ꓪꓳꓽ ꓜꓲꓽ ꓛꓵ (ꓪꓳꓽ ꓛꓬꓽ ꓛꓵ) ꓙꓲꓻ ꓖꓴ ꓙꓳˍ ꓟ

ꓪꓳꓽ ꓜꓲꓽ ꓛꓵꓺ ꓔꓯ ꓠꓬ ꓟꓬ-ꓟ ꓗꓴꓷꓼ ꓡꓰꓽ ꓟꓽ ꓞꓲꓺ ꓠꓱꓸ ꓐꓯ ꓗꓴꓷꓼ ꓐꓴ ꓗꓪˍ ꓟꓲ ꓮ ꓕꓯ ꓟꓲ ꓜꓽ ꓔꓬ ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥ ꓡꓳ= ꓪꓳꓽ ꓜꓲꓽ ꓛꓵꓺ ꓔꓯ ꓬꓲ ꓚꓱꓺ ꓚꓱꓹ ꓟ꓾ ꓬꓲ ꓪꓳꓽ ꓬꓲꓻ ꓚꓬꓸ ꓓꓳˍ ꓟ꓾ ꓬꓲ ꓙꓴꓺ ꓡꓱꓸˍ ꓟ꓾ ꓔꓳꓹ ꓜꓽˍ ꓟ ꓕꓱ ꓟꓬ ꓚꓱꓹ ꓣꓱꓽ ꓢꓲ ꓜꓽ ꓔꓬ ꓟ ꓥ ꓡꓳ=

ꓪꓳꓽ ꓜꓲꓽ ꓛꓵꓺ ꓘꓴꓽ ꓗꓪ ꓠꓬ Potassium꓾ Folate꓾ Anthocyanin꓾ riboflavin꓾ ꓠꓲ-ꓬ-ꓢꓲꓠ꓾ Vitamin B6꓾ Vitamin K꓾ Calcium꓾ Magnesium꓾ Zinc꓾ Phosphorous꓾ Copper꓾ Manganese ꓐꓰ Sodium ꓢꓯꓼ ꓐꓴ ꓙꓳˍ ꓟ ꓥ ꓡꓳ=

ꓪꓳꓽ ꓜꓲꓽ ꓛꓵꓺ ꓜꓽˍ ꓟ ꓠꓬ ꓚꓮꓠꓚꓰꓣ ꓠꓻ ꓔꓯ ꓗꓽ ꓕꓸ ꓐ ꓡˍ ꓡꓳ= ꓪꓳꓽ ꓜꓲꓽ ꓛꓵꓺ ꓗꓪ ꓙꓳˍ ꓟ ꓢꓯꓼ ꓕꓲ ꓙꓰꓽ ꓠꓬ ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓝꓲˍ ꓟ ꓔꓯ ꓖꓼ ꓓꓳ ꓗꓷ ꓢꓲ ꓖꓳ ꓓꓱꓽ ꓗꓪ ꓚꓮꓠꓚꓰꓣ ꓡꓱꓸ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ=

ꓦꓰꓼ ꓟ ꓙꓲꓺˍ ꓟ ꓔꓯ ꓟꓬꓽ ꓠꓬꓲ ꓪꓽ ꓠꓬꓲ ꓡ ꓝꓲˍ ꓡꓳ= ꓪꓳꓽ ꓜꓲꓽ ꓛꓵꓺ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓦꓰꓼ ꓟ ꓙꓲꓺˍ ꓟ ꓟꓬꓱꓽ ꓬꓰˍ ꓟ ꓔꓯ ꓪꓽ ꓠꓬꓲ ꓡꓰ ꓠ ꓬꓰ ꓙ ꓖꓶˍ ꓡꓳ= ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲꓺ ꓟꓴꓸ ꓗꓷ ꓡꓰ ꓝꓲ ꓢꓲ꓾ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ= ꓧꓪꓽ ꓖꓳ ꓓꓱꓽ ꓚꓱꓺ ꓡꓰ ꓓꓴ ꓐꓱ ꓶˍ ꓟꓲ ꓜꓽ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓧꓪꓽ ꓖꓳ ꓓꓱꓽ ꓢꓯꓼ ꓪꓽ ꓠꓬꓲ ꓡ ꓝꓲˍ ꓡꓳ= ꓪꓳꓽ ꓜꓲꓽ ꓛꓵꓺ ꓗꓪ ꓮ ꓟꓬꓹ ꓙꓳˍ ꓟ ꓦꓲꓔꓮꓟꓲꓠ ꓚ ꓢꓯꓼ ꓠꓬ ꓧꓪꓽ ꓖꓳ ꓓꓱꓽ ꓢꓯꓼ ꓟꓬꓱꓽ ꓬꓰˍ ꓟ ꓔꓯ ꓢꓯꓼ ꓙꓳ ꓡ ꓝꓲ ꓢꓲ꓾ ꓟꓵꓽ ꓘꓳꓼ ꓕꓲ ꓟ ꓐꓰ ꓕꓲ ꓟ ꓝꓸ ꓙꓰˍ ꓟ ꓗꓪ ꓒꓬꓱꓼ ꓡˍ ꓟ ꓠꓻ ꓤ ꓒꓬꓽ ꓤ ꓐꓴ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶ ꓐ ꓡˍ ꓟ ꓥ ꓡꓳ=

