ꓧꓪꓽ ꓖꓳ ꓓꓱꓽꓔꓬ, ꓢ ꓓꓴ ꓐꓱ ꓶ ꓜꓽ ꓫꓵꓽ ꓜꓽ ꓙꓰꓽ

 

ꓞꓳ ꓤ ꓕꓲ ꓣꓳ ꓗꓹ ꓛꓲꓽˍ ꓟ ꓤꓶꓻ ꓔꓯ ꓟꓶ ꓓꓴ ꓐꓱ ꓶ ꓧꓪꓽ ꓖꓳ ꓓꓱꓽ ꓔꓬ ꓢ ꓠꓹ ꓟ ꓠꓬ ꓮ ꓟꓬꓹ ꓬꓳꓸ ꓚꓵˍ ꓟ ꓥ ꓡꓳ= ꓒꓴ ꓫꓵꓺ ꓵꓻ ꓖꓴ ꓟꓽ ꓓ ꓠ ꓛꓲꓺ ꓮ ꓟꓬꓹ ꓙꓳˍ ꓥ ꓟꓲ ꓧꓪꓽ ꓖꓳ ꓓꓱꓽ ꓔꓬ ꓟꓽ ꓢꓻ ꓕꓯ ꓠꓽ ꓮ ꓡꓲ ꓬꓰ ꓢꓲ ꓗꓹ ꓛꓲ ꓔꓬ ꓪ ꓢꓰꓽ= ꓧꓪꓽ ꓖꓳ ꓓꓱꓽ ꓔꓬ ꓢ ꓠꓲꓹ ꓫꓵˍ ꓠꓬ ꓧꓪꓽ ꓖꓳ ꓓꓱꓽ ꓕꓲ ꓟ ꓡꓱꓸꓼ ꓔꓯ ꓔꓳꓹ ꓙ ꓠ ꓗꓹ ꓡꓳ= ꓖꓳ ꓓꓱꓽ ꓠꓱ ꓫꓳꓸ ꓟꓸ ꓔꓯ ꓔꓳꓹ ꓙ ꓐ ꓡˍ ꓥ ꓟꓲ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓔꓯ ꓠꓬ ꓮ ꓙꓵꓽ ꓚꓵꓹ ꓓꓳ ꓡ ꓢꓲ ꓔꓬ ꓢꓻ ꓟꓽ ꓔꓬ ꓢꓻ ꓡꓳꓸ ꓠꓹ ꓟ ꓠꓽ ꓟꓽ ꓢꓻ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ ꓬꓲꓸ ꓪꓴꓻ ꓐꓰ ꓬꓲ ꓘꓴꓽ ꓗꓪ ꓔꓬꓹ ꓢꓻ ꓓꓴ ꓐꓱ ꓟꓽ ꓠꓽ ꓠꓽ ꓠꓯꓻ ꓞꓲꓼ ꓦꓲꓻ ꓗꓪ ꓟꓳꓸ ꓖꓶˍ ꓟ꓾ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓔꓯ ꓜꓽ ꓖꓶˍ ꓟ ꓔꓯ ꓬꓰ ꓖꓶ ꓠꓯꓹ ꓟ ꓥ ꓡꓳ=

ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓒꓴ ꓮ ꓟꓬꓹ ꓣꓱꓽ ꓟꓽ ꓛꓵꓽ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓜꓽ ꓓꓴ ꓜꓽ ꓙꓰꓽ ꓘꓴꓽ ꓗꓪ ꓡꓰꓽ ꓢꓯꓼ ꓮ ꓟꓬꓹ ꓓˍ ꓟ ꓥ ꓢꓲ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓣꓱꓽ ꓬꓯꓼ ꓓꓴ ꓙꓳˍ ꓟ ꓜꓽ ꓓꓴ ꓮ ꓟꓬꓹ ꓙꓳˍ ꓟ ꓥ ꓡꓳ= ꓮ ꓡꓲ ꓫꓵꓽ ꓜꓽ ꓓꓴ ꓥ ꓡ ꓐꓯ ꓟ ꓔꓯ ꓝꓸ ꓢꓲ ꓠ ꓠꓹ ꓓꓴ ꓬꓰ ꓡꓯ=

