ꓪꓳꓽ ꓒꓲ ꓘꓴꓸ (ꓪꓳꓽ ꓒꓬꓽ ꓘꓴꓸ) ꓔꓶ ꓚꓱꓹ

ꓪꓳꓽ ꓒꓬꓽ ꓘꓴꓸ ( ꓪꓳꓽ ꓒꓲ ꓘꓴꓸ) ꓠꓬ ꓙꓬ ꓝꓲ ꓪꓳꓽ ꓒꓬꓽ ꓕꓲ ꓫꓵꓽ ꓥꓳ= ꓓꓽ ꓪꓴꓸ ꓔꓶꓻ ꓪꓴꓸ ꓔꓴˍ ꓟ ꓠꓬ ꓧꓶꓽ ꓟꓵꓽ ꓗꓪ ꓥ ꓢꓲ꓾ 1500 ꓘꓳꓼ ꓖ ꓡꓯꓽ ꓖ ꓙꓲꓺ ꓕꓯ ꓥ ꓡꓳ= ꓗꓸ ꓠꓯ ꓠꓬ Japan ꓐꓰ Korea ꓗꓪ ꓔꓶ ꓒꓬꓱ ꓙꓰ ꓗꓷ ꓟ ꓥꓳ= 1900 ꓘꓳꓼ ꓖꓽ ꓡꓯꓽ ꓖꓽ ꓙꓲꓺ ꓕꓯ ꓠꓬ Asia ꓗꓴꓷꓼ ꓐꓴ ꓗꓪ ꓔꓶ ꓒꓬꓱ ꓗꓷ ꓢꓲ꓾ ꓗꓸ ꓠꓯ ꓧꓶꓽ ꓟꓵꓽ ꓢꓴ ꓐꓴ ꓡꓰ Europe꓾ America ꓐꓰ Austria ꓟꓵꓽ ꓐꓴ ꓗꓪ ꓟꓵꓽ ꓚꓵꓸ ꓙꓰˍ ꓕꓯ ꓖꓳ ꓗꓪ ꓔꓶ ꓒꓬꓱꓼ ꓡ ꓗꓷ ꓟ ꓥꓳ=

ꓪꓳꓽ ꓒꓬꓽ ꓘꓴꓸ ꓬꓲꓸ ꓒꓬꓽ ꓠꓬ ꓠꓲꓹ ꓛꓵꓼ ꓢꓲ ꓬꓲꓸ ꓪꓵꓽ ꓠꓽ ꓒꓴˍ ꓡꓳ= ꓶꓼ ꓫ ꓝꓲ ꓛꓲ ꓡ ꓕꓯ ꓬꓲꓸ ꓜꓲ ꓠꓬ 18” ꓗꓪ ꓐꓰ 20” ꓛꓲ ꓟꓴˍ ꓡꓳ= ꓬꓲꓸ ꓜꓲ ꓔꓯ ꓠꓬ ꓬꓲꓸ ꓪꓰꓺ ꓟꓽ ꓪꓰꓺ ꓢꓰꓽ ꓕꓯ ꓡꓰ ꓶꓼ ꓫ ꓠꓯꓹ ꓡꓳ=

ꓪꓳꓽ ꓒꓬꓽ ꓘꓴꓸ ꓜꓲ ꓠꓬ ꓕꓲ ꓠꓬꓲ ꓐꓱ ꓶ ꓟꓶꓽ ꓛꓺ ꓢꓯꓼ 4 ꓙꓵꓹ ꓗꓪ ꓐꓰ 5 ꓙꓵꓹ ꓛꓲꓺ ꓣꓱꓽ ꓞꓹ ꓡꓳ= ꓟꓶꓽ ꓛꓺ ꓢꓯꓼ 4 ꓙꓵꓹ ꓠꓯꓸ ꓘꓪ ꓡꓰꓽ ꓖꓶˍ ꓠꓬ ꓬꓲꓸ ꓜꓲ ꓪꓴꓽ ꓡ ꓟꓽ ꓓ=

