ꓬꓳꓸ-ꓑ-ꓓꓰ (ꓠꓬꓼ-ꓡꓯꓼ-ꓢꓶꓽ) ꓙꓲꓻ ꓖꓴ ꓙꓳˍ ꓟ ꓚꓱꓹ

ꓬꓳꓸ-ꓑ-ꓓꓰ ꓜꓽ ꓗꓷ ꓕꓯ ꓣꓳꓽ ꓖꓳ ꓓꓱꓽ ꓘꓴꓽ ꓗꓪ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ? ꓬꓳꓸ-ꓑ-ꓓꓰ ꓠꓬ ꓣꓳ ꓢꓷꓸ ꓔ ꓟ ꓡꓰ ꓐꓰ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓥꓳ= ꓬꓳꓸ-ꓑ-ꓓꓰ ꓠꓬ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓜ ꓜꓶˍ ꓟ ꓚꓱꓹ ꓐꓱ ꓶ ꓙꓲꓻ ꓖꓴ ꓙꓳ ꓡꓰ ꓝꓲˍ ꓟ ꓥ ꓡꓳ= ꓞꓶꓽ ꓝꓲꓸˍ ꓟ ꓠꓻ ꓫꓵꓽ ꓙꓳˍ ꓢꓴ ꓐꓱ ꓶ ꓥ ꓟꓲ ꓖ-ꓡꓴꓹ-ꓗꓳꓸ-ꓢꓶꓽ ꓡꓰꓦꓰꓡ ꓔꓯ ꓕꓲ ꓟꓴ ꓤ ꓗꓷ ꓡꓰ ꓝꓲˍ ꓟ ꓥ ꓡꓳ= ꓝꓳꓡꓲꓚ ꓮꓚꓲꓓ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓬꓳꓸ-ꓑ-ꓓꓰ ꓠꓬ ꓤ ꓠꓱ ꓖꓳ ꓓꓱ ꓙꓳˍ ꓟ ꓤ ꓟꓶ ꓤ ꓐꓴ ꓥˍ ꓟꓲ ꓜꓽ ꓖꓶ ꓠ ꓔ ꓟ ꓕꓲ ꓫꓵꓽ ꓥꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓙꓲꓻ ꓖꓴ ꓙꓳˍ ꓟ ꓢꓯꓼ ꓙꓳˍ ꓟ ꓥ ꓡꓳ= ꓬꓳꓸ-ꓑ-ꓓꓰ ꓗꓪ ꓙꓳˍ ꓟ ꓦꓲꓔꓮꓟꓲꓠ ꓗ ꓐꓰ ꓝꓳꓡꓲꓚ ꓮꓚꓲꓓ ꓠꓬ ꓣꓳ ꓪꓳꓽ ꓔꓳ ꓔꓯ ꓥˍ ꓟꓲ ꓕꓶꓺ ꓡꓰ ꓝꓲˍ ꓟ ꓥꓳ= ꓦꓲꓔꓮꓟꓲꓠ ꓚ ꓐꓰ ꓠꓱꓸ ꓐꓯ ꓠꓻ ꓫꓵꓽ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓟ ꓢꓯꓼ ꓙꓳˍ ꓟ ꓑꓶꓸ ꓓꓴ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓢꓯꓼ ꓔꓯ ꓥ ꓟꓲ ꓗꓽ ꓕꓸ ꓖꓶˍ ꓟ ꓥꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓑꓯꓹ-ꓠ-ꓬꓲ-ꓚꓬꓯꓸ ꓠꓻ ꓫꓵꓽ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ ꓐꓰ ꓕꓱ ꓡꓱ ꓐꓯ ꓔ ꓡꓳ=

ꓬꓳꓹ-ꓑ-ꓓꓰ ꓗꓪ ꓐˍ ꓟ ꓝꓲꓐꓰꓣ ꓢꓯꓼ ꓠꓬ ꓬꓲꓻ ꓙꓬ ꓢꓯꓼ ꓔꓯ ꓟꓽ ꓛꓳꓸ ꓡꓰ ꓠꓹ ꓟ ꓐꓱ ꓶ ꓬꓰ ꓙˍ ꓟ ꓥꓳ= ꓪꓴꓸ ꓞꓱꓻ ꓗꓪ ꓠꓻ ꓫꓵꓽ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓪꓴꓸ ꓞꓱꓻ ꓔꓯ ꓥˍ ꓟꓲ ꓢꓲꓽ ꓫꓬ ꓡꓰ ꓝꓲˍ ꓟ ꓥꓳ= ꓬꓳꓹ-ꓑ-ꓓꓰ ꓠꓬ ꓖꓳ ꓓꓱꓽ ꓘꓴꓽ ꓗꓪ ꓟꓽ ꓙꓲꓻ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓥˍ ꓟꓲ ꓐꓬ ꓡꓰ ꓝꓲˍ ꓟ ꓥꓳ= ꓬꓳꓹ-ꓑ-ꓓꓰ ꓜꓽ ꓖꓶˍ ꓟ ꓑꓶꓸ ꓓꓴ ꓣꓳ ꓪꓴꓸ ꓞꓱꓻ ꓔꓯ ꓥˍ ꓟꓲ ꓙꓲꓻ ꓡꓰ ꓝꓲˍ ꓟ ꓥꓳ=

ꓠꓻ ꓫꓵꓽ ꓐꓶ ꓓꓲ ꓥˍ ꓟꓲ ꓟꓽ ꓓꓵꓽ ꓡꓰ ꓠꓹ ꓟ ꓚꓮꓠꓚꓰꓣ ꓚꓰꓡꓡꓢ ꓟꓽ ꓒꓬꓱꓼ ꓡꓰ ꓠꓹ ꓟ ꓬꓰ ꓖꓶˍ ꓟ ꓑꓶꓸ ꓓꓴ ꓣꓳ ꓖꓳ ꓓꓱꓽ ꓙꓲꓻ ꓠꓹ ꓟ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓥ ꓡꓳ= ꓫꓵꓽ ꓚꓳˍ ꓟ ꓚꓱꓹ ꓔꓯ ꓥ ꓟꓲ ꓙꓲꓻ ꓡꓰ ꓝꓲˍ ꓟ ꓥꓳ= ꓕꓱ ꓟ ꓠꓬ ꓬꓳꓸ-ꓑ-ꓓꓰ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓟꓬ ꓙꓲꓻ ꓖꓴ ꓙꓳˍ ꓟ ꓐꓴ ꓔꓯ ꓐꓯ ꓟꓸ ꓖꓶ ꓡˍ ꓟ ꓥꓳ=

Add new comment

5 + 4 =