ꓠꓸ ꓐꓳꓽ ꓪꓳꓽ (ꓧꓳꓽ ꓫꓬ) ꓔꓶ ꓚꓱꓹ

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓠꓬ ꓬꓲꓸ ꓫꓵꓸ ꓢꓶꓽ꓾ ꓬꓲ ꓒꓬꓽ ꓐꓰ ꓬꓲ ꓪꓰ ꓐꓴ ꓔꓯ ꓜꓽ ꓓˍ ꓟ ꓪꓳꓽ ꓒꓬꓽ ꓥꓳ= ꓬꓲ ꓚꓰˍ ꓟꓲ ꓜꓽ ꓐ ꓡˍ ꓟ ꓥꓳ= ꓬꓲ ꓜꓲ ꓠꓬ 4’-5’ ꓛꓲꓺ ꓟꓴˍ ꓟ ꓥ ꓢꓲ ꓠꓬꓲ ꓕꓲ ꓧꓪꓹ ꓔꓶ ꓔ ꓠꓬ ꓠꓬꓲꓽ ꓢ ꓘꓳꓼ ꓛꓲ ꓔꓶ ꓔ ꓓꓹ ꓟ ꓬꓲ ꓜꓲ ꓥꓳ= ꓬꓲ ꓐꓵꓽ ꓠꓬ ꓮ ꓔꓲꓸ ꓤ ꓞꓱ ꓠꓱ (ꓛꓬꓸ) ꓟ ꓪꓴꓸ ꓠꓬꓲ ꓕꓲ ꓐꓱ ꓠꓽ ꓜꓽ ꓟꓽ ꓧꓳꓹ꓾ ꓟꓽ ꓠꓵ= ꓖꓳ ꓡꓱ ꓥˍ ꓟꓲ ꓠꓸ-ꓐꓳꓽ-ꓪꓳꓽ ꓠꓬ ꓮ ꓚꓵꓹ ꓛꓵꓼ ꓔꓬ ꓟ ꓤ ꓠꓱ ꓤ ꓙꓳ ꓢꓴ ꓟꓹ ꓟ ꓐꓴ ꓐꓱ ꓶ ꓮ ꓚꓵꓹ ꓬꓲꓻ ꓮ ꓟꓬꓹ ꓙꓳ ꓡ ꓝꓲˍ ꓟ꓾ ꓬꓲ ꓫꓵꓸ ꓢꓶꓽ ꓠꓬ ꓟꓲꓽ ꓦꓲ ꓠꓯ ꓞꓲꓼ꓾ ꓠꓱꓸ ꓐꓯ ꓙꓲꓻ ꓖꓴˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓠꓸ-ꓐꓳꓽ-ꓪꓳꓽ (ꓧꓳꓽ-ꓫꓬ) ꓔꓶ ꓚꓱꓹ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ= ꓙꓬ ꓝꓲ ꓕꓯ ꓮ ꓘꓶ ꓙꓬˍ ꓟ ꓟꓵꓽ ꓗꓪ ꓠꓬ ꓙꓬ ꓝꓲꓸ ꓖꓴ ꓡꓰ ꓔꓬ ꓕꓯ ꓔꓶ ꓐ ꓡˍ ꓟ ꓥ ꓡꓳ= ꓞ ꓟꓵꓽ ꓡꓱꓻ ꓟꓵꓽ꓾ ꓙꓬ ꓝꓲꓸ ꓗꓪ ꓮ ꓘꓶꓸ ꓟꓽ ꓙꓬ ꓟ ꓟꓵꓽ ꓗꓪ ꓠꓬ ꓙꓬ ꓝꓲ ꓓꓵꓽ ꓡ ꓔꓬ ꓕꓯ ꓡꓰ ꓔꓶ ꓠꓯꓹ ꓟ ꓥꓳ= ꓝꓮꓲ ꓟꓶ ꓞ ꓢꓯꓼ ꓟꓶˍ ꓟ ꓗꓪ ꓔꓶ ꓠꓯꓹ ꓡꓳ=

ꓔꓶˍ ꓟ ꓗꓪ ꓠꓱꓸ ꓐꓯ ꓔꓶ ꓫꓵꓽ ꓔꓶ ꓙꓰꓽ ꓔꓶˍ ꓟ ꓡꓰ ꓐꓰ ꓬꓲ ꓟꓲ ꓗꓪ ꓟ ꓠꓱꓸ ꓦꓱꓽ ꓐꓴ ꓔꓯ ꓧꓶꓽ ꓡꓰ ꓠ ꓘꓪ ꓗꓷ ꓢꓲ ꓠꓬꓲ ꓩꓲꓸ ꓛꓲ ꓧꓳꓽ ꓖꓶ ꓗꓷ ꓢꓲ ꓔꓶ ꓠꓯꓹ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓟꓲ ꓗꓪ ꓬꓲꓻ ꓙꓬ ꓐꓱ ꓓꓹ ꓝꓲ ꓟꓽ ꓓ= ꓬꓲ ꓫꓵꓸ ꓫꓵꓸ ꓢꓲ ꓔꓶ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓬꓲ ꓜꓲ ꓡꓲꓸ ꓤ ꓚꓵꓹ ꓢꓲˍ ꓟꓲ ꓔꓶ ꓐ ꓡˍ ꓟ ꓥꓳ= ꓬꓲ ꓚꓰ ꓠꓽ ꓞꓼ ꓞꓼ ꓪꓴꓽ ꓡ ꓢˍ ꓟ ꓡꓰꓽ ꓟꓽ ꓞꓲꓺ ꓬꓲ ꓚꓰꓺ ꓠꓬ ꓛꓵꓽ ꓡꓰ ꓢˍ ꓟ ꓪꓴꓸ ꓠꓬꓲ ꓬꓲ ꓜꓲ ꓚꓵꓹ ꓔꓶˍ ꓕꓯ ꓮ ꓘꓶꓸ ꓤ ꓟꓳ ꓠ ꓔ ꓟ ꓥꓳ= ꓬꓲ ꓜꓲ ꓡꓲꓸ ꓤ ꓔꓶˍ ꓠꓬ ꓕꓲ ꓜꓲ ꓐꓰ ꓕꓲ ꓜꓲ 6”-8” ꓗꓪ ꓛꓲꓺ ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ= ꓬꓲ ꓜꓲ ꓠꓬ ꓐꓱꓽ ꓙꓰ ꓡꓱꓸ ꓙꓰ ꓗꓴˍ ꓟ ꓑꓶꓸ ꓓꓴ ꓢꓲꓹ ꓓ ꓐꓰ ꓞꓳꓹ ꓖꓶ ꓠ ꓔ ꓡꓳ=