ꓢꓽ-ꓡꓯꓸ ꓜꓲ ꓔꓶ ꓚꓱꓹ

ꓢꓽ-ꓡꓯꓸ ꓜꓲ ꓔꓯ ꓓꓽ ꓪꓴꓸ ꓕꓯ Asia Minor꓾ Iran ꓾ Turkey ꓗꓴꓷꓼ ꓐꓴ ꓗꓪ ꓔꓶꓸ ꓪꓴꓸ ꓔꓴ ꓗꓷ ꓟ ꓥꓳ=

ꓮ ꓟꓶ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓶˍ ꓟ ꓥ ꓢꓲ ꓾ ꓟꓽ ꓓ ꓜꓽ ꓟꓬꓽˍ ꓟ ꓠꓬ American ꓐꓰ Europe ꓗꓴꓷꓼ ꓐꓴ ꓗꓪ ꓥ ꓡꓳ= ꓟꓬ-ꓟ ꓗꓴꓷꓼ ꓗꓪˍ ꓟꓲ ꓾ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓐ ꓡˍ ꓡꓳ= ꓢꓽ-ꓡꓯꓸ ꓜꓲ ꓗꓪ

ꓢꓽ-ꓡꓯꓸ ꓜꓲ ꓗꓪ 4 ꓙꓰꓽ ꓙꓳˍ ꓥˍ ꓟꓲ ꓾ ꓟꓬ-ꓟ ꓗꓴꓷꓼ ꓗꓪ ꓠꓬ ꓬꓲꓸ ꓘꓴꓸ ꓜꓲ ꓐꓰ ꓬꓲꓸ ꓒꓬꓽ ꓜꓲ ꓔꓯ ꓔꓶˍ ꓡꓳ=

-       ꓢꓽ-ꓡꓯꓸ ꓜꓲ ꓔꓯ ꓮ ꓫꓵꓽ ꓟꓵꓽ ꓗꓪˍ ꓟꓲ ꓔꓶ ꓒꓬꓱꓼ ꓡˍ ꓡꓳ= ꓧꓶꓽ ꓚꓲ ꓐꓹ ꓟ ꓠꓱꓸ ꓦꓱꓽ ꓐꓰ ꓮꓸ ꓠꓬꓲꓸ ꓛꓰꓽ ꓩꓲꓸ-ꓛꓲꓺ ꓟꓵꓽ ꓛꓵꓽ ꓮ ꓟꓬꓹ ꓐꓹ ꓟ ꓗꓪ ꓔꓶˍ ꓠꓬ ꓪ ꓙꓲ ꓙꓲˍ ꓟ ꓥꓳ= ꓢꓽ-ꓡꓯꓸ ꓜꓲ ꓠꓬ ꓮ ꓘꓶꓸ ꓙꓴꓺˍ ꓟ ꓬꓲꓸ ꓟꓲꓺ ꓗꓪ ꓠꓬ ꓔꓶ ꓟꓽ ꓒꓬꓱꓼ ꓡ=

-       ꓦ ꓐ ꓕꓲ ꓟ ꓘꓴꓽ ꓗꓪ ꓟꓶꓽ ꓛꓺ ꓢꓯꓼ (12-15) ꓛꓲ ꓙꓳˍ ꓟ ꓟꓵꓽ ꓘꓳꓼ ꓗꓪ ꓔꓶˍ ꓠꓬ ꓙꓲˍ ꓡꓳ= ꓡꓱꓺ ꓝꓲꓸ ꓛꓺ ꓝꓲꓸ ꓕꓯ ꓔꓶ ꓔ ꓠꓬ ꓾ ꓬꓲꓸ ꓪꓰꓺ ꓠꓯꓼ ꓠꓯꓼ ꓪꓰꓺ ꓢꓲ ꓬꓲꓸ ꓜꓲ ꓟꓽ ꓪꓴꓽ ꓡ= ꓬꓲꓸ ꓒꓬꓽˍ ꓔꓯˍ ꓟꓲ ꓘꓪꓽ ꓡꓰ ꓝꓲˍ ꓡꓳ=