ꓬꓲꓸ ꓜꓲ ꓐꓱ ꓶ ꓩꓲꓸ-ꓛꓲꓺ ꓟꓵꓽ ꓛꓵꓽ ꓮ ꓟꓬꓹ ꓣꓱꓽ ꓞꓹ ꓡꓳ= ꓬꓲꓸ ꓪ ꓐꓴ ꓠꓬ ꓧꓶꓽ ꓚꓲꓺ (ꓥ ꓠꓬ) ꓠꓱꓸ ꓠꓲꓺ ꓠꓴꓽ  ꓗꓪ ꓪꓴꓽ ꓡ ꓟꓽ ꓗꓴ= ꓠꓱꓸ ꓠꓲꓺ ꓠꓴꓽ ꓐꓯˍ ꓟ ꓠꓬ ꓠꓬꓽ ꓡꓯꓼ ꓡꓯꓼ ꓗꓸ ꓟ ꓟꓲ ꓠꓯ(ꓠꓱꓸ ꓦꓱꓽ ꓠꓬꓼ ꓡꓯꓼ) ꓔꓯ ꓐꓯˍ ꓟ ꓥ ꓡꓳ= ꓩꓲꓸ-ꓛꓲꓺ ꓟꓵꓽ ꓛꓵꓽ ꓐꓱ ꓶ ꓙ ꓖꓶˍ ꓕꓯ  ꓢꓲꓹ ꓒꓬꓽ ꓛꓵꓽ ꓾ ꓪꓳꓽ ꓒꓬꓽ ꓛꓵꓽ ꓐꓰ ꓢꓲꓹ ꓢꓶꓽ ꓗꓴꓺ ꓙꓲꓺ ꓛꓵꓽ ꓾ ꓮꓸ ꓠꓬꓲꓽ ꓛꓰꓽ ꓾ ꓮꓸ ꓭꓸ ꓛꓰꓽ ꓐꓴ ꓔꓯ ꓙ ꓖꓶꓽ ꓐ ꓡˍ ꓡꓳ=

ꓬꓲꓸ ꓜꓲ ꓡꓲꓸ ꓤ ꓔꓯ ꓔꓶˍ ꓟ ꓕꓯꓽ ꓢꓲꓺ ꓬꓲꓸ ꓫꓵꓸ ꓔꓶˍ ꓕꓯ ꓠꓽ ꓪ ꓙꓲ ꓙꓲˍ ꓡꓳ ꓫꓵꓽ ꓥꓳ= ꓬꓲꓸ ꓫꓵꓸ ꓫꓵˍ ꓕꓯ ꓬꓲꓸ ꓫꓵꓸ 10 ꓢꓶꓽ ꓛꓲ ꓧꓳꓽ ꓗꓷ ꓢꓲ꓾ ꓕꓲ ꓑꓳ ꓐꓰ ꓕꓲ ꓑꓳ ꓠꓬꓲꓽ ꓗꓴꓸ ꓚꓸꓼ ꓗꓪ 6” ꓛꓲꓺ ꓗꓷꓹ ꓶꓽ ꓢꓲ ꓔꓶ ꓠ ꓔ ꓡꓳ=ꓣꓳ ꓫꓵꓸ ꓔ ꓟ ꓬꓲꓸ ꓫꓵꓸ ꓮ ꓙꓵꓽ ꓡꓱꓸꓼ ꓬꓲꓸ ꓜꓲ ꓟꓽ ꓣꓱꓽ ꓓꓳ ꓡ ꓟ ꓪꓴꓸ ꓠꓬꓲ ꓕꓲꓽ ꓖꓺꓼ ꓗꓪ ꓡꓰꓽ ꓬꓲꓸ ꓫꓵꓸ 10 ꓢꓶꓽ ꓛꓲ ꓫꓵꓸ ꓖꓶ ꓠ ꓗꓹ ꓟ ꓥ ꓡꓳ= ꓫꓵꓸ ꓗꓷ ꓠꓬ ꓕꓯꓽ ꓢꓲ ꓗꓪ ꓩꓲꓸ-ꓛꓲꓺ ꓐꓽ ꓐꓽ ꓤ ꓑꓲꓸ ꓖꓶ ꓠ ꓗꓹ ꓡꓳ= ꓟꓵꓽ ꓘꓳꓼ ꓮ ꓘꓶꓸ ꓛˍ ꓕꓯ ꓠꓽ ꓬꓲꓸ ꓫꓵꓸ ꓫꓵꓸ ꓔ ꓟ ꓕꓯꓽ ꓢꓲꓺ ꓗꓪ ꓫꓵꓸ ꓙꓴꓺ ꓑꓲꓸ ꓔ ꓢꓲ ꓾ ꓬꓲꓸ ꓜꓲ ꓡꓲꓸ ꓤ ꓣꓱꓽ ꓡ ꓕꓯ ꓢꓲꓸ ꓡꓰꓽ ꓣꓴ ꓦ ꓖꓶ ꓠꓯꓹ ꓡꓳ=

