ꓬꓰ-ꓢꓴ ꓐꓰ ꓟꓵꓽ ꓘꓳꓼ (2) (Dialogue with Environment)

 ꓢꓲꓺ ꓒꓽ ꓬꓰ-ꓢꓴ ꓬꓲ ꓟꓸ ꓟꓲ ꓚˍ ꓕꓯ ꓔꓯ ꓥꓳꓽ ꓐꓯˍ ꓟ ꓮꓽ ꓙꓵꓽ ꓠꓯꓸꓼ ꓗꓪ ꓟꓵꓽ ꓘꓳꓼ ꓚꓱꓹ ꓙꓱꓽ ꓤꓽ ꓟ ꓞꓲ ꓚꓱꓹ ꓧꓪꓽ ꓫꓵꓽ ꓧꓪꓽ ꓙꓲꓽ ꓚꓱꓹ ꓠꓬꓹ ꓫꓵꓽ ꓠꓬꓹ ꓙꓱꓽ ꓚꓱꓹ ꓢꓲꓹ ꓜꓲ ꓡꓳ ꓜꓲ ꓜ ꓫꓵꓸ ꓡꓳ ꓫꓵꓸ ꓕꓱ ꓡꓲꓳ ꓫꓵꓽ ꓮꓽ ꓙꓵꓽ ꓐꓹ ꓟ ꓥ ꓪ= ꓬꓲ ꓠꓬ ꓜ ꓫꓵꓸ ꓫꓵꓸ ꓔ ꓟ ꓚꓱꓹ ꓬꓳ=ꓦ 10ꓽ 1- 18 ꓗꓪ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓢꓴ ꓟꓽ ꓙꓲˍ ꓟ ꓮꓸ ꓣꓳ ꓡꓳꓸ ꓢꓴ ꓚꓱꓹ ꓔꓯ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓟꓸ ꓖꓶ ꓡˍ ꓟ ꓙꓳˍ ꓡꓳ= ꓬꓲ ꓡꓰ ꓔꓯ ꓥꓳꓽ ꓐꓯˍ ꓟ ꓠꓯꓸꓼ ꓗꓪ ꓦ ꓟꓲ ꓚꓱꓹ ꓟꓵꓽ ꓚꓱꓹ ꓟꓵꓽ ꓗꓪ ꓣꓳˍ ꓟ ꓬꓲꓼ ꓫꓵꓸ ꓢꓲꓹ ꓪꓰ ꓚꓱꓹ ꓕꓱ ꓡꓲꓳ ꓫꓵꓽ ꓢꓲꓹ ꓪꓰ ꓡꓳ ꓪꓰ ꓦ ꓥ ꓚꓱꓹ ꓔꓯ ꓡꓴ-ꓘ 12ꓽ 27 ꓗꓪ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓟꓵꓽ ꓪꓳꓼ ꓗꓪ ꓐꓱ ꓔꓬˍ ꓟ ꓠꓬꓹ ꓤꓽ ꓐꓴ ꓚꓱꓹ ꓖꓳ ꓟ ꓡꓰ ꓟꓽ ꓞꓲ ꓡꓴ-ꓘ 9ꓽ 58 ꓗꓪ ꓪꓴꓸ ꓓꓵꓽ ꓚꓱꓹ ꓕꓱ ꓡꓲꓳ ꓫꓵꓽ ꓔꓯꓸ ꓔꓯ ꓥꓳꓽ ꓐꓯ ꓟꓸ ꓖꓶ ꓡˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓚꓰꓼ ꓢꓴ ꓢꓲꓺ ꓒꓽ ꓥˍ ꓡꓳ= ꓚꓰꓼ ꓔ ꓟ ꓠꓯꓸꓼ ꓗꓪ ꓬꓲ ꓥˍ ꓟꓲ ꓐˍ ꓡꓳ= ꓬꓲ ꓡꓴ ꓐꓱ ꓗꓪ ꓬꓲ ꓡꓯꓼ ꓟꓰꓼ ꓓꓶꓽ ꓡˍ ꓟ ꓔꓯ ꓠꓽ ꓡꓰ ꓝꓲꓸ ꓟ ꓢꓲꓺ ꓡꓲ ꓐꓰ ꓗꓶ ꓡꓰ ꓝꓲˍ ꓟ ꓟ-ꓘꓳ 4ꓽ 35-41ꓹ ꓟ-ꓕꓲ 8ꓽ 22-25 ꓕꓱ ꓡꓲꓳ ꓫꓴꓽ ꓗꓪ ꓡꓳꓸ ꓟꓳ ꓪ ꓓˍ ꓡꓳ=

