ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓙꓲꓻ ꓖꓴ ꓙꓳˍ ꓟ

ꓣꓳ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓕꓲ ꓠꓬꓲ ꓗꓪ ꓬꓲꓸ ꓫꓵꓸ ꓬꓲ ꓠꓲꓹ ꓟ ꓐꓴ ꓔꓯˍ ꓟꓲ ꓜꓽ ꓠ ꓗꓹ ꓟ ꓥ ꓡꓳ= ꓬꓲ ꓫꓵꓸ ꓬꓲ ꓠꓲꓹ ꓟ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓬꓲ ꓢꓯꓼ ꓒ ꓐꓲ ꓙꓳˍ ꓟ ꓥ ꓡꓳ= ꓬꓲ ꓫꓵꓸ ꓬꓲ ꓠꓲꓹ ꓟ ꓐꓴ ꓘꓴꓽ ꓗꓪ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓥ ꓟꓲ ꓬꓲ ꓢꓯꓼ ꓮ ꓟꓬꓹ ꓙꓳˍ ꓟ ꓥꓳ= ꓧꓪꓽ ꓖꓳ ꓓꓱꓽ ꓔꓬꓹ ꓢ ꓝꓲˍ ꓟ ꓬꓲ ꓞꓶꓻ꓾ ꓦꓲꓔꓮꓟꓲꓠ꓾ ꓟꓲꓠꓰꓣꓮꓡꓢ ꓢꓯꓼ ꓐꓴ ꓮ ꓟꓬꓹ ꓙꓳ ꓢꓲ꓾ ꓳ’ˍ ꓟ꓾ ꓠꓲꓹ ꓟ ꓠꓻ ꓐꓰ ꓠ-ꓐ 2 ꓢꓰꓹ-ꓛꓬꓳ ꓠꓻ ꓔꓯ ꓓꓻ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓐꓯ ꓗꓶ ꓠꓬ ꓟꓽ ꓜꓽ ꓠꓬꓲ ꓢꓴ ꓟꓽ ꓙꓳ꓾ ꓟꓽ ꓢꓷꓸ ꓢꓴˍ ꓟꓲ ꓟꓽ ꓙꓳ= ꓛꓳꓽ ꓒꓯꓹ ꓛꓳꓽ ꓤ ꓐꓴ ꓗꓹ ꓡ꓾ ꓛꓪꓸ ꓡˍ ꓕꓯ ꓟꓲ ꓲ’ ꓖꓶꓽ ꓜꓽ꓾ ꓢꓯꓸ ꓐꓬꓱꓽ ꓡꓳꓸ ꓠꓬꓲˍ ꓥ ꓟꓲ ꓜꓽ ꓢꓲ ꓠꓬꓲ ꓡꓳꓸ꓾ ꓕꓱ ꓡꓱ ꓬꓰ ꓔꓬ ꓟ ꓥ ꓡꓳ= ꓖꓳ ꓡꓱ ꓮ ꓕꓯ ꓟꓲ ꓜꓽ ꓔꓬ ꓥ ꓟꓲ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓗꓪ ꓮ ꓫꓵꓽ ꓙꓲꓻ ꓖꓴ ꓙꓳˍ ꓟ ꓔꓯ ꓠꓽ ꓣꓳ ꓟꓽ ꓚꓬꓹ ꓪ ꓔꓬ ꓟ ꓥ ꓡꓳ=

ꓣꓳ ꓗꓳ ꓡꓳ ꓗꓪ ꓢꓻ ꓢ ꓡꓰꓽ ꓪ ꓓꓹ ꓟ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓮ ꓔꓲꓸ ꓠꓯꓸˍ ꓟ (ꓮ ꓠꓶꓸ ꓤ ꓟ) ꓠꓬ ꓠꓲꓹ ꓟ ꓔꓬ ꓢꓻ ꓓꓴ ꓔꓯ ꓔꓳꓹ ꓙ ꓖꓶˍ ꓡꓳ ꓐꓰ ꓐꓯ ꓕꓯ ꓠꓽ ꓮ’ ꓡꓰ ꓓꓴ ꓥꓳ=

ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓗꓪ ꓞꓳ ꓤ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓖꓶˍ ꓟ ꓬꓲ ꓞꓶꓻ ꓐꓰ ꓠꓲꓹ ꓟ ꓐꓱ ꓶ ꓙꓲꓻˍ ꓟ phytosterols ꓐꓴ ꓙꓳˍ ꓟ ꓥ ꓡꓳ= ꓬꓲ ꓞꓶꓻ ꓢꓯꓼ ꓕꓱ ꓟ ꓠꓬ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓠꓲꓸ ꓡꓰ ꓠ ꓬꓰ ꓙ ꓖꓶˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲꓹ ꓟ ꓔꓯ ꓮ ꓕꓯ ꓟꓲ ꓔꓬꓹ ꓢ ꓝꓲ ꓠꓲꓹ ꓫꓵˍ ꓠꓬ ꓕꓲ ꓠꓬꓲ ꓗꓪ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓕꓲ ꓚꓪꓹ (ꓕꓲ ꓚꓬꓹ) ꓜꓽ ꓖꓶ ꓠ ꓗꓹ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓗꓪ ꓦꓲꓔꓮꓟꓲꓠ ꓰ ꓢꓯꓼ ꓮ ꓟꓬꓹ ꓙꓳˍ ꓠꓬꓲ ꓟꓬ-ꓢꓶꓽ ꓢꓯꓼ ꓪꓽ ꓠꓬꓲ ꓡ ꓝꓲˍ ꓡꓳ=

