗꓷ ꓡꓰ_ ꓟ ꓥ ꓡꓳ=