ꓡꓽ-ꓫꓪꓸ ꓔꓶ ꓚꓱꓹ (ꓔꓶ ꓫꓵꓽ ꓔꓶ ꓙꓰꓽ ꓔꓶˍ ꓟ ꓚꓱꓹ)

ꓡꓽ-ꓫꓪꓸ ꓔꓯ ꓬꓲ ꓓꓽ ꓟ ꓝꓳꓽ ꓐꓰ ꓬꓲ ꓤ ꓤ ꓝꓳꓽ ꓔꓯ ꓟꓬꓽ ꓠꓬꓲ ꓔꓶˍ ꓟ ꓥ ꓡꓳ=

ꓔꓶ ꓓꓴ ꓐꓱ ꓶ ꓧꓺ ꓔꓷꓼ ꓡꓰˍ ꓟ꓾ ꓙꓲꓻ ꓖꓴ ꓡꓰˍ ꓟ ꓬꓲ ꓙꓵꓹ ꓠꓬ 9 ꓦ ꓡꓳꓹ ꓬꓰ ꓔꓬ ꓟ ꓕꓲ ꓠꓽ ꓗꓪ ꓐꓰ 11 ꓦ ꓗꓪ ꓛꓲꓺ ꓥ ꓡꓳ꓾ ꓐꓰ ꓐꓯ ꓓꓹ ꓟ ꓥꓳ= ꓖꓳ ꓡꓱ ꓥ ꓟꓲ ꓕꓲ ꓟꓵꓽ ꓐꓰ ꓕꓲ ꓟꓵꓽ ꓟꓽ ꓫꓱꓸ ꓡꓯ ꓘꓳ= ꓕꓲ ꓖ ꓕꓲ ꓟꓵꓽ ꓗꓪ ꓠꓬ ꓟꓶꓽ ꓦ ꓡꓲꓺ ꓟꓬꓽˍ ꓟ ꓪꓴꓸ ꓠꓬꓲ ꓟꓶ ꓦ ꓠꓽ ꓡꓰ ꓕꓯ ꓢꓲꓸ ꓔꓶˍ ꓟ ꓥ ꓡꓳ=

ꓔꓶ ꓓꓴ ꓐꓱ ꓶ ꓬꓲ ꓟꓲꓺ ꓔꓯ ꓘꓪꓺ ꓗꓷ ꓢꓲ ꓘꓪꓺ ꓔ ꓟ ꓠꓱꓸ ꓦꓱꓽ ꓘꓴꓸ ꓔꓯ ꓧꓶꓽ ꓡꓰ ꓝꓲ= ꓖꓳ ꓗ ꓠꓯꓸ ꓮꓸ ꓠꓬꓲꓽ ꓛꓲꓽ (ꓮꓸ ꓪꓯꓼ ꓛꓲꓽ) ꓬꓲ ꓙꓴꓺ ꓧꓳꓽ ꓗꓷ= ꓙꓱꓽ ꓤ ꓛꓲꓽ ꓬꓲ ꓙꓴꓺ ꓟꓽ ꓥ ꓥ꓾ ꓬꓲ ꓙꓲꓽ ꓣꓱꓽˍ ꓕꓯ ꓠꓽ ꓬꓲ ꓛꓲꓽ ꓗꓪ ꓐꓶꓽ ꓓꓲꓻ ꓙꓳˍ ꓟ ꓪꓴꓸ ꓠꓬꓲ ꓬꓲ ꓜꓲ ꓐꓱ ꓶ ꓫ ꓓꓴ ꓒꓬꓱꓼ ꓡꓹ ꓥꓳ=

