ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓜꓲ ꓔꓶ ꓚꓱꓹ (Water Spinach)

ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓜꓲ ꓐꓰ ꓗꓴꓸ ꓙꓲ ꓙꓳ ꓢꓲ꓾ ꓮ ꓡꓰ ꓕꓲ ꓟꓵꓽ ꓗꓪ ꓐꓰ ꓔꓶ ꓪꓴꓸ ꓔꓴ ꓩꓴ ꓡˍ ꓟ ꓔꓯ ꓟꓽ ꓐꓯ ꓔ ꓥˍ ꓟꓲ ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓡꓰ ꓟꓬ-ꓟ ꓗꓴꓷꓼ ꓗꓪ ꓔꓶ ꓩꓴ ꓡˍ ꓟ ꓥꓳ=

 

ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓘꓴꓽ ꓗꓪ ꓟꓬ-ꓟ ꓜꓲ ꓐꓰ ꓧꓶꓽ ꓜꓲ ꓐꓯ ꓢꓲ 2 ꓙꓰꓽ ꓙꓳˍ ꓥ= ꓟꓬ-ꓟ ꓟꓶꓽ ꓛꓲꓺ ꓔꓶꓸ ꓜꓲ ꓠꓬ ꓬꓲꓸ ꓒꓬꓽ ꓐꓰ ꓬꓲ ꓜꓲ ꓣꓳ ꓢꓲ꓾ ꓬꓲ ꓜꓲˍ ꓟꓲ ꓗꓳꓹ ꓡꓳ=

 

ꓧꓶꓽ ꓟꓶꓽ ꓛꓲꓺ ꓔꓶꓸ ꓜꓲ ꓠꓬ ꓬꓲ ꓒꓬꓽ ꓐꓰ ꓬꓲ ꓜꓲ ꓪꓴꓽ ꓢꓲ ꓠꓴꓽ ꓠꓴꓽ ꓡꓰꓽ ꓗˍ ꓡꓳ=

ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓜꓲ ꓔꓯ ꓟꓬ-ꓟ ꓗꓴꓷꓼ ꓡꓱꓻ ꓟꓵꓽ ꓗꓪ ꓮꓽ ꓟꓬꓹ ꓔꓶˍ ꓡꓳ= Asia ꓟꓵꓽ ꓗꓪ ꓡꓰꓽ ꓜ ꓢꓴ ꓟꓬꓽˍ ꓟ ꓪꓴꓸ ꓠꓬꓲ Asia ꓗꓴꓷꓼ ꓐꓴ ꓗꓪ ꓔꓶˍ ꓟ ꓥꓳ=

ꓬꓲꓻ ꓙꓬ ꓢꓯꓼ ꓮ ꓟꓬꓹ ꓧꓳꓽˍ ꓟ꓾ ꓠꓵˍ ꓟ ꓬꓲ ꓜꓲ ꓥ ꓟ ꓪꓴꓸ ꓠꓬꓲ ꓟꓶꓽ ꓦ ꓦ ꓟꓬꓽˍ ꓟ ꓟꓵꓽ ꓗꓪ ꓪ ꓙꓲ ꓔꓶˍ ꓟ ꓥꓳ= ꓙꓬꓻ ꓢꓯꓼ ꓟꓬꓽ ꓟ ꓪ ꓚꓲꓺ ꓟꓵꓽ ꓙꓬꓻ ꓝꓲ ꓗꓪ ꓠꓬ ꓔꓶ ꓒꓬꓱꓼ ꓡ ꓟꓽ ꓓ=

ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓔꓶ ꓓꓴ ꓙ ꓖꓶꓼˍ ꓕꓯ ꓠꓱꓸ ꓐꓯꓼ ꓪꓳꓽ ꓒꓬꓽ ꓜꓲ ꓡꓰ ꓐꓰ ꓬꓲ ꓟꓲ ꓘꓪꓺ ꓢꓲ ꓙ ꓖꓶꓼ ꓠ ꓔ ꓡꓳ= ꓬꓲ ꓟꓲ ꓫꓬꓹ ꓓꓳ ꓡꓰ ꓠꓬ ꓮꓸ ꓠꓬꓲꓽ ꓛꓲꓽ ꓧꓳꓽ ꓖꓶ ꓠꓯꓹ ꓡꓳ= ꓔꓶ ꓢꓲ ꓶꓻ ꓡꓯꓼ ꓬꓰ ꓓꓴ ꓐꓱ ꓶ ꓙꓽ ꓖꓶꓼˍ ꓠꓬ ꓟꓽ ꓔꓶ ꓧꓶꓸ ꓕꓯꓼ 2 ꓠꓬꓲ ꓛꓲꓺ ꓕꓯ꓾ 1 acre ꓗꓪ urea ꓩꓲꓸ ꓛꓲꓻ (112 lb) phosphate 56 lb ꓧꓳꓽ ꓖꓶ ꓠꓯˍ ꓡꓳ= ꓔꓶ ꓗꓷ ꓢꓲ ꓦ ꓐ ꓕꓲ ꓟ ꓙꓳ ꓡˍ ꓠꓬ ꓝꓮꓲ urea ꓩꓲꓸ ꓛꓲꓻ (112 lb) ꓧꓳꓽ ꓖꓶ ꓠ ꓔ ꓡꓳ=

