ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓙꓲꓻ ꓖꓴ ꓙꓳˍ ꓟ ꓚꓱꓹ

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓠꓬ ꓣꓳ ꓧꓪꓽ ꓖꓳ ꓓꓱꓽ ꓣꓱꓽ ꓬꓯˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥꓳ= ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓕꓲꓽ ꓑꓶꓹ ꓓꓴꓽ (ꓕꓲ ꓐꓯ) ꓗꓪ Vitamin A, B, C, K, Calorie, Calcium, Iron 30g ꓙꓳˍ ꓟ ꓥ ꓡꓳ= ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓔꓯ ꓮ ꓕꓯˍ ꓟꓲ ꓜꓽˍ ꓟ ꓠꓬ ꓧꓪꓽ ꓖꓳ ꓓꓱꓽ ꓢꓯꓼ ꓐꓱ ꓶ ꓙꓲˍ ꓟ ꓥ ꓡꓳ= ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓠꓬ ꓕꓲ ꓡꓰ ꓕꓲ ꓠꓬꓲ ꓜꓽ ꓓꓴ ꓐꓱ ꓶ ꓮ ꓘꓶꓸ ꓢˍ ꓟ ꓐꓰ ꓮ ꓘꓶꓸ ꓙꓲˍ ꓟ ꓜꓽ ꓓꓴ ꓘꓴꓽ ꓗꓪ ꓟ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓗꓪ ꓙꓳˍ ꓟ Iron ꓢꓯꓼ ꓠꓬ ꓫꓪꓻ (ꓟꓶꓹ ꓝꓲꓼ) ꓗꓪ ꓙꓳˍ ꓟ Iron ꓢꓯꓼ ꓕꓯꓽ ꓢꓲ ꓥꓪꓽ ꓝꓸ ꓙꓳˍ ꓟ ꓪꓴꓸ ꓠꓬꓲ Iron ꓢꓯꓼ ꓠꓲꓸ ꓢꓲ꓾ ꓫꓵꓽ ꓢꓯꓼ ꓐꓽˍ ꓟ ꓔꓯ ꓗꓽ ꓕ ꓐ ꓡˍ ꓡꓳ= ꓦꓲꓓꓰꓳ ꓕꓱ ꓟ ꓗꓪ ꓠꓬ ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓗꓪ ꓙꓳˍ ꓟ ꓙꓲꓻ ꓓꓴ ꓔꓯ ꓐꓯ ꓟꓳꓸ ꓖꓶ ꓓꓴ ꓥꓳ= ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓙꓲꓻ ꓓꓴ ꓙꓳˍ ꓟ ꓮ ꓡꓲ ꓫꓵꓽ ꓥ ꓡ=

(1) ꓟꓬ ꓢꓶꓽ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓟ

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓘꓴꓽ ꓗꓪ ꓟꓬ ꓢꓶꓽ ꓠꓬꓲ ꓟꓳ ꓓꓴ ꓢꓯꓼ ꓐꓱ ꓶ ꓔꓳꓹ ꓙˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ= ꓟꓬ ꓢꓶꓽ ꓢꓯꓼ ꓐꓱ ꓶˍ ꓡꓰꓽ ꓟꓽ ꓞꓲꓺ Beta carotene ꓠꓬ Vitamin A ꓢꓯꓼ ꓠꓲꓸ ꓔ ꓟ ꓔꓯˍ ꓟ ꓡꓴꓽ ꓖꓶˍ ꓟ ꓥ ꓡꓳ= ꓳ ꓡˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓢꓯꓼ ꓥˍ ꓟꓲ ꓓꓹ ꓟ ꓑꓶꓸ ꓓꓴ ꓠꓱꓸ ꓐꓯꓼ ꓕꓲ ꓫꓵꓽ ꓫꓵꓽ ꓐꓰ ꓟꓽ ꓕꓽ ꓟ ꓪꓴꓸ ꓠꓬꓲ ꓟꓬ ꓢꓶꓽ ꓳˍ ꓟ꓾ ꓟꓬ ꓢꓶꓽ ꓫꓵꓽ ꓡˍ ꓟ꓾ ꓞꓰꓹ ꓟ (ꓠꓬꓲ ꓟꓵˍ ꓟ) ꓐꓱ ꓶˍ ꓟꓲ ꓮ ꓘꓶꓸ ꓣꓱꓽ ꓬꓯꓼˍ ꓟ ꓥ ꓡꓳ= ꓝꓮꓲ ꓠꓬ ꓞꓲꓼ ꓟꓳꓽ ꓡ ꓕꓯ ꓒꓬꓱꓼ ꓗꓴˍ ꓟ ꓟꓬ ꓢꓶꓽ ꓠꓬꓲ ꓟꓽ ꓟꓳ꓾ ꓟꓬ ꓢꓶꓽ ꓶ ꓡꓰˍ ꓟ ꓔꓯˍ ꓟꓲ ꓗꓽ ꓕꓸ ꓖꓶ ꓐ ꓡˍ ꓡꓳ=