ꓝꓮꓲ ꓑꓣꓳꓔꓰꓲꓠ ꓢꓯꓼ ꓥ ꓟꓲ ꓓꓯꓹ ꓟ ꓑꓶꓸ ꓓꓴ ꓧꓪꓽ ꓘꓴꓸ (ꓧꓪꓽ ꓐꓴ) ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ=

ꓦ-ꓐ-ꓪꓰ ꓔꓯ ꓕꓲ ꓠꓬꓲ ꓗꓪ ꓕꓲ ꓚꓪꓹ (ꓕꓲꓽ ꓚꓬꓹ) ꓜꓽ ꓖꓶˍ ꓕꓯ ꓫꓵꓽ ꓘꓴꓽ ꓗꓪ ꓙꓳˍ ꓟ ꓟꓽ ꓙꓲꓻ ꓟ ꓗꓳ-ꓡꓯꓸ-ꓢꓕ-ꓣꓮꓪ ꓔꓯ ꓠꓲꓸ ꓡꓰ ꓝꓲ ꓢꓲ ꓠꓲꓹ ꓟ ꓢꓯꓼ ꓐꓲ ꓡꓰ ꓝꓲˍ ꓡꓳ=

ꓦ-ꓐ-ꓪꓰ ꓗꓪ ꓑꓣꓳꓔꓰꓲꓠ ꓢꓯꓼ ꓡꓰꓽ ꓟꓽ ꓞꓲꓺ ꓝꓲꓐꓰꓣ ꓢꓯꓼ ꓥˍ ꓟꓲ ꓙꓳˍ ꓟ ꓑꓶꓸ ꓓꓴ ꓦꓰꓼ ꓟ ꓙꓲꓺ ꓢꓻ ꓡꓰ ꓝꓲˍ ꓡꓳ=

ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓗꓪ ꓕꓱ ꓡꓱ ꓫꓵꓽ ꓙꓲꓻ ꓖꓴ ꓙꓳˍ ꓐꓯ ꓥ ꓟꓲ  ꓮ ꓟꓬꓹ ꓜꓽ ꓪ ꓡꓰ ꓕꓯ ꓫꓵꓽ ꓢꓯꓼ ꓬꓯꓼ ꓡꓰ ꓠꓲꓸ ꓡꓰ ꓢꓲ ꓠꓬꓲ꓾ ꓪꓴꓸ ꓟꓶ ꓟꓶˍ ꓟ ꓒꓬꓱꓼ ꓡ ꓗꓴꓸˍ ꓡꓳ= ꓦ-ꓐ-ꓪꓰ ꓬꓲ ꓢꓯꓼ ꓠꓬ ꓮ ꓔꓳꓸ ꓮ ꓘꓶꓸ ꓞꓹ ꓟ ꓗꓪ ꓡꓱ ꓔ ꓕꓯ ꓠꓽ ꓬꓲ ꓢꓯꓼ ꓥ ꓟꓲ ꓒꓲꓼ ꓡꓰ ꓗꓴˍ ꓡꓳ= ꓖꓳ ꓡꓱ ꓠꓬꓲ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓬꓲ ꓜꓲꓽ ꓪꓴꓻ ꓔꓯꓹ ꓡ ꓢꓲ ꓦꓲꓻ ꓗꓪ ꓮ ꓔꓳꓸ ꓞꓹ ꓢꓯꓼ ꓮ ꓔꓲꓸ ꓤ ꓡꓰꓽ ꓣꓱꓽ ꓢꓲ ꓡꓱ ꓜꓽˍ ꓠꓬ ꓪ ꓜꓲ ꓙꓲˍ ꓟ ꓥ ꓡꓳ= ꓡꓱ ꓔ ꓟ ꓕꓯꓽ ꓢꓲ ꓦ-ꓐ-ꓪꓰ ꓟꓽ ꓡꓱ ꓔ ꓟ ꓬꓲ ꓜꓲꓽ ꓠꓬ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓬꓲ ꓒꓵꓽ ꓟꓽ ꓟꓬꓽ ꓟ꓾ ꓣꓳ ꓗꓳ ꓡꓳ ꓗꓪ ꓢꓻ ꓢˍ ꓡꓰꓽ ꓪ ꓓꓹ ꓟ꓾ ꓦ-ꓐ-ꓪꓰ ꓠꓬ ꓣꓳꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓠꓬꓲ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓕꓲ ꓠꓬꓲ ꓗꓪ ꓦ-ꓐ-ꓪꓰ (ꓟꓲꓽ ꓟꓲ ꓢꓲꓹ ꓪꓰ ꓫꓵꓸ) ꓔꓯ ꓕꓲ ꓚꓪꓹ (ꓕꓲ ꓚꓬꓹ) ꓜꓽ ꓓꓴ ꓬꓰ ꓡꓯ꓾ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=