ꓦ-ꓓꓴꓽ-ꓢꓶꓽ ꓙꓲꓻ ꓖꓴ ꓙꓳˍ ꓟ

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓜꓽ ꓫꓵꓽ ꓜꓽ ꓙꓰꓽ ꓠꓯꓸꓼ ꓗꓪ ꓬꓲ ꓜꓲ ꓗꓪ ꓐꓰ ꓟꓶˍ ꓟ ꓜꓽ ꓫꓵꓽ ꓜꓽ ꓙꓰꓽ ꓔꓯ ꓮ ꓕꓯ ꓟꓲ ꓜꓽ ꓖꓶˍ ꓕꓯ ꓠꓲꓹ ꓟ ꓠꓻ꓾ ꓢꓰꓹ-ꓛꓬꓳ ꓔꓪꓰꓹ-ꓛꓬꓳ ꓠꓻ꓾ ꓚꓮꓠꓚꓰꓣ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓟ ꓥ ꓡꓳ= ꓪꓳꓽ ꓒꓬꓽ ꓪꓳꓽ ꓟꓲꓸ ꓐꓴ ꓘꓴꓽ ꓗꓪ ꓐꓰ ꓦ-ꓓꓴꓽ-ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓬꓯꓼ ꓟ ꓢꓯꓼ ꓠꓱꓸ ꓐꓯ ꓕꓯꓽ ꓢꓲ ꓓꓵˍ ꓟ ꓥ ꓢꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓖꓶˍ ꓟ ꓜꓽ ꓓꓴ ꓕꓲ ꓫꓵꓽ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓦ-ꓓꓴꓽ-ꓢꓶꓽ ꓔꓯ ꓠꓬ ꓑꓯꓸ ꓜꓽ ꓫꓳꓹ ꓜꓽˍ ꓟ꓾ ꓬꓳ ꓫꓬꓹ ꓢꓲ ꓜꓽˍ ꓟ꓾ ꓚꓬꓸ ꓗꓷ ꓢꓲ ꓜꓽˍ ꓟ꓾ ꓕꓱ ꓟꓬ ꓚꓱꓹ ꓜꓽ ꓐ ꓡˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱꓹ ꓗꓪ ꓐꓰ ꓦ-ꓓꓴꓽ-ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓐꓴ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

1. ꓦ-ꓓꓴꓽ-ꓢꓶꓽ ꓦꓲꓔꓮꓟꓲꓠ ꓮ ꓙꓵꓽ ꓟ ꓬꓲ ꓝꓳꓹ ꓟꓶ ꓥ ꓡꓳ

ꓦ-ꓓꓴꓽ-ꓓꓶꓽ ꓕꓲ ꓢꓶꓽ ꓗꓪ ꓕꓲ ꓠꓬꓲ ꓐꓱ ꓶ ꓣꓱꓽ ꓞꓹ ꓟ ꓦꓲꓔꓮꓟꓲꓠ ꓚ 40% ꓔꓯ ꓡꓴꓽ ꓖꓶˍ ꓡꓳ= ꓦꓲꓔꓮꓟꓲꓠ ꓚ ꓡꓰꓽ ꓟꓽ ꓞꓲꓺ ꓧꓪꓽ ꓖꓳ ꓓꓱꓽ ꓢꓯꓼ꓾ ꓧꓪꓽ ꓗꓴꓹ ꓙꓲꓻ ꓔꓬꓹ ꓢ ꓓꓴ꓾ ꓟꓬ ꓢꓶꓽ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓟ ꓦꓲꓔꓮꓟꓲꓠ ꓮ꓾ ꓪꓳꓽ ꓔꓳ ꓔꓯ ꓪꓽ ꓠꓬꓲ ꓡꓰ ꓝꓲˍ ꓟ ꓦꓲꓔꓮꓟꓲꓠ ꓗ꓾ ꓠꓲꓹ ꓟ ꓧꓪꓽ ꓐꓴ ꓣꓳ ꓡꓰˍ ꓟ ꓐꓰ ꓫꓵꓽ ꓢꓯꓼ ꓔꓯ ꓔꓲ ꓟꓴˍ ꓗꓷ ꓡꓰ ꓝꓲ ꓢꓲ꓾ ꓧꓪꓽ ꓖꓳ ꓓꓱꓽ ꓗꓪ ꓟ ꓬꓲ ꓬꓲꓻ ꓢꓯꓼ ꓔꓯ ꓔꓲ ꓟꓴꓸ ꓗꓷ ꓡꓰ ꓝꓲ ꓓꓴ ꓐꓱ ꓶ ꓣꓱꓽ ꓞꓹ ꓟ ꓑꓳꓔꓮꓢꓢꓲꓴꓟ ꓢꓯꓼ ꓐꓴ ꓙꓳˍ ꓟ ꓥ ꓡꓳ=