ꓬꓲꓸ ꓜꓲ ꓗꓪ ꓬꓲꓸ ꓒꓬꓽ 3 ꓒꓬꓽ ꓛꓲꓺ ꓓꓳ ꓡˍ ꓕꓯ ꓬꓲꓸ ꓜꓲ ꓡꓲꓸ ꓤ ꓔꓯ 3 ꓜꓲ 4 ꓜꓲ ꓞꓲ ꓜꓰꓻ ꓝꓲ ꓢꓲ ꓚꓵꓹ ꓦ ꓖꓶ ꓠ ꓗꓹ ꓡꓳ= ꓬꓲꓸ ꓒꓬꓽ 8 ꓒꓬꓽ ꓛꓲꓺ ꓣꓱꓻ ꓓꓳ ꓡˍ ꓕꓯ ꓠꓬ ꓜꓰꓻ ꓞꓹ ꓟ 3 ꓜꓲ(4 ꓜꓲ) ꓘꓴꓽ ꓗꓪ ꓐꓰ ꓪ ꓙꓲ ꓙꓲˍ ꓟ ꓕꓲ ꓜꓲ ꓔꓯ ꓡꓰꓽ ꓜꓰꓻ ꓝꓲ ꓢꓲ ꓮ ꓙꓵꓽ ꓚꓵꓹ ꓦ ꓗꓷ ꓠ ꓗꓹ ꓡꓳ= ꓔꓶ ꓗꓷ ꓗꓸ ꓠꓯꓸ 25 ꓠꓬꓲ ꓙꓳ ꓡˍ ꓠꓬ ꓣꓱꓻ ꓓꓳ ꓡ ꓟ ꓟꓳꓼ ꓮ ꓙꓵꓽ ꓚꓵꓹ ꓦ ꓗꓷ ꓢꓲ꓾ ꓬꓲꓸ ꓜꓲ ꓕꓲꓽ ꓚꓳꓺ ꓡꓳꓺ ꓗꓪ ꓡꓵꓹ ꓖꓶꓽ ꓠ ꓗꓹ ꓡꓳ=  ꓪꓳꓽ ꓒꓬꓽ ꓘꓴꓸ(ꓪꓳꓽ ꓒꓲ ꓘꓴꓸ) ꓚꓰꓺ ꓠꓬ ꓕꓯꓽ ꓢꓲꓺ ꓗꓪ ꓓꓹ ꓟ ꓪꓴꓸ ꓠꓬꓲ ꓾ ꓬꓲꓸ ꓟꓲꓺ ꓡꓵꓹ ꓖꓶˍ ꓕꓯ ꓬꓲꓸ ꓚꓰꓺ ꓔꓯ ꓟꓽ ꓡꓵꓹ ꓪ ꓡꓰ ꓠ ꓤ ꓟꓴ ꓠ ꓔ ꓡꓳ=

