ꓟꓶꓽ ꓙꓲꓻ ꓖꓴ ꓙꓳˍ ꓟ

ꓟꓶꓽ ꓗꓪ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓢꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓘꓶꓸ ꓙꓲˍ ꓟ ꓥ ꓡꓳ= ꓟꓶꓽ ꓜꓽ ꓖꓶˍ ꓟ ꓑꓶꓸ ꓓꓴ ꓟꓶˍ ꓟ ꓙꓲꓻ ꓖꓴ ꓐꓴ ꓠꓬ

1. ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓟꓽ ꓟꓴ ꓓꓯ ꓠ ꓬꓰ ꓖꓶˍ ꓟ

ꓦꓯꓹ ꓒꓶꓼ ꓔꓯ ꓣꓱꓽ ꓢꓲ ꓚꓬꓹ ꓠꓬꓲ ꓔ ꓟ ꓗꓪ ꓟꓶꓽ ꓜꓽˍ ꓟ ꓦꓯꓹ ꓒꓶꓼ ꓐꓴ ꓬꓲ ꓪ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓠꓬ ꓠꓲꓸ ꓡꓰ ꓢꓲ ꓧꓪꓽ ꓖꓳ ꓓꓱꓽ ꓚꓱꓻ ꓡꓰ ꓟ ꓐꓰ꓾ ꓝꓮꓲ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼˍ ꓟꓲ ꓢꓷꓸ ꓢꓷꓸ ꓡꓰꓽ ꓙꓵꓽ ꓐ ꓡˍ ꓟ ꓔꓯ ꓟꓳꓻ ꓪˍ ꓟ ꓥ ꓡꓳ=

ꓖꓳ ꓡꓱ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓙꓵꓽ ꓐ ꓡˍ ꓟ ꓠꓬ ꓟꓶꓽ ꓘꓴꓽ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

1. ꓚꓮꓠꓚꓰꓣ ꓠꓻ ꓔꓯ ꓫꓬꓹ ꓓꓻ ꓡꓰ ꓝꓲˍ ꓟ

ꓟꓶꓽ ꓘꓴꓽ ꓗꓪ ꓚꓮꓠꓚꓰꓣ ꓠꓻ ꓔꓯ ꓗꓽ ꓔ ꓖꓶ ꓐ ꓡˍ ꓟ ꓮꓠꓔꓲꓳꓫꓲꓓꓮꓠꓔꓢ ꓮ ꓟꓬꓹ ꓙꓳˍ ꓠꓬꓲ ꓮ ꓕꓯ ꓟꓲ ꓜꓽ ꓖꓶˍ ꓕꓯ ꓠꓽ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓐꓰ ꓠꓱꓸ ꓐꓯ ꓚꓮꓠꓚꓰꓣ ꓚꓰꓡꓡ ꓐꓴ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶ ꓐ ꓡˍ ꓡꓳ=

1. ꓳˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟꓶ ꓤ ꓳˍ ꓟ ꓠꓬ ꓠꓲꓹ ꓟ ꓠꓻ꓾ ꓓꓲꓮꓐꓰꓔꓰꓢ ꓠꓻ ꓐꓰ ꓮ ꓘꓶꓸ ꓘꓪꓽ ꓡ ꓒꓸ ꓡ ꓟ ꓠꓻ ꓐꓴ ꓐꓰ ꓝꓸ ꓡꓯ ꓘꓳ ꓓꓹ ꓡꓳ= ꓳˍ ꓟ ꓔꓯ ꓠꓲꓸ ꓡꓰ ꓝꓲ ꓬꓯꓼ ꓡꓰ ꓝꓲ ꓓꓴ ꓐꓱ ꓶ ꓮꓠꓔꓲꓳꓫꓲꓓꓮꓠꓔꓢ ꓐꓴ ꓮ ꓟꓬꓹ ꓙꓳˍ ꓟ ꓟꓶꓽ ꓠꓬ ꓮ ꓘꓶꓸ ꓙꓲˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ꓾ ꓟꓶꓽ ꓠꓬ ꓦꓰꓼ ꓟ ꓬꓲꓸ ꓑ ꓒꓬꓱꓼ ꓡˍ ꓟ ꓔꓯˍ ꓟꓲ ꓗꓽ ꓕꓸ ꓖꓶ ꓐ ꓡ ꓢꓲ ꓦꓰꓼ ꓟ ꓔꓬꓹ ꓢ ꓓꓴ ꓐꓱ ꓶ ꓬꓰ ꓙ ꓔꓳꓹ ꓙ ꓐ ꓡˍ ꓡꓳ=

1. ꓪꓴꓸ ꓠꓷꓸ ꓟꓬꓱꓽ ꓬꓰˍ ꓟ ꓔꓯ ꓢꓯꓼ ꓡꓴꓽ ꓖꓶˍ ꓟ

ꓬꓲ ꓠꓽ 12 ꓠꓽ ꓛꓲꓺ ꓧꓪ ꓟꓰꓹ ꓠꓬꓲ ꓔ ꓟ ꓗꓪ ꓟꓶꓽ ꓜꓽ ꓔ ꓢꓲ ꓚꓲꓸ ꓟꓶ ꓓꓴ ꓔꓯ ꓚꓬꓹ ꓠꓬꓲˍ ꓟ ꓕꓳꓽ ꓶ ꓠꓺ ꓠꓬꓲˍ ꓟ ꓔꓯ ꓒꓳꓹ ꓢꓴ ꓐꓴ ꓠꓬ ꓟꓶꓽ ꓟꓽ ꓜꓽ ꓔ ꓢꓴ ꓐꓴ ꓢꓶꓸ ꓟꓽ ꓞꓲꓺ ꓮ-ꓟ ꓪ ꓜꓲ ꓟꓬꓽˍ ꓟ ꓔꓯ ꓟꓳꓻ ꓪˍ ꓡꓳ ꓐꓰ ꓢꓷꓸ ꓪ ꓡꓳ=

ꓟꓶꓽ ꓘꓴꓽ ꓗꓪ Diosgenin ꓐꓰ ꓘꓴˍ ꓟ ꓢꓯꓼ ꓕꓲ ꓫꓵꓽ ꓓꓯꓹ ꓟ ꓥ ꓢꓲ꓾ ꓖꓳ ꓟ ꓠꓬ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓢꓯꓼ ꓔꓯ ꓟꓴꓺ ꓓꓯ ꓡꓰ ꓝꓲ ꓢꓲ ꓪꓴꓸ ꓠꓷꓸ ꓟꓬꓱꓽ ꓬꓰˍ ꓟ ꓔꓯ ꓪꓽ ꓠꓬꓲ ꓡꓰ ꓝꓲ ꓐ ꓡˍ ꓡꓳ=