ꓢꓲꓽ ꓫꓬ ꓕꓳ ꓶ ꓐꓰ ꓟꓲ ꓠꓯ (Dialogue with Environment)

ꓚꓧꓣꓲꓢꓔꓳꓡꓳꓖꓬ ꓐꓯˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓚꓱꓹ ꓔꓯ ꓜꓲ ꓜꓲ ꓟꓴ ꓟꓴ ꓧꓪꓹ ꓟ ꓢꓳ ꓣꓴˍ ꓟ ꓬꓲ ꓟꓸ ꓟꓲꓽ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓠꓲꓹ ꓛꓵꓼ ꓑꓲꓳ ꓔ ꓟ ꓢꓲꓺ ꓒꓽ ꓬꓰ-ꓢꓴ ꓟꓸ ꓟꓲꓽ ꓢꓲꓺ ꓒꓽ ꓬꓰ-ꓢꓴ ꓚꓱꓹ ꓔꓯ ꓢꓳˍ ꓟ ꓢꓷꓸ ꓠꓲꓹ ꓐꓰ ꓬꓲ ꓟꓸ ꓟꓲꓽ ꓙꓳˍ ꓡꓳ= ꓐꓯ ꓟꓵ ꓢꓪˍ ꓟ ꓠꓬ ꓪꓴ-ꓢ ꓡꓰ ꓟꓵꓽ ꓚꓰꓼ ꓟꓲꓽ ꓚꓰꓼ ꓕꓯ ꓡꓰ ꓟꓲ ꓠꓯ ꓕꓱ ꓟ ꓔꓯ ꓮꓽ ꓘꓶꓸ ꓐꓲ ꓠ ꓠꓲꓹ ꓚꓵꓼ ꓑꓲꓳ ꓗꓶ ꓡꓰ ꓠ ꓕꓱ ꓡꓰ ꓚꓰꓼ ꓔ ꓟ ꓥ ꓪ= ꓖꓳ ꓟ ꓪꓴꓸ ꓠꓬ ꓢꓲꓺ ꓒꓽ ꓬꓰ-ꓢꓴ ꓡꓰ ꓚꓰꓼ ꓔ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓢꓷꓸ ꓡꓰ ꓝꓲˍ ꓟ ꓚꓰꓼ ꓔ ꓟ ꓚꓱꓹ ꓕꓱ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓢꓲꓺ ꓒꓽ ꓬꓰ-ꓢꓴ ꓡꓰ ꓮ ꓡꓰ ꓐꓯ ꓦˍ ꓡ ꓐꓯˍ ꓟ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓪ= ꓥꓪ ꓠꓽ ꓮꓸ ꓣꓳ ꓔꓯ ꓢꓯꓼ ꓟꓬ ꓟꓶ ꓝꓲ ꓠꓹ ꓟ ꓐꓰ ꓐꓲ ꓡꓶꓽ ꓡꓰ ꓠꓹ ꓟ ꓢꓯꓼ ꓟꓬ ꓟꓶ ꓝꓲ ꓠˍ ꓟ ꓡˍ ꓡꓳ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓔ ꓡꓳ (ꓬꓳ-ꓦ 10ꓽ 10) = 