ꓮ ꓭꓸ ꓩꓴ

ꓮ ꓭꓸ ꓩꓴ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓢꓲ ꓬꓲ ꓒꓵꓽˍ ꓟꓲ ꓠꓲꓸˍ ꓟ ꓥ ꓡꓳ= ꓮ ꓭꓸ ꓩꓴ ꓕꓲ ꓩꓴ ꓗꓪ ꓑ-ꓣꓳ-ꓔꓲꓸ ꓢꓯꓼ 6 g ꓛꓲꓺ ꓙꓳˍ ꓟ ꓥ ꓢꓲ Vitamin ꓐꓰ Minerals ꓢꓯꓼ ꓐꓴ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ= ꓪꓴꓸ ꓠꓶꓸ ꓪꓴꓽ ꓡ ꓓꓴ ꓐꓱ ꓶ ꓬꓳꓸ ꓚꓵˍ ꓟ ꓗꓳ-ꓡꓲꓸ Choline ꓢꓯꓼ ꓔꓯ ꓮ ꓭꓸ ꓩꓴ ꓜꓽ ꓖꓶˍ ꓟ ꓗꓪ ꓐꓰ ꓟꓶ ꓡˍ ꓟ ꓥ ꓡꓳ= ꓡꓱꓺ ꓢꓲ ꓜꓽˍ ꓥˍ ꓟꓲ꓾ ꓚꓬꓸ ꓢꓲ ꓜꓽˍ ꓥˍ ꓟꓲ ꓮ ꓡꓲ ꓬꓰ ꓢꓲ ꓜꓽˍ ꓜꓽ ꓮ ꓘꓶꓸ ꓜꓽ ꓙꓲꓻˍ ꓟ ꓥ ꓡꓳ=

ꓡꓽ ꓫꓪꓸ

ꓪꓳꓽ ꓒꓬꓽ ꓬꓲ ꓫꓵꓽ ꓬꓲ ꓙꓰꓽ ꓚꓬꓸ ꓕꓯ ꓧꓳꓽˍ ꓟ ꓡꓽ ꓫꓪꓸ ꓥˍ ꓟꓲ ꓠꓲꓹ ꓟ ꓐꓰ ꓫꓵꓽ ꓙꓴꓽ ꓔꓬ ꓢ ꓓꓴ ꓐꓱ ꓶ ꓮ ꓘꓶꓸ ꓬꓳꓸ ꓚꓵˍ ꓟ ꓥ ꓡꓳ= ꓫꓵꓽ ꓓꓯˍ ꓟ꓾ ꓫꓵꓽ ꓘꓴꓽ ꓗꓪ ꓬꓲ ꓞꓶꓻ ꓟꓬꓽ ꓡˍ ꓟ ꓐꓰ ꓫꓵꓽ ꓙꓴꓽ ꓗꓳꓹ ꓟ ꓠꓻ ꓙꓳ ꓢꓴ ꓐꓴ ꓡꓽ ꓫꓪꓸ ꓔꓯ ꓮ ꓕꓯˍ ꓟꓲ ꓜꓽˍ ꓠꓬ ꓠꓻ ꓕꓲ ꓐꓱ ꓢ ꓡꓰˍ ꓡꓳ ꓐꓰ ꓠꓻ ꓫꓵꓽ ꓔꓯ ꓟꓳꓸ ꓧꓪꓺ ꓟꓰꓹ ꓠꓬꓲ ꓢꓴ ꓐꓴ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓥ ꓡꓳ= ꓝꓮꓲ ꓡꓽ ꓫꓪꓸ ꓠꓬ ꓪꓽ ꓠꓬꓲˍ ꓟ ꓐꓶꓽ ꓓꓲꓻ ꓢꓰꓼ ꓠꓯꓻ ꓞꓲꓼ ꓕꓲ ꓫꓵꓽˍ ꓟꓲ ꓥ ꓡꓳ=