ꓖꓳ ꓟ ꓡꓰ ꓟꓽ ꓞꓲ ꓟ-ꓘꓳ 5ꓽ 48- 49 ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓬꓲ ꓙꓬ ꓕꓯꓽ ꓢꓲ ꓙ ꓫꓱˍ ꓟ ꓚꓱꓹ ꓟ-ꓕꓲ 14ꓽ 13- 21 ꓟ-ꓘꓳ 8ꓽ 1- 16 ꓡꓴ-ꓘ 9ꓽ 16- 17 ꓬꓳ-ꓦ 6ꓽ 1- 13 ꓗꓪ ꓠꓬ ꓜꓽ ꓪꓳ ꓡꓳꓸ ꓪꓳ ꓔꓯ ꓟꓬꓽ ꓡ ꓝꓲˍ ꓟ ꓑꓸ ꓑꓸ ꓔꓯ ꓟꓬꓽ ꓡ ꓝꓲˍ ꓟ ꓚꓱꓹ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓠ ꓢꓴ ꓒꓬꓽ ꓢꓴ ꓔꓯ ꓠ ꓫꓬꓹ ꓒꓬꓽ ꓫꓬꓹ ꓖꓶˍ ꓡꓳ= ꓬꓲ ꓠꓬ ꓠ ꓓꓴ ꓑꓻ ꓓꓴ ꓒꓬꓽ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓔꓯ ꓬꓰ ꓙ ꓔ ꓙˍ ꓡꓳ= ꓓ ꓡꓰ ꓝꓲˍ ꓡꓳ= ꓛꓵ ꓫꓳꓸ ꓡꓯꓽ ꓫꓳꓸ ꓔꓯ ꓠ ꓫꓬ ꓒꓻꓽ ꓫꓬ ꓖꓶˍ ꓡꓳ( ꓟ-ꓘ 3ꓽ 1-12) ꓗꓪ ꓕꓱ ꓡꓰ ꓐꓯ ꓔ ꓡꓳ= ꓡꓯꓽ ꓒꓯꓹ ꓕꓲꓽ ꓐꓽ ꓫꓵ ꓢꓴ ꓤꓽ ꓑꓸ ꓤꓼ ꓔꓯ ꓓ ꓡꓰ ꓝꓲˍ ꓟ ꓟ-ꓘꓳ 3ꓽ 1- 6 ꓗꓪ ꓮꓽ ꓟꓬꓹ ꓘꓳꓼ ꓓꓯꓽ ꓝꓲꓸ ꓘꓳꓸ ꓔꓬˍ ꓟ ꓤꓽ ꓟꓶꓼ ꓤꓼ ꓔꓯ ꓓ ꓡꓰ ꓝꓲˍ ꓟ ꓟ-ꓘꓳ 13ꓽ 10- 17ꓹ 38 ꓘꓳꓼ ꓗꓳ ꓓꓱꓽ ꓕꓲꓽ ꓐꓶꓽ ꓫꓵ ꓢꓴ ꓔꓯ ꓠ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓬꓳ-ꓦ 5ꓽ 1- 15ꓹ ꓛꓱꓽ ꓟꓳ ꓡ ꓕꓲꓽ ꓠꓬꓲ ꓗꓪ ꓚꓳˍ ꓡꓰ ꓟꓬ ꓢꓷꓽ ꓟꓽ ꓟꓳˍ ꓟ ꓬꓳ-ꓦ 9ꓽ 1- 14 ꓗꓪ ꓕꓱ ꓡꓰ ꓠ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓔꓯ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓡꓰ ꓠ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓠꓬ ꓞꓳ ꓤꓽ ꓔꓯ ꓢꓲ ꓚꓰ ꓢꓲ ꓫꓬꓹ ꓖꓶˍ ꓟ ꓟꓽ ꓥ=