ꓝꓮꓲ ꓦꓲꓔꓮꓟꓲꓠ ꓐ꓾ ꓝꓳꓡꓮꓔꓰ꓾ ꓟꓮꓖꓠꓰꓢꓲꓴꓟ꓾ ꓚꓧꓣꓳꓟꓲꓴꓟ꓾ ꓚꓳꓡꓲꓠ꓾ ꓜꓲꓠꓚ ꓐꓰ ꓑꓧꓳꓢꓑꓧꓮꓔꓰ ꓢꓯꓼ ꓐꓴˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ=

1. ꓠꓲꓹ ꓟ ꓔꓬꓹ ꓢ ꓓꓴ ꓐꓱ ꓶ ꓬꓰ ꓙ ꓖꓶˍ ꓡꓳ= ꓦ-ꓓꓴꓽ-ꓢꓶꓽ ꓗꓪ ꓡꓬꓚꓳꓑꓰꓠꓰ꓾ ꓦꓲꓔꓮꓟꓲꓠ ꓚ꓾ ꓦꓲꓔꓮꓟꓲꓠ ꓐꓴ ꓡꓰ ꓐꓰ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ ꓮꓠꓳꓫꓲꓓꓮꓠꓔꓢ ꓢꓯꓼ ꓐꓴ ꓠꓬ ꓠꓲꓹ ꓟ ꓠꓻ ꓡꓰ ꓐꓰ ꓞꓽ ꓞꓽ ꓓꓻ ꓡꓰ ꓟꓽ ꓓ ꓟ ꓠꓻ ꓒꓬꓱꓼ ꓡˍ ꓟ ꓝꓣꓰꓰ ꓣꓮꓓꓲꓚꓮꓡꓢ ꓐꓴ ꓔꓯ ꓖꓼ ꓓꓳˍ ꓟ ꓗꓪ ꓬꓰ ꓙ ꓖꓶˍ ꓡꓳ= ꓜꓽ ꓓꓴ ꓜꓽ ꓫꓵꓽ ꓗꓪ ꓐꓰ ꓠꓯꓻ ꓞꓲꓼ ꓔꓯ ꓟꓳꓸ ꓚꓬꓹ ꓠꓬꓲ ꓔ ꓟ ꓗꓪ ꓠꓬ ꓠꓲꓹ ꓟ ꓔꓬꓹ ꓢꓴ ꓓꓴ ꓐꓱ ꓶ ꓡꓬꓚꓳꓑꓰꓠꓰ ꓐꓹ ꓟ ꓠꓯꓻ ꓞꓲꓺ ꓐꓴ ꓔꓯ ꓓꓳ ꓖꓶˍ ꓟ ꓢꓶꓸ ꓟꓽ ꓞꓲꓺ ꓦ-ꓓꓴꓽ-ꓢꓶꓽ ꓔꓯ ꓟꓬꓽ ꓠꓬꓲ ꓜꓽ ꓠꓹ ꓟ ꓚꓴꓽ ꓬꓲꓹ ꓖꓶ ꓔ ꓡꓳ=

