ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓔꓶ ꓚꓱꓹ

ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ

• ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓠꓬ ꓡꓱꓻ ꓢꓯꓼ ꓧꓳꓹꓟ ꓬꓲꓸ ꓢꓶꓽ ꓬꓲꓸ ꓜꓲ ꓥ ꓢꓲ꓾ ꓮ ꓟꓬꓹ ꓘꓳꓼꓗꓷ ꓔ ꓐ ꓡˍ ꓟ ꓬꓲꓸ ꓜꓲˍ ꓟꓲ ꓥꓳ=
• ꓬꓲꓸ ꓒꓬꓽ ꓬꓲꓸ ꓜꓲ ꓔꓯ ꓜꓽ ꓟ ꓓꓽ꓾ ꓬꓲꓸ ꓢꓶꓽ ꓔꓯꓸ ꓡꓰꓽ ꓜꓽ ꓓꓹ ꓟ ꓬꓲꓸ ꓜꓲ ꓥ ꓡꓳ=
• ꓬꓲꓸ ꓜꓲ ꓠꓬ 1’ ꓗꓪ ꓐꓰ 3’ ꓗꓪ ꓛꓲꓺ ꓟꓴ ꓢꓲ꓾ ꓬꓲꓸ ꓜꓲ ꓦꓲꓺ ꓙ ꓠꓬ 1’ ꓗꓪ ꓐꓰ 2’ ꓗꓪ ꓛꓲ ꓙꓳˍ ꓟ ꓥꓳ=
• ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓜꓲ ꓔꓯ India ꓗꓴꓷꓼ ꓗꓪ ꓐꓰ ꓔꓶ ꓪꓴꓸ ꓔꓴ ꓗꓷ ꓥˍ ꓟꓲ꓾ ꓮ ꓟꓶ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓶ ꓜꓽˍ ꓟ ꓬꓲꓸ ꓜꓲ ꓒꓬꓱꓼ ꓡ ꓗꓷꓳ=
• Japan ꓢꓶꓽ꓾ Turkey ꓢꓶꓽ ꓾ Italy ꓢꓶꓽ  ꓐꓯ ꓢꓲ ꓬꓲꓸ ꓫꓵꓽ ꓮ ꓟꓬꓹ ꓙꓳˍ ꓟ ꓥꓳ=
• ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓗꓴꓹ ꓙꓲ ꓠꓬ ꓬꓲꓹ ꓡꓵꓼ ꓡꓵꓼ ꓗꓹ ꓢꓲ꓾ ꓬꓲꓸ ꓘꓴꓽ ꓗꓪ ꓟ ꓬꓲꓸ ꓧꓪꓽ ꓔꓯ ꓠꓬ ꓠꓱꓸꓼ ꓐꓯ ꓪꓳꓽ ꓒꓬꓽ ꓐꓰ ꓧꓪꓽ ꓾ ꓥꓪꓸ ꓐꓴ ꓐꓰˍ ꓟꓲ ꓔꓹ ꓜꓽ ꓓˍ ꓡꓳ ꓫꓵꓽ ꓥꓳ=
