ꓠ.‐ꓐꓳꓽ‐ꓪꓳꓽ (ꓧꓳꓽ‐ꓫꓬ) ꓙꓲꓻ ꓖꓴ ꓙꓳˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓠꓬ ꓟꓵꓽ ꓕꓯ ꓗꓳꓹ ꓕꓯ ꓗꓪ ꓟ ꓜꓽ ꓫꓵꓽ ꓜꓽ ꓙꓰꓽ ꓫꓬꓹ ꓢꓴ ꓚꓬꓸ ꓢꓴ ꓐꓴ ꓮ ꓟꓬꓹ ꓣꓱꓽˍ ꓟ ꓕꓲ ꓙꓰꓽ ꓥ ꓡꓳ= ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓬꓲ ꓫꓵꓸ ꓢꓶꓽ ꓔꓯ ꓪꓳꓽ ꓒꓬꓽ ꓫꓬ ꓓꓴ (ꓛꓱꓽ ꓠꓱ ꓗꓹ ꓛꓲꓽ) ꓓꓴ ꓐꓱ ꓶ ꓣꓱꓽ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓠꓯꓻ ꓞꓲꓼ ꓐꓱ ꓶˍ ꓟꓲ ꓣꓱꓽ ꓔꓬ ꓖꓴˍ ꓟ ꓥ ꓡꓳ= ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓬꓲ ꓒꓬꓽ ꓔꓯ ꓠꓬ ꓬꓲꓸ ꓪꓳꓽ ꓬꓲꓻ꓾ ꓧꓪꓽ꓾ ꓥꓪꓸ꓾ ꓮ ꓭꓸ ꓩꓴ ꓐꓴ ꓐꓰ ꓫꓬꓹ ꓜꓽˍ ꓐ ꓡˍ ꓟ ꓥꓳ= ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓔꓯ ꓠꓬ ꓬꓲ ꓜꓲ ꓬꓲ ꓒꓬꓽ꓾ ꓬꓲ ꓫꓵꓸ ꓢꓶꓽ ꓡꓰꓽ ꓟꓽ ꓞꓲꓺ ꓬꓲ ꓚꓰꓺ ꓔꓯ ꓥˍ ꓟꓲ ꓚꓬꓸ ꓜꓽ ꓐ ꓡˍ ꓟ ꓥꓳ= ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓜꓲ ꓔꓯ ꓕꓲ ꓜꓲ ꓡꓱꓸꓼ ꓣꓱꓽ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓬꓲ ꓫꓵꓸ ꓢꓶꓽ ꓗꓪ ꓥˍ ꓟꓲ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓬꓲ ꓒꓬꓽ ꓠꓬ ꓜꓽ ꓧꓳꓽ ꓔ ꓟ ꓮ ꓙꓵꓽ ꓔꓯ ꓜꓶˍ ꓟ ꓗꓪ ꓬꓰ ꓙ ꓖꓶˍ ꓟ꓾ ꓟꓽ ꓫꓬ ꓟ ꓟꓲꓽ ꓦꓲ ꓔꓯ ꓢꓯꓼ ꓦ ꓪ ꓡꓰ ꓟ ꓔꓯ ꓓꓻ ꓡꓰ ꓝꓲˍ ꓟ꓾ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡ ꓝꓲˍ ꓟ꓾ ꓛꓱꓽ ꓠꓱˍ ꓟ ꓔꓯ ꓟꓽ ꓛꓱꓽ ꓠꓱ ꓗꓷ ꓡꓰ ꓝꓲˍ ꓟ꓾ ꓦꓰꓽ ꓛꓲꓽ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ꓾ ꓤ ꓠꓱ ꓤ ꓐꓴ ꓞꓼ ꓐꓰ ꓦꓰꓽ ꓛꓲ ꓠꓻ ꓡ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ ꓥ ꓢꓲ꓾ ꓠꓲꓹ ꓟ ꓔꓯ ꓔꓬꓹ ꓢ ꓝꓲˍ ꓟ ꓪꓴꓸ ꓠꓶꓸ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡ ꓝꓲ ꓓꓴ ꓐꓱ ꓶ ꓣꓱꓽ ꓐ ꓡˍ ꓟ꓾ ꓡꓰꓲꓗ-ꓖꓮꓴꓠꓖ ꓔꓯ ꓓꓻ ꓡꓰ ꓝꓲˍ ꓟ꓾ ꓩꓯꓹ-ꓖꓯꓸꓼ ꓐꓶꓽ ꓓꓲꓻ ꓐꓴ ꓔꓯ ꓗꓽ ꓕꓸ ꓟ ꓗꓪ ꓔꓳꓹ ꓙ ꓐ ꓡˍ ꓟ꓾ ꓫꓵꓽ ꓒꓬꓸ ꓠꓻ ꓔꓯ ꓢ ꓡꓰ ꓝꓲˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓬꓲ ꓒꓬꓽ ꓠꓬ ꓮ ꓡꓰ ꓫꓵꓽ ꓙꓲꓻ ꓖꓴ ꓙꓳˍ ꓟ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

