ꓟꓺ ꓛꓵꓻ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓮ ꓘꓶꓸ ꓞꓻ ꓡˍ ꓟ ꓞꓻ ꓝꓲꓸ (ꓡꓱꓻ ꓝꓲꓸ) ꓗꓪ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓞꓻ ꓢꓯꓼ ꓪꓴꓸ ꓠꓬꓲ ꓚꓵꓸ ꓬꓲꓻ ꓮ ꓟꓬꓹ ꓓꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓠꓲꓸ ꓡꓰ ꓝꓲ ꓐ ꓡˍ ꓡꓳ= ꓮ ꓟꓶ ꓞꓻ ꓝꓲꓸ ꓡꓱꓻ ꓝꓲꓸ ꓗꓪ ꓓꓳꓻ ꓠꓯꓹ ꓟ ꓒꓬꓮꓪ-ꓬꓰ ꓐꓴ ꓘꓴꓽ ꓗꓪ ꓞꓳ ꓤ ꓮ ꓟꓬꓹ ꓓꓳꓻ ꓔꓬ ꓟ ꓕꓲ ꓫꓵꓽ ꓥ ꓢꓲ ꓧꓪꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓧꓳꓽ ꓡꓴꓽ ꓖꓶ ꓐ ꓡˍ ꓟ ꓟꓺ ꓛꓵꓻ ꓬꓲꓻ ꓙꓲꓻ ꓖꓴ ꓙꓳˍ ꓟ ꓚꓱꓹ 6 ꓙꓰ: ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

(1)  ꓟꓺ ꓛꓵꓻ ꓗꓪ Vitamin B꓾ Vitamin C꓾ Iron ꓐꓰ Magnesium ꓢꓯꓼ ꓐꓴ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓪꓴꓽ ꓓꓲꓻ꓾ ꓫꓵꓽ ꓒꓬꓸ꓾ ꓠꓲꓹ ꓟ ꓐꓰ ꓦꓰꓼ ꓟ ꓐꓴ ꓔꓯ ꓟꓬꓽ ꓠꓬꓲ ꓢꓯꓼ ꓖꓶˍ ꓡꓳ=

(2)  ꓧꓪꓽ ꓖꓳ ꓓꓱꓽ ꓔꓯ ꓢꓯꓼ ꓒꓬꓱꓼ ꓡꓰ ꓝꓲˍ ꓟ Glucose ꓢꓯꓼ ꓥˍ ꓟꓲ ꓙꓳˍ ꓟ ꓑꓶꓸ ꓓꓴ ꓬꓲꓻ ꓙꓬ ꓢꓲꓼˍ ꓟ ꓔꓯ ꓓꓻ ꓡꓰ ꓝꓲ ꓢꓲ ꓢꓰ ꓡꓰ ꓝꓲˍ ꓟ ꓢꓯꓼ ꓙꓳˍ ꓡꓳ= ꓮ ꓟꓶ ꓟ ꓡꓰ ꓞꓻ ꓝꓲꓸ ꓗꓪ ꓞꓻ ꓢꓯꓼ ꓑꓶꓸ ꓓꓴ ꓔꓬꓹ ꓟꓽ ꓢ ꓢꓴ ꓐꓴ ꓠꓬ ꓟꓺ ꓛꓵꓻ ꓪꓴꓽ ꓬꓲꓻ ꓔꓯ ꓓꓳꓻ ꓖꓶˍ ꓕꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓜꓽ ꓓꓴ ꓜꓽ ꓙꓰꓽ ꓗꓪ ꓐꓰ ꓙꓲꓻ ꓖꓴ ꓙꓳˍ ꓟ ꓔꓯ ꓟꓳꓸ ꓚꓬꓹ ꓠꓬꓲ ꓢꓴ ꓐꓴ ꓡꓰ ꓐꓯ ꓔ ꓟ ꓙꓳˍ ꓡꓳ=

(3)  ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓐꓴ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓟꓺ ꓛꓵꓻ ꓔꓯ ꓓꓳꓻ ꓖꓶˍ ꓟ ꓗꓪ ꓐꓰ ꓟꓷꓽ ꓠꓷꓹ ꓘꓴꓽ ꓗꓪ ꓬꓲ ꓐꓵꓽ ꓛꓱꓽ ꓠꓱˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ=

(4)  Iron ꓢꓯꓼ ꓐꓰ Folic Acid ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓟꓺ ꓛꓵꓻ ꓠꓬ ꓫꓵꓽ ꓢꓯꓼ ꓠꓲꓸ꓾ ꓫꓵꓽ ꓢꓯꓼ ꓐꓽ ꓢꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓡꓳ=

(5)  Potassium ꓢꓯꓼ ꓙꓳˍ ꓟ ꓑꓶꓸ ꓓꓴ ꓦꓰꓼ ꓟ꓾ ꓦꓰꓽ ꓛꓲꓽ ꓐꓱ ꓶ ꓮ ꓘꓶꓸ ꓙꓲˍ ꓡꓳ=

(6)  Diabetes ꓠꓻ ꓙꓳ ꓢꓴ꓾ ꓫꓵꓽ ꓓꓯꓻ ꓠꓻ ꓙꓳ ꓢꓴ꓾ ꓖꓳ ꓓꓱꓽ ꓡꓲꓽ ꓢꓴ (ꓤ ꓠꓱ ꓶꓻ ꓞꓹ ꓢꓴ)   ꓐꓴ ꓠꓬ ꓟꓺ ꓛꓵꓻ ꓔꓯ ꓮ ꓟꓬꓹ ꓓꓳꓻ ꓟꓽ ꓓ ꓟ ꓥ ꓡꓳ= ꓝꓮꓲ ꓧꓪꓽ ꓖꓳ ꓓꓱꓽ ꓒꓸ ꓡ (ꓘꓪꓽ ꓡ) ꓠꓲꓹ ꓫꓵ ꓢꓴ ꓐꓴ ꓐꓱ ꓶ ꓟꓺ ꓛꓵꓻ ꓔꓯ ꓟꓬꓽ ꓠꓬꓲ ꓓꓳꓻ ꓖꓶ ꓐ ꓡˍ ꓡꓳ=

ꓝꓮꓲ ꓠꓬ ꓟꓺ ꓛꓵꓻ ꓗꓪ Calcium꓾ Manganese꓾ Amino Acid꓾ Zinc꓾ Thiramin ꓐꓰ Riboflavin ꓢꓯꓼ ꓐꓴ ꓙꓳˍ ꓟ ꓥ ꓡꓳ= ꓞꓼ ꓛꓵꓻ ꓢꓯꓼ ꓙꓳˍ ꓟˍ ꓡꓰ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓬꓯꓼˍ ꓟ Fiber ꓢꓯꓼ ꓥˍ ꓟꓲ ꓙꓳˍ ꓡꓳ= Antioxidants ꓐꓴ ꓥ ꓟ Flavonoids ꓐꓰ Polyphenolic compound ꓢꓯꓼ ꓐꓴ ꓥˍ ꓟꓲ ꓙꓳˍ ꓢꓰꓽ ꓡꓳ=