ꓛꓳꓻ ꓢꓶꓽ

ꓪꓳꓽ ꓒꓬꓽ ꓗꓪ ꓧꓳꓽ ꓜꓽˍ ꓟ ꓛꓳꓻ ꓢꓶꓽ ꓥˍ ꓟꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲˍ ꓟ ꓥ ꓡꓳ= ꓛꓳꓻ ꓢꓶꓽ ꓜꓽˍ ꓟ ꓗꓪ ꓐꓰ Cancer ꓕꓲ ꓐꓱ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲ ꓢꓲ ꓧꓪꓽ ꓗꓴꓹ ꓙꓲꓻ ꓐꓰ ꓪꓴꓸ ꓓꓵ ꓗꓴꓹ ꓙꓲꓻ ꓔꓯ ꓔꓬ ꓢ ꓡꓰ ꓝꓲˍ ꓟ ꓔꓯ ꓧꓪ ꓟꓳꓻ ꓔ ꓟ ꓥ ꓡꓳ=

ꓚꓬꓻ

ꓚꓬꓻ ꓘꓴꓽ ꓗꓪ ꓙꓳˍ ꓟ ꓢꓯꓼ ꓕꓲ ꓙꓰꓽ ꓠꓬ ꓦꓰꓼ ꓟ ꓗꓪ ꓟꓲꓽ ꓦꓲ ꓑꓳˍ ꓟ꓾ ꓦꓰꓽ ꓛꓲꓽ ꓕꓳˍ ꓟ ꓔꓯ ꓑ ꓙꓽ ꓙꓽ ꓡꓰ ꓓꓻ ꓡꓰ ꓝꓲˍ ꓟ ꓪꓴꓸ ꓠꓬꓲ ꓦꓰꓽ ꓧꓳꓹ ꓠꓯꓻ ꓞꓲꓼ꓾ ꓦꓰꓼ ꓟ ꓟꓲꓽ ꓦꓲꓻ ꓠꓯꓻ ꓞꓲꓼ ꓫꓬꓹ ꓟ ꓗꓪ ꓚꓬꓻ ꓧꓳꓽ ꓢꓲ ꓫꓬꓹ ꓟ ꓥ ꓡꓳ= ꓠꓯꓻ ꓞꓲꓼ ꓚꓱꓹ ꓔꓯ ꓟꓳꓸ ꓧꓪ ꓟꓰꓹ ꓠꓬꓲ ꓔ ꓟ ꓗꓪ ꓐꓰˍ ꓟꓲ ꓚꓬꓻ ꓠꓬ ꓬꓲ ꓪꓴꓻ ꓓꓽ ꓟ ꓳ ꓡˍ ꓟ ꓔꓯ ꓗꓽ ꓔ ꓖꓶ ꓢꓲ ꓧꓪꓽ ꓘꓴꓸ ꓠꓻˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ ꓐꓰ ꓐꓯ ꓔ ꓡꓳ=

