ꓢꓶꓹ ꓢꓶꓽ ꓔꓶ ꓚꓱꓹ

Custard Apple ꓢꓶꓽ ꓠꓬ ꓮ ꓘꓶꓸ ꓜꓽ ꓟꓲˍ ꓟ ꓜꓽ ꓙꓲˍ ꓟ ꓢꓶꓹ ꓢꓶꓽ ꓥ ꓢꓲ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓮ ꓟꓬꓹ ꓔꓶˍ ꓡꓳ= ꓞ ꓟꓵꓽ ꓗꓪ ꓪ ꓙꓲ ꓔꓶ ꓒꓬꓱꓼ ꓡ ꓓꓹ ꓡꓳ= ꓬꓲꓻ ꓙꓬ ꓙꓳ ꓢꓲ꓾ ꓟꓵꓽ ꓡꓱꓹ ꓟ꓾ ꓟꓵꓽ ꓟꓽ ꓙꓴꓺ ꓟ ꓗꓪ ꓮ ꓘꓶꓸ ꓔꓶ ꓒꓬꓱꓼ ꓡ ꓓꓹ ꓡꓳ= ꓟꓶꓽ ꓦ ꓮ ꓘꓶꓸ ꓡꓲ ꓟꓬꓽˍ ꓟ ꓗꓪ ꓠꓬ ꓔꓶ ꓟꓽ ꓒꓬꓱꓼ ꓡ=

ꓔꓶˍ ꓟ ꓗꓪ ꓬꓲ ꓫꓵꓸ ꓗꓪ ꓐꓰ ꓔꓶˍ ꓟ ꓐꓰ ꓬꓲꓸ ꓡꓯꓼ ꓗꓸ ꓔꓶˍ ꓟ ꓐꓯˍ ꓢꓲ ꓠꓬꓲꓽ ꓙꓰꓽ ꓙꓳˍ ꓡꓳ= ꓬꓲ ꓫꓵꓸ ꓗꓪ ꓐꓰ ꓔꓶˍ ꓠꓬ ꓬꓲ ꓜꓲ 6 ꓘꓳꓼ ꓙꓳ ꓡˍ ꓕꓯ ꓬꓲ ꓢꓶꓽ ꓓꓱꓼ ꓪꓴꓸ ꓔꓴ ꓢꓲ꓾ 15 ꓘꓳꓼ ꓗꓪ ꓠꓬ ꓬꓲ ꓢꓶꓽ ꓮꓽ ꓟꓬꓹ ꓟꓽ ꓓꓱꓼ= ꓬꓲ ꓡꓯꓼ ꓗꓸ ꓓꓶ ꓔꓶˍ ꓠꓬ ꓬꓲꓸ ꓜꓲ 2-3 ꓘꓳꓼ ꓕꓯ ꓡꓰ ꓬꓲꓸ ꓢꓶꓽ ꓓꓱꓼ ꓡˍ ꓡꓳ= ꓬꓲ ꓫꓵꓸ ꓗꓪ ꓐꓰ ꓔꓶˍ ꓕꓯ ꓬꓲꓸ ꓜꓲ ꓡꓲꓸ ꓤ ꓔꓯ ꓬꓲ ꓟꓲ ꓗꓪ 1 ꓘꓳꓼ ꓛꓲ ꓔꓶ ꓔ ꓢꓲ꓾ ꓬꓲ ꓡꓯꓼ ꓗꓸ ꓗꓪ ꓐꓰ ꓔꓶˍ ꓠꓬ ꓬꓲ ꓟꓲ ꓗꓪ ꓦ ꓐ 3-4 ꓛꓲ ꓡꓰꓽ ꓗꓷ ꓔ ꓢꓲ ꓾ ꓟꓶꓽ ꓦ ꓦ ꓝꓲ ꓛꓲꓺ ꓡˍ ꓕꓯ ꓔꓶ ꓓꓴ ꓙ ꓖꓶ ꓔ ꓟ ꓗꓪ ꓚꓵꓸ ꓔꓶ ꓐ ꓡˍ ꓡꓳ=