(2) ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓟꓬꓽ ꓡ ꓝꓲˍ ꓟ

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓗꓪ ꓙꓳˍ ꓟ Vitamin A ꓠꓬ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓢꓯꓼ ꓐꓱ ꓶ ꓟꓽ ꓓ ꓣꓱꓽ ꓞꓹ ꓟ Vitamin ꓕꓲ ꓟ ꓥ ꓡꓳ= Antioxidant ꓐꓴ ꓥ ꓟ Lutein, zeaxanthin, beta caroteneꓹ chlorophyll ꓐꓴ ꓠꓬ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓢꓯꓼ ꓮ ꓟꓬꓹ ꓟꓬꓽ ꓡ ꓝꓲˍ ꓡꓳ= ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓢꓯꓼ ꓮ ꓟꓬꓹ ꓙꓳˍ ꓕꓯ ꓠꓽ ꓣꓳ ꓠꓯꓸꓼ ꓗꓪ ꓠꓻ ꓐꓶꓽ ꓓꓲꓻ ꓢꓺ ꓢˍ ꓐꓰ ꓓꓵꓽ ꓡ ꓟꓽ ꓓ= ꓝꓮꓲ ꓠꓬ ꓣꓳ ꓔꓯ ꓮ ꓕꓯˍ ꓟꓲ ꓔꓬ ꓢ ꓝꓲˍ ꓟ ꓥ ꓡꓳ=

(3) ꓪꓳꓽ ꓔꓳ ꓔꓯ ꓢꓯꓼ ꓙꓳ ꓡ ꓝꓲˍ ꓟ

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓬꓲ ꓒꓬꓽ ꓗꓪ ꓪꓳꓽ ꓔꓳ ꓔꓬ ꓢ ꓓꓴ ꓐꓱ ꓶ ꓣꓱꓽ ꓞꓹ ꓟ Vitamin K ꓐꓰ Magnesium ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ= Vitamin K ꓠꓬ ꓪꓳꓽ ꓔꓳ ꓘꓳꓹ ꓡꓰ ꓢˍ ꓟ ꓔꓯ ꓠꓲꓸ ꓡꓰ ꓝꓲ ꓢꓲ Vitamin D ꓐꓰ ꓕꓲ ꓪꓽ ꓪꓳꓽ ꓔꓳ ꓕꓶꓻ ꓡꓰ ꓠ꓾ ꓪꓳꓽ ꓔꓳ ꓢꓯꓼ ꓙꓳ ꓡꓰ ꓠ ꓢꓯꓼ ꓧꓳꓽ ꓖꓶˍ ꓡꓳ= ꓧꓪꓽ ꓗꓪ ꓙꓳˍ ꓟ Vitamin D ꓢꓯꓼ ꓐꓰ ꓠꓸ ꓪꓳꓽ ꓗꓪ ꓙꓳˍ ꓟ Vitamin ꓠꓬ ꓕꓲ ꓡꓰꓹꓼ ꓥ ꓟ ꓪꓴꓸ ꓠꓬꓲ꓾ ꓧꓪꓽ ꓜꓽ ꓠꓲꓹ ꓶ ꓡꓰˍ ꓕꓯ꓾ ꓥ ꓠꓬ Vitamin D꓾ Calcium ꓐˍ ꓟ ꓮꓸ ꓠꓬꓲꓽ ꓮ ꓚꓵꓹ (ꓮꓸ ꓠꓬꓲꓽ ꓠꓳꓹ ꓠꓳꓼ) ꓢꓳꓻ ꓟꓽ ꓐ ꓡ ꓢꓴ ꓐꓴ ꓠꓬ ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓜꓽ ꓖꓶ ꓠꓯꓹ ꓟ ꓥ ꓡꓳ=