            ꓧꓪ ꓟꓳ ꓔ ꓟ ꓝꓮꓲ ꓕꓲ ꓫꓵꓽ ꓠꓬ ꓫꓵꓽ ꓘꓴꓽ ꓗꓪ ꓡꓬꓚꓳꓑꓲꓠ ꓢꓯꓼ ꓟꓬꓽˍ ꓟ ꓠꓬ ꓠꓲꓹ ꓟ ꓠꓻ꓾ ꓢꓰꓹ-ꓛꓬꓳ ꓔꓪꓰꓹ-ꓛꓬꓳ ꓠꓻ ꓒꓬꓱꓼ ꓡ ꓢꓴ ꓐꓴ ꓗꓪˍ ꓟꓲ ꓞꓽ ꓞꓽ ꓟꓽ ꓫꓵꓻ ꓠ ꓬꓰ ꓙ ꓖꓶˍ ꓡꓳ꓾ ꓐꓰ ꓐꓯ ꓔ ꓡꓳ=

1.  ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓪꓽ ꓠꓬꓲ ꓡ ꓝꓲˍ ꓡꓳ= ꓦ-ꓓꓴꓽ-ꓢꓶꓽ ꓠꓬ ꓟꓬꓽ ꓢꓶꓺ ꓔꓬꓹ ꓢ ꓝꓲˍ ꓟ ꓡꓬꓚꓳꓑꓲꓠ ꓐꓹ ꓟ ꓡꓰꓽ ꓟꓽ ꓞꓲꓺ ꓡꓴꓔꓰꓲꓠ ꓐꓰ ꓐꓰꓔꓮ ꓚꓮꓣꓳꓔꓲꓠꓰ ꓐꓴ ꓥˍ ꓟꓲ ꓐꓹ ꓟ ꓑꓶꓸ ꓓꓴ ꓟꓬꓽ ꓢꓶꓺ ꓢꓯꓼ ꓪꓽ ꓠꓬꓲ ꓡ ꓝꓲˍ ꓟˍ ꓡꓰ ꓐꓰ ꓟꓬ ꓢꓶꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓥ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ= ꓚꓳꓟ-ꓑꓴ-ꓔ ꓣꓱꓽ ꓟꓬꓽ ꓢꓴ ꓥˍ ꓟꓲ ꓦ-ꓓꓴꓽ-ꓢꓶꓽ ꓟꓬꓽ ꓠꓬꓲ ꓜꓽˍ ꓕꓯ ꓪ ꓜꓲ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=
2. ꓦꓰꓼ ꓟ ꓙꓲꓺ ꓢ ꓝꓲˍ ꓡꓳ= ꓦ-ꓓꓴꓽ-ꓢꓶꓽ ꓗꓪ ꓙꓳˍ ꓟ ꓝꓲꓐꓰꓣ ꓢꓯꓼ ꓐꓰ ꓬꓲꓻ ꓙꓬ ꓢꓯꓼ ꓠꓬ ꓜꓽ ꓓꓴ ꓙꓲꓺˍ ꓟ ꓔꓯ ꓢꓯꓼ ꓙꓳ ꓡ ꓝꓲ ꓢꓲ ꓦꓰꓽ ꓛꓲꓼ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ= ꓮ-ꓟꓰ-ꓣꓲ-ꓗ ꓗꓪ ꓜꓽ ꓓꓴ ꓜꓽ ꓙꓰꓽ ꓐꓰ ꓠꓯꓻ ꓞꓲꓼ ꓚꓬꓹ ꓠꓬꓲ ꓖꓴ ꓗꓪ ꓐꓰ ꓦ-ꓓꓴꓽ-ꓢꓶꓽ ꓕꓲ ꓢꓶꓽ ꓗꓪ ꓬꓲ ꓬꓲꓻ 6 ꓳꓜ ꓐꓰ ꓝꓲꓐꓰꓣ ꓢꓯꓼ (1ꓸ)ꓖ ꓓꓵˍ ꓡꓳ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓥ ꓟꓲ ꓦꓰꓼ ꓟ ꓠꓻ ꓙꓳ ꓢꓴ ꓐꓴ ꓐꓰ ꓦꓰꓼ ꓟ ꓗꓪ ꓜꓽ ꓓꓴ ꓙꓲꓺ ꓖꓶˍ ꓟ ꓮꓚꓲꓓ ꓮ ꓟꓬꓹ ꓓꓳ ꓡ ꓢꓴ ꓐꓴ ꓠꓬ ꓦ-ꓓꓴꓽ-ꓢꓶꓽ ꓗꓪ ꓙꓳˍ ꓟ ꓬꓲ ꓚꓱ ꓢꓯꓼ ꓑꓶꓸ ꓓꓴ ꓪ ꓜꓲ ꓠꓻ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=
3.  ꓢꓰꓹ-ꓛꓬꓳ ꓔꓪꓰꓹ-ꓛꓬꓳ ꓠꓻ ꓐꓴ ꓔꓯ ꓬꓰ ꓙ ꓖꓶˍ ꓡꓳ=