(1) ꓬꓲ ꓝꓲꓸ ꓳˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓠꓬ ꓠꓻˍ ꓟ ꓳˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓬꓲ ꓗꓴꓹ ꓙꓲ ꓕꓯꓽ ꓢꓲ ꓗꓪ ꓟꓲꓺ (ꓦꓲꓽ) ꓓꓹ ꓟˍ ꓡꓰ ꓐꓰ ꓳˍ ꓟ ꓪꓳꓽ ꓔꓳ ꓬꓲ ꓝꓲꓸ ꓐꓴ ꓔꓯ ꓥˍ ꓟꓲ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ=

(2) ꓓꓲꓮꓐꓰꓔꓰꓢ ꓠꓻ ꓐꓱ ꓶ ꓙꓲꓻ ꓖꓴ ꓙꓳˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓒꓬꓽ ꓠꓬ ꓫꓵꓽ ꓘꓴꓽ ꓗꓪ ꓟ ꓖꓡꓴꓚꓳꓢꓰ ꓔꓯ ꓠꓲꓸ ꓡꓰ ꓝꓲ ꓠ ꓬꓰˍ ꓟ ꓗꓪ ꓣꓱꓽ ꓬꓯꓼˍ ꓡꓳ= ꓧꓳꓽ ꓫꓬ ꓗꓪ ꓙꓳˍ ꓟ ꓢꓯꓼ ꓕꓲ ꓙꓰꓽ ꓠꓬ ꓓꓲꓮꓐꓰꓔꓰꓢ ꓠꓻ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓒꓬꓽ ꓠꓬ ꓓꓲꓮꓐꓰꓔꓰꓢ ꓠꓻ ꓗꓪ ꓟꓳꓻ ꓪˍ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓠꓲꓸ ꓡꓰ ꓝꓲˍ ꓟ ꓗꓪ ꓬꓰ ꓙ ꓐ ꓡˍ ꓡꓳ=

(3) ꓞꓶꓽ ꓚꓵꓸˍ ꓟ ꓐꓰ ꓠꓻ ꓘꓴ ꓛꓵꓽˍ ꓟ ꓔꓯ ꓓꓻ ꓡꓰ ꓝꓲˍ ꓟ (ꓞꓶꓽ ꓦꓶꓽ ꓚꓲꓸ ꓔ ꓟ)

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓒꓬꓽ ꓠꓬ ꓠꓻ ꓘꓴ ꓘꓴꓽ ꓠꓻ ꓪꓴꓽ ꓬꓲꓻ ꓐꓴ ꓔꓯ ꓫꓬꓽ ꓡꓰ ꓝꓲ ꓢꓲ ꓢꓯꓼ ꓦ ꓢꓻ ꓡꓰ ꓝꓲ ꓓꓴ ꓐꓱ ꓶ ꓬꓰ ꓙˍ ꓖꓶˍ ꓟˍ ꓡꓰ ꓐꓰ ꓢꓯꓼ ꓦ ꓚ ꓔꓯ ꓥˍ ꓟꓲ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓐꓵꓼ ꓟꓵ ꓘꓴꓽ ꓗꓪ ꓟ ꓞꓶꓽ ꓔꓯ ꓥˍ ꓟꓲ ꓣꓴ ꓦ ꓗꓷ ꓐ ꓡˍ ꓟ ꓪꓴꓸ ꓠꓬꓲ ꓢꓯꓼ ꓦ ꓚ (ꓟꓲꓽ ꓦꓲ ꓚ) ꓐꓴ ꓔꓯ ꓔꓬꓹ ꓢꓻ ꓡꓰ ꓝꓲ ꓢꓲ ꓞꓶꓽ ꓚꓵꓸˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ=