ꓟꓲ ꓠꓯ ꓗꓪ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓬꓲ ꓜꓴ ꓬꓲ ꓟꓯꓼ ꓮꓽ ꓟꓬꓹ ꓙꓳˍ ꓟ ꓡꓰ ꓐꓰ ꓕꓲꓽ ꓡꓰꓻ ꓣꓳꓸ ꓥˍ ꓟꓲ ꓮꓽ ꓟꓬꓹ ꓒꓴ ꓔ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓐꓲ ꓜꓲꓼˍ ꓟ ꓐꓯˍ ꓟ ꓠꓬ ꓟꓽ ꓙꓳ= ꓬꓲ ꓜꓴ ꓬꓲ ꓟꓯꓼ ꓗꓪ ꓬꓰ ꓔꓬ ꓢꓴ ꓮꓽ ꓙꓵꓽ ꓬꓲ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓟ ꓐꓰ ꓬꓲ ꓪꓽ ꓒꓬꓱꓼ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓮꓽ ꓘꓶꓸ ꓙꓲˍ ꓟ ꓥ ꓢꓲ ꓠꓬꓲ ꓟꓬꓱ ꓓꓳꓽ ꓖꓶ ꓒꓵˍ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓬꓲ ꓪꓽ ꓣꓳꓸ ꓦꓲꓺ ꓗꓪ ꓠꓶꓼ ꓔ ꓟ ꓐꓬꓱˍ ꓐꓰ ꓖꓳ ꓕꓲꓽ ꓘꓴꓸ ꓗꓪ ꓐꓲ ꓫꓵꓽ ꓦˍ ꓟ ꓥ ꓕ ꓑꓳꓸ ꓠꓬ ꓟꓴ ꓘꓳꓼ ꓒꓳꓹ ꓡˍ ꓟ ꓚꓱꓹ ꓔ ꓟꓳꓸ ꓢꓷꓸ ꓠꓲꓹ ꓖꓶˍ ꓟ ꓐꓬꓱꓽ ꓐꓴ ꓥ ꓢꓲ ꓬꓲ ꓐꓬꓱꓽ ꓐꓳ ꓔ ꓟ ꓔꓯ ꓥˍ ꓟꓲ ꓮꓽ ꓘꓶꓸ ꓡꓳꓸ ꓐꓲ ꓠ ꓬꓰ ꓦˍ ꓟ ꓥ ꓪ= ꓖꓳ ꓡꓰ ꓬꓰ ꓦˍ ꓟ ꓙꓳ ꓥˍ ꓟꓲ ꓗ-ꓕꓳꓡꓲꓼ ꓙꓲ-ꓢꓴ ꓢꓲꓺ ꓤꓼ ꓕꓲꓽ ꓣꓳ ꓗꓪ ꓚꓳ ꓛꓳꓽ ꓥꓳ ꓐꓯˍ ꓠꓬ ꓖꓳ ꓟ ꓬꓲ ꓐꓬꓱꓽ ꓠꓬ ꓐꓲ ꓜꓲꓼˍ ꓟ ꓙꓳ ꓥˍ ꓟꓲ ꓚꓧꓲꓰꓝ ꓢꓰꓮꓔꓔꓡꓰ ꓡꓰ ꓐꓯ ꓦˍ ꓟ ꓕꓳ ꓶ꓾ ꓲꓠꓓꓲꓮ ꓗꓪ ꓚꓳ ꓠꓲ ꓟꓴꓽ ꓖꓪꓽ ꓐꓳ ꓒꓽ ꓥꓳꓽ ꓙꓱ ꓐꓳ ꓒꓽ ꓔꓮꓖꓳꓣꓰ ꓡꓰ ꓐꓳ ꓔ ꓟ ꓔꓯ ꓟꓬꓽ ꓠꓬꓲ ꓣꓴ ꓦˍ ꓟ ꓔꓯ ꓡꓳꓸ ꓟꓳˍ ꓡꓳ= ꓙꓲ-ꓢꓴ ꓢꓲꓺ ꓤꓼ ꓐꓴ ꓣꓱꓹ ꓟ ꓢꓲꓽ ꓫꓬ ꓕꓳ ꓶ ꓗꓪ ꓚꓳꓸ ꓥˍ ꓟꓲ꓾ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓗꓪ ꓚꓳꓸ ꓥˍ ꓟꓲ ꓣꓴ ꓢꓲ ꓟꓽ ꓐꓳ ꓔ= ꓖꓳ ꓟ ꓠꓬ ꓣꓳꓽ ꓐꓱ ꓶ ꓠꓲꓹ ꓟ ꓟꓽ ꓗꓹ ꓛꓲꓽ ꓓꓴ ꓠꓲꓹ ꓟ ꓟꓽ ꓢ ꓓꓴ ꓕꓲꓽ ꓫꓵꓽ ꓥˍ ꓡꓳ= 

ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓬꓲ ꓜꓴ ꓬꓲ ꓟꓯꓼ ꓐꓴ ꓠꓬ ꓔꓷ ꓫꓵꓽ ꓔꓷ ꓙꓵꓽ ꓗꓪ ꓣꓱꓽ ꓠꓹ ꓟ ꓟꓵꓽ ꓛꓵꓽ ꓢꓲꓹ ꓛꓵꓽ ꓗꓪ ꓙꓳˍ ꓟ ꓔꓷ ꓫꓵ ꓔꓷ ꓙꓵꓽ ꓔꓯ ꓢꓯꓼ ꓖꓶˍ ꓟ ꓖꓳ ꓟ ꓠꓯꓸꓼ ꓗꓪ ꓙꓳˍ ꓟ ꓟꓬ ꓢꓶꓽ ꓡꓰ ꓟꓳ ꓪ ꓟꓽ ꓓˍ ꓟ ꓐꓶꓽ ꓓꓲ ꓡꓳꓹ ꓓꓲ ꓔꓯ ꓞꓳ ꓤꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓠꓯꓸꓼ ꓗꓪ ꓒꓬꓱꓼ ꓡꓰ ꓝꓲ ꓠ ꓔꓷ ꓫꓵꓽ ꓔꓷ ꓙꓵꓽ ꓔꓯ ꓞꓳ ꓤꓽ ꓐꓱ ꓙꓲ ꓖꓴ ꓙꓳˍ ꓟ ꓠꓯꓸꓼ ꓗꓪ ꓒꓬꓱꓼ ꓡꓰ ꓝꓲ ꓠ꓾ ꓬꓲ ꓜꓲ ꓥˍ ꓟꓲ ꓟꓬꓽ ꓠꓬꓲ ꓪꓴꓽ ꓡ ꓠ ꓕꓱ ꓡꓰ ꓗꓶ ꓡꓰ ꓝꓲˍ ꓟ ꓣꓱꓽˍ ꓟ ꓥ ꓪ= ꓖꓳ ꓟ ꓡꓰ ꓐꓰ ꓕꓲꓽ ꓡꓰꓻ ꓔꓷ ꓫꓵꓽ ꓔꓷ ꓙꓵꓽ ꓔꓯ ꓥˍ ꓟꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓙꓲ ꓠ ꓟꓬꓽ ꓠꓬꓲ ꓐꓶꓹ ꓠꓬꓲ ꓪꓴꓽ ꓡ ꓠ ꓕꓱ ꓡꓰ ꓬꓲ ꓫꓵꓸ ꓔꓯ ꓕꓱ ꓡꓰ ꓒꓳꓹ ꓔ ꓟ ꓥˍ ꓟꓲ ꓬꓰ ꓐ ꓡˍ ꓡꓳ= ꓖꓳ ꓡꓰ ꓔꓷ ꓫꓵꓽ ꓔꓷ ꓙꓵꓽ ꓗꓪ ꓣꓱˍꓟ ꓟꓵꓽ ꓛꓵꓽ ꓢꓲꓹ ꓛꓵꓽ ꓔꓯ ꓢꓲ ꓟꓳꓸ ꓮ ꓡꓰ ꓢꓲꓸ ꓣꓱꓽ ꓠꓹ ꓟ ꓬꓲ ꓙꓬ ꓔꓯ ꓮ ꓡꓰ ꓢꓲ ꓣꓱꓽ ꓠꓹ ꓟ ꓕꓱ ꓡꓲꓳ ꓫꓵꓽ ꓔꓯ ꓟꓳꓸ ꓬꓲ ꓪꓽ ꓠꓬ ꓟꓸ ꓖꓶˍ ꓟ ꓮꓽ ꓟꓬꓹ ꓕꓱ ꓡꓰ ꓙꓳˍ ꓟ ꓥ ꓪ= ꓕꓱ ꓟ ꓙꓲˍ ꓟ ꓕꓲꓽ ꓛꓱꓽ ꓔꓯ ꓢꓲ ꓟꓸ ꓖꓶˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓢꓲꓽ ꓫꓬ ꓕꓳ ꓶ ꓗꓪ ꓚꓳꓸ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯˍ ꓟ ꓗꓪ ꓚꓳꓸ ꓢꓳ ꓣꓴ ꓢꓲ ꓬꓰˍ ꓟ ꓠꓬ ꓮꓽ ꓘꓶꓸ ꓟꓽ ꓙꓳ= ꓕꓱ ꓟ ꓠꓬ ꓠꓲꓹ ꓟ ꓟꓽ ꓢ ꓓꓴ ꓠꓲꓹ ꓟ ꓟꓽ ꓗꓹ ꓛꓲ ꓓꓴ ꓕꓲꓽ ꓫꓵꓽ ꓥ ꓪ= ꓟꓬꓽ ꓠꓬꓲ ꓐꓶˍ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓠꓬꓲꓸ ꓠꓬꓲ 3000 ꓘꓳꓼ ꓗꓪ ꓓꓵꓽ ꓡˍ ꓟ ꓬꓲ ꓙꓵꓹ ꓗꓪ ꓢꓲꓺ ꓒꓽ ꓬꓰ-ꓢꓴ ꓚꓱꓹ ꓔꓯ ꓟꓳꓸ ꓢꓳ ꓢꓷꓸ ꓡꓰ ꓠ ꓬꓰˍ ꓟ ꓮꓽ ꓘꓶꓸ ꓟꓳ ꓪ ꓓ ꓠ ꓬꓰˍ ꓟ ꓟꓽ ꓙꓳˍ ꓢꓰꓹ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓚꓵ ꓚꓵ ꓐꓯˍ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓔꓯ ꓧꓶꓸ ꓕꓯ ꓪꓴ-ꓢ ꓡꓰ ꓚꓰꓼ ꓔ ꓟ ꓡꓰ ꓐꓰ ꓕꓲꓽ ꓡꓰꓻ ꓝꓮꓲ ꓕꓲꓽ ꓧꓪꓹ ꓒꓬꓱꓼ ꓡ ꓠꓹ ꓟ ꓐꓱ ꓶ ꓠꓬ ꓮ ꓡꓰ ꓥˍ ꓟꓲ ꓬꓰ ꓟꓽ ꓐ ꓡ ꓠ ꓗꓪ ꓛꓲ ꓟꓲ ꓠꓯ ꓠꓬ ꓐꓬ ꓡꓰꓳ= ꓕꓱ ꓟ ꓥˍ ꓟꓲ ꓠꓲꓹ ꓟ ꓟꓽ ꓢ ꓓꓴ ꓠꓲꓹ ꓟ ꓟꓽ ꓗꓹ ꓛꓲ ꓓꓴ ꓕꓲꓽ ꓫꓵꓽ ꓥ ꓪ= 