• ꓬꓲꓸ ꓗꓴꓹ ꓙꓲ ꓠꓬ ꓒꓴˍ ꓟ ꓟꓲ ꓙꓳ꓾ ꓠꓲꓹ ꓛꓵꓼˍ ꓟˍ ꓟꓲ ꓙꓳ꓾ ꓠꓲꓹ ꓛꓵꓼ ꓟꓵꓽ ꓪꓴꓽ ꓗꓹ ꓟˍ ꓟꓲ ꓙꓳˍ ꓡꓳ=
• ꓬꓲꓸ ꓢꓶꓽ ꓗꓪ ꓠꓬ ꓬꓲꓸ ꓡꓴꓸ ꓡꓴꓸ꓾ ꓬꓲꓸ ꓛꓱꓺ ꓛꓱꓺ ꓾ ꓬꓲꓸ ꓡꓴꓸ ꓓꓽ ꓟ ꓾ ꓬꓲꓸ ꓡꓴꓸ ꓤ ꓤ ꓐꓯ ꓢꓲ ꓮ ꓟꓬꓹ ꓙꓰꓽ ꓙꓳˍ ꓡꓳ=
• ꓬꓲꓸ ꓢꓶꓽ ꓡꓴꓸ ꓤ ꓤ ꓐꓰ ꓬꓲꓸ ꓢꓶꓽ ꓫꓵˍ ꓟ ꓠꓬ Asia  ꓐꓰ Italy ꓢꓶꓽ ꓥ ꓢꓲ ꓠꓬꓲ ꓾ꓬꓲꓸ ꓢꓶꓽ ꓮ ꓟꓬꓹ ꓓꓱꓼˍ ꓟ ꓐꓰ ꓔꓶ ꓢˍ ꓟ ꓪꓴꓸ ꓠꓬꓲ  Asia ꓟꓵꓽ ꓗꓪ ꓮ ꓟꓬꓹ ꓙꓳˍ ꓟ ꓥꓳ=
• ꓬꓲꓸ ꓜꓲ ꓔꓶ ꓢꓴ ꓙꓽ ꓖꓶˍ ꓕꓯ ꓾ ꓬꓲꓸ ꓟꓲꓺ ꓗꓪ ꓟ ꓠꓱꓸ ꓦꓱꓽ ꓮ ꓙꓵꓽ ꓧꓶꓽ ꓡꓰ ꓠ ꓫꓬ ꓖꓶ ꓠ ꓔ ꓥ=
• ꓬꓲꓸ ꓟꓲꓺ ꓕꓯ ꓢꓲ ꓗꓪ ꓩꓲꓸ ꓛꓲꓺ ꓥ ꓟ ꓮꓸ ꓠꓬꓲꓽ ꓛꓰꓽ ꓾ ꓮꓸ ꓭꓸ ꓛꓰꓽ ꓐꓴ ꓔꓯ 1” 2” ꓛꓲ ꓧꓳꓽ ꓖꓶ ꓠꓯˍ ꓡꓳ=
• ꓔꓶˍ ꓕꓯ ꓬꓲꓸ ꓫꓵꓸ ꓗꓪ ꓐꓰ ꓬꓲꓸ ꓜꓲ ꓡꓲꓸ ꓤ ꓫꓬꓹ ꓢꓲ ꓔꓶˍ ꓟ ꓐꓰ꓾ ꓬꓲꓸ ꓫꓵꓸ ꓫꓵꓸ ꓢꓲ ꓔꓶˍ ꓟ ꓐꓯ ꓢꓲ 2 ꓙꓰꓽ ꓙꓳˍ ꓥ=
• ꓙꓬ ꓟꓵꓽ ꓗꓪ ꓠꓬ ꓬꓲꓸ ꓜꓲ ꓡꓲꓸ ꓤ ꓐꓴ ꓔꓯ ꓟꓽ ꓔꓶ ꓧꓶꓸ ꓕꓯ ꓠꓬꓲꓽ ꓠꓽ ꓕꓯ ꓡꓰꓽ Plastic ꓬꓲꓸ ꓠꓯꓺ ꓠꓯꓺ ꓐꓰ ꓑꓲꓸ ꓔ ꓖꓶ ꓠ ꓗꓹ ꓡꓳ=
• ꓕꓲ ꓜꓲ ꓡꓰ ꓕꓲ ꓜꓲ ꓘꓴꓽ ꓗꓪ 18” ꓗꓪ ꓐꓰ 24” ꓠꓬꓲꓽ ꓗꓴꓸ ꓚꓸꓼ ꓗꓷ ꓢꓲ ꓔꓶ ꓖꓶ ꓠ ꓔ ꓥ=
• ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓜꓲ ꓠꓬ ꓬꓲ ꓙꓬ ꓢꓯꓼ ꓐꓰ ꓡꓱꓻ ꓢꓯꓼ ꓖꓶ ꓠ ꓔ ꓟ ꓪꓴꓸ ꓠꓬꓲ꓾ ꓕꓲ ꓠꓬꓲ ꓗꓪ ꓬꓲꓸ ꓙꓬ 1 ꓧꓪꓹ ꓾ 2 ꓧꓪꓹ ꓛꓲ ꓧꓳꓽ ꓖꓶ ꓠ ꓗꓹ ꓡꓳ=
• ꓬꓲ ꓟꓲꓺ ꓗꓪ ꓟ ꓟꓳꓼ ꓮ ꓙꓵꓽ ꓔꓯ ꓟꓲ ꓫꓬꓹ ꓡꓲꓸ ꓖꓶ ꓠ ꓔ ꓥ= ꓬꓲꓸ ꓜꓲ ꓡꓲꓸ ꓤ ꓐꓴ ꓔꓯ ꓔꓶ ꓗꓷ ꓗꓸ ꓠꓯꓸ 60 ꓠꓬꓲ ꓐꓰ 90 ꓠꓬꓲ ꓘꓴꓽ ꓗꓪ ꓠꓬ ꓬꓲꓸ ꓢꓶꓽ ꓧꓼ ꓜ ꓓꓹ ꓡꓳ=ꓬꓲꓸ ꓢꓶꓽꓧꓼˍ ꓕꓯ ꓬꓲꓸ ꓜꓲ ꓟꓽ ꓐꓬ ꓡꓰ ꓠ ꓬꓲꓸ ꓙꓲꓻ ꓤ ꓟꓴ ꓢꓲ ꓧꓼ ꓠ ꓔ ꓥ= ꓬꓲꓸ ꓢꓶꓽ ꓗꓴꓹ ꓙꓲ ꓠꓬ ꓬꓲꓹ ꓡꓵꓼ ꓡꓵꓼ ꓗꓹ ꓥˍ ꓟꓲ ꓬꓲꓸ ꓢꓶꓽ ꓠꓽ ꓡꓯꓸ ꓟ ꓑꓶꓸ ꓓꓴ ꓮ ꓤꓹ ꓮ ꓤꓹ ꓧꓼꓔ ꓡꓳ=

ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓜꓲ ꓗꓪ ꓠꓬ ꓬꓲꓸ ꓢꓶꓽ ꓐꓶꓽ ꓓꓲꓻ ꓠ ꓙꓳ ꓡ ꓗꓴˍ ꓟ ꓪꓴꓸ ꓠꓬꓲ꓾ ꓐꓶꓽ ꓓꓲꓻ ꓢꓰꓼ ꓠꓯ ꓞꓲꓼ ꓧꓳꓽ ꓖꓶ ꓠꓯˍ ꓥ= ꓖꓳ ꓟ ꓡꓰ ꓟꓽ ꓞꓲ ꓦꓹ-ꓓꓴꓽ-ꓢꓶꓽ ꓜꓲ ꓐꓰ ꓬ-ꓬꓲ-ꓜꓲ (ꓧꓶꓽ-ꓐꓲꓼ) ꓜꓲ ꓐꓴ ꓗꓪ ꓙꓳˍ ꓟ ꓠˍ ꓟꓲ ꓒꓬꓱꓼ ꓡ ꓗꓴˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓜꓲ ꓔꓯ 3 ꓘꓳꓼ 1 ꓧꓪꓹ ꓬꓲꓸ ꓟꓲꓺ ꓡꓶꓸ ꓖꓶ ꓠ ꓔ ꓥ=ꓬ-ꓬꓲ-ꓜꓲ (ꓧꓶꓽ-ꓐꓲꓼ) ꓾ ꓦ-ꓓꓴ-ꓢꓶꓽ ꓾ ꓡꓹ-ꓝꓲꓼ ꓐꓴ ꓔꓶ ꓗꓷ ꓟ ꓬꓲꓸ ꓟꓲꓺ ꓗꓪ ꓠꓬ  ꓢꓲ-ꓐ-ꓢꓶꓽ (ꓳꓣ) ꓖꓪ-ꓢꓶꓽ ꓜꓲ ꓟꓽ ꓔꓶ ꓠꓽ ꓪ ꓙꓲ ꓙꓲˍ ꓥ=