Radio Veritas Asia Buick St., Fairview Park, Queszon City, Metro Manila. 1106 Philippines | + 632 9390011-15 | +6329390011-15
ꓟꓺ ꓟꓵꓼ (ꓡꓹ ꓟꓶꓽ ꓢꓶꓸ) ꓙꓲꓻ ꓖꓴ ꓙꓳˍ ꓟ ꓐꓰ ꓟꓽ ꓙꓲꓻ ꓟ ꓚꓱꓹ
ꓮ ꓟꓶ ꓟ ꓡꓰ ꓟꓶꓽ ꓦ ꓦ ꓝꓲꓸ ꓕꓯ ꓠꓬ ꓟꓺ ꓟꓵꓼ ꓮ ꓟꓬꓹ ꓓꓳˍ ꓟ ꓥ ꓡꓳ= ꓟꓺ ꓟꓵꓽ ꓧꓪꓺ ꓪꓴꓽ ꓢꓴ ꓮ ꓟꓬꓹ ꓙꓳˍ ꓟ ꓡꓰꓽ ꓟꓽ ꓞꓲꓺ ꓙꓲꓺ ꓔꓲ ꓗꓪ ꓥˍ ꓟꓲ ꓪꓴꓻ ꓜꓽ ꓪ ꓓꓹ ꓟ ꓦꓬꓼ ꓠꓬꓲˍ ꓟꓲ ꓥ ꓡꓳ= ꓖꓳ ꓡꓱ ꓠꓬꓲ ꓟꓶꓽ ꓦ ꓦ ꓝꓲꓸ ꓕꓯ ꓓꓳˍ ꓟ ꓟꓺ ꓟꓵꓼ ꓙꓲꓻ ꓖꓴ ꓙꓳˍ ꓟ ꓐꓰ ꓟꓽ ꓙꓲꓻ ꓟ ꓚꓱꓹ ꓐꓴ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=
(1) ꓦꓲꓼ ꓟ ꓜꓶ ꓢˍ ꓟ
(2) ꓞꓼ ꓞꓼ ꓓꓻ ꓡꓰ ꓟꓽ ꓓ ꓟ꓾ ꓓꓻ ꓡꓰ ꓫꓸ ꓟ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓟ(3) ꓐꓶꓽ ꓓꓲꓻ ꓢꓰꓼ ꓢꓯꓼ ꓙꓳˍ ꓟ
(4) ꓫꓵꓽ ꓤꓶꓻ ꓙꓳ ꓡꓰ ꓝꓲˍ ꓟ
(5) ꓟꓽ ꓙꓲꓻ ꓟ ꓬꓲ ꓞꓶꓻ ꓔꓯ ꓠꓲꓸ ꓡꓰ ꓝꓲˍ ꓟ
(6) ꓬꓲ ꓐꓽ ꓙꓰˍ ꓟ ꓗꓪ ꓬꓲ ꓙꓵꓹ ꓙꓳˍ ꓟ
(7) ꓠꓻ ꓓꓴ ꓤ ꓤ ꓔꓯ ꓫꓬ ꓡꓰ ꓝꓲˍ ꓟ
(8) ꓫꓵꓽ ꓓꓳ ꓔꓬ ꓟ Hemorrhoids ꓠꓻ ꓔꓯ ꓓꓻ ꓡꓰ ꓝꓲˍ ꓟ
ꓮ ꓡꓲ ꓫꓵꓽ ꓜꓽ ꓓꓴ ꓥˍ ꓟꓲ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓙꓳˍ ꓟ ꓪꓴꓸ ꓠꓬꓲ ꓙꓲꓻ ꓖꓴ ꓟꓽ ꓙꓳ ꓟ ꓔꓯ ꓝꓸ ꓢꓲ ꓐꓯ ꓟꓳꓸ ꓖꓶˍ ꓥꓳ=
