ꓪꓳꓽ ꓜꓲꓽ ꓛꓵꓺ(ꓪꓳꓽ ꓛꓬꓽ ꓛꓵꓺ) ꓔꓶꓺ ꓚꓱꓹ

ꓪꓳꓽ ꓜꓲꓽ ꓗꓪ 3 ꓙꓰꓽ ꓙꓳˍ ꓡꓳ= ꓔꓶꓺ ꓗꓷ ꓗ ꓠꓯꓸ 20-30 ꓠꓬꓲ ꓙꓳ ꓡ ꓕꓯ ꓶꓼ ꓫ ꓓꓹ ꓟ ꓬꓲ ꓝꓳꓽ꓾ ꓔꓶ ꓗꓷ ꓗ ꓠꓯꓸ 35-45 ꓗꓪ ꓶꓼ ꓫ ꓓꓹ ꓟ ꓬꓲ ꓝꓳꓽ ꓐꓰ ꓔꓶ ꓔ ꓟ 50-60 ꓠꓬꓲ ꓛꓲꓺ ꓕꓯ ꓶꓼ ꓫ ꓓꓹ ꓟ ꓐꓯ ꓢꓲ ꓢꓺ ꓝꓳꓽ ꓙꓳˍ ꓟ ꓥ ꓡꓳ=

ꓪꓳꓽ ꓜꓲꓽ ꓠꓬ ꓬꓲ ꓛꓵꓺ ꓥ ꓟ ꓪꓴꓸ ꓠꓬꓲ ꓮ ꓠꓯꓸ ꓠꓯꓸ ꓗꓪ ꓛꓲ ꓟꓲ ꓛꓬ ꓟꓽ ꓗꓳꓹ ꓟ ꓟꓵꓽ ꓗꓪ ꓔꓶꓺ ꓠꓯꓹ ꓟ ꓥ ꓡꓳ= ꓩꓲꓸ ꓛꓲꓻ ꓮ ꓟꓬꓹ ꓙꓳ ꓢꓲ ꓧꓶꓽ ꓚꓲ ꓮ ꓔꓲꓸ ꓤ ꓙꓳˍ ꓟ ꓟꓵꓽ ꓠꓬ ꓪ ꓙꓲ ꓙꓲˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓧꓶꓽ ꓚꓲ ꓮ ꓟꓬꓹ ꓙꓳˍ ꓟ ꓟꓵꓽ꓾ ꓠꓱꓸ ꓠꓲ ꓠꓴꓽ꓾ ꓬꓲ ꓟꓲꓺ ꓠꓬꓼ ꓡꓯꓼˍ ꓟ ꓗꓪ ꓠꓬ ꓬꓲ ꓛꓵꓺ ꓮ ꓘꓶꓸ ꓟꓽ ꓓꓲꓻ=

ꓪꓳꓽ ꓜꓲꓽ ꓛꓵꓺ (ꓪꓳꓽ ꓛꓬꓽ ꓛꓵꓺ) ꓠꓬ ꓙꓬˍ ꓟ ꓟꓵꓽ ꓘꓳꓼ ꓔꓯ ꓠꓵˍ ꓟ ꓥ ꓡꓳ= ꓟꓵꓽ ꓘꓳꓼ ꓮ ꓘꓶꓸ ꓛˍ ꓠꓬ ꓬꓲ ꓛꓵꓺ ꓣꓳˍ ꓟ꓾ ꓬꓲ ꓛꓵꓺ ꓟꓽ ꓐꓲꓻ ꓟ꓾ ꓬꓲ ꓟꓶꓽ ꓝꓲ ꓟꓬꓽˍ ꓟ꓾ ꓬꓲ ꓐꓵꓽ ꓮ ꓘꓶꓸ ꓛꓱꓽ ꓠꓱˍ ꓟ ꓕꓱ ꓡꓱ ꓫꓵꓽ ꓗꓷ ꓡꓰ ꓗꓴˍ ꓡꓳ=

