ꓠꓸ ꓑꓳ ꓑ ꓙ ꓓꓴ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓱ ꓶ ꓜꓽ ꓠꓯꓹ ꓟ ꓜꓽ ꓫꓵꓽ ꓜꓽ ꓙꓰꓽ

ꓧꓪꓽ ꓖꓳ ꓓꓱꓽ ꓗꓪ ꓑ ꓙ ꓓꓴ꓾ ꓠꓬꓲ ꓟꓳ ꓓꓴ꓾ ꓛꓱꓽ ꓠꓱ ꓓꓴ꓾ ꓛꓵˍ ꓟ ꓝꓱˍ ꓟ ꓐꓬˍ ꓟ ꓘꓪꓽˍ ꓟ ꓜꓽ ꓙꓲˍ ꓜꓽ ꓟꓽ ꓙꓲˍ ꓟ ꓔꓯ ꓢꓷꓸ ꓓꓴ꓾ ꓗꓳˍ ꓟ ꓠꓴꓽˍ ꓟ ꓔꓯ ꓢꓷꓸ ꓓꓴ ꓐꓯ ꓢꓲ (5) ꓙꓰꓽ ꓙꓳˍ ꓟ ꓗꓪ ꓠꓸ ꓑꓳ ꓑ ꓙ ꓓꓴ ꓠꓬ ꓕꓲ ꓟ ꓥ ꓡꓳ= ꓝꓮꓲ ꓑ ꓙ ꓓꓴ ꓐꓬ ꓡꓰ ꓠꓬ ꓮ ꓙꓵꓽ ꓓꓻ ꓡꓰ ꓠ ꓫꓬꓹ ꓟ ꓗꓪ ꓮ ꓘꓶꓸ ꓫꓬꓹ ꓫꓸ ꓟ ꓥ ꓡꓳ= ꓟꓽ ꓑ ꓙ ꓗꓷ ꓡꓰ ꓕꓯ ꓧꓶꓸ ꓕꓯ ꓟ ꓡꓰ ꓑ ꓙ ꓡ ꓠ ꓫꓬꓹ ꓫꓸ ꓟ ꓥ ꓡꓳ=

ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓙ ꓡꓯ ꓘꓳꓹ ꓟ ꓗꓪ ꓠꓸ ꓑꓳ ꓐꓰ ꓑ ꓙ ꓓꓴ ꓠꓬ ꓟꓬꓽ ꓠꓬꓲ ꓬꓳꓸ ꓚꓵˍ ꓡꓳ ꓐꓯ ꓥ ꓟꓲ ꓠꓱꓸ ꓐꓯꓼ 4 ꓙꓰꓽ ꓡꓰ ꓐꓰ ꓤ ꓟꓴˍ ꓟ ꓠꓽ ꓟꓽ ꓙꓳ ꓐꓯ ꓠ ꓛꓲꓺ ꓥꓳ= ꓠ ꓑꓳꓸ ꓑ ꓙ ꓓꓴ ꓐꓬ ꓡꓰ ꓢꓴ꓾ ꓟꓽ ꓑ ꓙ ꓗꓷ ꓡꓰ ꓢꓴ ꓐꓴ ꓧꓶꓸ ꓕꓯ ꓟ ꓡꓰ ꓫꓬꓽ ꓫꓬꓽ ꓡꓰꓽ ꓑ ꓙ ꓠꓹ ꓟ ꓠꓽ ꓒꓬꓱꓼ ꓡ ꓟꓽ ꓓ ꓐꓯ ꓠ ꓛꓲꓺ ꓥꓳ= ꓕꓱ ꓟꓬ ꓬꓳꓸ ꓚꓵˍ ꓟ ꓑ ꓙ ꓓꓴ ꓢꓯꓼ ꓮ ꓕꓯ ꓟꓲ ꓑ ꓙ ꓔꓬ ꓠ ꓬꓰ ꓠ ꓔ ꓟ ꓡꓰ ꓟꓽ ꓛꓲꓺ ꓑ ꓙ ꓓꓴ ꓢꓯꓼ ꓙꓳ  ꓡꓰ ꓠ ꓔꓳꓹ ꓙ ꓠ ꓔ ꓡꓳ=

(ꓦꓲꓓꓰꓳ ꓕꓱ ꓟ ꓗꓪ ꓠꓬ ꓠꓸ ꓑꓳ ꓑ ꓙ ꓓꓴ ꓔꓯ ꓢꓯꓼ ꓧꓳꓽ ꓖꓶˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=) ꓕꓱ ꓟ ꓔꓯ ꓠꓬ Hello Health Group ꓐꓴ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓔꓯ ꓕꓲ ꓝꓸ ꓐꓯ ꓟꓳꓸ ꓖꓶ ꓩꓴ ꓓꓴ ꓥ ꓡꓳ=

ꓟꓲ ꓠꓯ ꓗꓪ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓠꓬ ꓞꓳ ꓤ ꓧꓪꓽ ꓖꓳ ꓓꓱꓽ ꓕꓲ ꓟ ꓡꓱꓸꓼ ꓔꓯ ꓔꓳꓹ ꓙ ꓐ ꓡˍ ꓟ ꓢꓯꓼ ꓙꓳˍ ꓟ ꓥ ꓡꓳ= ꓠꓸ ꓑꓳ ꓔꓬ ꓢ ꓓꓴ ꓐꓯ ꓗꓷ ꓠꓬ ꓞꓳ ꓤ ꓮ ꓟꓬꓹ ꓠꓬ ꓠꓸ ꓑꓳ ꓐꓱ ꓶ ꓠꓯꓻ ꓞꓲꓼ꓾ earplugs꓾ ꓠꓱ ꓫꓳꓸ ꓟꓸ ꓗꓪ ꓐꓰ ꓫꓴꓸˍ ꓟ (ꓠꓮꓪꓸ ꓟꓲˍ ꓟ) ꓢꓯꓼ ꓐꓴ ꓔꓯ ꓞꓲꓺ ꓦ ꓖꓶˍ ꓟ noise canceling headphones ꓐꓴ ꓔꓯ ꓡꓰꓽ ꓓꓵꓽ ꓙ ꓔꓬ ꓟ ꓟꓬꓽˍ ꓡꓳ=

ꓚꓵꓺ ꓚꓵꓺ ꓠꓸ ꓑꓳ ꓑ ꓙ ꓓꓴ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟ꓾ ꓟꓽ ꓑ ꓙ ꓗꓷ ꓡꓰˍ ꓟ ꓗꓪ ꓐꓰ ꓗꓽ ꓕꓸ ꓖꓶ ꓓꓴ ꓐꓱ ꓶ ꓠꓬ ꓥ-ꓟ-ꓢꓶꓽ (ꓬ-ꓟ-ꓕꓴꓽ) ꓡꓰ ꓐꓰ ꓢꓲꓹ ꓢꓶꓽ ꓡꓳ ꓢꓶꓽ꓾ ꓠꓲꓹ ꓛꓵꓼˍ ꓟ ꓬꓲꓸ ꓒꓬꓽ ꓐꓰ ꓮꓸ ꓠꓳ ꓐꓴ ꓔꓯ ꓟꓬꓽ ꓠꓬꓲ ꓜꓽ ꓖꓶ ꓠꓯꓹ ꓟ ꓬꓳꓸ ꓚꓵˍ ꓡꓳ= ꓠꓸ ꓑꓳ ꓑ ꓙ ꓓꓴ ꓔꓯ ꓢꓯꓼ ꓧꓳꓽ ꓖꓶˍ ꓟ ꓜꓽ ꓫꓵꓽ ꓐꓴ ꓠꓬ