ꓠꓲꓹ ꓟ ꓔꓯ ꓥˍ ꓟꓲ ꓔꓬꓹ ꓢ ꓡꓰ ꓝꓲˍ ꓡꓳ= ꓪꓳꓽ ꓜꓲꓽ ꓛꓵꓺ ꓗꓪ Flavonoid ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓖꓶ ꓐ ꓡˍ ꓡꓳ= ꓜꓽ ꓫꓵꓽ ꓜꓽ ꓙꓰꓽ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓐꓴ ꓔꓯ ꓧꓪ ꓟꓰꓹ ꓠꓬꓲ ꓢꓴ ꓐꓴ ꓡꓰ ꓢꓳ ꓣꓴ ꓔ ꓟ ꓗꓪ ꓪꓳꓽ ꓜꓲꓽ ꓛꓵꓺ ꓜꓽ ꓖꓶˍ ꓟ ꓠꓬ ꓠꓲꓹ ꓟ ꓔꓯ ꓔꓬꓹ ꓢ ꓡꓰ ꓝꓲ ꓢꓲ꓾ ꓠꓲꓹ ꓟ ꓫꓵꓽ ꓙꓴꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓙ ꓐ ꓡˍ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓤꓲꓽ ꓒꓴꓽ ꓗꓪ ꓟ ꓡꓳ ꓓꓰ ꓔꓯ ꓧꓶꓽ ꓡꓰ ꓝꓲ ꓐ ꓡˍ ꓡꓳ= ꓪꓳꓽ ꓜꓲꓽ ꓛꓵꓺ ꓔꓯ ꓮ ꓕꓯ ꓟꓲ ꓜꓽ ꓖꓶˍ ꓕꓯ ꓠꓬ ꓤꓲꓽ ꓒꓴꓽ ꓗꓪ ꓙꓳˍ ꓟ ꓡꓳ ꓓꓰ ꓔꓯ ꓦ ꓐ ꓕꓲ ꓟ ꓬꓲ ꓘꓴꓽ ꓗꓪ ꓧꓶꓽ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓐꓯ ꓔ ꓡꓳ= ꓪꓳꓽ ꓜꓲꓽ ꓛꓵꓽ ꓘꓴꓽ ꓗꓪ ꓙꓳˍ ꓟ ꓑꓳꓔꓮꓢꓢꓲꓴꓟ ꓢꓯꓼ ꓠꓬ ꓤꓲꓽ ꓒꓴꓽ ꓗꓪ ꓟ ꓡꓳ ꓓꓰ ꓔꓯ ꓧꓶꓽ ꓡꓰ ꓝꓲ꓾ ꓙꓲꓺ ꓡꓰ ꓝꓲˍ ꓟ ꓢꓯꓼ ꓙꓳˍ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓫꓵꓽ ꓒꓬꓸ ꓗꓪ ꓓꓵꓽ ꓡˍ ꓟ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ= ꓪꓳꓽ ꓜꓲꓽ ꓛꓵꓺ ꓗꓪ ꓙꓳˍ ꓟ ꓑꓳꓔꓮꓢꓢꓲꓴꓟ꓾ ꓢꓳꓓꓲꓴꓟ꓾ ꓓꓲꓰꓔꓮꓣꓬ ꓝꓲꓐꓰꓣ ꓢꓯꓼ ꓐꓴ ꓠꓬ ꓫꓵꓽ ꓒꓬꓸ ꓔꓯ ꓓꓳꓼ ꓒꓬꓱꓼ ꓡꓰ ꓝꓲˍ ꓟ ꓢꓯꓼ ꓐꓰ꓾ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓗꓷ ꓐ ꓡˍ ꓡꓳ= ꓙꓲꓺ ꓒꓶꓽ ꓑꓶꓸ ꓓꓴ ꓫꓵꓽ ꓒꓬꓸ ꓠꓻ ꓔꓬ ꓢꓴ ꓐꓴ ꓪꓳꓽ ꓜꓲꓽ ꓛꓵꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓖꓶˍ ꓕꓯ ꓫꓵꓽ ꓒꓬꓸ ꓔꓬꓹ ꓢ ꓡꓰˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓪꓳꓽ ꓜꓲꓽ ꓛꓵꓺ ꓗꓪ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓮ ꓟꓬꓹ ꓙꓳˍ ꓐꓯ ꓥ ꓟꓲ꓾ ꓜꓽ ꓓꓴˍ ꓟꓲ ꓠꓯꓻ ꓞꓲꓼ꓾ ꓠꓯꓻ ꓞꓲꓼ ꓥˍ ꓟꓲ ꓜꓽ ꓓꓴ ꓥ ꓟ ꓑꓶꓸ ꓓꓴ ꓬꓲ ꓟꓶ ꓬꓲ ꓙꓲꓽ ꓜꓽˍ ꓕꓯ (ꓜꓽ ꓠꓬꓽ ꓙꓲꓺ ꓡꓰ ꓕꓯ) ꓾ ꓢꓺ ꓡꓰ ꓠ ꓜꓽˍ ꓕꓯ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓢꓶꓸ ꓟꓽ ꓞꓲꓺ꓾ ꓟꓽ ꓙꓲꓻ ꓟ ꓟꓬꓽ ꓠꓬꓲ ꓒꓬꓱꓼ ꓡˍ ꓟ ꓥ ꓡꓳ꓾ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=

Add new comment

1 + 1 =