ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓙꓲꓻ ꓖꓴ ꓙꓳˍ ꓟ

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓠꓬ ꓣꓳ ꓟꓬ-ꓟ ꓗꓴꓷꓼ ꓗꓪ ꓮꓽ ꓟˍ ꓟꓲ ꓜꓽ ꓐ ꓡˍ ꓟ꓾ ꓪꓴꓻ ꓜꓽ ꓐ ꓡˍ ꓟ꓾ ꓢ ꓢˍ ꓪ ꓓꓹ ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥꓳ=

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓗꓪ ꓞꓳ ꓤ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓥ ꓡꓳ= Vitamin A꓾ Vitamin B1꓾ Vitamin K꓾ Protein꓾ Calcium꓾ Phosphorus꓾ Iron꓾ Carotene꓾ Sodium ꓕꓱ ꓡꓱ ꓫꓵꓽ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓬꓽ ꓠꓬꓲ ꓙꓲꓻ ꓖꓴ ꓖꓶˍ ꓟ ꓥ ꓡꓳ=

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓕꓲ ꓗꓶꓸ ꓗꓪ ꓐꓰ ꓟꓶˍ ꓟ ꓢꓯꓼ ꓐꓴ ꓠꓬ꓾

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓜꓽˍ ꓟ ꓗꓪ ꓐꓰ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓞꓰꓻ ꓡꓰ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓝꓱ ꓡꓰ ꓠˍ ꓟꓲ ꓬꓰ ꓙ ꓖꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓔꓯ ꓡꓱ ꓢꓲ ꓜꓽ ꓖꓶˍ ꓕꓯ Triglycoside ꓡꓰ ꓐꓰ ꓟꓽ ꓙꓲꓻ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓠꓲꓸ ꓡꓰ ꓝꓲˍ ꓡꓳ=

ꓫꓵꓽ ꓒꓬꓸ ꓐꓱ ꓶˍ ꓟꓲ ꓙꓲꓻˍ ꓟ ꓥ ꓡꓳ= ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓗꓪ ꓙꓳˍ ꓟ ꓮꓠꓔꓲꓳꓫꓲꓓꓮꓠꓔꓢ ꓢꓯꓼ ꓐꓴ ꓠꓬ ꓫꓵꓽ ꓒꓬꓸ ꓔꓯ ꓓꓳꓼ ꓐꓴ ꓫꓬ ꓡꓰ ꓠꓹ ꓟ ꓐꓰ ꓫꓵꓽ ꓒꓬꓸ ꓐꓰ ꓗꓴꓸ ꓙꓲ ꓙꓳˍ ꓟ ꓠꓻ ꓐꓴ ꓔꓯ ꓫꓬꓹ ꓟ ꓗꓪ ꓬꓰ ꓙ ꓖꓶˍ ꓡꓳ=

ꓫꓵꓽ ꓢꓯꓼ ꓠꓲꓸˍ ꓟ ꓔꓯ ꓗꓽ ꓔꓸ ꓙ ꓖꓶ ꓐ ꓡˍ ꓡꓳ= ꓲꓣꓳꓠ ꓢꓯꓼ ꓒ ꓐꓲ ꓟꓶˍ ꓕꓯ ꓠꓽ ꓫꓵꓽ ꓢꓯꓼ ꓠꓲꓸˍ ꓟ ꓠꓻ ꓟꓽ ꓒꓬꓱꓼ ꓟ ꓥ ꓡꓳ= ꓤ ꓟꓶ ꓤ ꓐꓴ ꓤ ꓠꓱ ꓶꓻ ꓔꓬ ꓕꓯ ꓠꓬ ꓲꓣꓳꓠ ꓢꓯꓼ ꓟꓬꓽ ꓠꓬꓲ ꓣꓱꓽ ꓞꓹ ꓟ ꓥ ꓡꓳ= ꓲꓣꓳꓠ ꓢꓯꓼ ꓐꓲ ꓓꓹ ꓕꓯ ꓠꓬ ꓫꓵꓽ ꓚꓰꓡꓡ ꓐꓴ ꓒꓬꓱꓼ ꓡˍ ꓟ ꓔꓯ ꓢꓯꓼ ꓖꓶ ꓢꓲ ꓫꓵꓽ ꓢꓯꓼ ꓪꓽ ꓠꓬꓲ ꓡ ꓝꓲˍ ꓡꓳ= ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓐꓴ ꓠꓬ ꓫꓵꓽ ꓢꓯꓼ ꓠꓲꓸ ꓢꓴ ꓐꓱ ꓶ ꓮ ꓘꓶꓸ ꓙꓲˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ=

ꓜꓽ ꓓꓴ ꓙꓲꓺ ꓢ ꓡꓰ ꓝꓲˍ ꓡꓳ=

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓗꓪ ꓙꓳˍ ꓟ ꓝꓲꓐꓰꓣ ꓢꓯꓼ ꓠꓬ ꓦꓰꓼ ꓟ ꓙꓲˍ ꓟ ꓔꓯ ꓢ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓬꓲ ꓪꓴꓻ ꓚꓱꓹ ꓗꓪ ꓘꓶꓻ ꓡꓶ ꓓꓴ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓜꓽˍ ꓟ ꓗꓪ ꓐꓰ ꓟꓬ ꓢꓶꓽ ꓢꓯꓼ ꓙꓳ ꓡ ꓝꓲˍ ꓡꓳ= ꓬꓲꓻ ꓙꓬ ꓟꓶ ꓛꓲ ꓔꓶꓸ ꓗꓪ ꓟꓬ ꓢꓶꓽ ꓔꓬ ꓢ ꓓꓴ ꓐꓱ ꓶ ꓟꓬꓽ ꓠꓬꓲ ꓣꓱꓽ ꓞꓹ ꓟ Vitamin ꓮ ꓐꓰ Lutein ꓢꓯꓼ ꓐꓴ ꓙꓳˍ ꓟ ꓑꓶꓸ ꓓꓴ ꓟꓬ ꓢꓶꓽ ꓐꓱ ꓶ ꓮ ꓘꓶꓸ ꓙꓲˍ ꓟ ꓜꓽ ꓓꓴˍ ꓟꓲ ꓥ ꓡꓳ=

ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ= ꓬꓲꓻ ꓙꓬ ꓟꓶ ꓛꓲ ꓔꓶ ꓗꓪ Vitamin ꓚ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓮ ꓟꓬꓹ ꓙꓳ ꓡ ꓝꓲˍ ꓡꓳ= ꓬꓲꓻ ꓙꓬ ꓟꓶꓽ ꓛꓲ ꓔꓶꓸ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓓꓵˍ ꓟ Free Radicals ꓐꓴ ꓔꓯ ꓠꓲꓸ ꓡꓰ ꓝꓲˍ ꓟ Antioxidants ꓢꓯꓼ ꓐꓰ Minerals ꓢꓯꓼ ꓑꓶꓸ ꓓꓴ ꓢꓯꓼ ꓙꓳ ꓡ ꓠꓹ ꓟ ꓬꓰ ꓙ ꓖꓶˍ ꓟ ꓥ ꓡꓳ=

ꓠꓲꓹ ꓟ ꓔꓯ ꓔꓬ ꓢ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓟꓶ ꓛꓲ ꓔꓶꓸ ꓠꓬ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓠꓲꓸ ꓡꓰ ꓝꓲˍ ꓟ ꓑꓶꓸ ꓓꓴ ꓫꓵꓽ ꓙꓴꓽ ꓛꓵꓽ ꓡꓰˍ ꓟ ꓟꓽ ꓒꓬꓱꓼ ꓡ ꓝꓲ ꓠꓬꓲ ꓠꓲꓹ ꓟ ꓐꓱ ꓶ ꓙꓲˍ ꓟ ꓥ ꓡꓳ=

ꓝꓮꓲ ꓠꓬ ꓤꓲꓽ ꓐꓰ ꓪꓳꓽ ꓓꓲꓻ ꓔꓬ ꓢ ꓓꓴ ꓐꓱ ꓶˍ ꓟꓲ ꓙꓲꓻ ꓖꓴ ꓖꓶˍ ꓟ ꓥ ꓡꓳ= ꓪꓳꓽ ꓓꓲꓻ ꓔꓬꓹ ꓟꓽ ꓢ ꓟ ꓑꓶꓸ ꓓꓴ ꓤꓲ ꓫꓵ ꓫꓵˍ ꓟ ꓗꓪ ꓟꓽ ꓢ ꓟ ꓙꓳˍ ꓕꓯˍ ꓟꓲ ꓬꓲꓻ ꓙꓬ ꓟꓶ ꓛꓲ ꓔꓶꓸ ꓜꓽˍ ꓕꓯ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓬꓲꓻ ꓙꓬ ꓟꓶ ꓛꓲ ꓔꓶꓸ ꓗꓪ ꓬꓲꓻ ꓙꓬ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓪꓳꓽ ꓓꓲꓻ ꓟꓬꓱꓽ ꓬꓰˍ ꓟ ꓔꓯ ꓢꓯꓼ ꓙꓳ ꓙꓳ ꓡꓰꓽ ꓬꓰ ꓐ ꓡ ꓠ ꓬꓰ ꓙ ꓖꓶˍ ꓡꓳ=

ꓝꓮꓲ ꓬꓲꓻ ꓙꓬ ꓟꓶ ꓛꓲ ꓔꓶꓸ ꓠꓬ ꓧꓪꓽ ꓗꓴꓹ ꓙꓲ ꓐꓱ ꓶˍ ꓟꓲ ꓮ ꓘꓶꓸ ꓙꓲˍ ꓟ ꓥ ꓡꓳ= ꓬꓲꓻ ꓙꓬ ꓟꓶ ꓛꓲ ꓔꓶꓸ ꓗꓪ ꓙꓳˍ ꓟ ꓢꓯꓼ ꓐꓴ ꓠꓬ ꓧꓪꓽ ꓗꓴꓹ ꓙꓲ ꓚꓰꓡꓡ ꓐꓴ ꓬꓲ ꓫꓵꓼ ꓒꓬꓱꓼ ꓡ ꓠꓹ ꓟ ꓬꓰ  ꓙ ꓖꓶˍ ꓡꓳ=

ꓝꓮꓲ ꓠꓬ ꓦꓰꓽ ꓛꓲꓽ ꓘꓶꓽ ꓔ ꓢꓴ ꓐꓴ꓾ ꓖꓳ ꓓꓱꓽ ꓗꓪ ꓠꓻ ꓫꓬꓹ ꓕꓯ ꓘꓶꓽ ꓔ ꓪ ꓢꓴ ꓐꓴˍ ꓟꓲ ꓘꓶꓽ ꓔ ꓟ ꓬꓲ ꓑ ꓞꓽ ꓞꓽ ꓓꓻ ꓡꓰ ꓠꓹ ꓟ ꓐꓱ ꓶ ꓬꓲꓻ ꓙꓬ ꓟꓶ ꓛꓲ ꓔꓶꓸ ꓜꓽ ꓖꓶ ꓠꓯꓹ ꓡꓳ꓾ ꓐꓰ ꓢꓷꓸ ꓪ ꓡꓳ=