ꓪꓳꓽ ꓒꓬꓽ ꓘꓴꓸ ꓜꓲ ꓠꓬ ꓬꓲ ꓙꓬ ꓢꓯꓼ ꓔꓯ ꓪ ꓙꓲ ꓠꓵˍ ꓡꓳ=  ꓬꓲꓸ ꓘꓴꓸ ꓒꓬꓱꓼ ꓪꓴꓸ ꓔꓴˍ ꓕꓯ ꓾ ꓬꓲꓸ ꓜꓲ ꓑꓳ ꓡˍ ꓕꓯ ꓬꓲ ꓙꓬ ꓮ ꓟꓬꓹ ꓧꓳꓽ ꓖꓶ ꓠ ꓗꓹ ꓡꓳ= ꓪꓳꓽ ꓒꓬꓽ ꓘꓴꓸ ꓒꓬꓱꓼ ꓡ ꓗꓷˍ ꓟꓲ ꓬꓲꓸ ꓘꓴꓸ ꓟꓽ ꓪꓴꓽ ꓡ ꓕꓯ ꓠꓽ Nitrogen ꓢꓯꓼ ꓐˍ ꓟ ꓩꓲꓸ-ꓛꓲꓺ ꓧꓳꓽ ꓖꓶ ꓠꓯꓹ ꓡꓳ=

ꓪꓳꓽ ꓒꓬꓽ ꓘꓴꓸ ꓬꓲꓸ ꓒꓬꓽ ꓮ ꓘꓶꓸ ꓙꓳ ꓡ ꓢꓲ ꓬꓲꓸ ꓘꓴꓸ ꓡꓲꓽ ꓡˍ ꓕꓯ ꓠꓬ ꓶꓼ ꓫ ꓝꓲ ꓛꓲꓺ ꓡꓺꓳ=ꓔꓶ ꓗꓷ ꓗꓸ ꓠꓯꓸ 70-80 ꓠꓬꓲ ꓛꓲꓺ ꓗꓪ ꓥ ꓡꓳ= ꓬꓲꓸ ꓟꓲꓺ ꓗꓪ ꓟꓶꓽ ꓤ ꓗꓷ ꓔ ꓕꓯ ꓠꓬ ꓬꓲꓸ ꓘꓴꓸ ꓐꓶꓽ ꓡ ꓢꓲ ꓛꓵꓽ ꓡꓰ ꓗꓴˍ ꓡꓳ= ꓶꓼ ꓫˍ ꓕꓯ ꓠꓯꓸ ꓘꓪ ꓗꓪ ꓟ ꓬꓲꓸ ꓒꓬꓽ 3 ꓒꓬꓽ ꓔꓯ ꓜꓰꓻ ꓦ ꓗꓷ ꓢꓲ ꓶꓼ ꓫ ꓐ ꓡˍ ꓡꓳ=

ꓕꓲꓽ acre ꓔꓶˍ ꓠꓬ ꓬꓲꓸ ꓜꓲ (5000 – 7000) ꓕꓱˍ ꓛꓲ ꓓꓳˍ ꓡꓳ=

ꓬꓲꓸ ꓫꓵꓸ ꓐꓱ ꓶ ꓠꓬ꓾ ꓬꓲꓸ ꓪꓰꓺ ꓪꓰꓺ ꓡˍ ꓗꓪ ꓛꓲ ꓔꓶ ꓢꓲ ꓬꓲꓸ ꓢꓶꓽ ꓟꓲꓺ ꓡˍ ꓕꓯ ꓬꓲꓸ ꓫꓵꓸ ꓐꓱ ꓶ ꓶꓼ ꓫ ꓐ ꓡˍ ꓡꓳ=