-      ꓢꓽ-ꓡꓯꓸ ꓜꓲ ꓔꓯ ꓕꓲ ꓐꓱ ꓠꓬ ꓾ ꓬꓲꓸ ꓜꓲ ꓡꓲꓸ ꓤ ꓔꓶ ꓢꓲ꓾ ꓕꓲ ꓐꓱ ꓠꓬ ꓬꓲꓸ ꓫꓵꓸ ꓫꓵꓸ ꓢꓲ ꓔꓶˍ ꓟˍ ꓟꓲ ꓙꓳˍ ꓡꓳ= 8 ꓦ ꓾ 9 ꓦ ꓛꓲ ꓕꓯ ꓔꓶˍ ꓠꓬ ꓾ ꓬꓲꓸ ꓫꓵꓸ ꓔꓶ ꓐ ꓡˍ ꓟ ꓥ ꓢꓲ꓾ 10 ꓦ ꓐꓰ 11 ꓦ ꓕꓯ ꓔꓶˍ ꓕꓯ ꓠꓽ ꓬꓲꓸ ꓜꓲ ꓡꓲꓸ ꓤ ꓔꓯ ꓔꓶ ꓐ ꓡˍ ꓡꓳ=

-       ꓬꓲꓸ ꓫꓵꓸ ꓔꓶˍ ꓕꓯ ꓠꓬ꓾ ꓬꓲ-ꓫꓴꓲꓸ ꓔꓶˍ ꓟ ꓕꓲ ꓡꓰꓹꓼ ꓬꓲꓸ ꓟꓲꓺ ꓕꓯ ꓢꓲ ꓬꓲꓸ ꓫꓵꓸ ꓐꓽ ꓐꓽ ꓤ ꓫꓵꓸ ꓢꓲ꓾ ꓕꓯ ꓢꓲ ꓗꓪ ꓟꓳꓼ ꓙꓴꓺ ꓑꓲꓸ ꓖꓶ ꓠ ꓗꓹ ꓡꓳ= ꓬꓲꓸ ꓟꓲꓺ ꓟꓽ ꓙꓴꓺ ꓡꓰ ꓠ ꓕꓲ ꓠꓬꓲ ꓕꓲ ꓧꓪꓹ ꓬꓲ ꓙꓬ ꓧꓳꓽ ꓖꓶ ꓠ ꓗꓹ ꓡꓳ= ꓬꓲꓸ ꓜꓲ ꓡꓲꓸ ꓤ ꓣꓱꓺ ꓓꓳ ꓡˍ ꓕꓯ ꓫꓵꓸ ꓙꓴꓺ ꓔꓯ ꓣꓴ ꓦ ꓖꓶ ꓠ ꓔ ꓥ= ꓣꓱꓽ ꓓꓳ ꓡˍ ꓟ ꓬꓲꓸ ꓜꓲ ꓡꓲꓸ ꓤ ꓐꓴ 8 ꓠꓽ ꓛꓲ ꓙꓳ ꓡˍ ꓕꓯ ꓾ ꓝꓮꓲ ꓕꓲ ꓖ ꓗꓪ ꓚꓵꓹ ꓔꓶ ꓐ ꓡˍ ꓡꓳ=