ꓔꓶˍ ꓕꓯ ꓬꓲ ꓜꓲ ꓔꓶ ꓓꓴ ꓪꓹ ꓘꓴ ꓕꓲ ꓟ ꓐꓰ ꓕꓲ ꓟ ꓠꓬꓲꓽ ꓗꓴꓸ ꓚꓸꓼ ꓗꓪ 8’ ꓛꓲ ꓗꓷꓹ ꓶꓽ ꓢꓲ꓾ ꓪ ꓘꓴ ꓔꓯ 1’7” ꓐꓰ 1’ ꓠꓯꓸ ꓛꓲ ꓓꓵꓽ ꓗꓷ ꓢꓲ ꓔꓶ ꓐ ꓡˍ ꓡꓳ= ꓬꓲ ꓘꓳꓼ ꓮ ꓟꓬꓹ ꓔꓶ ꓔ ꓓꓹ ꓟ ꓬꓲ ꓜꓲ ꓥ ꓢꓲ ꓬꓲꓸ ꓚꓰꓺ ꓮ ꓠꓯꓸ ꓠꓯꓸ ꓗꓪ ꓛꓲ ꓚ ꓙꓰˍ ꓟ ꓑꓶꓸ ꓓꓴ ꓬꓲ ꓜꓲ ꓔꓶ ꓓꓴ ꓪꓹ ꓘꓴ ꓔꓯˍ ꓟꓲ ꓪꓴꓽ ꓠ ꓛꓲ ꓓꓵꓽ ꓠ ꓔ ꓥ=

ꓬꓲ ꓜꓲ ꓔꓶ ꓓꓴ ꓪꓹ ꓘꓴ ꓓꓵꓽ ꓗꓷ ꓠꓬ꓾ ꓮꓸ ꓠꓬꓲꓽ ꓛꓰꓽ 1 ꓑꓳ꓾ ꓮꓸ ꓭꓸ ꓛꓰꓽ 1 ꓑꓳ꓾ ꓜ ꓒꓴ ꓗꓴꓹ ꓙꓲ 2 ꓑꓳ꓾ ꓚꓺ ꓒꓶꓽ 2 ꓑꓳꓸ꓾ ꓢꓲꓹ ꓒꓬꓽ ꓙꓴꓺ 1 ꓑꓳ ꓐꓴ ꓔꓯ ꓩꓲꓸ ꓛꓲ ꓟꓵꓽ ꓛꓵꓽ ꓐꓰ ꓑꓯꓸ ꓗꓷ ꓫꓳꓽ ꓗꓷ ꓢꓲ꓾ ꓬꓲꓻ ꓙꓬ ꓧꓳꓽ ꓢꓲ ꓠꓬꓲ ꓪꓹ ꓘꓴ ꓗꓪ ꓗꓶ ꓔ= ꓦ ꓐ ꓕꓲ ꓟ ꓛꓲ ꓙꓳ ꓡˍ ꓠꓬ ꓬꓲ ꓜꓲ ꓔꓶ ꓓꓴ ꓐꓱ ꓶ ꓟ ꓓ ꓙꓲˍ ꓟ ꓧˍ ꓟ ꓔꓶ ꓓꓴ ꓪꓹ ꓘꓴ ꓒꓬꓱꓼ ꓡˍ ꓥꓳ=

ꓔꓶ ꓗꓷ ꓢꓲ ꓩꓲꓸ ꓛꓲ ꓧꓳꓽ ꓖꓶ ꓕꓯ ꓾ ꓬꓲ ꓜꓲ ꓔꓲ ꓗꓪ ꓐꓰ 2’ ꓛꓲ ꓗꓶꓹ ꓶꓽ ꓢꓲ ꓕꓲ ꓚꓳ ꓡꓳ ꓧꓳꓽ ꓖꓶ ꓠꓯꓹ ꓡꓳ=  ꓬꓲ ꓪꓰ ꓪꓰ ꓡˍ ꓟ ꓗꓪ ꓐꓰ ꓪꓴꓸ ꓔꓴ ꓢꓲ ꓕꓲ ꓘꓳꓼ ꓕꓯ ꓢꓲ ꓕꓲ ꓘꓳꓼ 6” ꓛꓲ ꓗꓷꓹ ꓶꓽ ꓢꓲ ꓩꓲꓸ ꓛꓲ ꓧꓳꓽ ꓖꓶ ꓢꓲ ꓬꓲ ꓙꓬ ꓡꓳꓼ ꓠ ꓧꓳꓽ ꓖꓶ ꓠ ꓔ ꓥ= ꓐꓯ ꓠꓲꓹ ꓫꓵˍ ꓟ ꓠꓬ ꓕꓱ ꓕꓲ ꓘꓳꓼ ꓗꓪ 2’ ꓛꓲ ꓗꓷꓹ ꓶꓽ ꓢꓲ ꓩꓲꓸ ꓛꓲ ꓧꓳꓽ ꓖꓶ ꓗꓷ ꓠꓬ꓾ ꓠꓸ ꓦꓬ ꓕꓲ ꓘꓳꓼ ꓗꓪ ꓠꓬ ꓬꓲ ꓜꓲ ꓛꓲ ꓔꓲ ꓗꓪ ꓐꓰ 2’6” ꓛꓲ ꓗꓷꓹ ꓶꓽ ꓢꓲ ꓩꓲꓸ ꓛꓲ ꓧꓳꓽ ꓖꓶ ꓠꓯꓹ ꓟ ꓥꓳ=

