ꓬꓲꓻ ꓙꓬ ꓪꓳꓽ ꓒꓲ ꓙꓲꓻ ꓖꓴ ꓙꓳˍ ꓟ

ꓬꓲꓻ ꓙꓬ ꓪꓳꓽ ꓒꓲ ꓐꓰ ꓐꓯ ꓗꓷ ꓕꓯ ꓠꓬ ꓟꓬꓽ ꓠꓬꓲ ꓠꓬ ꓖꓳ ꓟꓬ ꓟꓽ ꓢꓷꓸ ꓟꓽ ꓑ ꓙ ꓠꓬꓲ ꓟ ꓥ ꓡꓳ= ꓪꓳꓽ ꓒꓲ ꓐꓯ ꓟ ꓔꓯ ꓢꓷꓸ ꓔ ꓥ ꓟꓲ ꓬꓲꓻ ꓙꓬ ꓪꓳꓽ ꓒꓲ ꓔꓯ ꓠꓬ ꓢꓷꓸ ꓢꓴ ꓠꓲꓸˍ ꓥꓳ= ꓕꓱ ꓟ ꓠꓬ ꓣꓳ ꓟꓬ-ꓟ ꓗꓴꓷꓼ ꓮ ꓟꓬꓹ ꓖꓻ ꓗꓪ ꓟꓽ ꓙꓳ ꓟ ꓑꓶꓸ ꓓꓴ ꓥ ꓡꓳ= ꓖꓳ ꓡꓱ ꓥ ꓟꓲ ꓟ-ꓓ-ꓡꓲ ꓟꓵꓽ ꓫꓴ꓾ ꓟꓴ-ꓖꓴ ꓡꓳ ꓒꓱ ꓗꓪ ꓠꓬ ꓬꓲꓻ ꓙꓬ ꓪꓳꓽ ꓒꓲ ꓔꓯ ꓮ ꓟꓬꓹ ꓔꓶꓺ ꓢꓲ ꓜꓽ ꓔꓬ ꓟ ꓥ ꓡꓳ=

ꓬꓲꓻ ꓙꓬ ꓪꓳꓽ ꓒꓲ ꓐꓯ ꓟ ꓠꓬ ꓟꓲꓠꓰꓣꓮꓡꓢ ꓢꓯꓼ ꓮ ꓟꓬꓹ ꓙꓳˍ ꓟ ꓠꓲꓹ ꓛꓵꓼˍ ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥ ꓡꓳ= ꓮꓢꓲꓮ ꓐꓰ ꓰꓴꓣꓳꓑꓰ ꓐꓴ ꓗꓪ ꓔꓶꓺ ꓔꓬ ꓟ ꓥ ꓡꓳ= ꓰꓴꓣꓳꓑꓰ ꓪꓳꓽ ꓒꓬ ꓐꓴ ꓗꓪ ꓮ ꓟꓬꓹ ꓟꓳꓻ ꓪˍ ꓟ ꓥ ꓡꓳ=

ꓬꓲꓸ ꓒꓬꓽ ꓠꓬ ꓡꓴꓸ ꓡꓴꓸ ꓤ ꓗꓹ ꓢꓲ ꓬꓲ ꓜꓲ ꓠꓬ ꓛꓱꓼ ꓛꓱꓼ ꓗꓹ ꓟ ꓥ ꓡꓳ= ꓬꓲ ꓜꓲ ꓗꓪ ꓟ ꓠꓲꓹ ꓛꓵꓼˍ ꓟ ꓠꓬ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡ ꓠ ꓬꓰ ꓖꓶˍ ꓟ ꓥ ꓡꓳ= ꓬꓲ ꓒꓬꓽ ꓠꓬ ꓡꓴꓸ ꓢꓲ ꓣꓳˍ ꓥ ꓟꓲ ꓬꓲ ꓒꓬꓽ ꓖꓳ ꓟ ꓗꓪ ꓦꓲꓔꓮꓟꓲꓠ ꓢꓯꓼ꓾ ꓟꓲꓠꓰꓣꓮꓡꓢ ꓢꓯꓼ꓾ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓐꓴ ꓮ ꓟꓬꓹ ꓙꓳ ꓔꓬ ꓟ ꓥꓳ=