- ꓮꓸ ꓠꓳ ꓐꓰ ꓠꓲꓹ ꓛꓵꓼˍ ꓟ ꓬꓲꓸ ꓒꓬꓽ

 ꓕꓱ ꓟ ꓘꓴꓽ ꓗꓪ Folic Acid ꓕꓲ ꓜꓴꓻ ꓘꓴꓽ ꓗꓪ ꓟ Folate ꓢꓯꓼ ꓐˍ ꓟ ꓥ ꓢꓲ ꓢꓯꓼ ꓕꓱ ꓟ ꓠꓬ ꓑ ꓙ ꓓꓴ ꓔꓯ ꓢꓯꓼ ꓙꓳ ꓡ ꓝꓲˍ ꓡꓳ= ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ)꓾ Kailan꓾ Lettuce ꓐꓰ ꓮꓸ ꓠꓳ ꓬꓲꓸ ꓫꓵꓽ ꓬꓲ ꓙꓰꓽ ꓘꓴꓽ ꓗꓪ Folate ꓢꓯꓼ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓕꓱ ꓟ ꓔꓯ ꓜꓽ ꓖꓶ ꓠꓯꓹ ꓟ ꓥ ꓡꓳ=

–        ꓕꓳꓸ-ꓑ ꓢꓶꓽ ꓾ Dark Chocolate

ꓕꓳꓸ-ꓑ ꓢꓶꓽ ꓐꓰ Dark Chocolate ꓐꓴ ꓗꓪ Magnesium ꓢꓯꓼ ꓟꓬꓽ ꓠꓬꓲ ꓙꓳˍ ꓟ ꓥ ꓡꓳ= ꓕꓱ ꓗꓪ ꓙꓳˍ ꓟ Magnesium ꓠꓬ Neuroprotective Effects ꓐꓯ ꓟ ꓑ ꓙ ꓓꓴ ꓔꓯ ꓐꓬ ꓡꓰˍ ꓟ ꓟꓽ ꓗꓷ ꓡꓰ ꓠ ꓫꓬꓹ ꓖꓶˍ ꓟ ꓢꓯꓼ ꓙꓳˍ ꓟ ꓥ ꓡꓳ= ꓟꓬꓽ ꓠꓬꓲ ꓠꓬ ꓮ ꓘꓶꓸ ꓫꓴꓸˍ ꓟ ꓠꓮꓪꓸ ꓟꓲˍ ꓟ ꓢꓯꓼ ꓪꓴꓸ ꓠꓬꓲ ꓒꓬꓱꓼ ꓡˍ ꓟ ꓑ ꓙ ꓓꓴ ꓐꓬ ꓡꓰ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ=

- ꓬꓲꓸ ꓫꓵꓸ꓾ ꓬꓲ ꓠꓲꓹ ꓟ ꓐꓴ ꓠꓬ ꓞꓼ ꓐꓰ ꓑ ꓙ ꓓꓴ ꓔꓯ ꓐꓬ ꓡꓰ ꓝꓲˍ ꓟ ꓔꓯ ꓗꓽ ꓕꓸ ꓙ ꓐ ꓡˍ ꓡꓳ= ꓬꓲ ꓠꓲꓹ ꓟ ꓗꓪ ꓙꓳˍ ꓟ zinc ꓢꓯꓼ ꓐꓴ ꓠꓬ ꓕꓱ ꓟ ꓔꓯ ꓠꓲꓹ ꓡꓰ ꓠ ꓬꓰ ꓙ ꓐ ꓡˍ ꓟ ꓥ ꓡꓳ=

- ꓥ-ꓟ-ꓢꓶꓽ (ꓬ-ꓟ-ꓕꓴꓽ)꓾ ꓧꓪꓽ ꓗꓳꓼ ꓢꓶꓽ꓾ ꓬꓽ ꓬꓲꓸ ꓢꓶꓽ(ꓧꓶꓽ ꓐꓲꓼ) ꓐꓴˍ ꓡꓰ ꓐꓰ Potassium ꓮ ꓟꓬꓹ ꓙꓳˍ ꓟ ꓜꓽ ꓫꓵꓽ ꓐꓴ ꓠꓬ ꓠꓸ ꓑꓳ ꓬꓲꓸ ꓘꓴꓽ ꓗꓪ ꓪꓴꓽ ꓬꓲꓻ ꓬꓲꓸ ꓒꓱꓻ ꓔꓯ ꓢꓯꓼ ꓙꓳ ꓡꓰ ꓝꓲˍ ꓡꓳ= ꓪꓴꓽ ꓬꓲꓻ ꓒꓱꓻ ꓖꓳ ꓟ ꓠꓬ Potassium ꓮ ꓟꓬꓹ ꓡꓳꓽ ꓔ ꓟ ꓥ ꓢꓲ ꓛꓵˍ ꓟ ꓜꓽ ꓛꓵꓽ꓾ ꓟꓶꓽ ꓛꓲ ꓔꓶꓸ ꓡꓰ ꓐꓰ ꓛꓵˍ ꓟ ꓜꓽ ꓫꓵꓽ ꓗꓪ ꓐꓰˍ ꓟꓲ ꓑꓳ-ꓔꓯ-ꓢꓲ-ꓬꓯ ꓢꓯꓼ ꓟꓶ ꓓꓹ ꓟ ꓥ ꓡꓳ=

–        Flaxseed꓾ ꓳ ꓓꓳꓽ ꓢꓶꓽ ꓐꓰ ꓥꓪꓸ

Omega-3 Fatty Acid ꓢꓯꓼ ꓮ ꓟꓬꓹ ꓙꓳˍ ꓟ Flaxseed꓾ ꓳ ꓓꓳꓽ ꓢꓶꓽ꓾ chia seed꓾ ꓬꓲꓻ ꓙꓬ ꓓꓽ ꓟ ꓗꓪ ꓙꓳˍ ꓟ ꓜꓽ ꓫꓵꓽ ꓐꓰ ꓥꓪꓸ ꓐꓴ ꓥˍ ꓟꓲ ꓑ ꓙ ꓓꓴ ꓔꓯ ꓢꓯꓼ ꓧꓳꓽ ꓖꓶˍ ꓟ ꓥ ꓡꓳ=

–        ꓗꓲꓸ ꓗꓳ (ꓟꓵꓺ ꓛꓵꓽ) ꓐꓰ ꓬꓲꓸ ꓩꓴꓻ ꓬꓲ ꓫꓵꓽ ꓬꓲ ꓙꓰꓽ ꓾ ꓙꓱꓼ ꓤ ꓮ ꓚꓵꓹ ꓬꓲꓻ ꓗꓪ ꓐꓰ ꓫꓬꓹ ꓔ ꓟ ꓜꓽ ꓫꓵꓽ ꓓꓳꓻ ꓫꓵꓽ ꓐꓰ cereal

Vitamin D ꓢꓯꓼ ꓮ ꓟꓬꓹ ꓙꓳˍ ꓟ ꓗꓲꓸ ꓗꓳ (ꓟꓵꓺ ꓛꓵꓽ)꓾ ꓬꓲ ꓩꓴꓻ ꓬꓲ ꓫꓵꓽ ꓬꓲ ꓙꓰꓽ꓾ ꓙꓱꓽ ꓤ ꓮ ꓚꓵꓹ ꓬꓲꓻ ꓗꓪ ꓐꓰ ꓫꓬꓹ ꓔ ꓟ ꓜꓽ ꓫꓵꓽ ꓓꓳꓻ ꓫꓵꓽ ꓐꓰ cereal ꓐꓴ ꓠꓬ ꓠꓸ ꓑꓳ ꓑ ꓙ ꓓꓴ ꓢꓯꓼ ꓔꓯ ꓪꓽ ꓠꓬꓲ ꓡꓰ ꓝꓲˍ ꓟ ꓥ ꓡꓳ= ꓟꓬꓽ ꓠꓬꓲ ꓠꓬ ꓠꓸ ꓑꓳ ꓘꓴꓽ ꓗꓪ ꓟ ꓪꓳꓽ ꓔꓳ ꓠꓴꓽ ꓔꓯ ꓢꓯꓼ ꓙꓳ ꓡ ꓝꓲˍ ꓟ ꓥ ꓡꓳ=