(4) Cancer ꓠꓻ ꓔꓯ ꓗꓽ ꓕꓸ ꓖꓶˍ ꓟ

ꓠꓸ ꓪꓳꓽ ꓗꓪ glucuronides ꓐꓰ Methylenedioxy flavonoid ꓢꓯꓼ ꓒ ꓐꓲꓻ ꓙꓳˍ ꓟ ꓥ ꓢꓲ ꓕꓱ ꓟ ꓠꓬ cancer ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶˍ ꓡꓳ= ꓠꓯꓻ ꓞꓲꓼ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓧꓪ ꓟꓰꓹ ꓠꓬꓲ ꓔ ꓟ ꓗꓪ꓾ ꓮ ꓚꓵꓹ cancer ꓐꓰ ꓤ ꓘꓶꓻ ꓗꓪ ꓟ ꓤ ꓶꓻ ꓡꓰ ꓢꓴ ꓕꓲ ꓫꓵꓽ cancer ꓒꓬꓱꓼ ꓡ ꓚꓱꓹ ꓔꓯ ꓠꓲꓸ ꓡꓰ ꓝꓲˍ ꓟ ꓥ ꓡꓳ꓾ ꓐꓰ ꓐꓯ ꓔ ꓟ ꓙꓳˍ ꓡꓳ=

(5) ꓠꓲꓹ ꓟ ꓔꓬꓹ ꓢ ꓡꓰ ꓝꓲˍ ꓟ

ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓗꓪ Potassium ꓢꓯꓼ ꓙꓳˍ ꓟ ꓪꓴꓸ ꓠꓬꓲ ꓠꓲꓹ ꓟ ꓔꓬꓹ ꓢ ꓓꓴ ꓐꓱ ꓶ ꓟꓬꓽ ꓠꓬꓲ ꓣꓱꓽ ꓬꓯꓼˍ ꓡꓳ= ꓠꓯꓻ ꓞꓲꓼ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ potassium ꓠꓬ ꓫꓵꓽ ꓓꓯˍ ꓟ ꓔꓯ ꓞꓰ ꓡꓰ ꓝꓲ ꓢꓲ꓾ ꓟꓲꓽ ꓦꓲ ꓒꓲꓹ ꓠꓻ ꓐꓰ ꓠꓲꓹ ꓟ ꓠꓻ ꓔꓯ ꓗꓽ ꓕꓸ ꓖꓶˍ ꓡꓳ꓾ ꓐꓯ ꓟ ꓔꓯ ꓧꓪ ꓟꓳ ꓔ ꓟ ꓥ ꓡꓳ= ꓠꓸ ꓪꓳꓽ ꓗꓪ ꓙꓳˍ ꓟ nitrates ꓢꓯꓼ ꓥˍ ꓟꓲ ꓫꓵꓽ ꓤꓶꓻ ꓙꓳ ꓡ ꓝꓲ ꓢꓲ꓾ ꓠꓲꓹ ꓟ ꓔꓬꓹ ꓢ ꓓꓴ ꓐꓱ ꓶ ꓮ ꓟꓬꓹ ꓣꓱꓽ ꓬꓯꓼˍ ꓡꓳ=