ꓗꓪꓰ-ꓗ-ꓳ

ꓐꓶꓽ ꓗꓴꓷꓼ꓾ ꓠꓱꓸ ꓐꓯ ꓗꓴꓷꓼ ꓐꓴ ꓡꓰ ꓐꓰ ꓟꓬ-ꓟ ꓗꓴꓷꓼ ꓗꓪ ꓠꓬ ꓮ ꓟꓬꓹ ꓟꓽ ꓜꓽ ꓔꓬ ꓥ ꓟꓲ ꓗꓪꓰ-ꓗ-ꓳ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓟꓬꓹ ꓣꓱꓽ ꓬꓯꓼ ꓓꓴ ꓙꓳˍ ꓟ ꓥ ꓡꓳ= 1997 ꓘꓳꓼ ꓕꓯ ꓮ-ꓟꓰ-ꓣꓲ-ꓗ ꓗꓴꓷꓼ ꓜꓽ ꓓꓴ ꓐꓰ ꓠꓯꓻ ꓞꓲꓼ ꓜꓴꓻ ꓓꓽ ꓟ ꓡꓰ ꓗꓪꓰ-ꓗ-ꓳ ꓐˍ ꓟ꓾ ꓚꓬꓼˍ ꓟ ꓜꓽ ꓓꓴ ꓜꓽ ꓫꓵꓽ ꓠꓬ ꓠꓲꓹ ꓟ ꓔꓬꓹ ꓢꓻ ꓓꓴ ꓐꓱ ꓶ ꓔꓳꓹ ꓙ ꓐ ꓡˍ ꓟ ꓔꓯ ꓐꓯ ꓑꓶ ꓗꓷ ꓗ ꓠꓯꓸ ꓠꓬ ꓗꓪꓰ-ꓗ-ꓳ ꓔꓯ ꓮ ꓤ ꓮ ꓤ ꓐꓰ ꓜꓽ ꓩꓴꓻ ꓡ ꓢꓲ ꓮ ꓟꓶ ꓠꓬ ꓗꓪꓰ-ꓗ-ꓳ ꓐˍ ꓟ ꓜꓽ ꓓꓴ ꓮ ꓟꓬꓹ ꓙꓳ ꓡ ꓟ ꓥ ꓡꓳ= ꓗꓪꓰ-ꓗ-ꓳ ꓔꓯ ꓮ ꓠꓱ ꓕꓯ ꓟ ꓡꓰ ꓠꓴꓽ ꓡꓰ ꓠ ꓔꓲꓹ ꓗꓷ ꓢꓲ ꓢꓲꓹ ꓢꓶꓽ ꓕꓲ ꓙꓰꓽ ꓙꓰꓽ ꓐꓰ ꓔꓺ ꓜꓽˍ ꓟ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓟ ꓥ ꓡꓳ= ꓗꓪꓰ-ꓗ-ꓳ ꓜꓽˍ ꓟ ꓠꓬ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓠꓲꓸ ꓡꓰ ꓝꓲ ꓢꓲ Fiber ꓢꓯꓼ ꓟꓶ ꓡꓰ ꓝꓲˍ ꓟ ꓪꓴꓸ ꓠꓬꓲ ꓦꓰꓽ ꓛꓲꓽ ꓘꓴꓽ ꓗꓪ ꓜꓽ ꓫꓵꓽ ꓜꓶˍ ꓟ ꓗꓪ ꓪꓽ ꓠꓬꓲ ꓡꓰ ꓝꓲˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ Potassium ꓐꓰ Folic Acid ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓟꓶꓽ ꓛꓲ ꓔꓶꓸ

ꓟꓶꓽ ꓛꓲ ꓔꓶꓸ ꓐꓴ ꓠꓬ ꓢꓻ ꓢꓻ ꓡꓰꓽ ꓪꓴꓻ ꓟꓶ ꓓꓹ ꓟ ꓡꓰꓽ ꓟꓽ ꓞꓲꓺ ꓬꓲ ꓒꓵꓽˍ ꓟꓲ ꓟꓽ ꓟꓬꓽ ꓟ ꓥꓳ= ꓟꓶꓽ ꓛꓲ ꓔꓶꓸ ꓘꓴꓽ ꓗꓪ Vitamin A, Vitamin C, Vitamin B, Iron, Calcium, Protein ꓐꓰ Potassium ꓢꓯꓼ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓟꓽ ꓟꓶ ꓫꓵ ꓕꓲ ꓧꓪꓹ ꓜꓽ ꓖꓶ ꓠ ꓗˍ ꓟ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓮꓸ ꓠꓬꓲꓽ ꓮ ꓚꓵꓹ (ꓮ ꓠꓬꓲꓽ ꓠꓳꓸ ꓠꓳ)