–        Vitamin B-12 ꓙꓳˍ ꓟ ꓜꓽ ꓓꓴ

ꓠꓸ ꓑꓳ ꓬꓲ ꓘꓴꓽ ꓗꓪ ꓟ ꓑ ꓙ ꓓꓴ ꓬꓲ ꓙꓴꓽ ꓠꓻ ꓡˍ ꓕꓯ Vitamin B-12 ꓢꓯꓼ ꓟꓽ ꓓ ꓟꓽ ꓞꓽ ꓣꓱꓽ ꓞꓹ ꓟ ꓥ ꓡꓳ= ꓠꓸ ꓑꓳ ꓔꓬ ꓢꓻ ꓓꓴ ꓐꓱ ꓶ Vitamin D ꓣꓱꓽ ꓞˍ ꓟˍ ꓡꓰ ꓐꓰ Vitamin B-12 ꓥˍ ꓟꓲ ꓟꓽ ꓓꓻ ꓟꓽ ꓞꓽ ꓣꓱꓽ ꓞꓹ ꓟ ꓥ ꓡꓳ= Vitamin B-12 ꓠꓬ ꓙꓱꓽ ꓤ ꓮ ꓚꓵꓹ ꓬꓲꓻ ꓗꓪ ꓐꓰ ꓫꓬꓹ ꓔ ꓟ ꓜꓽ ꓫꓵꓽ ꓐꓰ ꓬꓲ ꓠꓲꓹ ꓟ ꓐꓴ ꓗꓪ ꓐꓰ ꓟꓶ ꓪ ꓓꓹ ꓟ ꓥ ꓡꓳ=

–        ꓕꓱ ꓗꓪ ꓢꓷꓸ ꓔ ꓓꓴ ꓕꓲ ꓫꓵꓽ ꓠꓬ ꓜꓽ ꓓꓴ ꓕꓱ ꓟ ꓜꓽ ꓗꓷ ꓕꓯ ꓠꓽ ꓠꓸ ꓑꓳ ꓟꓽ ꓑ ꓙ ꓟꓽ ꓗꓷ ꓡꓰꓳ꓾ ꓐꓯ ꓠꓲꓹ ꓫꓵˍ ꓟ ꓠꓽ ꓟꓽ ꓥ= ꓠꓸ ꓑꓳ ꓟꓽ ꓑ ꓙ ꓟ ꓠꓸ ꓑꓳ ꓐꓳꓽ ꓡˍ ꓟ ꓔꓯ ꓠꓯꓼ ꓠꓯꓼ ꓟꓽ ꓗꓷ ꓡ ꓠ ꓗꓽ ꓕꓸ ꓖꓶ ꓓꓴ ꓐꓰ꓾ ꓞꓼ ꓞꓼ ꓟꓽ ꓐꓳꓽ ꓡꓰ ꓠꓽ ꓠꓸ ꓑꓳ ꓑ ꓙ ꓓꓴ ꓢꓯꓼ ꓧꓳꓽ ꓖꓶˍ ꓟ ꓡꓰꓽ ꓥ ꓡꓳ= ꓟꓽ ꓒꓬꓱꓼ ꓡ ꓕꓯ ꓡꓰ ꓗꓽ ꓕꓸ ꓖꓶˍ ꓟ ꓠꓬ ꓒꓬꓱꓼ ꓡ ꓗꓸ ꓠꓯꓸ ꓫꓬꓹ ꓟ ꓕꓯꓽ ꓢꓲꓺ ꓪ ꓙꓲ ꓙꓲˍ ꓡꓳ ꓐꓯ ꓟ ꓔꓯ ꓢꓷꓸ ꓔ ꓠ ꓗꓹ ꓡꓳ꓾ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