ꓦ-ꓓꓴꓽ-ꓢꓶꓽ ꓠꓬ ꓠ ꓑ (2) ꓢꓰꓹ-ꓛꓬꓳ ꓔꓪꓰ-ꓛꓬꓳ ꓠꓻ ꓙꓳ ꓢꓴ ꓐꓴ ꓐꓱ ꓶ ꓗꓽ ꓕꓸ ꓙ ꓖꓶˍ ꓟ ꓜꓽ ꓓꓴ ꓥ ꓡꓳ= ꓚꓬꓹ ꓠꓬꓲ ꓔ ꓟ ꓕꓲ ꓖ ꓗꓪ ꓢꓰꓹ-ꓛꓬꓳ ꓠꓻ ꓙꓳ ꓢꓴ ꓐꓴ ꓗꓪ ꓦ-ꓓꓴꓽ-ꓢꓶꓽ ꓐꓰ ꓫꓬꓹ ꓔ ꓟ ꓢꓯꓼ ꓠꓯꓻ ꓞꓲꓼ ꓔꓯ ꓬꓲ ꓠꓬꓲ (30) ꓠꓬꓲ ꓛꓲ ꓓꓳꓻ ꓖꓶˍ ꓕꓯ ꓠꓲꓹ ꓟ ꓠꓻ ꓒꓬꓱꓼ ꓡ ꓝꓲˍ ꓟ ꓝꓣꓰꓰ ꓣꓮꓓꓲꓚꓮꓡꓢ ꓐꓴ ꓔꓯ ꓠꓲꓸ ꓡꓰ ꓝꓲˍ ꓟ ꓔꓯ ꓟꓳꓻ ꓪˍ ꓡꓳ=

1.  ꓚꓮꓠꓚꓰꓣ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓙ ꓖꓶˍ ꓡꓳ=

ꓚꓬꓹ ꓠꓬꓲ ꓧꓪ ꓟꓰꓹ ꓠꓬꓲ ꓔ ꓟ ꓗꓪ ꓡꓬꓚꓳꓑꓰꓠꓰ ꓢꓯꓼ ꓠꓬ ꓤꓽ ꓘꓶꓻ ꓚꓮꓠꓚꓰꓣ꓾ ꓐꓵꓼ ꓟꓵ ꓚꓮꓠꓚꓰꓣ꓾ ꓦꓰꓼ ꓟ ꓚꓮꓠꓚꓰꓣ ꓐꓴ ꓡꓰ ꓐꓰ ꓚꓮꓠꓚꓰꓣ ꓚꓰꓡꓡ ꓐꓴ ꓪꓴꓽ ꓡ ꓟ ꓔꓯ ꓗꓽ ꓕꓸ ꓙ ꓖꓶˍ ꓡꓳ꓾ ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓥ ꓟꓲ ꓚꓲꓸ ꓔ ꓓꓴ ꓕꓲ ꓫꓵꓽ ꓠꓬ ꓮ ꓡꓲ ꓫꓵꓽ ꓜꓽ ꓓꓴ ꓥ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻˍ ꓟ ꓡꓰꓽ ꓟꓽ ꓞꓲꓺ ꓜꓽ ꓟꓬꓽ ꓙꓲ ꓡꓰ ꓕꓯ ꓟꓽ ꓙꓲꓻ ꓟˍ ꓟꓲ ꓒꓬꓱꓼ ꓡ ꓝꓲ ꓐ ꓡˍ ꓟ ꓔꓯ ꓚꓲꓸ ꓔ ꓠ ꓗꓹ ꓡꓳ=