ꓬꓲ ꓠꓬ ꓞꓳ ꓫꓵꓽ ꓘꓶˍ ꓟ ꓟꓽ ꓙꓳ ꓙꓵ ꓢꓴ ꓞꓳ ꓤꓽ ꓟꓽ ꓙꓵ ꓢꓴ ꓞꓳ ꓤꓽ ꓕꓱ ꓡꓰ ꓘꓶˍ ꓟ ꓥˍ ꓟꓲ ꓟꓽ ꓙꓳ꓾ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓕꓯ ꓢꓲ ꓛꓳꓽ ꓢꓲ ꓞꓳ ꓤꓽ ꓔꓯ ꓘꓶˍ ꓟ ꓥˍ ꓟꓲ ꓟꓽ ꓙꓳ= ꓦ ꓡꓱ ꓢꓴ ꓟꓽ ꓦ ꓡꓱ ꓢꓴ ꓙꓵ ꓠꓲꓹ ꓟꓽ ꓙꓳ ꓢꓴ ꓙꓳ ꓢꓴ ꓐꓶꓽ ꓞꓳ ꓔꓯ ꓥˍ ꓟꓲ ꓠꓲ ꓔꓯ ꓦ ꓡꓱ ꓔꓬ ꓢꓴ ꓔꓯ ꓥˍ ꓟꓲ ꓮꓽ ꓙꓵꓽ ꓔꓯ ꓬꓲ ꓠꓬ ꓠ ꓫꓬꓹ ꓒꓬꓽ ꓫꓬꓹ ꓖꓶˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓪꓴ-ꓢ ꓠꓬ ꓪꓴˍ ꓟ ꓫꓱꓸ ꓤꓼ ꓠꓲꓹ ꓙꓳ ꓢꓴ ꓪꓴ-ꓢ ꓥˍ ꓡꓳ ꓐꓯˍ ꓟ ꓔꓯ ꓢꓷꓸ ꓡꓰ ꓝꓲˍ ꓟ ꓠ ꓢꓴ ꓒꓬꓽ ꓢꓴ ꓔꓯ ꓠ ꓫꓬꓹ ꓒꓬꓽ ꓫꓬ ꓖꓶˍ ꓟ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ˍ ꓟ ꓞꓳ ꓤꓽ ꓠꓯꓸꓼ ꓗꓪ ꓟꓬꓽ ꓠꓬꓲ ꓪꓴꓽ ꓡ ꓟꓴ ꓡ ꓠˍ ꓟ ꓐꓱ ꓶ ꓓꓵꓽ ꓙ ꓢꓲ ꓬꓰˍ ꓟ ꓥ ꓪ= ꓢꓲꓺ ꓒꓽ ꓬꓰ-ꓢꓴ ꓡꓰ ꓟꓸ ꓟꓲ ꓚˍ ꓟ ꓠꓯꓸꓼ ꓗꓪ ꓬꓲ ꓠꓬ ꓬꓲ ꓙꓬ ꓡꓰ ꓐꓰ ꓞꓳ ꓤꓽ ꓔꓯ ꓢꓯꓸ ꓡꓰ ꓝꓲˍ ꓟ ꓬꓲ ꓢꓯꓸ ꓥˍ ꓡꓳ= ꓑꓸ ꓑꓸ ꓐꓰ ꓜꓽ ꓪꓳ ꓡꓳꓸ ꓪꓳ ꓡꓰ ꓐꓰ ꓢꓯꓼ ꓟꓬ ꓖꓶ ꓢꓴ ꓥˍ ꓡꓳ= ꓬꓲ ꓠꓬ ꓠꓬꓲ ꓟꓳ ꓓꓴ ꓥˍ ꓟꓲ ꓥˍ ꓡꓳ ꓐꓰ ꓬꓳ-ꓦ 4ꓽ 13- 14ꓹ ꓬꓳ-ꓦ 6ꓽ 48ꓹ ꓬꓳ-ꓦ 8ꓽ 12 ꓗꓪ ꓕꓱ ꓡꓰ ꓐꓳ ꓔ ꓡꓳ=

ꓢꓲꓺ ꓒꓽ ꓬꓰ-ꓢꓴ ꓠꓬ ꓙꓲˍ ꓟ ꓮꓸ ꓣꓳ ꓡꓳꓸ ꓒꓽ ꓥˍ ꓡꓳ ꓐꓯˍ ꓟ ꓔꓯ ꓟꓸ ꓖꓶ ꓗꓷꓳ= ꓬꓲ ꓠꓬ ꓞꓳ ꓤꓽ ꓮꓽ ꓙꓲꓽ ꓔꓯ ꓢꓯꓸ ꓟꓬ ꓟꓶ ꓠˍ ꓟ ꓐꓲ ꓜꓲˍ ꓟ ꓢꓯꓼ ꓟꓬ ꓔꓯ ꓘꓳꓹ ꓣꓴ ꓟꓶ ꓠˍ ꓟ ꓡˍ ꓟ ꓥˍ ꓡꓳ (ꓬꓳ-ꓦ 10ꓽ 10) ꓗꓪ ꓕꓱ ꓡꓰ ꓐꓯ ꓔ ꓡꓳ=