-       ꓔꓶ ꓓꓴ ꓬꓲꓸ ꓟꓲꓺ ꓙ ꓖꓶˍ ꓕꓯ ꓾ ꓠꓱꓸ ꓦꓱꓽ ꓮ ꓙꓵꓽ ꓧꓶꓽ ꓡꓰˍ ꓗꓪ ꓛꓲ ꓫꓬꓹ ꓠ ꓔ ꓥ= ꓠꓱꓸ ꓦꓱꓽ ꓬꓲꓸ ꓘꓴꓸ ꓬꓲꓸ ꓘꓴꓸ ꓓˍ ꓟ ꓗꓪ ꓫꓵˍ ꓠꓬ ꓬꓲꓸ ꓫꓵꓸ ꓕꓯ ꓢꓲ ꓠꓱꓸ ꓦꓱꓽ ꓘꓴꓸ ꓠꓬꓲꓸ ꓬꓯꓼ ꓡꓰ ꓢꓲ ꓬꓲꓸ ꓜꓲ ꓣꓱꓺ ꓓꓳ ꓡ ꓟꓽ ꓘꓴ ꓟ ꓪꓴꓸ ꓠꓬꓲ ꓥꓳ=

-       ꓬꓲꓸ ꓫꓵꓸ ꓫꓵ ꓗꓷ ꓗꓸ ꓠꓯ ꓕꓯꓺ ꓢꓲ ꓗꓪ ꓩꓲꓸ ꓛꓲꓺ ꓟꓵꓽ ꓛꓵꓽ ꓐꓽ ꓐꓽ ꓤ ꓧꓳꓽ ꓖꓶ ꓠ ꓔ ꓥ= ꓬꓲꓸ ꓜꓲ ꓣꓱꓽ ꓓꓳ ꓡˍ ꓕꓯ ꓕꓲ ꓜꓲ ꓡꓰ ꓕꓲ ꓜꓲ ꓠꓬꓲꓽ ꓗꓴꓸ ꓚꓸꓼ ꓗꓪ 1” ꓛꓲ ꓗꓶˍ ꓶꓽ ꓝꓲ ꓢꓲ꓾ ꓠꓬꓲꓽ ꓗꓴꓸ ꓚꓸꓼ ꓗꓪ ꓟ ꓠꓱꓸꓼ ꓐꓯꓼ ꓬꓲꓸ ꓜꓲ ꓡꓲꓸ ꓐꓴ ꓔꓯ ꓚꓵꓹ ꓦ ꓗꓷ ꓠꓯˍ ꓡꓳ=  ꓬꓲꓸ ꓜꓲ ꓡꓲꓸ ꓤ ꓣꓱꓽ ꓡ ꓗꓸ ꓠꓯꓸ 8 ꓠꓽ ꓙꓳ ꓡˍ ꓕꓯ ꓾ ꓝꓮꓲ ꓕꓲ ꓖꓺ ꓗꓪ ꓚꓵꓹ ꓔꓶˍ ꓟ ꓗꓪ ꓾ ꓟꓶꓽ ꓘꓶꓽ ꓝꓲꓸ ꓟꓶꓽ ꓛ ꓮ ꓘꓶꓸ ꓟꓽ ꓛ ꓕꓯ ꓔꓶ ꓠꓯ ꓥ=