ꓔꓶˍ ꓟ ꓗꓪ ꓬꓲꓸ ꓫꓵꓸ ꓐꓱ ꓶ ꓠꓬ ꓬꓲ ꓢꓶꓽ ꓪꓴꓽˍ ꓟ ꓐꓲˍ ꓟ ꓔꓯ ꓣꓴ ꓔꓯ ꓬꓲ ꓧꓹ꓾ ꓬꓲ ꓢꓷꓹ ꓔꓯ ꓔꓶ ꓠꓯꓹ ꓟ ꓥꓳ= ꓕꓲ ꓜꓲ ꓐꓰ ꓕꓲ ꓜꓲ꓾ ꓕꓲ ꓚꓬꓸ ꓐꓰ ꓕꓲ ꓚꓬꓸ 3” 4” ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ= ꓔꓶ ꓗꓷ ꓗꓸ ꓠꓯꓸ ꓩꓲꓸ-ꓛꓲꓻ ꓟꓵꓽ ꓛꓵꓽ ꓐꓴ ꓧꓳꓽ ꓖꓶ ꓠꓯꓹ ꓥ= ꓖꓳ ꓗ ꓠꓯꓸ ꓠꓬ ꓫꓵꓸ ꓙꓴꓺ꓾ ꓜ ꓪꓵꓽ ꓑꓱꓸ ꓙꓳˍ ꓠꓬꓲ ꓕꓯꓽ ꓢꓲ ꓗꓪ ꓑꓲꓸ ꓖꓶ ꓗꓷ= ꓖꓳ ꓟ ꓟꓽ ꓙꓳ ꓠꓬ ꓑ-ꓡ-ꓢ-ꓔꓲ ꓬꓲ ꓠꓯꓺ ꓠꓯꓺ ꓑꓲꓸ ꓗꓷ= ꓕꓱ ꓡꓰ ꓬꓰˍ ꓟ ꓠꓬ ꓬꓲ ꓟꓲꓺ ꓗꓪ ꓧꓳꓽ ꓔ ꓟ ꓬꓲꓻ ꓙꓬ ꓢꓯꓼ ꓮ ꓟꓬꓹ ꓟꓽ ꓙꓴꓺ ꓡꓰ ꓠꓹ ꓟ ꓥ ꓡꓳ= ꓫꓵꓸ ꓙꓴꓺ ꓜ ꓪꓵꓽ ꓑꓱꓸ ꓟꓽ ꓙꓳ ꓠꓬ꓾ ꓑ-ꓡ-ꓢ-ꓔꓲ ꓑꓲꓸ ꓖꓶ ꓠꓲꓹ ꓟꓽ ꓫꓵ ꓠꓬ ꓬꓲ ꓟꓲꓺ ꓔꓯ ꓕꓲ ꓠꓬꓲ ꓟ ꓬꓲꓻ ꓙꓬ ꓠꓬꓲꓽ ꓧꓪꓹ ꓧꓳꓽ ꓖꓶˍ ꓟꓲ ꓓꓹ ꓡꓳ= ꓬꓲꓻ ꓙꓬ ꓟꓬꓽ ꓟꓬꓽ ꓧꓳ ꓖꓶ ꓠꓯꓹ ꓥ ꓟꓲ ꓮ ꓘꓶꓸ ꓬꓲ ꓙꓬ ꓟꓶꓸ ꓡꓰˍ ꓗꓪ ꓛꓲ ꓠꓽ ꓧꓳꓽ ꓖꓶ ꓟꓽ ꓛꓵꓺ=

ꓔꓶ ꓗꓷ ꓟ ꓞꓲꓺ ꓠꓬꓲ ꓛꓲꓺ ꓙꓳ ꓡꓹ ꓠꓬ ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡꓺ ꓡꓳ= ꓬꓲ ꓜꓲ ꓡꓯꓼ ꓕꓵ ꓕꓲ ꓕꓵ ꓛꓲ ꓙꓳ ꓡ ꓠꓬ ꓬꓲꓻ ꓙꓬ ꓮ ꓟꓬꓹ ꓧꓳꓽ ꓖꓶ ꓟꓽ ꓛꓵꓳ= ꓖꓳ ꓡꓱ ꓥˍ ꓟꓲ ꓟꓵꓽ ꓮ ꓘꓶꓸ ꓙꓴꓺˍ ꓟ ꓗꓪ ꓠꓽ ꓟꓽ ꓠꓽ ꓠꓽ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓥ= ꓝꓮꓲ ꓬꓲ ꓛꓵꓺ ꓚꓵꓹ ꓓ ꓡꓹ ꓕꓯ ꓠꓬ ꓬꓲꓻ ꓙꓬ ꓧꓳꓽ ꓖꓶ ꓟꓽ ꓛꓵꓺꓳ=