ꓢꓶꓽ ꓛꓲ ꓐꓰ ꓪꓳꓽ ꓔꓳ ꓕꓶꓺ ꓡꓰ ꓠꓹ ꓟ Calcium ꓢꓯꓼ ꓡꓳꓼ ꓠ ꓛꓲ ꓣꓱꓽ ꓞꓹ ꓟ ꓥ ꓡꓳ= Calcium ꓢꓯꓼ ꓮ ꓟꓬꓹ ꓟꓶ ꓠꓲꓹ ꓫꓵˍ ꓠꓬ ꓮ ꓠꓬꓲꓽ ꓮ ꓚꓵꓹ ꓬꓲꓻ ꓔꓯ ꓟꓬꓽ ꓠꓬꓲ ꓓꓳꓻ ꓠ ꓔ ꓥ= ꓪꓳꓽ ꓔꓳ ꓔꓬ ꓢ ꓓꓴ ꓡꓰꓽ ꓟꓽ ꓞꓲꓺ ꓫꓵꓽ ꓤꓶꓻ ꓙꓳ ꓠꓹ ꓟ꓾ ꓧꓪꓽ ꓘꓴꓸ ꓟꓬꓱꓽ ꓬꓰ ꓠꓹ ꓟ ꓐꓰ ꓠꓲꓹ ꓟ ꓔꓷꓹ ꓟ ꓗꓪ ꓤꓶꓻ ꓙꓳ ꓠꓹ ꓟˍ ꓟꓲ Calcium ꓢꓯꓼ ꓣꓱꓽ ꓞꓹ ꓟ ꓥ ꓡꓳ= ꓮ ꓠꓬꓲꓽ ꓮ ꓚꓵꓹ ꓬꓲꓻ ꓘꓴꓽ ꓗꓪ Calcium ꓢꓯꓼ ꓡꓰꓽ ꓟꓽ ꓞꓲꓺ Vitamin A, Vitamin B ꓢꓯꓼ ꓥˍ ꓟꓲ ꓙꓳˍ ꓟ ꓪꓴꓸ ꓠꓬꓲ ꓬꓲ ꓒꓵꓽ ꓠꓲꓸ ꓢꓲ ꓧꓪꓽ ꓖꓳ ꓓꓱꓽ ꓔꓬ ꓢꓻ ꓓꓴ ꓐꓱ ꓶ ꓣꓱꓽ ꓬꓯꓼˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓬꓽ ꓬꓲꓸ ꓢꓶꓽ (ꓧꓶꓽ ꓐꓲꓼ)

ꓬꓽ ꓬꓲꓸ ꓢꓶꓽ ꓥˍ ꓟꓲ ꓢꓻ ꓢꓻ ꓪ ꓓꓹ ꓟ ꓜꓽ ꓫꓵꓽ ꓕꓲ ꓟ ꓥ ꓡꓳ= ꓪꓳꓽ ꓔꓳ꓾ ꓠꓲꓹ ꓟ ꓐꓰ ꓬꓲ ꓪꓴꓻ ꓔꓬ ꓢꓻ ꓓꓴ ꓐꓱ ꓶ ꓬꓰ ꓙ ꓖꓶˍ ꓟ ꓬꓽ ꓬꓲꓸ ꓢꓶꓽ ꓔꓯ ꓜꓽ ꓕꓯ ꓠꓬ ꓠꓱꓸ ꓐꓯꓼ ꓚꓱꓹ ꓕꓯ ꓢꓲꓽ ꓬꓽ ꓬꓲꓸ ꓢꓶꓽ ꓔꓯ ꓬꓲꓻ ꓙꓬ ꓗꓪ ꓚꓬꓸ ꓗꓷ ꓢꓲ꓾ ꓪꓰꓽ ꓗꓷ ꓢꓲ ꓔꓲꓸ ꓜꓽˍ ꓠꓬ ꓪ ꓙꓲꓻ ꓙꓲˍ ꓡꓳ ꓐꓰ ꓢꓷꓸ ꓪ ꓟ ꓥ ꓡꓳ=