ꓔꓶˍ ꓕꓯ ꓬꓲ ꓜꓲ ꓔꓯ ꓓꓶꓻ ꓗꓷ ꓢꓲ ꓔꓶˍ ꓠꓬ ꓪ ꓙꓲ ꓙꓲˍ ꓡꓳ= ꓬꓲ ꓜꓲ ꓕꓲ ꓜꓲ ꓗꓪ ꓬꓲ ꓝꓲ 4 ꓝꓲ ꓟꓽ ꓞꓲꓺ ꓙꓳˍ ꓟ ꓬꓲ ꓜꓲ ꓔꓯ 8”-10” ꓛꓲꓺ ꓓꓶꓻ ꓗꓷ ꓢꓲ ꓬꓲ ꓟꓲ ꓗꓪ ꓕꓲ ꓝꓳꓹ ꓗꓪ 2 ꓜꓲ 3 ꓜꓲ ꓛꓲꓺ ꓔꓶ ꓗꓷ= ꓜ ꓔꓶˍ ꓟ ꓕꓲ ꓡꓰꓹ ꓣꓳꓽ ꓡꓯꓼ ꓠꓬꓲ ꓐꓰ ꓧꓶꓸ ꓕꓯ ꓬꓲ ꓟꓲ ꓗꓪ ꓗꓸ ꓧꓳꓽ ꓗꓷ ꓢꓲ ꓬꓲ ꓜꓲ ꓔꓶ ꓠꓯꓹ ꓡꓳ= ꓕꓲ ꓚꓬꓸ ꓐꓰ ꓕꓲ ꓚꓬꓸ ꓠꓬꓲꓽ ꓗꓴꓸ ꓚꓸꓼ ꓗꓪ 1’ ꓛꓲ ꓗꓷꓹ ꓶꓽ ꓗꓷ ꓢꓲ ꓠꓬꓲ꓾ ꓬꓲꓸ ꓚꓬꓸ ꓘꓴꓽ ꓗꓪ ꓕꓲ ꓜꓲ ꓐꓰ ꓕꓲ ꓜꓲ 10” ꓛꓲꓺ ꓶꓽ ꓢꓲ ꓔꓶ ꓠꓯˍ ꓡꓳ=

ꓬꓲ ꓜꓲ ꓔꓶ ꓗꓷ ꓠꓬ ꓬꓲ ꓜꓲ 3” ꓗꓪ ꓛꓲꓺ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓜꓲ ꓪꓴꓽ ꓡ ꓕꓯ ꓬꓲ ꓟꓲ ꓗꓪ ꓬꓲꓻ ꓙꓬ 3” ꓗꓪ ꓐꓰ 6” ꓗꓪ ꓛꓲꓺ ꓬꓲꓻ ꓙꓬ ꓧꓳꓽ ꓔ ꓠꓯꓹ ꓥ= ꓛꓺ ꓝꓲ ꓮ ꓘꓶꓸ ꓛˍ ꓕꓯ ꓬꓲ ꓟꓲ ꓗꓪ ꓟ ꓬꓲꓻ ꓙꓬ ꓡꓱꓻ ꓡ ꓢꓲ ꓬꓲ ꓜꓲ ꓔꓯ ꓫꓵꓻ ꓝꓲˍ ꓟ ꓪꓴꓸ ꓠꓬꓲ ꓕꓲ ꓠꓽ ꓕꓲ ꓧꓪꓹ ꓬꓲꓻ ꓙꓬ ꓡꓶꓸ ꓖꓶ ꓠ ꓗꓹ ꓡꓳ=

