ꓬꓳꓸ ꓚꓵꓹ ꓟ ꓬꓲꓸ ꓚꓰ ꓜꓽ ꓪꓳ ꓡꓳꓸ ꓪꓳ (Q & A)

ꓟꓲ ꓠꓯ ꓗꓪ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓜꓽ ꓠꓬꓲ ꓔ ꓟ ꓜꓽ ꓪꓳ ꓡꓳꓸ ꓪꓳ ꓮꓽ ꓟꓬꓹ ꓫꓵꓽ ꓕꓱ ꓡꓰ ꓙꓳꓹ ꓟ ꓥ ꓪ= ꓣꓳꓽ ꓟꓵꓽ ꓗꓪ ꓜꓽ ꓪꓳ ꓡꓳꓸ ꓪꓳ ꓫꓸ ꓔ ꓟ ꓠꓬ ꓮꓽ ꓟꓬꓹ ꓫꓵꓽ ꓜꓽ ꓟꓽ ꓗꓴꓸ ꓔ ꓟ ꓪꓴꓸ ꓠꓬꓲ ꓥˍ ꓡꓳ= ꓣꓳꓽ ꓟꓵꓽ ꓣꓳꓽ ꓡꓳ ꓗꓪ ꓫꓸ ꓔ ꓟ ꓠꓬ ꓜꓽ ꓔꓯ ꓟꓽ ꓓ ꓪꓴꓸ ꓓꓵ ꓛꓹ ꓢꓲ ꓢꓯꓼ ꓕꓵꓼ ꓕꓱ ꓟ ꓔꓯ ꓡꓰ ꓢꓲ ꓜꓽ ꓪꓳ ꓡꓳꓸ ꓪꓳ ꓚꓵꓺ ꓐꓰ ꓢꓪꓹ ꓟ ꓪꓴ ꓠꓬ ꓥ ꓐꓶ= ꓚꓵ ꓚꓵ ꓐꓯꓹ ꓠꓬ ꓟꓲ ꓠꓯ ꓗꓪ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓜꓽꓹ ꓟ ꓟꓽ ꓓ ꓬꓳꓸ ꓚꓵꓹ ꓟ ꓮꓽ ꓟꓬꓹ ꓫꓵꓽ ꓕꓱ ꓡꓰ ꓙꓳꓹ ꓟ ꓥ ꓐꓶ= ꓜꓽ ꓪꓳ ꓡꓳꓸ ꓪꓳ ꓕꓲꓽ ꓫꓵꓽ ꓡꓰ ꓕꓲꓽ ꓫꓵ ꓜꓽ ꓙꓲ ꓠꓹ ꓟ ꓐꓱ ꓶ ꓠꓬ ꓧꓪꓽ ꓞꓶ꓾ ꓞꓼ ꓐꓳ ꓐꓰ ꓞꓼ ꓛꓵ ꓙꓳ ꓕꓯ ꓢꓲ ꓠꓲꓹ ꓫꓵꓹ ꓟ ꓡꓰ ꓐꓰ ꓬꓰ ꓜꓽ ꓙꓲ  ꓥ= ꓟꓲ ꓠꓯ ꓗꓪ ꓜꓽ ꓪꓳ ꓡꓳꓸ ꓪꓳ ꓮꓽ ꓟꓬꓹ ꓫꓵꓽ ꓙꓳꓹ ꓟ ꓠꓯꓸꓼ ꓗꓪ ꓬ ꓟ ꓕꓴ ꓥˍ ꓠꓬ ꓬ ꓟ ꓢꓶꓽ꓾ ꓐꓲꓼ꓾ ꓟꓶꓽ ꓥˍ ꓠꓬ ꓟꓶꓽ ꓙꓲ꓾ ꓮꓸ ꓟꓶ꓾ ꓧꓶꓽ ꓐꓲꓼ ꓘꓴ ꓫ꓾ ꓢꓲ ꓜꓲ ꓟꓶ ꓙꓲ꓾ꓫꓪ ꓐꓰ ꓜ ꓠꓬ ꓟꓽ ꓓ ꓣꓱꓽ ꓔꓬ ꓟ ꓜꓽ ꓫꓵꓽ ꓐꓴ ꓥˍ ꓡꓳ= 