ꓙꓲ-ꓢꓴ ꓢꓲꓺ ꓤꓼ ꓐꓴˍ ꓐꓰ ꓠꓱꓸ ꓐꓯꓼ ꓞꓳ ꓤꓽ ꓮꓽ ꓙꓵꓽ ꓠꓬ ꓕꓱ ꓟ ꓚꓱꓹ ꓔꓯ ꓟꓳꓸ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓢꓲꓺ ꓒꓽ ꓬꓰ-ꓢꓴ ꓡꓰ ꓟꓸ ꓖꓶ ꓔ ꓟ ꓮꓸ ꓓꓲꓽ ꓒꓵꓽˍ ꓟ ꓕꓱ ꓟ ꓔꓯ ꓢꓳ ꓣꓴ ꓠ ꓗˍ ꓡꓳ= ꓔꓯ ꓥꓳꓽ ꓕꓲꓽ ꓟ ꓐꓯ ꓠꓬ ꓘꓶꓽ ꓫꓵꓽ ꓫꓵꓼ ꓗꓪ ꓡꓳꓹ ꓬꓲ ꓟ 40 ꓘꓳꓼ ꓠꓬꓲꓽ ꓗꓴꓸ ꓚꓸ ꓗꓪ ꓟꓲ ꓠꓯ ꓞꓳ ꓤꓽ ꓐꓴ ꓠꓬ ꓟꓲ ꓠꓯ ꓕꓱ ꓟ ꓮꓽ ꓙꓵꓽ ꓡꓱꓸꓼ ꓔꓯ ꓐꓬ ꓡꓰ ꓠ꓾ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓠ ꓕꓱ ꓡꓰ ꓬꓰ ꓗꓶ ꓟ ꓪꓴꓸ ꓠꓬꓲ ꓛꓲ ꓡˍ ꓟ ꓙꓵꓹ ꓗꓪ ꓠꓬ ꓟꓲ ꓠꓯ ꓕꓱ ꓟ ꓗꓪ ꓢꓯꓸ ꓔꓬˍ ꓟ ꓞꓳ ꓤꓽ ꓐꓰ ꓙꓱ ꓤꓽ ꓟ ꓞꓲ ꓮꓽ ꓙꓵꓽ ꓠꓬ ꓫꓸ ꓡꓰ ꓓꓴ ꓠꓯꓸꓼ ꓗꓪ ꓛꓲ ꓡ ꓓꓴ ꓬꓰˍ ꓟ ꓔꓯ ꓮꓽ ꓟ ꓥˍ ꓟꓲ ꓟꓳꓸ ꓖꓶˍ ꓟ ꓐꓯ ꓟꓸ ꓖꓶˍ ꓟ ꓟꓽ ꓙꓳ= ꓖꓳ ꓡꓰ ꓥˍ ꓟꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓟ ꓚꓱꓹ ꓔꓯ ꓟꓳꓸ ꓐꓯ ꓔ ꓟ ꓙꓳˍ ꓡꓳ= ꓞꓳ ꓤꓽ ꓮ ꓡꓰ ꓔꓬ ꓠꓬꓲ ꓔ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓙꓳˍ ꓡꓳ= ꓞꓳ ꓤꓽ ꓠꓬ ꓟꓲ ꓠꓯ ꓗꓪ ꓢꓯꓸ ꓔꓬˍ ꓟ ꓙꓵꓹ ꓗꓪ ꓠꓲꓹ ꓦꓬꓸ ꓙꓵˍ ꓟ ꓟꓽ ꓬꓰ ꓠˍ ꓟ ꓣꓱꓽ ꓬꓯˍ ꓟ ꓔꓯ ꓡꓰ ꓣꓱꓽ ꓠˍ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓙꓳˍ ꓡꓳ= ꓠꓴ ꓪꓽ ꓓꓵꓽ ꓓꓳ ꓙꓲ ꓗꓪ ꓙꓽ ꓥꓳˍ ꓟꓲ ꓡꓽ ꓔꓲꓸˍ ꓟ ꓜꓽ ꓓꓴˍ ꓟꓲ ꓒꓴˍ ꓟꓲ ꓕꓽ ꓔꓯ= ꓐꓵ ꓞꓲꓽˍ ꓟꓲ ꓠꓬꓲꓽ ꓘꓳꓹ ꓕꓽ ꓔꓯ= ꓕꓱ ꓟ ꓠꓬ ꓮꓸ ꓫꓵꓽ ꓔꓯ ꓐꓯ ꓠꓲꓹ ꓫꓵꓹ ꓡ ꓐꓯˍ ꓠꓬ ꓣꓳꓽ ꓠꓯꓸꓼ ꓗꓪ ꓙ ꓡꓰ ꓢꓲ ꓠꓱꓸ ꓐꓯꓼ ꓮꓽ ꓟꓬꓹ ꓔꓯ ꓕꓽ ꓔꓯꓹ ꓕꓽ ꓣꓱꓽ ꓐꓯˍ ꓟ ꓥ ꓪ= ꓠꓬꓲꓸ ꓠꓬꓲ ꓟꓲ ꓠꓯ ꓐꓬ ꓡꓰˍ ꓟ ꓠꓬ ꓖꓴꓽ ꓙꓴꓽ ꓠꓲꓸ ꓫꓬꓸ ꓮꓽ ꓟꓬꓹ ꓙꓳ ꓠˍ ꓟ꓾ ꓖꓴꓽ ꓙꓴꓽ ꓠꓲꓸ ꓫꓬꓸ ꓮꓽ ꓟꓬꓹ ꓙꓳ ꓡ ꓕꓯꓽ ꓠꓬ ꓟꓬꓱꓽ ꓟꓽ ꓬꓰ ꓮꓽ ꓔꓳ ꓜꓽ ꓢꓲ ꓔꓬ ꓠˍ ꓟ ꓙꓽ ꓟꓶˍ ꓟ ꓙꓳˍ ꓟ ꓕꓯꓽ ꓢꓲ ꓟꓬꓽ ꓠꓬꓲ ꓙꓳ ꓠ ꓢꓯꓼ ꓕꓵꓼˍ ꓟ ꓚꓵꓸ ꓛꓬꓽ ꓣꓱꓽ ꓬꓯꓼˍ ꓟ ꓕꓯ ꓢꓲ ꓮꓽ ꓟꓬꓹ ꓧꓪ ꓗꓷˍ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓙꓵꓽ ꓪꓽ ꓔꓯ ꓮꓽ ꓔꓳ ꓧꓪ ꓗꓶˍ ꓟ ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓐꓬ ꓡꓰˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓕꓱ ꓡꓰ ꓬꓰˍ ꓟ ꓠꓬ ꓟꓲ ꓠꓯ ꓐꓬ ꓡꓰ ꓠꓹ ꓟ ꓐꓱ ꓶ ꓙꓽ ꓫꓸ ꓓꓴ ꓙꓳˍ ꓟ ꓔꓯ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓸ ꓖꓶˍ ꓟ ꓥ ꓪ= 

ꓧꓶꓸ ꓕꓯ ꓕꓲꓽ ꓞꓲꓼ ꓗꓪ ꓠꓬ ꓣꓳ ꓠꓬ ꓣꓱꓽ ꓬꓯꓼ ꓟ ꓔꓯ ꓥꓳꓽ ꓐꓯ ꓠꓬ ꓣꓳꓽ ꓥꓪꓸ ꓧꓪꓸ ꓟ ꓣꓳꓽ ꓟꓶꓽ ꓘꓶꓼ ꓠꓯꓼ ꓠꓯꓼ ꓚꓸ ꓜꓼ ꓓꓴ ꓡꓰ ꓢꓲ ꓧꓪꓸ ꓡꓳ= ꓖꓳ ꓡꓰ ꓥˍ ꓟꓲ ꓠꓬꓲꓸ ꓠꓬꓲ ꓠꓬ ꓒꓴ ꓪ ꓡ ꓠꓹ ꓟ ꓐꓱ ꓶ ꓥꓪꓸ ꓮꓽ ꓟꓬꓹ ꓢꓰꓼ ꓗꓶˍ ꓟ ꓥ ꓪ= ꓖꓳ ꓡꓰ ꓠꓬꓲ ꓠꓬꓲꓸ ꓠꓬꓲ ꓠꓬ ꓮꓸ ꓔꓳꓸ ꓙꓼ ꓡꓰ ꓞꓴꓽˍ ꓟ ꓔꓷꓸ ꓔ ꓟ꓾ ꓥꓪꓸ ꓐꓳꓽ ꓡꓰ ꓐꓶˍ ꓟ꓾ ꓟꓬ ꓞꓲꓼ ꓗꓷ ꓢꓲ ꓥꓪꓸ ꓣꓴˍ ꓟ ꓕꓱ ꓡꓲꓳ ꓫꓵꓽ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓮꓽ ꓘꓶꓸ ꓬꓰ ꓗꓷˍ ꓟ ꓠꓬ ꓐꓬ ꓡꓰ ꓝꓲˍ ꓟ ꓥ ꓪ= ꓖꓳ ꓡꓰ ꓐꓰ ꓕꓲꓽ ꓡꓰꓻ ꓢꓲꓹ ꓜꓲ ꓡꓳ ꓜꓲ ꓟꓲ ꓠꓯ ꓗꓪ ꓙꓳˍ ꓟ ꓥ ꓕ ꓑꓳꓸ ꓔꓯ ꓕꓱ ꓡꓰ ꓬꓰ ꓗꓷˍ ꓟ ꓥ ꓪ= ꓠꓬꓲꓸ ꓠꓬꓲ ꓫꓸ ꓔ ꓟꓶꓽ ꓔ ꓟ ꓗꓴꓷꓼ ꓗꓪ ꓔꓬ ꓢꓴ ꓞꓳ ꓤꓽ ꓬꓲ ꓢꓯꓹ ꓬꓲ ꓟꓶꓽ ꓢꓯꓹ ꓔꓯ ꓞꓳ ꓫꓸ ꓗꓷ ꓡꓰ ꓝꓲˍ ꓟ ꓠꓬ ꓠꓯꓸ ꓦꓬꓸ ꓙꓲˍ ꓟ ꓪꓴꓸ ꓠꓬꓲ ꓥˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓠꓲꓸ ꓦꓬꓸ ꓙꓲˍ ꓟ ꓡꓰ ꓐꓰ ꓕꓲꓽ ꓡꓰꓻ ꓟꓲ ꓠꓯ ꓔꓯ ꓥˍ ꓟꓲ ꓐꓬ ꓡꓰ ꓝꓲˍ ꓟ ꓥ ꓪ= ꓟ-ꓘꓳ 10ꓽ 23 ꓡꓴ-ꓘ 16ꓽ 19- 31 ꓢꓲꓺ ꓒꓽ ꓬꓰ-ꓢꓴ ꓡꓰ ꓮ ꓡꓰ ꓐꓯˍ ꓡ ꓐꓯˍ ꓠꓬ ꓞꓳ ꓐꓳ ꓢꓲꓹ ꓔꓯꓸ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓠꓹ ꓟ ꓫꓸ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓱ ꓕꓲꓽ ꓘꓴꓸ ꓗꓪ ꓠꓯꓸ ꓦꓬꓸ ꓙꓵˍ ꓟ ꓠꓬ ꓟꓴ ꓗꓪ ꓗꓴꓷꓼ ꓓꓵꓽ ꓪ ꓠꓹ ꓟ ꓐꓱ ꓶ ꓥˍ ꓟꓲ ꓫꓸ ꓡꓰ ꓝꓲˍ ꓟ ꓡꓰ ꓟꓽ ꓞꓲ ꓟꓲ ꓠꓯ ꓔꓯ ꓥˍ ꓟꓲ ꓐꓬ ꓡꓰ ꓝꓲ ꓢꓲ ꓬ6ꓲ ꓟꓶꓽ ꓗꓪ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓫꓸ ꓡꓰˍ ꓟ ꓠꓯꓸꓼ ꓗꓪ ꓛꓲ ꓡꓰ ꓝꓲˍ ꓟ ꓥ ꓪ= ꓡꓴ-ꓘ 12ꓽ 