ꓔꓶ ꓗꓷ ꓗꓸ ꓠꓯꓸ 20-30 ꓠꓬꓲ ꓛꓲꓺ ꓕꓯ ꓬꓲ ꓟꓲ ꓗꓪ ꓟꓳꓼ ꓣꓱꓻ ꓡˍ ꓠꓬ ꓮ ꓙꓵꓽ ꓚꓵꓹ ꓦ ꓖꓶ ꓠ ꓔ ꓥ= ꓗ ꓠꓯꓸ ꓠꓬ ꓩꓲꓸ ꓛꓲꓻ ꓧꓳꓽ ꓖꓶ ꓠꓯꓹ ꓡꓳ=

ꓶꓼ ꓫ ꓝꓲ ꓛꓲꓺ ꓡ ꓢꓲ ꓬꓲ ꓜꓲ ꓶꓼˍ ꓕꓯ ꓬꓲ ꓟꓲ ꓗꓪ ꓟ ꓬꓲꓻ ꓙꓬ ꓐꓴ ꓔꓯ 5” ꓗꓪ ꓛꓲ ꓫꓱꓺ ꓦ ꓗꓷ ꓢꓲ ꓬꓲ ꓜꓲ ꓶꓼ ꓠ ꓔ ꓡꓳ= ꓶꓼ ꓗꓷ ꓢꓲ ꓤꓰꓻ ꓞꓹ ꓟ ꓬꓲ ꓜꓲ ꓟꓶꓸ ꓓꓴꓽ ꓔꓯ ꓬꓲꓻ ꓙꓬ ꓕꓯꓽ ꓢꓲ 2”-3” ꓛꓲꓺ ꓟꓳ ꓓ ꓠ ꓬꓰ ꓖꓶ ꓠꓯꓹ ꓡꓳ=ꓖꓳ ꓡꓱ ꓢꓲ ꓡꓰ ꓤꓰꓻ ꓞꓹ ꓟ ꓬꓲ ꓜꓲ ꓟꓶꓸ ꓓꓴꓽ ꓗꓪ ꓐꓰ ꓝꓮꓲ ꓕꓲ ꓧꓪꓹ ꓬꓲꓸ ꓪꓳꓸ ꓠꓳ ꓠꓱꓽ ꓡ ꓠꓹ ꓟ ꓥꓳ=

ꓬꓲꓻ ꓙꓬ ꓟꓶꓽ ꓛꓲꓺ ꓔꓶꓸ ꓜꓲ ꓠꓬ ꓔꓶ ꓗꓷ ꓢꓲ (60-120) ꓠꓬꓲ ꓛꓲꓺ ꓗꓷ ꓡꓰˍ ꓠꓬ ꓶꓼ ꓫ ꓓꓹ ꓟ ꓥꓳ= ꓟꓶꓽ ꓦ ꓦ ꓝꓲ ꓕꓯ ꓮ ꓘꓶꓸ ꓔꓶ ꓒꓬꓱꓼ ꓡˍ ꓟ ꓥ ꓢꓲ꓾ꓕꓲ acre ꓗꓪ (500-1000) ꓕꓱꓻ ꓟꓶˍ ꓟ ꓥꓳ=

ꓕꓱ ꓗꓪ ꓢꓷꓸ ꓔ ꓓꓴ ꓠꓬ꓾

ꓬꓲ ꓜꓲ ꓔꓶˍ ꓕꓯ ꓕꓲ ꓜꓲ ꓡꓱꓸꓼ ꓬꓲꓻ ꓙꓬ ꓟꓶꓸ ꓡꓰ ꓠ ꓔꓶ ꓟꓽ ꓓ= ꓬꓲꓻ ꓙꓬ ꓟꓶꓸ ꓡꓰˍ ꓕꓯ ꓠꓽ ꓬꓲ ꓜꓲ ꓮ ꓙꓵꓽ ꓫꓵꓻˍ ꓥꓳ=

ꓬꓲꓻ ꓙꓬ ꓟꓶꓽ ꓛꓲꓺ ꓔꓶ ꓜꓲ ꓠꓬ ꓬꓲꓻ ꓙꓬ ꓢꓯꓼ ꓮꓽ ꓟꓬꓹ ꓧꓳˍ ꓟ꓾ ꓠꓵˍ ꓟ ꓬꓲ ꓜꓲ ꓥ ꓟ ꓪꓴꓸ ꓠꓬꓲ ꓬꓲ ꓙꓬ ꓮ ꓕꓯˍ ꓟꓲ ꓧꓳꓽ ꓖꓶ ꓠ ꓗꓹ ꓡꓳ=

Add new comment

7 + 5 =