ꓟꓵꓽ ꓘꓳꓼ ꓐꓰ ꓶꓺ ꓡꓯꓼ (Environment)

1998 ꓘꓳꓼ ꓕꓯꓽ ꓮꓢꓲꓮ ꓗꓪ ꓟ ꓶꓺ ꓡꓯꓼ ꓟꓴ ꓚꓱꓹ ꓠꓬ ꓠ ꓓꓴ ꓒꓬꓽ ꓓꓴ ꓔꓳꓹ ꓜꓳꓽ ꓔꓬ ꓡꓳ= ꓐꓯ ꓟꓴ ꓫꓱˍ ꓟ ꓠꓬ ꓶꓺ ꓡꓯꓼ ꓟꓴ ꓚꓱꓹ ꓠꓯꓸꓼ ꓗꓪ ꓢꓯꓼ ꓟꓽ ꓙꓳˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓣ-ꓫ ꓗꓴꓷꓼ ꓒꓴ ꓣꓴꓐꓡꓰ ꓬꓲ ꓒꓵꓼ ꓞꓲ ꓡꓰˍ ꓟ ꓑꓶꓸ ꓓꓴ ꓫꓸ ꓢꓴ ꓟꓶꓽ ꓢꓴ ꓗꓴꓷ ꓗꓴꓷꓼ ꓗꓪ ꓬꓰ ꓙˍ ꓟ ꓒꓴ ꓮꓽ ꓟꓬꓹ ꓟꓽ ꓪ ꓟ ꓪꓴꓸ ꓠꓬꓲ ꓠꓲ ꓟꓬꓽ ꓠꓬꓲ ꓕꓱ ꓡꓰ ꓗꓶ ꓡꓰˍ ꓓꓴ ꓟ ꓥ ꓪ ꓐꓰ ꓕꓱ ꓡꓰ ꓐꓯˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓢꓔꓳꓚꓗ ꓢꓧꓮꓣꓰ ꓐꓯˍ ꓟ ꓒꓴ ꓟꓬꓽ ꓡ ꓐꓶꓹ ꓡˍ ꓟ ꓥˍ ꓠꓬ ꓣꓳ ꓡꓰˍ ꓟ ꓚꓱꓹ ꓟꓸ ꓖꓶˍ ꓟ ꓶꓺ ꓡꓯꓼ ꓬꓰˍ ꓟ ꓚꓱꓹ ꓕꓱ ꓕꓲꓽ ꓘꓴꓸ ꓗꓪ ꓮ ꓕꓯꓽ ꓥˍ ꓟꓲ ꓥꓽ ꓑꓳꓸ ꓓꓯ ꓡˍ ꓟ ꓟꓽ ꓙꓳ ꓞꓲ ꓡꓰˍ ꓟ ꓪꓴꓸ ꓠꓬꓲ ꓥˍ ꓡꓳ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓶꓺ ꓡꓯꓼ ꓟꓴˍ ꓟ ꓞꓲ ꓡꓰˍ ꓕꓯ ꓠꓬ ꓗꓴꓷꓼ ꓕꓲꓽ ꓗꓴꓷꓼ ꓡꓰ ꓕꓲꓽ ꓗꓴꓷꓼ ꓗꓪ ꓫꓸ ꓓꓴ ꓟꓡꓽ ꓓꓴ ꓕꓱ ꓡꓰ ꓮꓽ ꓟꓬ ꓔꓳꓹ ꓜꓳˍ ꓟ ꓥ ꓪ= ꓕꓱ ꓡꓰ ꓟꓲ ꓠꓯ ꓗꓪ ꓟ ꓶ ꓡꓯꓼ ꓟꓴ ꓚꓱꓹ ꓟꓽ ꓙꓲ ꓠꓬ ꓫꓸ ꓢꓴ ꓟꓶꓽ ꓢꓴ ꓗꓴꓷꓼ ꓠꓯꓸꓼ ꓗꓪ ꓙꓶˍ ꓟ ꓶ ꓡꓯꓼ ꓥˍ ꓟꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓬꓽ ꓡˍ ꓟ ꓥ ꓪ=

ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓟꓽ ꓓ ꓫꓸ ꓔ ꓟ ꓗꓴꓷꓼ ꓐꓴ ꓠꓯꓸꓼ ꓗꓪ ꓠꓬ ꓟꓵꓽ ꓘꓳꓼ ꓥˍ ꓟꓲ ꓟꓬꓽ ꓠꓬꓲ ꓐꓬ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓞꓳ ꓤ ꓥˍ ꓟꓲ ꓟꓬ ꓠꓬꓲ ꓫꓸ ꓡꓰˍ ꓓꓴ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓬ ꓶꓺ ꓡꓯꓼ ꓔꓯ ꓚꓱꓹ ꓠˍ ꓟ ꓢꓯꓼ ꓕꓵꓼˍ ꓟ ꓪꓴꓸ ꓠꓬꓲ ꓞꓳ ꓫꓸ ꓗꓴꓷꓼ ꓐꓴ ꓠꓬ ꓑ ꓫꓬꓽ ꓐꓴ ꓔꓯ ꓬꓲ ꓙ ꓔ ꓙˍ ꓟ ꓠꓯ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓬ ꓞꓲꓼ ꓫꓹ ꓖꓶˍ ꓟ ꓠꓯꓸꓼ ꓗꓪ ꓒꓴ ꓮꓽ ꓟꓬꓹ ꓣꓱꓽ ꓓꓴ ꓟꓽ ꓙꓳ ꓕꓱ ꓡꓰ ꓗꓶ ꓡꓰ ꓢꓲ ꓠꓬꓲ ꓑ ꓫꓬꓽ ꓐꓴ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓧꓪꓸ ꓧꓪꓼ ꓔꓬ ꓟꓶ ꓠˍ ꓟ ꓫꓸ ꓔ ꓟ ꓡꓰ ꓟꓽ ꓞꓲ ꓜꓽ ꓪꓳ ꓡꓳꓸ ꓪꓳ ꓥˍ ꓟꓲ ꓫꓸ ꓡꓰˍ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓶꓺ ꓡꓯꓼ ꓚꓱꓹ ꓠˍ ꓟ ꓐꓱ ꓶ ꓟꓵꓽ ꓘꓳꓼ ꓔꓯ ꓥˍ ꓟꓲ ꓐꓬ ꓡꓰ ꓝꓲˍ ꓟ ꓒꓴ ꓤꓼ ꓫꓵ ꓤꓼ ꓧꓪꓸ ꓟ꓾ ꓢꓲ ꓜꓲ ꓘꓶˍ ꓔ ꓟ꓾ ꓫꓵ ꓚꓴꓸ ꓔ ꓟ꓾ ꓑꓳꓽ ꓫꓵꓽ ꓚꓴꓸ ꓔ ꓟ ꓕꓱ ꓡꓲꓳ ꓫꓵꓽ ꓚꓴꓸ ꓔ ꓟ ꓪꓴꓸ ꓠꓬꓲ ꓥˍ ꓡꓳ= ꓗꓴꓷꓼ ꓗꓪ ꓟ ꓟꓵꓽ ꓘꓳꓼ ꓐꓬ ꓡꓰ ꓠ ꓬꓰˍ ꓟ ꓶꓺ ꓡꓯꓼ ꓟꓴˍ ꓟ ꓮꓽ ꓟꓬꓹ ꓕꓱ ꓡꓰ ꓬꓰ ꓢꓲ ꓶꓺ ꓡꓯꓼ ꓔꓯ ꓚꓱꓹ ꓠˍ ꓟ ꓢꓯꓼ ꓕꓵꓼˍ ꓟ ꓪꓴꓸ ꓠꓬꓲ ꓥ ꓪ=

1980 ꓘꓳꓼ ꓔꓯ ꓛꓳꓽ ꓠꓬꓲ ꓕꓯ꓾ ꓞꓳ ꓫꓸ ꓗꓴꓷꓼ ꓐꓴ ꓶꓺ ꓡꓯꓼ ꓚꓱꓹ ꓠꓬꓲ ꓔ ꓟ ꓠꓬ 600 ꓐꓲꓡꓡꓲꓳꓠ ꓙꓳˍ ꓡꓳ= 1 ꓐꓲꓡꓡꓲꓳꓠ ꓐꓯˍ ꓟ ꓠꓬ 10ꓹ000 ꓫꓬꓹ ꓔꓯ ꓐꓯˍ ꓟ ꓥˍ ꓪ= 1999 ꓘꓳꓼ ꓕꓯꓽ ꓠꓬ 2 ꓕꓣꓲꓡꓡꓲꓳꓠ ꓗꓪ ꓛꓲ ꓟꓬ ꓡˍ ꓟ ꓔꓯ ꓐꓯˍ ꓟ ꓥ ꓪ= 1 ꓔꓣꓲꓡꓡꓲꓳꓠ ꓐꓯˍ ꓟ ꓠꓬ 1ꓹ000 ꓫꓬˍ ꓟ 10ꓹ 000 ꓧꓪꓹ ꓥ ꓕꓯꓽ ꓢꓲ 1 ꓔꓣꓲꓡꓡꓲꓳꓠ ꓐꓯˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ 2 ꓕꓣꓲ ꓡꓡꓲꓳꓠ ꓐꓯˍ ꓕꓯ ꓠꓬ 10ꓹ 000 ꓫꓬˍ ꓟ 2ꓹ000 ꓧꓪꓹ ꓗꓶ ꓡꓰ ꓕꓯ ꓢꓲ ꓠꓬꓲ 2 ꓔꓣꓲꓡꓡꓲꓳꓠ ꓐꓯˍ ꓟ ꓥ ꓪ=