ꓟꓵꓽ ꓘꓳꓼ ꓒꓳꓹ ꓡꓹ ꓟ ꓔꓯ ꓫꓬꓹ ꓑꓱ ꓠˍ ꓟ ꓠꓬ ꓣꓳꓽ ꓶ (Environment)

ꓞꓳ ꓤꓽ ꓮꓽ ꓟꓬꓹ ꓠꓬ ꓟꓵꓽ ꓘꓳꓼ ꓐꓰ ꓙꓲ-ꓢꓴ ꓢꓲꓺ ꓤꓼ ꓙꓵ ꓠꓲꓹ ꓝꓸ ꓡꓯꓽ ꓘꓳˍ ꓟ ꓟꓽ ꓙꓳ ꓐꓰ ꓐꓯ ꓔꓬꓹ ꓟ ꓪꓴꓸ ꓠꓬꓲ ꓟꓽ ꓥ= ꓞꓳ ꓤꓽ ꓮꓽ ꓟꓬꓹ ꓠꓬ ꓟꓵꓽ ꓘꓳꓼ  ꓐꓰ ꓙꓲ-ꓢꓴ ꓢꓲꓺ ꓤꓼ ꓙꓵ ꓠꓲꓹ ꓠꓬ ꓝꓸ ꓡꓯꓽ ꓘꓳ ꓟ ꓙꓳ ꓢꓲ ꓚꓵ ꓚꓵ ꓬꓳꓸ ꓚꓵˍ ꓡꓳ ꓐꓰ ꓕꓱ ꓡꓰ ꓖꓪꓽ ꓙꓱ ꓞꓲꓹ ꓔ ꓟ ꓪꓽ ꓡꓯꓽ ꓘꓳꓹ ꓟ ꓙꓳˍ ꓡꓳ= ꓖꓳ ꓡꓰ ꓥˍ ꓟꓲ ꓚꓵ ꓚꓵ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓝꓲꓸˍ ꓟ ꓔꓯ ꓡꓳꓸ ꓙ ꓒꓳꓽ ꓙꓹ ꓟ ꓗꓽ ꓕꓸ ꓙˍ ꓟ ꓕꓱ ꓡꓲꓳ ꓫꓵꓽ ꓟꓽ ꓙꓳ ꓠꓱꓸ ꓔꓬˍ ꓟ ꓥˍ ꓡꓳ= ꓪꓴ-ꓢ ꓐꓰ ꓟꓲ ꓠꓯ ꓞꓳ ꓤꓽ ꓖꓳ ꓟ ꓡꓰ ꓟꓽ ꓞꓲ ꓟꓴ ꓗꓳꓹ ꓓꓵ ꓓꓵ ꓝꓸ ꓡꓯꓽ ꓘꓳꓹ ꓟ ꓙꓳ ꓥ ꓐꓯꓹ ꓟ ꓔꓯ ꓧꓪ ꓟꓲꓹ ꓦˍ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓐꓳ ꓔ ꓟ ꓕꓳ ꓶ ꓐꓳ ꓛꓱ ꓩꓴ ꓡˍ ꓟ ꓕꓳ ꓶ ꓕꓱ ꓡꓲꓳ ꓫꓵꓽ ꓙꓳ ꓢꓲ ꓚꓵ ꓚꓵ ꓝꓸ ꓡꓯꓽ ꓘꓳˍ ꓟ ꓙꓳˍ ꓥ ꓐꓯ ꓔꓯ ꓘꓳꓹ ꓣꓴ ꓟ ꓥ ꓪ=

ꓲ-ꓣꓲ-ꓡꓮꓠꓓ ꓗꓴꓷꓼ ꓗꓪ ꓛꓳ ꓠꓬꓲ ꓠꓬ ꓲ-ꓣꓲ-ꓡꓮꓠꓓ ꓟꓵꓽ ꓗꓪ ꓟ ꓟꓵꓽ ꓘꓳꓼ ꓒꓳꓹ ꓡˍ ꓟ ꓖꓳ ꓟ ꓡꓰ ꓟꓽ ꓞꓲ ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓟ ꓟꓵꓽ ꓘꓳꓼ ꓒꓳꓹ ꓡˍ ꓟ ꓖꓳ ꓟ ꓪꓴꓸ ꓠꓬꓲ ꓒꓬꓱꓼ ꓡˍ ꓟ ꓫꓵꓽ ꓪꓴ ꓢꓲꓹ ꓛꓵꓽ ꓒꓬꓱꓼ ꓡˍ ꓟ ꓕꓱ ꓟ ꓔꓯ ꓓꓽ ꓪꓴꓸ ꓐꓳ ꓢꓴ ꓠꓬ ꓔꓲꓺ ꓒꓽ ꓟꓴꓣꓑꓧꓬ ꓥˍ ꓡꓳ= ꓠꓱꓸ ꓐꓯꓼ ꓔꓲꓺ ꓒꓽ ꓓꓽ ꓐꓴ ꓖꓳ ꓟ ꓡꓰ ꓟꓽ ꓞꓲ ꓔꓲꓺ ꓒꓽ ꓓꓽ ꓐꓴ ꓖꓪ ꓙꓱ ꓜꓲꓼˍ ꓟ ꓗꓪ ꓥˍ ꓟꓲ ꓟꓵꓽ ꓘꓳꓼ ꓒꓳꓹ ꓡˍ ꓟ ꓚꓱꓹ ꓔ ꓟꓳꓸ ꓐꓳ ꓔ ꓡꓳ= ꓕꓱ ꓡꓰ ꓐꓳꓹ ꓟ ꓠꓯ ꓗꓪ ꓒꓲ-ꓡꓲ-ꓑꓮꓲ ꓗꓴꓷꓼ ꓗꓪꓔꓲꓺ ꓓꓽ ꓐꓴ ꓓꓽ ꓪꓴꓸ ꓐꓳ ꓔ ꓟ ꓥ ꓪ= 1998 ꓘꓳꓼ ꓕꓯꓽ "ꓮꓽ ꓘꓡꓸ ꓐꓲ ꓞˍ ꓟ ꓣꓳ ꓟꓲ ꓠꓯ ꓕꓱ ꓟ ꓠꓬ ꓮ ꓡꓰ ꓗꓷ ꓡꓰ ꓡ?" ꓐꓰ ꓪꓴꓸ ꓓꓵ ꓛꓹ ꓢꓲ ꓕꓳ ꓶ ꓐꓳ ꓔ ꓟ ꓙꓳˍ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓲ-ꓔ-ꓡꓲ ꓗꓪ ꓟ ꓔꓲꓺ ꓒꓽ ꓓꓽ ꓐꓴ ꓥˍ ꓟꓲ ꓐꓳꓹ ꓟ ꓙꓳˍ ꓡꓳ= ꓖꓪ-ꓔꓲ-ꓟ-ꓡ ꓗꓪ ꓚꓳꓸ ꓔꓲꓺ ꓒꓽ ꓓꓽ ꓐꓴ ꓡꓰ " ꓟꓲ ꓠꓯ ꓥꓳ ꓢꓯꓼ" ꓐꓯ ꓢꓲ ꓕꓱ ꓡꓰ ꓐꓳ ꓔ ꓟ ꓥˍ ꓟꓲ ꓙꓳˍ ꓡꓳ= ꓯ-ꓟꓰ-ꓣꓲ-ꓗꓮꓠ ꓗꓪ ꓚꓳꓸ ꓔꓲꓺ ꓒꓽ ꓓꓽ ꓐꓴ ꓥˍ ꓟꓲ 1991 ꓘꓳꓼ ꓕꓯꓽ ꓟꓵꓽ ꓘꓳꓹ ꓒꓳꓹ ꓡˍ ꓟ ꓚꓱꓹ ꓔꓯ ꓟꓳꓸ ꓕꓳ ꓶ ꓕꓲꓽ ꓚꓳꓸ ꓐꓳ ꓔ ꓟ ꓙꓳˍ ꓡꓳ= ꓕꓱ ꓡꓰ ꓐꓳ ꓔ ꓟ ꓙꓳ ꓥˍ ꓟꓲ ꓲ-ꓣꓲ-ꓡꓮꓠꓓ ꓗꓴꓷꓼ ꓢꓴ ꓡꓰ ꓟꓽ ꓞꓲ ꓠꓱꓸ ꓐꓯꓼ ꓮꓽ ꓟꓬꓹ ꓔꓶꓸ ꓗꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓐꓬ ꓡꓰˍ ꓟ ꓔꓯ ꓠꓬ ꓐꓳ ꓑꓶ ꓔ ꓟ ꓟꓽ ꓙꓳ=

Vꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ "Vꓮꓔꓲꓚꓮꓠ ꓲꓲ ꓚꓳꓠꓢꓔꓲꓔꓴꓔꓲꓳꓠ ꓳꓠ ꓔꓧꓰ ꓚꓧꓴꓣꓚꓧ ꓲꓠ ꓔꓧꓰ ꓟꓳꓓꓰꓣꓠ ꓪꓳꓣꓡꓓ" ꓐꓯꓹ ꓟ ꓕꓳ ꓶ ꓗꓪ ꓛꓳꓽ ꓠꓬꓲ ꓠꓬ ꓟꓲ ꓠꓯ ꓐꓬ ꓡꓰˍ ꓟ ꓚꓱꓹ ꓠꓬ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓝꓮꓲ ꓕꓲꓽ ꓧꓪꓹ ꓫꓬꓹ ꓑꓱ ꓠˍ ꓟ ꓟꓬꓱꓽ ꓓꓽ ꓟ ꓙꓳˍ ꓡꓳ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓗꓹ ꓛꓲꓽ ꓓꓴ ꓥ ꓕ ꓑꓳ ꓥꓳ ꓡꓳꓸ ꓓꓴ ꓥ ꓕ ꓑꓳꓸ ꓫꓸ ꓙꓲ ꓟꓶꓽ ꓙꓲ ꓓꓴ ꓥ ꓕ ꓑꓳꓸ ꓠꓲꓹ ꓟ ꓦꓲ ꓓꓴ ꓥ ꓕ ꓑꓳꓸ ꓟꓬꓽ ꓠꓬꓲ ꓐꓶꓹ ꓠꓬꓲ ꓫꓸ ꓢꓴ ꓟꓶꓽ ꓢꓴ ꓐꓴ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓮꓽ ꓙꓵ ꓠꓬ ꓙꓲ-ꓢꓴ ꓗꓸ ꓠꓯꓸ ꓢꓲ ꓗꓪ ꓖꓼ ꓢꓴ ꓐꓴ ꓗꓹ ꓛꓲˍ ꓟ ꓥꓳ ꓡꓳꓸ ꓓꓴ ꓥˍ ꓟ ꓠꓲ ꓫꓸ ꓟꓬ ꓫꓸ ꓓꓴ ꓥˍ ꓟ ꓠꓲꓹ ꓟ ꓦꓶ ꓓꓴ ꓥˍ ꓟ ꓕꓱ ꓡꓲꓳ ꓫꓵꓽ ꓥˍ ꓡꓳ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓐꓯ ꓟꓵ ꓢꓪꓹ ꓟ ꓠꓬ ꓠꓬꓲꓸ ꓠꓬꓲ ꓟꓲ ꓠꓯ ꓘꓪ ꓒꓬꓱꓼ ꓡꓹ ꓟ ꓥ ꓕ ꓑꓳꓸ ꓕꓱ ꓟ ꓠꓬ ꓙꓲ-ꓢꓴ ꓢꓲ ꓤꓼ ꓐꓴ ꓠꓯꓸꓼ ꓗꓪ ꓟꓯ ꓠꓬꓲ ꓔ ꓟ ꓟꓬꓱꓽ ꓓꓽ ꓟ ꓶ ꓓꓽ ꓟ ꓥˍ ꓡꓳ= ꓟꓽ ꓙꓲˍꓟ ꓔꓯ ꓫꓬꓹ ꓑꓱ ꓠꓹ ꓟ ꓟꓲ ꓠꓯ ꓐꓬ ꓡꓰˍ ꓟ ꓟꓵꓽ ꓘꓳꓼ ꓒꓳꓹ ꓡˍ ꓟ ꓔꓯ ꓫꓬꓹ ꓑꓱ ꓠꓹ ꓟ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ ꓶ ꓓꓽ ꓟ ꓟꓬꓱꓽ ꓓꓽ ꓟ ꓙꓳ ꓡꓳ ꓐꓰ ꓕꓱ ꓡꓰ ꓐꓯꓹ ꓟ ꓥ ꓪ=