ꓬꓲꓻ ꓙꓬ ꓪꓳꓽ ꓒꓲ ꓘꓴꓽ ꓗꓪ ꓮ ꓡꓲ ꓡꓴ ꓫꓵꓽ ꓢꓯꓼ ꓓꓯꓹ ꓟ ꓥ ꓡ ꓐꓯ ꓕꓯ ꓦꓲꓔꓮꓟꓲꓠ ꓮ꓾ ꓦꓲꓔꓮꓟꓲꓠ ꓐ12꓾ ꓦꓲꓔꓮꓟꓲꓠ ꓐ6꓾ ꓦꓲꓔꓮꓟꓲꓠ ꓗ꓾ ꓲꓣꓳꓠ ꓢꓯꓼ꓾ ꓟꓮꓖꓠꓰꓢꓲꓴꓟ꓾ ꓚꓮꓡꓚꓲꓴꓟ꓾ ꓑꓧꓳꓢꓑꓧꓮꓔꓰ ꓐꓴ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓚꓮꓡꓳꓣꓲꓰꓢ ꓥ ꓟꓲ ꓮ ꓟꓬꓹ ꓟꓽ ꓓꓵˍ ꓟ ꓑꓶꓸ ꓓꓴ ꓒꓸ ꓡ ꓘꓪꓽ ꓡ ꓠꓲꓹ ꓟꓽ ꓫꓵ ꓢꓴ ꓐꓱ ꓶˍ ꓟꓲ ꓙꓲꓻ ꓓꓰ ꓡꓰˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ=

ꓬꓲꓻ ꓙꓬ ꓪꓳꓽ ꓒꓲ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓕꓱ ꓡꓱ ꓙꓲꓻ ꓖꓴ ꓖꓶˍ ꓟ ꓥ ꓡꓳ=