ꓟꓺ ꓟꓵꓼ ꓔꓯ ꓬꓲ ꓐꓶꓹ ꓜꓽˍ ꓟ ꓪꓴꓸ ꓠꓬꓲ ꓟꓺ ꓟꓵꓼ ꓜꓲ ꓟꓶꓽ ꓡꓰ ꓖꓴ ꓢꓲ ꓟꓵꓽ ꓔꓯˍ ꓟꓲ ꓐꓬ ꓡꓰ ꓝꓲˍ ꓟ ꓥ ꓡꓳ= ꓟꓺ ꓘꓪꓽ ꓜꓲ꓾ ꓐꓻ ꓓ ꓜꓲ ꓠꓬ ꓟꓲꓽ ꓦꓲ ꓗꓪ ꓙꓳˍ ꓟ ꓗ-ꓐꓳꓠ-ꓓꓮꓲ-ꓳꓴꓔ-ꓢꓮꓲꓔ 100 ꓟ ꓗꓪ 70 ꓔꓯ ꓚꓵꓹ ꓣꓴ ꓗꓷ ꓢꓲ ꓞꓳ ꓤ ꓐꓴ ꓢꓯꓼ ꓦ ꓓꓴ ꓐꓱ ꓶ ꓢꓲꓽ ꓫꓬꓹ ꓟ ꓳꓫꓬꓖꓰꓠ ꓔꓯ ꓖꓶ ꓐ ꓡˍ ꓟ ꓪꓴꓸ ꓠꓬꓲ ꓟꓺ ꓘꓪꓽ ꓜꓲ ꓟꓽ ꓫꓵꓻ ꓠꓹ ꓟ ꓬꓳꓸ ꓚꓵˍ ꓡꓳ=
ꓟꓺ ꓟꓵꓼ ꓜꓽˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓗꓪ ꓟ ꓬꓲ ꓞꓶꓻ ꓐꓴ ꓔꓯ ꓠꓲꓸ ꓡꓰ ꓝꓲˍ ꓟ ꓪꓴꓸ ꓠꓬꓲ ꓮ ꓘꓶꓸ ꓝꓱꓻ ꓢꓴ ꓐꓴ ꓠꓬ ꓟꓺ ꓟꓵꓼ ꓜꓽ ꓟꓽ ꓓ= ꓕꓱ ꓗꓪ ꓐꓯ ꓗꓷ ꓟ ꓡꓰ ꓐꓰ ꓟꓺ ꓟꓵꓼ ꓜꓽ ꓖꓶˍ ꓟ ꓪꓴꓸ ꓠꓬꓲ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓙꓲꓻˍ ꓟ ꓙꓳˍ ꓟˍ ꓡꓰ ꓐꓰ ꓮ ꓟꓬꓹ ꓜꓽ ꓠꓬ ꓟꓰꓹ ꓟꓰꓹ ꓫꓵ (ꓟꓸ ꓡꓰ ꓟꓲꓹ) ꓗꓷ ꓡꓰˍ ꓥꓳ= ꓔꓯꓺ ꓥꓳꓽ ꓬꓲ ꓐꓽ ꓗꓪ ꓙꓰ ꓢˍ ꓟ ꓙꓲꓻ ꓓꓴ ꓙꓳˍ ꓥ ꓟꓲ ꓜꓽ ꓟꓬꓽ ꓡꓰ ꓕꓯ ꓠꓽ ꓦꓰꓽ ꓧꓳꓹ ꓡˍ ꓥꓳ=
ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓕꓲ ꓫꓵꓽ ꓠꓬ ꓟꓺ ꓟꓵꓼ ꓠꓬ ꓜꓽ ꓗꓷ ꓕꓯ ꓞꓼ ꓡꓱꓸ ꓫꓵꓻ ꓬꓰˍ ꓗꓪ ꓛꓲꓺ ꓬꓲ ꓓꓳꓼ ꓟꓽ ꓙꓳ ꓐꓯ ꓥˍ ꓟꓲ ꓮ ꓤ ꓤ ꓫꓵꓻ ꓝꓲˍ ꓟ Cyanogenic glycoside ꓐꓯ ꓟ Cyanide ꓢꓯꓼ ꓙꓳˍ ꓡꓳ= ꓟꓺ ꓟꓵꓼ ꓕꓲ ꓐꓱ ꓗꓪ Cyanide ꓢꓯꓼ ꓠꓬ 300ꓟꓖ ꓙꓳˍ ꓟ ꓪꓴꓸ ꓠꓬꓲ ꓮ ꓘꓶꓸ ꓙꓳꓺ ꓠꓯꓹ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓟꓳꓻˍ ꓟ ꓟꓺ ꓟꓵꓽ ꓥ ꓕ ꓑꓳꓸꓼ ꓔꓯ ꓮ ꓘꓶꓸ ꓟꓽ ꓜꓽ ꓪ ꓡꓰ ꓠꓹ ꓟ ꓬꓳꓸ ꓚꓵˍ ꓡꓳ= ꓮ ꓟꓬꓹ ꓟꓽ ꓜꓽ ꓪ ꓡꓰ ꓠꓹ ꓟˍ ꓟꓲ ꓬꓳꓸ ꓚꓵˍ ꓟ ꓥ ꓡꓳ= ꓟꓺ ꓟꓵꓼ ꓜꓽˍ ꓕꓯ ꓟꓲ ꓮ ꓘꓶꓸ ꓟꓲꓺ ꓡꓰ ꓠ ꓚꓬꓸ ꓗꓷ ꓢꓲ ꓜꓽ ꓠ ꓗꓹ ꓟ ꓥ ꓡꓳ=
Add new comment