(4) ꓜꓽ ꓓꓴ ꓜꓶˍ ꓟ ꓔꓯ ꓬꓰ ꓙ ꓖꓶˍ ꓟ

ꓧꓳꓽ ꓫꓬ ꓗꓪ ꓙꓳˍ ꓟ ꓰꓠꓜꓬꓟꓰ ꓐꓴ ꓠꓬ ꓜꓽ ꓓꓴ ꓜꓶˍ ꓟ ꓮꓚꓲꓓ ꓔꓯ ꓟꓬꓽ ꓡ ꓝꓲ ꓐ ꓡ ꓢꓲ ꓦꓰꓼ ꓟ ꓜꓶ ꓟꓽ ꓘꓴ ꓟ꓾ ꓟꓲꓽ ꓦꓲ ꓝꓴˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ= ꓦꓰꓽ ꓛꓲꓽ ꓗꓪ ꓟꓲꓽ ꓦꓲ ꓔꓴ ꓢꓲ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ= ꓦꓰꓼ ꓟ ꓠꓻ꓾ ꓬꓲ ꓪꓴꓻ ꓐꓴ ꓔꓯ ꓥˍ ꓟꓲ ꓔꓬꓹ ꓢ ꓡꓰ ꓝꓲ ꓐ ꓡˍ ꓡꓳ=

(5) ꓠꓻ ꓤ ꓒꓬꓽ ꓤ ꓔꓯ ꓥˍ ꓟꓲ ꓗꓽ ꓕꓸ ꓖꓶ ꓐ ꓡˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓗꓪ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓐꓰ ꓐꓶꓽ ꓓꓲꓻ ꓕꓲ ꓫꓵꓽ ꓔꓯ ꓗꓽ ꓐ ꓡˍ ꓟ ꓢꓯꓼ ꓙꓳˍ ꓡꓳ= ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓗꓽ ꓖꓶ ꓢꓲ ꓜꓽ ꓓꓴ ꓓꓳꓼ ꓖꓳ ꓢꓲ ꓦꓰꓼ ꓟ ꓔꓬꓹ ꓟꓽ ꓢ ꓗꓷ ꓡꓰ ꓝꓲˍ ꓟ ꓐꓶꓽ ꓓꓲꓻ ꓐꓴ ꓔꓯ ꓥˍ ꓟꓲ ꓗꓽ ꓕꓸ ꓖꓶˍ ꓡꓳ=

(6) ꓫꓵꓽ ꓓꓯˍ ꓟ ꓔꓯ ꓞꓰꓻ ꓡꓰ ꓝꓲˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓗꓪ ꓫꓵꓽ ꓙꓴꓽ ꓘꓴꓽ ꓗꓪ ꓚꓮꓡꓚꓲꓴꓟ ꓟꓽ ꓓꓵꓽ ꓡꓰ ꓠ ꓗꓽ ꓔ ꓖꓶ ꓢꓲ ꓫꓵꓽ ꓙꓴꓽ ꓐꓴ ꓔꓯ ꓔꓬꓹ ꓢ ꓡꓰ ꓝꓲˍ ꓟ ꓪꓴꓸ ꓠꓬꓲ ꓠꓲꓹ ꓟ ꓗꓪ ꓫꓵꓽ ꓬꓲꓻ ꓙꓰˍ ꓟ ꓗꓪ ꓙꓲꓻ ꓡꓰ ꓠ ꓬꓰ ꓙ ꓖꓶꓽ ꓐ ꓡˍ ꓡꓳ= ꓫꓵꓽ ꓬꓲꓻ ꓙꓰˍ ꓟ ꓔꓯ ꓙꓲꓻ ꓡꓰ ꓠ ꓬꓰ ꓙ ꓖꓶˍ ꓟ ꓠꓬ ꓫꓵꓽ ꓔꓯ ꓟꓽ ꓓꓯꓻ ꓡꓰ ꓠ ꓗꓽ ꓕꓸ ꓖꓶ ꓐ ꓡˍ ꓟ ꓥ ꓡꓳ=

(7) ꓢꓶꓽ ꓛꓲ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓗꓪ ꓳˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ ꓢꓯꓼ ꓙꓳˍ ꓟ ꓪꓴꓸ ꓠꓬꓲ ꓢꓶꓽ ꓛꓲ ꓠꓻˍ ꓟ ꓑꓶꓸ ꓓꓴ ꓠꓻ ꓡˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ= ꓢꓶꓽ ꓛꓲ ꓤꓶꓼ ꓦꓲꓻ ꓠꓻ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ= ꓟꓷꓽ ꓠꓷꓹ ꓘꓴꓽ ꓗꓪ ꓟ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ=