ꓮꓸ ꓠꓳ ꓢꓶꓽ ꓔꓶ ꓚꓱꓹ

ꓮꓸ ꓠꓳ ꓢꓶꓽ ꓔꓯ ꓧꓪꓽ ꓒꓴ ꓥꓳꓽ ꓗꓪ ꓐꓰ Garden Pea꓾ Field Pea ꓐꓰ ꓐꓯ ꓟ ꓥ ꓡꓳ= ꓮꓸ ꓠꓳ ꓢꓶꓽ ꓠꓬ ꓙꓬˍ ꓟ ꓟꓵꓽ ꓘꓳꓼ ꓔꓯ ꓠꓵˍ ꓟ ꓑꓶꓸ ꓓꓴ ꓛ ꓟꓵꓽ ꓡꓱ ꓟꓵꓽ ꓗꓪ ꓠꓬ 10 ꓦ 11 ꓦ ꓕꓯ ꓔꓶˍ ꓟ ꓥ ꓢꓲ꓾ 2 ꓦ 3 ꓦ ꓕꓯ ꓶꓼ ꓫˍ ꓟ ꓥ ꓡꓳ= ꓟꓶꓽ ꓦ ꓦ ꓝꓲ ꓕꓯ ꓘꓶꓽ ꓫ ꓶꓼ ꓫ ꓗꓷ ꓗ ꓠꓯꓸ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓢꓯꓼ ꓓꓹ ꓢꓰꓽ ꓕꓯ ꓔꓶ ꓐ ꓡˍ ꓟ ꓥꓳ= ꓐꓶ-ꓬꓲ ꓟꓵꓽ ꓐꓰ ꓠꓱꓸ ꓐꓯ ꓙꓬꓻ ꓟꓵꓽ ꓗꓪ ꓠꓬ ꓟꓵꓽ ꓘꓳꓼ ꓙꓬˍ ꓟ ꓑꓶꓸ ꓓꓴ 4 ꓦ ꓗꓪ ꓐꓰ 5 ꓦ ꓕꓲ ꓐꓶꓽ ꓗꓪ ꓛꓲ ꓔꓶˍ ꓟ ꓥ ꓡꓳ= 5 ꓦ ꓕꓲ ꓐꓶꓽ ꓖꓳ ꓑꓳꓸ ꓠꓬ ꓔꓶ ꓟꓽ ꓙꓲꓻ꓾ ꓔꓶ ꓟꓽ ꓓ= ꓔꓶ ꓟꓳꓼ ꓡꓳ ꓡꓰ ꓠꓬ ꓬꓲ ꓪꓰꓻ ꓪꓰ ꓟꓳꓼ ꓡꓳ ꓡꓰ ꓢꓲ ꓬꓲ ꓪꓰꓻ ꓗꓪ ꓐꓶꓽ ꓓꓲꓻ ꓠꓻ ꓙꓳ ꓡ ꓗꓴˍ ꓡꓳ=

ꓬꓲ ꓜꓲ ꓣꓱꓻ ꓓꓳ ꓡ ꓗ ꓠꓯꓸ ꓦ ꓐ ꓕꓲꓽ ꓟ ꓛꓲ ꓕꓯ ꓬꓲ ꓪꓰꓻ ꓪꓰ ꓡ ꓢꓲ꓾ ꓬꓲ ꓪꓰꓻ ꓪꓰ ꓗꓷ ꓗ ꓠꓯꓸ ꓦ ꓐ ꓕꓲ ꓟ ꓙꓳ ꓡ ꓠꓬ ꓬꓲ ꓢꓶꓽ ꓓꓱꓼ ꓡ ꓢꓲ ꓠꓬꓲ ꓬꓲ ꓕꓴꓽ ꓧꓼ ꓜꓽ꓾ ꓧꓼ ꓪꓴꓽ ꓓ ꓡꓻꓳ= ꓬꓲ ꓕꓴꓽ ꓒꓬꓱꓼ ꓡ ꓗ ꓠꓯꓸ ꓦ ꓐ ꓢ ꓟ ꓛꓲ ꓕꓯ ꓠꓬ ꓬꓲ ꓕꓴꓽ ꓬꓲ ꓠꓲꓹ ꓟ ꓢꓶꓽ ꓟꓺ ꓡꓻꓳ=