ꓢꓲꓹ ꓢꓶꓽ ꓕꓱ ꓟ ꓠꓬ꓾ ꓣꓳ ꓫꓬꓹ ꓔ ꓟ ꓠꓯ ꓞꓲꓼ ꓟꓽ ꓐ ꓟ ꓟꓽ ꓚꓬꓼ ꓟ ꓩꓲꓸ ꓛꓲ ꓧꓳꓽ ꓖꓶ ꓐ ꓡˍ ꓠꓬ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓢꓲ ꓓꓱꓼ ꓡˍ ꓟ ꓬꓲ ꓢꓶꓽˍ ꓟꓲ ꓮ ꓘꓶꓸ ꓜꓽ ꓙꓲˍ ꓡꓳ= ꓬꓲ ꓜꓲ ꓕꓲ ꓜꓲ ꓐꓱ ꓶ ꓦ ꓐ 6 ꓟ ꓗꓪ ꓕꓲ ꓧꓪꓹ ꓮꓸ ꓠꓬꓲꓽ ꓛꓰꓽ ꓮꓸ ꓭ ꓛꓰꓽ ꓕꓲ ꓕꓱ ꓧꓳꓽ ꓖꓶ ꓠ ꓗꓹ ꓡꓳ= ꓝꓮꓲ ꓮ-ꓠꓴ-ꓤꓲ-ꓪ ꓩꓲ ꓛꓲ ꓪꓴꓽ ꓬꓲꓻˍ ꓟꓲ ꓧꓳꓽ ꓖꓶ ꓠꓯꓹ ꓡꓳ= ꓩꓲꓸ ꓛꓲ ꓧꓳꓽ ꓖꓶˍ ꓟ ꓗꓪˍ ꓟꓲ ꓮꓸ ꓔꓲꓸ ꓤ ꓐꓰ ꓮꓽ ꓟꓬꓹ ꓧꓪꓹ ꓧꓳꓽ ꓖꓶˍ ꓠꓬ ꓬꓲ ꓜꓲ ꓐꓱ ꓶ ꓮ ꓘꓶꓸ ꓙꓲˍ ꓡꓳ=

ꓬꓲꓻ ꓙꓬ ꓧꓳꓽ ꓖꓶˍ ꓟ ꓗꓪ ꓬꓲ ꓫꓵꓸ ꓗꓪ ꓐꓰ ꓔꓶ ꓔ ꓟ ꓬꓲ ꓜꓲ ꓐꓴ ꓔꓯ ꓛ ꓝꓲꓸ ꓗꓪ ꓟꓽ ꓠꓽ ꓠꓽ ꓧꓳꓽ ꓖꓶ ꓟꓽ ꓛꓵꓺ= ꓟꓲ ꓛꓬ ꓟꓽ ꓙꓴꓺ ꓡꓰ ꓠ ꓛꓲˍ ꓡꓰꓽ ꓧꓳꓽ ꓖꓶ ꓠꓯꓹ ꓥ=