ꓔꓶꓺ ꓓꓴ ꓐꓱ ꓶ ꓠꓬ ꓠꓱꓸ ꓐꓯ ꓔꓶꓺ ꓫꓵꓽ ꓔꓶꓺ ꓙꓰꓽ ꓔꓶˍ ꓟ ꓡꓰ ꓐꓰ ꓬꓲ ꓟꓲꓺ ꓔꓯ ꓧꓶꓸ ꓕꓯ ꓘꓪꓺ ꓗꓷ ꓢꓲ ꓟꓵꓽ ꓛꓵꓽ꓾ ꓮꓸ ꓠꓬꓲꓽ ꓛꓲꓽ ꓬꓲ ꓛꓵꓽ ꓐꓴ ꓔꓯ ꓧꓳꓽ ꓖꓶ ꓠꓯꓹ ꓡꓳ= ꓧꓳꓽ ꓓꓳ ꓡꓰ ꓠꓬ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓮ ꓟꓬꓹ ꓧꓳꓽ ꓗꓷ ꓢꓲ ꓬꓲ ꓫꓵꓸ ꓫꓵꓸ ꓓꓴ ꓬꓲ ꓘꓴ ꓫꓬꓹ ꓖꓶ ꓗꓷ= ꓬꓲ ꓫꓵꓸ ꓘꓴ ꓕꓲ ꓟ ꓐꓰ ꓕꓲ ꓟ 4”-6”꓾ ꓕꓲ ꓚꓬꓸ ꓐꓰ ꓕꓲ ꓚꓬꓸ 2' ꓛꓲ ꓗꓶꓹ ꓶꓽ ꓠꓯꓹ ꓥ= ꓬꓲ ꓫꓵꓸ ꓬꓲ ꓘꓴ ꓕꓲ ꓘꓴ ꓗꓪ ꓬꓲ ꓫꓵꓸ ꓢꓶꓽ 3 ꓢꓶꓽ ꓗꓪ ꓐꓰ 4 ꓢꓶꓽ ꓛꓲꓺ ꓧꓳꓽ ꓗꓷ ꓢꓲ ꓕꓯꓽ ꓢꓲ ꓗꓪ ꓠꓱꓸ ꓦꓱꓽ ꓐꓽ ꓐꓽ ꓡꓰꓽ ꓑꓲꓸ ꓖꓶ ꓗꓷ= ꓬꓲ ꓫꓵꓸ ꓫꓵꓸ ꓗꓷ ꓠꓬ ꓬꓲ ꓟꓲꓺ ꓕꓯꓽ ꓢꓲꓺ ꓗꓪ ꓫꓵꓸ ꓙꓴꓺ ꓑꓲꓸ ꓖꓶ ꓠꓯꓹ ꓡꓳ= ꓕꓱ ꓡꓱ ꓑꓲꓸ ꓖꓶˍ ꓟ ꓠꓬ ꓟꓶꓽ ꓦ ꓦˍ ꓟ ꓪꓴꓸ ꓠꓬꓲ ꓟꓶꓽ ꓦ ꓢꓯꓼ ꓗꓪ ꓐꓰ ꓫꓵꓸ ꓔ ꓟ ꓬꓲ ꓫꓵꓸ ꓟꓽ ꓕꓶꓸ ꓓꓳ ꓙꓰ ꓠ ꓬꓰˍ ꓟ ꓥ ꓡꓳ=ꓕꓲ ꓰ-ꓗꓸ ꓔꓶꓺ ꓔ ꓠꓬ ꓬꓲ ꓫꓵꓸ 8lb ꓛꓲꓺ ꓣꓱꓽ ꓞꓹ ꓡꓳ=