ꓮꓸ ꓠꓳ ꓢꓶꓽ ꓠꓬ ꓩꓲꓸ ꓛꓲꓻ ꓟꓵꓽ ꓛꓵꓽ ꓮ ꓟꓬꓹ ꓙꓳˍ ꓟ ꓗꓪ ꓔꓶ ꓒꓬꓱꓼ ꓡ ꓢˍ ꓟ ꓥ ꓡꓳ= ꓠꓱꓸ ꓠꓲ ꓠꓴꓽˍ ꓟ ꓬꓲ ꓟꓲꓺ ꓠꓬꓼ ꓡꓯꓼˍ ꓟ ꓗꓪ ꓠꓽ ꓔꓶ ꓟꓽ ꓓ= ꓖꓳ ꓗꓪ ꓔꓶ ꓔ ꓠꓬ ꓬꓲ ꓜꓲ ꓪꓴꓽ ꓡ ꓫˍ ꓡꓳ= ꓧꓶꓽ ꓚꓲ ꓙꓳˍ ꓟ ꓟꓵꓽ ꓗꓪ ꓮꓸ ꓠꓬꓲꓽ ꓛꓲꓽ ꓬꓲ ꓛꓵꓽ꓾ ꓢꓲꓹ ꓒꓬꓽ ꓛꓵꓽ꓾ ꓩꓲꓸ-ꓛꓲꓻ ꓐꓴ ꓔꓯ ꓮꓸ ꓠꓬꓲꓽ ꓡꓳꓼ 20-25 ꓡꓳꓼ ꓗꓪ ꓛꓲꓺ ꓧꓳꓽ ꓗꓷ ꓢꓲ ꓡꓰꓽ ꓔꓶ ꓙꓲˍ ꓟ ꓥ ꓡꓳ꓾ ꓔꓶ ꓐ ꓡˍ ꓟ ꓥ ꓡꓳ= ꓦꓲꓻ ꓗꓪ ꓜꓽ ꓓꓴ ꓐꓱ ꓶˍ ꓡꓰꓽ ꓔꓶˍ ꓠꓬ ꓩꓲꓸ-ꓛꓲꓻ ꓟꓵꓽ ꓛꓵꓽ ꓮ ꓟꓬꓹ ꓧꓳꓽ ꓖꓶ ꓟꓽ ꓛꓵ=

ꓧꓶꓽ ꓚꓲꓺ ꓙꓳˍ ꓟ ꓟꓵꓽ ꓗꓪ ꓠꓬ ꓟꓶ ꓦ ꓦ ꓝꓲ ꓕꓯ ꓶꓼ ꓫˍ ꓟ ꓟꓲ-ꓛꓬ-ꓮꓸ-ꓠꓳ꓾ ꓠꓱꓸ꓾ ꓘꓶꓽ ꓫ ꓐꓴ ꓶꓼ ꓫ ꓗꓷ ꓗ ꓠꓯꓸ ꓬꓲ ꓟꓲꓺ ꓔꓯ ꓧꓶꓽ ꓡꓷꓹ ꓘꓪꓺ ꓗꓷ ꓢꓲ ꓬꓲ ꓚꓬꓸ ꓫꓬꓹ ꓡꓳ= ꓬꓲ ꓚꓬꓸ ꓕꓲ ꓚꓬꓸ ꓐꓰ ꓕꓲ ꓚꓬꓸ 12" ꓗꓶꓹ ꓶꓽ ꓢꓲ ꓫꓬꓹ ꓖꓶ ꓠ ꓔ ꓥ= ꓔꓶ ꓢꓴ ꓕꓲ ꓐꓱ ꓠꓬ ꓬꓲ ꓚꓬꓸ ꓟꓽ ꓫꓬꓹ ꓫꓬꓹ ꓘꓪꓺ ꓔ ꓟ ꓬꓲ ꓟꓲꓺ ꓗꓪ ꓬꓲ ꓫꓵꓸ ꓒꓬꓹ ꓢꓲ ꓔꓶˍ ꓟˍ ꓟꓲ ꓙꓳˍ ꓡꓳ= ꓬꓲ ꓚꓬꓸ ꓗꓪ ꓔꓶˍ ꓠꓬ ꓬꓲ ꓫꓵꓸ ꓢꓶꓽ ꓕꓲ ꓟ ꓐꓰ ꓕꓲ ꓟ 4" ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ= ꓬꓲ ꓫꓵꓸ ꓫꓵꓸ ꓗꓷ ꓠꓬ ꓬꓲ ꓕꓯꓽ ꓢꓲ ꓗꓪ ꓡꓸ ꓑ ꓛꓲꓽ꓾ ꓠꓱꓸ ꓦꓱꓽ ꓐꓰ ꓑꓲꓸ ꓖꓶ ꓗꓷ ꓠꓯꓹ ꓡꓳ= ꓗ ꓠꓯꓸ ꓠꓬ ꓮꓸ ꓠꓳ ꓟꓲꓺ ꓗꓪ ꓟꓳꓼ꓾ ꓫꓵꓸ ꓔꓯ ꓫꓬꓹ ꓡꓲꓸ ꓖꓶ ꓗ ꓔ ꓡꓳ=