ꓔꓳ-ꓩꓴꓸ

ꓔꓳ-ꓩꓴꓸ ꓔꓯ ꓮ ꓠꓳ ꓛꓵꓽ ꓗꓪ ꓐꓰ ꓫꓬꓹ ꓔ ꓟ ꓥ ꓡꓳ= ꓮ ꓠꓳꓸ ꓛꓵꓽ ꓠꓬ ꓗꓳ-ꓡꓯꓸ-ꓢ-ꓕ-ꓣꓮꓪ ꓮ ꓟꓬꓹ ꓟꓽ ꓚꓬꓼ ꓟ ꓮ ꓠꓳ ꓕꓲ ꓫꓵꓽ ꓥ ꓢꓲ Protein Iron Calcium ꓮ ꓟꓬꓹꓙꓳˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓔꓳ-ꓩꓴꓸ ꓔꓯ ꓮ ꓕꓯˍ ꓟꓲ ꓜꓽ ꓖꓶˍ ꓠꓬ ꓪꓳꓽ ꓔꓳ ꓪꓴꓽ ꓡˍ ꓟ ꓔꓯ ꓗꓽ ꓔ ꓖꓶˍ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓘꓴꓽ ꓗꓪ ꓐꓰ ꓞꓼ ꓛꓵ ꓢꓯꓼ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲˍ ꓡꓳ=

ꓦꓹ ꓓꓴꓽ ꓢꓶꓽ

ꓦꓹ ꓓꓴꓽ ꓢꓶꓽ ꓠꓬ ꓮ ꓘꓶꓸ ꓫꓵꓽˍ ꓟ ꓪꓴꓸ ꓠꓬꓲ ꓮ ꓠꓱ ꓕꓯ ꓠꓬ ꓦꓹ ꓓꓴꓽ ꓢꓶꓽ ꓔꓯ ꓓꓳꓼ ꓙꓳˍ ꓟ ꓢꓶꓹ ꓢꓶꓽ ꓥ ꓡꓳ꓾ ꓐꓰ ꓞꓳ ꓤ ꓐꓴ ꓢꓷꓸ ꓔ ꓟ ꓥ ꓡꓳ= ꓗ ꓠꓯꓸ ꓕꓯ ꓠꓬ ꓞꓳ ꓡ ꓮ ꓟꓬꓹ ꓜꓽ ꓡ ꓟ ꓥ ꓢꓲ꓾ ꓦꓹ ꓓꓴꓽ ꓢꓶꓽ ꓚꓱꓹ ꓔꓯ ꓟꓳꓸ ꓧꓪ ꓟꓰꓹ ꓠꓬꓲˍ ꓕꓯ ꓦ ꓓꓴꓽ ꓢꓶꓽ ꓠꓬ ꓔꓬꓹ ꓢꓻ ꓓꓴ ꓐꓱ ꓶ ꓜꓽˍ ꓟ ꓜꓽ ꓫꓵꓽ ꓜꓽ ꓙꓰꓽ ꓘꓴꓽ ꓗꓪ ꓟꓽ ꓙꓳ ꓟꓽ ꓓ ꓟ ꓜꓽ ꓓꓴ ꓕꓲ ꓙꓰꓽ ꓥ ꓟ ꓔꓯ ꓮ ꓙꓵꓽ ꓘꓳꓹ ꓣꓴ ꓐ ꓡˍ ꓟ ꓥ ꓡꓳ=

ꓦ ꓓꓴꓽ ꓢꓶꓽ ꓘꓴꓽ ꓗꓪ Vitamin A, Vitamin C ꓐꓰ ꓖꓳ ꓓꓱꓽ ꓡꓲꓽ ꓢꓴ꓾ ꓖꓳ ꓓꓱꓽ ꓠꓬꓲꓽ ꓔꓱꓹ ꓙꓳ ꓔꓬ ꓢꓴ ꓐꓱ ꓶ ꓟꓽ ꓙꓳ ꓟꓽ ꓓ ꓟ Folic Acis ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ= ꓝꓮꓲ ꓠꓬ ꓟꓳꓽ ꓡꓰ ꓢꓻˍ ꓟ ꓔꓯ ꓗꓽ ꓔ ꓖꓶˍ ꓟ ꓢꓯꓼ ꓕꓲ ꓟˍ ꓟꓲ ꓙꓳˍ ꓢꓰꓽ ꓟ ꓪꓴꓸ ꓠꓬꓲ ꓦ ꓓꓴꓽ ꓢꓶꓽ ꓔꓯˍ ꓟꓲ ꓮ ꓕꓯˍ ꓟꓲ ꓜꓽ ꓖꓶ ꓠꓯꓹ ꓟ ꓥ ꓡꓳ=

 

Add new comment

6 + 14 =