-       ꓢꓽ-ꓡꓯꓸ ꓜꓲ ꓠꓬ ꓪꓴꓽ ꓡ ꓫꓸ ꓟ ꓪꓴꓸ ꓠꓬꓲ ꓬꓲꓸ ꓜꓲ ꓔꓶ ꓗꓷ ꓗꓸ ꓠꓯꓸ  ꓟꓳꓼ ꓔꓯ ꓟꓽ ꓠꓽ ꓠꓽ ꓫꓬꓹ ꓡꓲꓸ ꓖꓶ ꓠꓹ ꓟ ꓬꓳꓸ ꓚꓵˍ ꓡꓳ= ꓬꓲꓸ ꓟꓲꓽ ꓔꓯˍ ꓟꓲ ꓘꓪꓺ ꓫꓴ ꓖꓶ ꓠ ꓔ ꓥ= ꓖꓳ  ꓟ ꓡꓰꓽ ꓟꓽ ꓞꓲ ꓬꓲꓸ ꓚꓰꓺ ꓠꓬ ꓕꓯꓺ ꓢꓲꓺ ꓗꓪ ꓡꓰꓽ ꓓˍ ꓟ ꓑꓶꓸ ꓓꓴ ꓬꓲꓸ ꓟꓲꓺ ꓘꓪꓺ ꓫꓴ ꓖꓶˍ ꓕꓯ ꓬꓲꓸ ꓚꓰꓺ ꓔꓯ ꓟꓽ ꓕꓲꓺ ꓡꓰ ꓠ ꓤ ꓟꓴ ꓠ ꓔ ꓥ= ꓬꓲꓸ ꓜꓲ ꓡꓲꓸ ꓤ ꓚꓵꓹ ꓔꓶ ꓗꓷ ꓢꓲ ꓦ ꓐ ꓕꓲ ꓟ ꓛꓲ ꓙꓳ ꓡˍ ꓕꓯ Nitrogen ꓢꓯꓼ ꓐˍ ꓟ ꓩꓲꓸ-ꓛꓲꓺ ꓧꓳꓽ ꓖꓶ ꓠ ꓗꓹ ꓥ= Nitrogen ꓢꓯꓼ ꓐˍ ꓟ ꓩꓲꓸ-ꓛꓲꓺ ꓐꓴ ꓠꓬ ꓙꓱꓽ ꓤ ꓛꓰꓽ ꓥ ꓡꓳ=

-       ꓢꓽ-ꓡꓯꓸ ꓜꓲ ꓠꓬ ꓬꓲ ꓙꓬ ꓮ ꓟꓬꓹ ꓧꓳꓽ ꓖꓶ ꓠ ꓗˍ ꓐꓯˍ ꓟꓲ ꓮ ꓘꓶꓸ ꓧꓳꓽ ꓖꓶ ꓟꓬꓽ ꓡꓰ ꓕꓯ ꓠꓽ ꓬꓲꓸ ꓚꓰꓺ ꓛꓵꓽ ꓡꓰ ꓢꓲ ꓬꓲꓸ ꓜꓲ ꓫꓵꓻ ꓡ ꓗꓴˍ ꓥꓳ=

-       ꓢꓽ-ꓡꓯꓸ ꓜꓲ ꓘꓴꓸ ꓔꓯ ꓪꓴꓽ ꓠꓹ ꓟ ꓐꓱ ꓶ ꓔꓶˍ ꓠꓬ꓾ ꓬꓲꓸ ꓘꓴꓸ ꓒꓬꓱꓼ ꓗꓷ ꓗꓸ ꓠꓯꓸ ꓠꓬ ꓶꓼ ꓪꓴꓽ ꓓꓹ ꓡꓳ= ꓦꓲ ꓗꓪ ꓜꓽ ꓓꓴ ꓐꓱ ꓶ ꓔꓶˍ ꓠꓬ ꓬꓲꓸ ꓘꓴꓸ ꓒꓬꓱꓼ ꓪꓴꓸ ꓔꓴ ꓡˍ ꓕꓯ ꓡꓰ ꓶꓼ ꓜꓽ ꓐ ꓡˍ ꓟ ꓥꓳ=

-       ꓢꓽ-ꓡꓯꓸ ꓜꓲ ꓜꓲ ꓕꓯ ꓢꓲ ꓗꓪ ꓟꓶꓽ ꓦ ꓪꓴꓽ ꓬꓲ ꓾ ꓠꓲꓺ ꓪꓴꓽ ꓬꓲ ꓒꓼ ꓓꓹ ꓕꓯ ꓶꓼ ꓫ ꓟꓽ ꓓ ꓢꓰꓽ= ဆလပ္ ꓬꓲꓸ ꓓꓳꓺ ꓗꓪ ꓟ ꓬꓲꓸ ꓒꓬꓽ ꓠ ꓠꓷꓼ ꓓꓹ ꓠꓬ ꓞꓼ ꓞꓼ ꓣꓴ ꓦ ꓖꓶ ꓠ ꓔ ꓥ=

Add new comment

1 + 11 =