ꓬꓲ ꓫꓵꓸ ꓔꓶ ꓗꓷ ꓟ 6-8 ꓠꓬꓲ ꓛꓲ ꓕꓯ ꓠꓬ ꓬꓲ ꓜꓲ ꓤ ꓤ ꓣꓱꓻ ꓓꓳ ꓡꓻꓳ= ꓬꓲ ꓜꓲ ꓣꓱꓻ ꓓꓳ ꓡ ꓗ ꓠꓯꓸ ꓦ ꓐ 5 ꓟ ꓛꓲꓺ ꓕꓯ ꓠꓬ ꓬꓲꓸ ꓕꓴꓽ ꓬꓲ ꓢꓶꓽ ꓟꓺ ꓡꓻꓳ= ꓜꓳꓽ ꓜꓳꓽ ꓗꓪꓼ ꓫꓵꓼ ꓢꓲ ꓔꓶ ꓔ ꓠꓬ ꓕꓲ ꓰ-ꓗꓸ ꓗꓪ 15 ꓑꓳꓽ ꓗꓪ ꓛꓲꓺ ꓧꓼ ꓪ ꓓꓹ ꓡꓳ= 

ꓬꓲ ꓢꓶꓽ ꓬꓲ ꓕꓴꓽ ꓮ ꓟꓬꓹ ꓓꓱꓼ ꓢꓲ꓾ ꓬꓲ ꓢꓶꓽ ꓬꓲ ꓕꓴꓽ ꓙꓲꓻ ꓡ ꓠꓹ ꓟ ꓠꓬ ꓶꓼ ꓫˍ ꓟ ꓗꓪˍ ꓟꓲ ꓮ ꓟꓬꓹ ꓤ ꓟꓳ ꓠ ꓔ ꓟ ꓥ ꓡꓳ=  ꓬꓲ ꓕꓴꓽ ꓧꓼ ꓫˍ ꓟ꓾ ꓶꓼ ꓫˍ ꓟ ꓗꓪ ꓬꓲ ꓕꓴꓽ ꓬꓲ ꓑꓶꓸ ꓗꓪ ꓠꓬ ꓠꓲꓹ ꓛꓵꓼ ꓢꓲ ꓠꓬꓲ ꓔꓱ ꓫꓵ ꓗꓪ ꓧꓪꓼ ꓡꓰ ꓕꓯ ꓠꓬ ꓶꓼ ꓫ ꓓ ꓡꓻꓳ= ꓕꓲ ꓕꓴꓽ ꓡꓱꓸꓼ ꓧꓪꓼ ꓡꓰ ꓢꓲ ꓙꓴꓺ ꓡꓰ ꓕꓯ ꓶꓼ ꓫˍ ꓠꓬ ꓮꓸ ꓠꓳ ꓢꓶꓽ ꓗꓪ ꓐꓶꓽ ꓓꓲꓻ ꓓꓶꓽ ꓗꓴˍ ꓠꓬꓲ ꓬꓲ ꓢꓶꓽ ꓮ ꓟꓬꓹ ꓟꓽ ꓟꓶ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓬꓲ ꓢꓶꓽ ꓬꓲ ꓕꓴꓽ ꓠꓲꓹ ꓛꓵꓼˍ ꓟ ꓗꓪ ꓐꓰ ꓧꓪꓼ ꓡꓰ ꓔꓬ ꓕꓯ ꓶꓼ ꓫ ꓢꓲ ꓟꓶꓽ ꓛ ꓣꓳˍ ꓟ ꓗꓪ ꓡꓱꓸ ꓖꓶ ꓠ ꓗˍ ꓡꓳ=