ꓬꓲ ꓜꓲ ꓧꓶꓽ ꓧꓶꓽ ꓪꓴꓽ ꓡ ꓠꓹ ꓟ ꓐꓱ ꓶ ꓕꓲ ꓘꓳꓼ ꓕꓲ ꓧꓪꓹ (ꓥ ꓠꓬ) ꓕꓲ ꓘꓳꓼ 2 ꓧꓪꓹ ꓬꓲ ꓜꓲ ꓔꓲ ꓗꓪ ꓘꓪ ꓫꓴ ꓖꓶ ꓠ ꓗꓹ ꓡꓳ= ꓬꓲꓸ ꓚꓰꓺ ꓫꓵꓼ ꓣꓱꓻ ꓡ ꓔꓬ ꓕꓯ ꓟꓶꓽ ꓦ ꓮ ꓘꓶꓸ ꓟꓽ ꓡꓲ ꓠꓬ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓡꓳ=  ꓬꓲꓸ ꓜꓲ ꓝꓸ ꓢꓲ ꓔꓶ ꓔ ꓟ ꓬꓲ ꓜꓲ ꓗꓪ ꓠꓬ 2 ꓘꓳꓼ ꓗꓪ ꓓꓱꓼ ꓡˍ ꓟ ꓬꓲ ꓢꓶꓽ ꓐꓴ ꓔꓯ ꓟꓽ ꓪꓴꓽ ꓡ ꓢꓰꓼ ꓕꓯ ꓡꓰ ꓧꓼ ꓦ ꓠ ꓗꓹ ꓡꓳ= ꓬꓲ ꓜꓲ 3 ꓘꓳꓼ ꓛꓲ ꓕꓯ ꓓꓱꓼˍ ꓟ ꓬꓲ ꓢꓶꓽ ꓔꓯ ꓡꓰꓽ ꓪꓴꓽ ꓡˍ ꓗꓪ ꓛꓲ꓾ ꓟꓲꓺ ꓡꓰˍ ꓗꓪ ꓛꓲ ꓗꓶ ꓔ ꓢꓲ ꓧꓼ ꓐ ꓡˍ ꓡꓳ= ꓬꓲ ꓜꓲ 5 ꓘꓳꓼ ꓛꓲ ꓙꓳ ꓡˍ ꓠꓬ ꓾ ꓬꓲ ꓢꓶꓽˍ ꓟꓲ ꓮ ꓘꓶꓸ ꓪꓴꓽ ꓡ ꓢꓲ ꓬꓲꓸ ꓒꓵꓽ ꓧˍ ꓟ ꓬꓲꓸ ꓒꓵꓽ ꓪˍ ꓟ ꓬꓲ ꓢꓶꓽ ꓓꓱꓼ ꓡˍ ꓥꓳ=

ꓬꓲ ꓜꓲ ꓗꓪ ꓣꓱꓽ ꓟꓽ ꓬꓯꓼ ꓟ ꓬꓲꓸ ꓡꓯꓼ ꓗꓸ ꓙꓴꓺ꓾ ꓬꓲ ꓑꓱꓸ ꓐꓴ ꓔꓯ ꓣꓴ ꓦ ꓗꓷ ꓢꓲ ꓬꓲ ꓜꓲ ꓔꓯ ꓟꓲꓽ ꓦꓲ ꓢꓯꓼ ꓪ ꓠꓹ ꓟ ꓬꓰ ꓖꓶ ꓠ ꓗꓹ ꓡꓳ= ꓬꓲꓸ ꓢꓶꓽ ꓓꓱꓼ ꓡˍ ꓕꓯ ꓟꓽ ꓧ ꓟ꓾ ꓟꓽ ꓙꓲꓻ ꓟ ꓬꓲ ꓢꓶꓽ꓾ ꓬꓲꓸ ꓢꓶꓽ ꓤ ꓤ ꓐꓴ ꓔꓯ ꓣꓴ ꓦ ꓗꓷ ꓢꓲ ꓾ ꓮ ꓘꓶꓸ ꓧˍ ꓟ ꓙꓲˍ ꓟ ꓬꓲ ꓢꓶꓽ ꓔꓯ ꓡꓰꓽ ꓚꓰ ꓔ ꓠ ꓗꓹ ꓡꓳ= ꓬꓲ ꓢꓶꓽ ꓗꓪ ꓐꓶꓽ ꓓꓲ ꓟꓽ ꓓꓶꓽ ꓠꓹ ꓟ ꓐꓱ ꓶ ꓬꓲ ꓢꓶꓽ ꓟꓽ ꓟꓲꓺ ꓡ ꓢꓰꓽ ꓟ ꓦ ꓐ ꓕꓲ ꓟ ꓕꓯ ꓡꓰ plastic ꓐꓰ ꓕꓱꓹ ꓖꓶ ꓠ ꓔ ꓡꓳ=

Add new comment

2 + 0 =