16- 21 ꓪꓴ-ꓢ ꓠ ꓞꓳ ꓙꓲꓽ ꓔꓯ ꓞꓳ ꓙꓲꓺꓳ ꓠꓬꓲꓸ ꓠꓬꓲ ꓟꓶꓽ ꓘꓶꓼ ꓠꓴ ꓶ ꓟꓬ ꓔꓯ ꓧꓪ ꓡˍ ꓥꓳ= ꓖꓳ ꓡꓰ ꓠꓬ ꓠꓴ ꓡꓰꓽ ꓙꓽ ꓖꓶ ꓔ ꓟ ꓮꓽ ꓟ ꓔꓯ ꓟ ꓗꓷ ꓡꓰ ꓥꓳ ꓪ? ꓐꓰ ꓕꓱ ꓡꓰ ꓐꓯ ꓔ ꓡꓳ= ꓖꓳ ꓡꓰ ꓠꓬꓲ ꓣꓳꓽ ꓠꓬ ꓠꓯꓸ ꓦꓬꓸ ꓙꓲꓽ ꓢꓲ ꓮꓽ ꓟꓬꓹ ꓧꓪꓸ ꓥˍ ꓟꓲ ꓢꓯꓼ ꓟꓬ ꓟꓶꓽ ꓡꓰ ꓠꓬ ꓮꓸ ꓫꓵꓽ ꓙꓲ ꓖꓴ ꓟꓽ ꓙꓳ=

ꓟꓲ ꓠꓯ ꓔꓯ ꓐꓬ ꓡꓰ ꓠ ꓗꓪ ꓛꓲ ꓠꓯꓸ ꓦꓬꓸ ꓙꓲꓽ ꓢꓲ ꓧꓪꓸ ꓥˍ ꓟꓲ ꓟꓲ ꓠꓯ ꓕꓱ ꓟ ꓐꓬ ꓡꓰ ꓠꓬ ꓠꓴ ꓮꓸ ꓫꓵꓽ ꓧꓪ ꓜꓽ ꓓꓴ ꓥˍ ꓡ ꓫꓸ ꓡꓰˍ ꓟ ꓗꓷ ꓡꓰ ꓓꓴ ꓥꓳ= ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓞꓳ ꓐꓳ ꓢꓲꓽ ꓕꓯꓸ ꓗꓴꓷꓼ ꓐꓴ ꓠꓬ ꓢꓲꓹ ꓜꓲ ꓡꓳ ꓜꓲ ꓔꓯ ꓟꓽ ꓘꓶꓹ ꓬꓲ ꓙꓬ ꓡꓳ ꓗꓸ ꓔꓯ ꓟꓽ ꓐꓬ ꓡꓰ ꓠꓹ ꓟ ꓮꓽ ꓘꓶꓸ ꓢꓯꓼ ꓕꓵꓼ ꓡˍ ꓟ ꓥ ꓪ= ꓣꓱꓽ ꓡˍ ꓟ ꓶ ꓤꓼ ꓶ ꓟꓲ ꓡꓰ ꓟꓶꓽ ꓘꓴꓽ ꓮꓽ ꓘꓶꓸ ꓟꓽ ꓓꓳ ꓡ ꓠ ꓙꓼ ꓒꓽ ꓙꓽ ꓒꓱ ꓕꓱ ꓡꓲꓳ ꓫꓵꓽ ꓡꓰ ꓮꓽ ꓘꓶꓸ ꓟꓽ ꓣꓱꓽ ꓕꓱ ꓡꓰ ꓬꓰ ꓡˍ ꓟ ꓥ ꓪ= ꓬꓲ ꓟꓶꓽ ꓗꓪ ꓠꓬ ꓟꓶꓽ ꓘꓴꓽ ꓓꓳ ꓡˍ ꓟ ꓟꓳꓽ ꓓꓳ ꓗꓸ ꓚꓰꓸ ꓡꓰ ꓟꓽ ꓣꓱꓽ ꓠꓹ ꓟ ꓕꓱ ꓡꓰ ꓬꓰ ꓡˍ ꓟ ꓔꓯ ꓡꓳꓸ ꓟꓳˍ ꓡꓳ= ꓠꓬꓲꓸ ꓠꓬꓲ ꓟꓲ ꓠꓯ ꓕꓱ ꓟ ꓐꓬ ꓡꓰ ꓠ ꓬꓰˍ ꓟ ꓠꓬ ꓣꓳꓽ ꓟꓲ ꓠꓯ ꓞꓳ ꓤꓽ ꓔꓯ ꓫꓸ ꓡꓰ ꓝꓲˍ ꓟ ꓥ ꓪ= ꓟꓲ ꓠꓯ ꓕꓱ ꓟ ꓟꓽ ꓐꓬ ꓡꓰ ꓠ ꓬꓰˍ ꓟ ꓠꓬ ꓣꓳ ꓔꓬ ꓢ ꓠꓹ ꓟ ꓒꓬꓱ ꓡ ꓝꓲˍ ꓟ ꓞꓳ ꓐꓳ ꓢꓲꓽ ꓕꓯꓸ ꓗꓴꓷꓼ ꓒꓬꓱꓼ ꓡ ꓝꓲˍ ꓟ ꓥ ꓪ=