ꓦ-ꓓꓴꓽ-ꓢꓶꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓖꓶˍ ꓐꓯ ꓥ ꓟꓲ ꓦ-ꓓꓴꓽ-ꓢꓶꓽ ꓠꓬ ꓮ ꓟꓬꓹ ꓜꓽ ꓟꓬꓽ ꓡꓰ ꓕꓯ ꓦꓰꓼ ꓛꓲꓽ ꓠꓻ ꓝꓲˍ ꓡꓳ= ꓤꓲꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓔꓯ ꓘꓶꓽ ꓡꓶꓽ ꓡꓰ ꓝꓲˍ ꓡꓳ= ꓝꓮꓲ ꓠꓬ ꓫꓵꓽ ꓓꓯꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓥˍ ꓟꓲ ꓮ ꓘꓶꓸ ꓬꓯꓼ ꓡꓰ ꓝꓲˍ ꓡꓳ= ꓝꓮꓲ ꓦ-ꓓꓴꓽ-ꓢꓶꓽ ꓠꓬ ꓚꓮꓠꓚꓰꓣ ꓠꓻ ꓫꓬꓹ ꓓꓴ ꓐꓱ ꓶ ꓟꓽ ꓥ ꓟ ꓔꓯ ꓟꓲ ꓢꓷꓸ ꓔ ꓠ ꓗꓹ ꓡꓳ= ꓦ-ꓓꓴꓽ-ꓢꓶꓽ ꓔꓯ ꓜꓽ ꓟꓬꓽ ꓡꓰ ꓕꓯ ꓪꓴꓸ ꓓꓵ ꓕꓲ ꓐꓶꓽ ꓠꓻˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓡꓰꓽ ꓟꓽ ꓞꓲꓺ꓾ ꓤ ꓠꓱ ꓶꓻ ꓔꓬ ꓢꓴ ꓖꓳ ꓓꓱꓽ ꓡꓲꓽ ꓔꓬ ꓢꓴ ꓐꓱ ꓶˍ ꓟꓲ ꓦꓰꓼ ꓛꓲꓼ ꓗꓪ ꓟ ꓤ ꓠꓱ ꓤ ꓐꓱ ꓶ ꓟꓽ ꓙꓲꓻ ꓐꓰ ꓢꓷꓸ ꓪ ꓡꓳ=

ꓝꓮꓲ ꓠꓬ ꓦ-ꓓꓴꓽ-ꓢꓶꓽ ꓜꓽ ꓟꓬꓽ ꓡꓰˍ ꓟ ꓗꓪ ꓐꓰ ꓪꓴꓽ ꓓꓲꓻ ꓗꓪ ꓡꓳ ꓓꓰ ꓙꓳ ꓡ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓦ-ꓓꓴꓽ-ꓢꓶꓽ ꓜꓽˍ ꓕꓯ ꓮ ꓡꓰ ꓜꓽ ꓟꓲˍ ꓮ ꓡꓰ꓾ ꓮ ꓡꓰ ꓜꓽ ꓙꓲˍ ꓮ ꓡꓰ ꓖꓳ ꓟꓬ ꓟꓽ ꓜꓽ ꓠꓹ ꓟ ꓢꓷꓸ ꓩꓴ ꓡˍ ꓟ ꓥ ꓡꓳ=

ꓧꓪꓽ ꓖꓳ ꓓꓱꓽ ꓐꓱ ꓶ ꓡꓳꓼ ꓠ ꓗꓪ ꓛꓲˍ ꓡꓰ ꓮ ꓕꓯ ꓟꓲ ꓜꓽ ꓠꓹ ꓟ ꓔꓯˍ ꓟꓲ ꓐꓯ ꓖꓶ ꓠꓲꓹ ꓫꓵˍ ꓡꓳ=