ꓬ ꓟ ꓕꓴꓽ ꓬ ꓟ ꓢꓶꓽ ꓔꓯ ꓜ ꓚꓵ ꓢꓪ ꓢꓲ ꓜꓽ ꓢꓲ ꓠꓬ ꓗꓰꓠ-ꓠꓬ꓾ ꓬꓴ-ꓗꓮꓠ-ꓓ꓾ ꓔꓮꓠ-ꓜ-ꓠꓲ-ꓬ꓾  ꓣ-ꓪꓮꓠ-ꓓ꓾ ꓐꓴ-ꓣꓴꓠ-ꓓꓲ꓾ ꓚꓳꓠ-ꓖꓳ ꓐꓰ ꓮ-ꓝꓲ-ꓣꓲ-ꓗ ꓗꓴꓷꓼ ꓮꓽ ꓟꓬꓹ ꓗꓪ ꓜꓽ ꓔꓬꓹ ꓟ ꓥˍ ꓡꓳ= ꓐꓲꓼ ꓔꓯ ꓠꓬ ꓠꓮꓲꓼ-ꓖꓲ-ꓣꓲ-ꓬ꓾ ꓖ-ꓠ꓾ ꓗꓯ-ꓟ-ꓣꓳꓠ ꓐ ꓴ ꓥˍ ꓡꓳ= ꓟꓶꓽ ꓥˍ ꓠꓬ ꓟꓶꓽ ꓙꓲ ꓕꓯ ꓠꓬ  ꓠꓮꓲꓼ-ꓖꓲ-ꓣꓲ-ꓬ ꓐꓰ ꓐꓶꓽ ꓓꓵꓽ ꓮ-ꓝꓲ-ꓣꓲ-ꓗ ꓗꓴꓷꓼ ꓮꓽ ꓟꓬꓹ ꓜꓽ ꓔꓬꓹ ꓟ ꓥ ꓪ= ꓮꓸ ꓟꓶ ꓔꓯ ꓠꓬ ꓑ=ꓑꓴ-ꓮ ꓠꓰꓪ ꓖꓲ-ꓠꓲ-ꓬ꓾ ꓔꓮꓠ-ꓜ-ꓠꓲ-ꓬ꓾ ꓲ-ꓓꓲ-ꓬꓴ-ꓑꓲ-ꓬ ꓐꓰ ꓧꓶꓽ ꓟꓵꓽ ꓕꓲꓽ ꓔꓶꓸ ꓡꓰ ꓕꓲꓽ ꓔꓶꓸ ꓗꓪ ꓜꓽ ꓔꓬꓹ ꓟ ꓥˍ ꓡꓳ= ꓧꓶꓽ ꓐꓲꓼ ꓔꓯ ꓠꓬ ꓧꓶꓽ ꓟꓵꓽ꓾ ꓣ-ꓫ꓾ ꓲꓠ-ꓓꓲ-ꓬ꓾ ꓮ-ꓟꓯ-ꓣꓲ-ꓗꓮꓠ꓾  ꓬꓴ-ꓗ-ꓣꓲꓠ ꓕꓱ ꓡꓰ ꓗꓴꓷꓼ ꓮꓽ ꓟꓬꓹ ꓗꓪ ꓜꓽ ꓔꓬꓹ ꓟ ꓥ ꓪ= ꓘꓴꓽ ꓫ ꓔꓯ ꓠꓬ ꓧꓶꓽ ꓟꓵꓽ꓾ ꓐ-ꓣ-ꓜꓲꓡ꓾ ꓟꓯꓼ-ꓢꓰ-ꓗꓳ ꓐꓰ ꓮ-ꓖꓲꓠ-ꓔꓲ-ꓠꓮ ꓗꓴꓷ ꓗꓪ ꓜꓽ ꓔꓬꓹ ꓟ ꓥ ꓪ= ꓢꓲꓹ ꓜꓲ ꓟꓶꓽ ꓙꓲ ꓔꓯ ꓠꓬ ꓡ-ꓔꓲꓠ ꓮ-ꓟꓯ-ꓣꓲ-ꓗ ꓗꓴꓷꓼ ꓮꓽ ꓟꓬꓹ ꓗꓪ ꓜꓽ ꓔꓬꓹ ꓟ ꓥ ꓪ= ꓫꓪ ꓔꓯ ꓠꓬ ꓗꓴꓷꓼ ꓮꓽ ꓟꓬꓹ ꓗꓪ ꓜꓽ ꓔꓬ ꓟ ꓥ ꓪ= ꓟꓬ ꓠꓬꓲ ꓠꓬ ꓴ-ꓣ0-ꓑꓼ ꓗꓴꓷꓼ ꓮꓽ ꓟꓬꓹ ꓗꓪ ꓣꓱꓽ ꓔꓬꓹ ꓟ ꓥ ꓪ= ꓜ ꓔꓯ ꓠꓬ ꓮ-ꓫꓼ ꓟꓵꓽ ꓗꓪ ꓟꓬꓽ ꓠꓬꓲ ꓣꓱꓽ ꓔꓬ ꓟ ꓥ ꓪ=

 ꓜꓽ ꓪꓳ ꓡꓳꓸ ꓪꓳ ꓔꓯ 3 ꓫꓵꓽ ꓐ ꓠ ꓜꓽ ꓗꓴꓸ ꓠꓬꓲ ꓔ ꓥ= 1ꓸ ꓜ 2ꓸ ꓧꓪꓽ 3ꓸ ꓢꓶꓹ ꓢꓶꓽ ꓡꓳ ꓢꓶꓽ ꓪꓳꓽ ꓒꓬ ꓪꓳꓽ ꓟꓬ ꓕꓱ ꓡꓰ 3 ꓫꓵꓽ ꓜꓽ ꓗꓴ ꓠꓬꓲ ꓔ ꓡꓳ= ꓣꓳꓽ ꓫꓸ ꓔ ꓟ ꓠꓬ ꓜꓽ ꓔꓯ ꓡꓰ ꓪꓴꓸ ꓓꓵ ꓛꓹ ꓢꓲ ꓬꓰꓹ ꓟ ꓪꓴꓸ ꓠꓬꓲ ꓥˍ ꓡꓳ= ꓜ ꓟꓲꓹ ꓡꓰ ꓕꓽ ꓬꓰ꓾ ꓧꓪꓽ ꓟꓲꓹ ꓟꓲ ꓬꓰ ꓡꓯ= ꓢꓶꓹ ꓢꓶꓽ ꓡꓳ ꓢꓶꓽ ꓪꓳꓽ ꓒꓬꓽ ꓪꓳꓽ ꓟꓲꓹ ꓟꓲ ꓬꓰ ꓡꓯ= ꓖꓳ ꓕꓯ ꓧꓪꓸ ꓧꓪꓼ ꓔꓬ ꓟꓶ ꓡ ꓥꓳ= ꓧꓪꓽ ꓪ ꓠ ꓮ ꓡꓰ ꓬꓰ ꓓꓴ ꓥ< ꓡ? ꓐꓯ ꓟ ꓔꓯ ꓥˍ ꓟꓲ ꓓꓵ ꓙ ꓓꓴ ꓬꓰ ꓡꓯ=