(6) ꓖꓳ ꓓꓱꓽ ꓡꓲꓽ ꓔꓬ ꓢꓴ ꓐꓱ ꓶ ꓙꓲˍ ꓟ

Folic acid ꓠꓬ ꓖꓳ ꓓꓱꓽ ꓡꓲꓽ ꓔꓬ ꓟ ꓟꓹ ꓟ ꓐꓴ ꓐꓱ ꓶ ꓟꓬꓽ ꓠꓬꓲ ꓣꓱꓽ ꓞꓹ ꓟ ꓢꓯꓼ ꓥ ꓡꓳ= folate ꓢꓯꓼ ꓠꓬ ꓤꓽ ꓘꓶꓻ ꓗꓪ ꓟ ꓤ ꓠꓱ ꓤ ꓪꓴꓽ ꓡ ꓔꓬ ꓟ ꓙꓵꓹ ꓗꓪ ꓧꓪꓸ ꓧꓪꓸꓼ ꓡꓰꓽ ꓪꓴꓽ ꓡ ꓠꓹ ꓟ ꓐꓰ ꓤ ꓠꓱ ꓤ ꓔꓯ ꓦꓵꓻ ꓓꓳ ꓡˍ ꓕꓯ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶˍ ꓡꓳ= ꓖꓳ ꓓꓱꓽ ꓡꓲꓽ ꓔꓬ ꓕꓯ ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓜꓽˍ ꓟ ꓠꓬ Folate ꓢꓯꓼ ꓮ ꓟꓬꓹ ꓪ ꓡꓰ ꓝꓲ ꓢꓲ ꓖꓳ ꓓꓱꓽ ꓡꓲꓽ ꓢꓴ ꓔꓯ ꓔꓬꓹ ꓢ ꓡꓰ ꓝꓲˍ ꓡꓳ=

ꓕꓱ ꓗꓪ ꓤ ꓟꓳ ꓠ ꓔ ꓓꓴ ꓠꓬ ꓠꓸ ꓪꓳꓽ ꓐꓰ ꓳ-ꓓꓳꓽ-ꓢꓶꓽ ꓕꓲ ꓡꓰꓹ ꓜꓽ ꓟꓽ ꓓ= ꓳ-ꓓꓳꓽ-ꓢꓶꓽ ꓗꓪ oxalic acid ꓮ ꓟꓬꓹ ꓙꓳˍ ꓟ ꓡꓰ ꓐꓰ ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓗꓪˍ ꓟꓲ oxalic acid ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ꓾ ꓕꓱ ꓠꓬꓲꓽ ꓙꓰꓽ ꓡꓱꓸꓼ ꓜꓽ ꓗꓷ ꓠꓬ oxalic acid ꓢꓯꓼ ꓟꓬꓽ ꓡꓰ ꓢꓲ ꓪꓳꓽ ꓓꓲꓻ ꓗꓪ ꓡꓳꓺ ꓓꓰꓺ ꓙꓳ ꓡ ꓗꓴˍ ꓡꓳ=

ꓤ ꓟꓳ ꓓꓴ ꓝꓮꓲ ꓕꓲ ꓫꓵꓽ ꓠꓬ ꓠꓸ ꓪꓳꓽ (ꓠꓸ ꓢꓲꓽ ꓛꓬꓽ) ꓔꓯ ꓟꓶ ꓤ ꓕꓽ ꓚꓬꓸ꓾ ꓕꓽ ꓡꓱ= ꓟꓶ ꓤ ꓚꓬꓸ ꓗꓷ ꓡꓱ ꓗꓷ ꓠꓬ ꓠꓸ ꓪꓳꓽ ꓗꓪ ꓙꓳˍ ꓟ ꓬꓲꓸ ꓢꓯꓼ ꓟꓽ ꓙꓳ ꓗꓷ ꓡꓰˍ ꓥꓳ= ꓮꓸ ꓔꓳꓸ ꓛ ꓢꓯꓼ ꓠꓬ ꓠꓸ ꓪꓳꓽ ꓬꓲꓸ ꓢꓯꓼ ꓔꓯ ꓠꓲꓸ ꓡꓰ ꓝꓲˍ ꓟ ꓪꓴꓸ ꓠꓬꓲ ꓥ ꓡꓳ=