1. ꓚꓮꓠꓚꓰꓣ ꓠꓻ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓬꓲꓻ ꓙꓬ ꓪꓳꓽ ꓒꓲ ꓠꓬ ꓚꓮꓠꓚꓰꓣ ꓠꓻ ꓔꓯ ꓗꓽ ꓕꓸ ꓓꓴ ꓐꓱ ꓶ ꓬꓰ ꓙ ꓖꓶˍ ꓟ ꓥ ꓡꓳ= ꓓꓠꓮ ꓐꓬ ꓡꓰˍ ꓟ ꓑꓶꓸ ꓓꓴ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲˍ ꓡꓳ= ꓪꓳꓽ ꓒꓬ ꓪꓰꓻ ꓠꓲꓹ ꓛꓵꓼˍ ꓡꓰ ꓐꓰ ꓚꓮꓠꓚꓰꓣ ꓠꓻ ꓔꓯ ꓠꓲꓸ ꓡꓰ ꓝꓲˍ ꓟ ꓥ ꓡꓳ= ꓮ ꓚꓵꓹ ꓚꓮꓠꓚꓰꓣ꓾ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓟꓽ ꓒꓬꓱꓼ ꓡ ꓠꓹ ꓟ ꓜꓽ ꓐ ꓡˍ ꓟ ꓥ ꓡꓳ=
2.  ꓠꓲꓹ ꓟ ꓔꓯ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓪꓳꓽ ꓒꓲ ꓠꓬ ꓫꓵꓽ ꓘꓴ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓬꓯꓼ ꓡꓰ꓾ ꓞꓰꓻ ꓡꓰ ꓝꓲ ꓢꓲ ꓠꓲꓹ ꓟ ꓫꓵꓽ ꓙꓴꓽ ꓐꓴ ꓔꓯ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓠꓲꓹ ꓛꓵꓼˍ ꓟ ꓪꓳꓽ ꓒꓬꓽ ꓐꓴ ꓠꓬ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓬꓯꓼ ꓡꓰ ꓝꓲ ꓢꓲ ꓠꓲꓹ ꓟ ꓫꓵꓽ ꓙꓴꓽ ꓣꓳˍ ꓟ ꓔꓯ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶˍ ꓟ ꓥ ꓡꓳ= ꓠꓲꓔꓣꓮꓔꓰ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓫꓵꓽ ꓢꓯꓼ ꓔꓯ ꓥ ꓟꓲ ꓔꓲ ꓟꓴꓺˍ ꓗꓷ ꓡꓰ ꓝꓲˍ ꓡꓳ=
3.  ꓪꓳꓽ ꓔꓳ ꓔꓯ ꓥ ꓟꓲ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓪꓳꓽ ꓒꓲ ꓗꓪ ꓚꓮꓡꓚꓲꓴꓟ ꓢꓯꓼ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓪꓳꓽ ꓔꓳ ꓪꓴꓽ ꓡˍ ꓟ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ= ꓚꓮꓡꓚꓲꓴꓟ ꓠꓬ ꓪꓳꓽ ꓔꓳ ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ ꓪꓳ ꓔꓳ ꓔꓯ ꓕꓶꓺ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓪꓳꓽ ꓒꓲ ꓗꓪ ꓝꓳꓡꓲꓚ ꓮꓚꓲꓓ ꓢꓯꓼ ꓙꓳˍ ꓟ ꓑꓶꓸ ꓓꓴ ꓤ ꓟꓶ ꓤ ꓐꓴ ꓔꓯ ꓞꓲꓼ ꓟꓳꓽ ꓡ ꓟ ꓑꓶꓸ ꓓꓴ ꓪꓳꓽ ꓔꓳ ꓟꓽ ꓪꓴꓽ ꓡ ꓠꓹ ꓟˍ ꓟꓲ ꓬꓰ ꓙ ꓖꓶˍ ꓡꓳ=
4.  ꓪꓴꓸ ꓠꓶꓸ ꓔꓯ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓪꓳꓽ ꓒꓲ ꓗꓪ ꓲꓢꓳꓔꓧꓲꓳꓚꓬꓮꓠꓮꓔꓰꓢ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓪꓴꓸ ꓠꓶꓸ ꓔꓯ ꓔꓬꓹ ꓢꓻ ꓡꓰ ꓠꓹ ꓟ ꓐꓱ ꓶ ꓬꓰ ꓙ ꓖꓶˍ ꓡꓳ=
5.  ꓧꓪꓽ ꓖꓳ ꓓꓱꓽ ꓢꓯꓼ ꓔꓯ ꓟꓲ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓦꓲꓔꓮꓟꓲꓟ ꓚ ꓮ ꓟꓬꓹ ꓓꓹˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓪꓧꓲꓔꓰ ꓐꓡꓳꓳꓓ ꓚꓰꓡꓡꓢ ꓐꓴ ꓔꓯ ꓟꓬꓽ ꓡ ꓝꓲ ꓢꓲ ꓠꓻ ꓐꓴ ꓔꓯ ꓖꓼ ꓓꓳ ꓗꓷ ꓠꓹ ꓟ ꓬꓰ ꓙ ꓖꓶˍ ꓡꓳ= ꓙꓬꓻ ꓓꓵꓽ ꓡꓰ ꓢꓲ ꓠꓻ ꓡˍ ꓟ ꓟꓽ ꓒꓬꓱꓼ ꓡ ꓠꓹˍ ꓟꓲ ꓟꓬꓽ ꓠꓬꓲ ꓬꓰ ꓙ ꓖꓶ ꓐ ꓡˍ ꓡꓳ=
6. ꓣꓰꓓ ꓐꓡꓳꓳꓓ ꓚꓰꓡꓡꓢ ꓟꓽ ꓐꓬ ꓡꓰ ꓠꓹ ꓟˍ ꓟꓲ ꓬꓰ ꓙ ꓖꓶˍ ꓡꓳ= ꓦꓮꓔꓲꓟꓲꓠ ꓚ ꓐꓰ ꓦꓲꓔꓮꓟꓲꓠ ꓰ ꓐꓴ ꓙꓳˍ ꓟ ꓑꓶꓸ ꓓꓴ ꓣꓰꓓ ꓐꓡꓳꓳꓓ ꓚꓰꓡꓡꓢ ꓐꓴ ꓟꓽ ꓐꓬ ꓡꓰ ꓠ ꓬꓰ ꓙ ꓖꓶˍ ꓟ ꓥ ꓡꓳ= ꓫꓵꓽ ꓢꓯꓼ ꓠꓲꓸˍ ꓟ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓙ ꓖꓶˍ ꓟ ꓥ ꓡꓳ=
7. ꓟꓬ ꓢꓶꓽ ꓠꓬꓲ ꓟꓳꓻ ꓢꓴ ꓢꓯꓼ ꓔꓯ ꓥ ꓟꓲ ꓡꓴꓽ ꓖꓶˍ ꓟ ꓥ ꓡꓳ= ꓦꓲꓔꓮꓟꓲꓠ ꓚ ꓙꓳˍ ꓟ ꓑꓶꓸ ꓓꓴ ꓟꓬꓺ ꓢꓶꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓕꓲ ꓙꓰꓽ ꓟꓽ ꓒꓬꓱꓼ ꓡ ꓠꓹ ꓟ ꓐꓱ ꓶˍ ꓟꓲ ꓬꓲꓻ ꓙꓬ ꓪꓳꓽ ꓒꓲ ꓔꓯ ꓜꓽ ꓖꓶ ꓠꓯꓹ ꓟ ꓥ ꓡꓳ= ꓟꓬꓺ ꓢꓶꓽ ꓔꓯ ꓫꓬꓽ ꓫꓬꓽ ꓡꓰꓽ ꓟꓳꓻ ꓡ ꓝꓲ ꓢꓲ ꓟꓬꓺ ꓢꓶꓽ ꓢꓯꓼ ꓪꓽ ꓠꓬꓲ ꓠꓹ ꓟ ꓐꓱ ꓶ ꓬꓰ ꓙ ꓖꓶˍ ꓡꓳ=