ꓬꓲ ꓜꓲ ꓬꓲ ꓟꓲ ꓗꓪ ꓟꓳꓼ ꓣꓱꓻ ꓡꓹ ꓕꓯ ꓚꓵꓹ ꓦ ꓖꓶ ꓠ ꓔ ꓡꓳ= ꓡꓽ-ꓫꓪꓸ ꓜꓲ ꓠꓬ ꓔꓶ ꓗꓷ ꓗꓸ ꓠꓯꓸ ꓦ ꓐ 7 ꓟ ꓗꓪ ꓐꓰ 8 ꓟ ꓛꓲ ꓙꓳ ꓡ ꓠꓬ ꓶꓼ ꓫ ꓝꓲ ꓛꓲꓺ ꓡꓺꓳ= ꓶꓼ ꓫ ꓝꓲ ꓛꓲ ꓡ ꓟ ꓔꓯ ꓮ ꓡꓲ ꓢꓷ ꓓꓹ ꓡ ꓐꓯ ꓠꓬ ꓡꓽ-ꓫꓪꓸ ꓜꓲ ꓬꓲ ꓠꓯꓸ ꓘꓪ ꓗꓪ ꓟ ꓬꓲ ꓒꓬꓽ ꓠꓬꓲꓽ ꓒꓬꓽ ꓢꓺ ꓒꓬꓽ ꓛꓲ ꓙꓴꓺ ꓡꓰ ꓧꓪꓼ ꓡꓰˍ ꓕꓯ ꓶꓼ ꓫ ꓝꓲ ꓛꓲ ꓡꓺ ꓟ ꓥꓳ=

ꓡꓽ-ꓫꓪꓸ ꓚꓵꓹ ꓟ ꓗꓪ ꓚꓵꓹ ꓠꓯꓼ ꓡꓰ ꓠꓬ ꓬꓲ ꓛꓵꓺ ꓮ ꓘꓶꓸ ꓟꓽ ꓪꓴ ꓓꓰꓺ ꓟ ꓪꓴꓸ ꓠꓬꓲ ꓶꓼ ꓫ ꓗꓷ ꓗ ꓠꓯꓸ ꓐꓵꓼ ꓡꓰ ꓢꓺ ꓡꓳ꓾ ꓐꓬ ꓡꓰ ꓢꓺ ꓡꓳ= ꓚꓵꓹ ꓟꓬ ꓡꓰˍ ꓟꓲ ꓬꓲ ꓛꓵꓺ ꓮ ꓘꓶꓸ ꓟꓳꓽ ꓡꓰ ꓢꓲ ꓣꓱꓽ ꓟꓽ ꓠ ꓗꓷ ꓡꓰ ꓗꓴˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓜꓲ ꓗꓪ ꓟ ꓠꓯꓸ ꓘꓪ ꓗꓪ ꓟ ꓬꓲꓸ ꓒꓬꓽ ꓠꓬꓲꓽ ꓒꓬꓽ ꓢꓺ ꓒꓬꓽ ꓙꓴꓺ ꓡꓰ ꓧꓪꓼ ꓡꓰ ꓖꓴˍ ꓠꓬ ꓶꓼ ꓫ ꓓ꓾ ꓚꓵꓹ ꓫ ꓓꓹ ꓟ ꓥ ꓡꓳ= ꓚꓵꓹ ꓦ ꓔ ꓟ ꓘꓴꓽ ꓗꓪ ꓬꓲ ꓛꓵꓹ ꓪꓴꓽˍ ꓟ ꓔꓯ ꓠꓸ ꓦꓬꓹ ꓬꓲ ꓫꓵꓸ ꓐꓱ ꓶ ꓫ ꓔ ꓐ ꓡꓹ ꓡꓳ=