ꓕꓱ ꓟ ꓕꓳ ꓶ ꓔꓯ ꓐꓳ ꓢꓴ ꓠꓬ 1970 ꓘꓳꓼ ꓕꓯꓽ ꓒꓲ-ꓡꓲ-ꓑꓮꓲ ꓗꓴꓷꓼ ꓗꓪ ꓪꓴ-ꓢ ꓟꓬꓱꓽ ꓪꓴꓸ ꓠꓬꓲ ꓛꓲ ꓡˍ ꓟ ꓥˍ ꓡꓳ= ꓕꓱ ꓡꓰ ꓬꓲ ꓛꓲ ꓡꓹ ꓕꓯ ꓬꓲ ꓔꓳꓹ ꓜꓳˍ ꓟ ꓬꓲ ꓟꓳˍ ꓟ ꓑꓶꓸ ꓓꓴ ꓕꓳ ꓶ ꓕꓱ ꓟ ꓔꓯ ꓐꓳ ꓠꓹ ꓟ ꓒꓬꓱꓼ ꓡˍ ꓟ ꓥˍ ꓡꓳ ꓐꓰ ꓐꓯˍ ꓡꓳ= ꓮ ꓡꓲꓳ ꓐꓯ ꓠꓬ ꓒꓲ-ꓡꓲ ꓑꓮꓲ ꓗꓴꓷꓼ ꓗꓪ ꓞꓹ ꓟ ꓟꓵꓽ ꓗꓪ ꓙꓳˍ ꓟ ꓢꓲꓹ ꓜꓲ ꓡꓳ ꓜꓲ ꓮꓽ ꓙꓵ ꓠꓬ ꓟꓬ ꓢꓶꓽ ꓟꓬ ꓟꓳ ꓐꓬ ꓡꓰˍ ꓟ ꓟꓶꓽ ꓡꓰˍ ꓟ ꓔꓯ ꓬꓲ ꓡꓳꓸ ꓟꓳ ꓗꓷꓳ= ꓢꓲꓹ ꓜꓲ ꓡꓳ ꓜꓲ ꓐꓬ ꓡꓰꓳ ꓟ ꓟꓶꓽ ꓡꓰˍ ꓟ ꓪꓴꓸ ꓠꓬ ꓟꓲ ꓠꓯ ꓧꓪꓽ ꓐꓰ ꓞꓳ ꓤꓽ ꓥˍ ꓟꓲ ꓫꓸ ꓓꓴ ꓔꓳꓹ ꓜꓳꓽ ꓡˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓦ ꓟꓲ ꓦ ꓐꓽ ꓡꓳ ꓗꓸ ꓬꓲꓽ ꓟ ꓬꓲ ꓐꓱ ꓬꓲ ꓡꓴꓽ ꓐꓱ ꓖꓳ ꓟ ꓡꓰ ꓟꓽ ꓞꓲ ꓢꓲꓹ ꓜꓲ ꓡꓳ ꓜꓲ ꓟꓵꓽ ꓕ ꓑꓳꓸ ꓐꓬ ꓡꓰˍ ꓟ ꓕꓱ ꓟ ꓔꓯ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓮꓸ ꓫꓵꓽ ꓥˍ ꓟꓲ ꓟꓽ ꓐꓯ ꓕꓱ ꓡꓰ ꓔꓬꓹ ꓟ ꓔꓯ ꓕꓳ ꓶ ꓐꓳ ꓢꓴ ꓠꓬ ꓮ' ꓡꓰ ꓢꓲ ꓐꓳ ꓡꓹ ꓟ ꓥ ꓪ= ꓖꓳ ꓕꓲꓽ ꓙꓵꓹ ꓗꓪ ꓒꓲ-ꓡꓲ-ꓑꓮꓲ ꓘꓴ ꓜꓲꓼ ꓞꓳ ꓠꓬ ꓞꓳ ꓤꓽ ꓪ ꓙꓵꓽ ꓪꓽ ꓚꓱꓹ ꓔꓯ ꓟꓳꓸ ꓞꓳ ꓤꓽ ꓔꓯ ꓥꓲꓸ ꓔ ꓟ ꓚꓱꓹ ꓔꓯ ꓟꓳꓸ ꓔꓱꓹ ꓚꓵˍ ꓟ ꓚꓱ ꓕꓱ ꓡꓲꓳ ꓫꓵꓽ ꓔꓯ ꓮꓽ ꓘꓶꓸ ꓐꓯ ꓔꓬ ꓥˍ ꓟꓲ ꓪꓴ-ꓢ ꓡꓰ ꓚꓱꓹ ꓔ ꓟ ꓟꓵꓽ ꓘꓳꓼ ꓪꓴ-ꓢ ꓡꓰ ꓚꓰꓼ ꓔ ꓟ ꓢꓲꓹ ꓜꓲ ꓡꓳ ꓜꓲ ꓪꓴ-ꓢ ꓡꓰ ꓚꓰꓼ ꓔ ꓟ ꓟꓲꓠꓯ ꓕꓱ ꓟ ꓐꓬ ꓡꓰˍ ꓟ ꓔꓯ ꓠꓬ ꓮꓽ ꓟ ꓥˍ ꓟꓲ ꓐꓯ ꓢꓴ ꓟꓽ ꓙꓳ=