ꓬꓲ ꓫꓵꓸ ꓔꓶꓺ ꓔ ꓟ 4 ꓠꓬꓲ ꓛꓲ ꓙꓳ ꓡ ꓕꓯ ꓠꓬ ꓬꓲ ꓜꓲ ꓣꓱꓻ ꓪꓴꓸ ꓔꓴ ꓡˍ ꓡꓳ= ꓔꓶꓺ ꓗꓷ ꓟ 10-12 ꓠꓬꓲ ꓛꓲꓺ ꓕꓯ ꓬꓲ ꓟꓲꓺ ꓗꓪ ꓟꓳꓼ ꓫꓬꓹ ꓡꓲꓸ ꓖꓶ ꓠꓯꓹ ꓡꓳ= ꓬꓲ ꓫꓵꓸ ꓫꓵꓸ ꓔ ꓟ ꓕꓲ ꓘꓴ ꓡꓰ ꓕꓲ ꓘꓴ ꓗꓪ ꓟ ꓪꓴꓽˍ ꓟ ꓕꓲ ꓜꓲ ꓔꓯ ꓤꓱꓻ ꓞꓹ ꓝꓲ ꓢꓲ ꓠꓱꓸ ꓐꓯꓼ ꓬꓲ ꓜꓲ ꓔꓯ ꓚꓵꓹ ꓦ ꓗꓷ= ꓬꓲ ꓜꓲ ꓣꓳˍ ꓕꓯ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓧꓳꓽ ꓟꓬꓽ ꓡꓰ ꓠꓬ ꓬꓲ ꓜꓲ ꓗꓪ ꓟ ꓬꓲ ꓒꓬꓽ ꓧꓪꓼ ꓡꓰ ꓢꓲ ꓫꓵꓻ ꓗꓴˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓜꓲ ꓣꓳꓺ ꓓꓹ ꓕꓯ ꓟꓶꓽ ꓦ ꓓꓽ ꓟ ꓡꓲꓺ ꓡˍ ꓟ ꓗꓪ ꓐꓰ ꓗꓽ ꓕꓸ ꓖꓶ ꓠꓹ ꓟ ꓐꓱ ꓶ ꓬꓲ ꓑꓲꓸ ꓓꓴ ꓫꓬꓹ ꓖꓶ ꓠ ꓔ ꓥ= ꓟꓬ-ꓟ ꓗꓴꓷꓼ ꓖꓴ ꓟꓶꓸ ꓕꓲ ꓛꓱꓽ ꓟꓶꓽ ꓦ ꓟꓬꓽ ꓠꓬꓲ ꓦˍ ꓟ ꓟꓵꓽ ꓗꓪ ꓠꓬ ꓬꓲ ꓦꓲꓻ ꓑꓲꓸ ꓖꓶ ꓢꓲ ꓔꓶꓺ ꓔꓬ ꓟ ꓥ ꓡꓳ=

ꓬꓲ ꓫꓵꓸ ꓬꓲ ꓝꓳꓽ ꓔꓯ ꓖꓼ ꓢꓲ ꓠꓬꓲ ꓔꓶꓺ ꓗꓷ ꓗ ꓠꓯꓸ 30 ꓠꓬꓲ ꓛꓲꓺ ꓕꓯ ꓠꓬ ꓬꓲ ꓛꓵꓺ ꓚꓵꓹ ꓓ ꓡꓺꓳ= ꓬꓲ ꓛꓵꓺ ꓚꓵˍ ꓕꓯ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓢꓯꓼ ꓙꓳ ꓠ ꓔ ꓥ= ꓠꓯꓼ ꓠꓯꓼ ꓟꓽ ꓚꓵꓹ ꓗꓷ ꓠꓬ꓾ ꓬꓲ ꓛꓵꓺ ꓚꓵꓹ ꓟꓬꓺ ꓡꓰ ꓠꓬ ꓬꓲ ꓛꓵꓺ ꓐꓶꓽ ꓡꓰ ꓗꓴˍ ꓡꓳ= ꓬꓲ ꓝꓳꓽ ꓔꓯ ꓖꓼ ꓢꓲ ꓕꓲ ꓰ-ꓗ ꓗꓪ ꓬꓲ ꓛꓵꓺ 5000-6000 lb ꓛꓲꓺ ꓚꓵꓹ ꓫ ꓟꓶ ꓓꓹ ꓡꓳ=

Add new comment

1 + 0 =