ꓮ ꓒꓵꓽ ꓟꓶ ꓢꓶꓽ ꓙꓲꓻ ꓖꓴ ꓙꓳˍ ꓟ

ꓠꓬꓲꓸ ꓠꓬꓲ ꓗꓪ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓮ ꓟꓬꓹ ꓙꓳˍ ꓟ ꓮ ꓒꓵꓽ ꓟꓶ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓠꓹ ꓟ ꓥ ꓡꓳ=

Vitamin ꓐꓰ Minerals ꓢꓯꓼ ꓮ ꓟꓬꓹ ꓙꓳˍ ꓟ ꓮ ꓒꓵꓽ ꓟꓶ ꓢꓶꓽ ꓠꓬ diabetes ꓠꓻ ꓢꓴ ꓐꓴ ꓐꓱ ꓶ ꓮ ꓘꓶꓸ ꓙꓲˍ ꓟ ꓜꓽ ꓫꓵꓽ ꓥ ꓟ ꓡꓰꓽ ꓟꓽ ꓞꓲ calorie ꓥˍ ꓟꓲ ꓮ ꓔꓲꓸ ꓤ ꓐˍ ꓟ ꓙꓳˍ ꓟ ꓥ ꓡꓳ= ꓧꓪꓽ ꓖꓳ ꓓꓱꓽ ꓦꓯꓸ ꓡꓰ ꓠꓲꓹ ꓫꓵ ꓢꓴ꓾ ꓝꓱꓺ ꓡꓰ ꓠꓲꓹ ꓫꓵ ꓢꓴ ꓠꓬ ꓮ ꓒꓵꓽ ꓟꓶ ꓢꓶꓽ ꓜ ꓙꓲˍ ꓥ ꓐꓰ꓾ ꓢꓷꓸ ꓪ ꓡꓳ= ꓮ ꓒꓵꓽ ꓟꓶ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓡꓬꓽ ꓡꓰ ꓝꓲˍ ꓟ ꓡꓰ ꓟꓽ ꓞꓲꓺ ꓬꓲ ꓓꓳꓼ ꓐꓴ ꓔꓯ ꓓꓻ ꓡꓰ ꓝꓲˍ ꓟ ꓪꓴꓸ ꓠꓬꓲ ꓪꓳꓽ ꓬꓲꓻ ꓫꓬꓹ ꓓꓳˍ ꓟꓲ ꓙꓲˍ ꓟ ꓥ ꓡꓳ= ꓝꓮꓲ ꓠꓬ ꓮ ꓒꓵꓽ ꓟꓶ ꓢꓶꓽ ꓘꓴꓽ ꓗꓪ Vitamin A, Vitamin C, Vitamin E, ꓐˍ ꓟ ꓙꓳˍ ꓟ ꓡꓰꓽ ꓟ ꓞꓲꓺ ꓬꓲ ꓢꓶꓽ ꓗꓪ ꓙꓳˍ ꓟ Omega 3 ꓠꓬ ꓬꓲ ꓝꓲꓸ ꓬꓲ ꓟꓲ ꓳ ꓠˍ ꓟ ꓐꓰ ꓠꓲꓹ ꓟ ꓫꓵꓽ ꓙꓴꓽ ꓣꓳ ꓡꓰˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ=

ꓮ ꓒꓵꓽ ꓟꓶ ꓙꓲꓻ ꓓꓴ ꓙꓳˍ ꓟ ꓚꓱꓹ ꓐꓴ ꓠꓬ

(1)ꓦꓰꓼ ꓟ ꓗꓪ ꓠꓻ ꓓꓴ ꓓꓴˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓐꓰ ꓬꓲꓸ ꓪꓴꓻ ꓘꓴꓽ ꓗꓪ ꓟ ꓐꓶꓽ ꓓꓲꓻ ꓐꓴ ꓫꓬ ꓡꓰ ꓝꓲˍ ꓟ

ꓮ ꓒꓵꓽ ꓟꓶ ꓢꓶꓽ ꓠꓬ ꓦꓰꓼ ꓟ ꓐꓰ ꓬꓲ ꓪꓴꓻ ꓘꓴꓽ ꓗꓪ ꓠꓻ ꓓꓴ ꓓꓴˍ ꓟ ꓔꓯ ꓓꓻ ꓡꓰ ꓠ ꓬꓰ ꓙ ꓐ ꓡˍ ꓡꓳ= ꓦꓰꓼ ꓟ ꓐꓰ ꓬꓲ ꓪꓴꓻ ꓘꓴꓽ ꓗꓪ ꓙꓳˍ ꓟ ꓟꓽ ꓙꓲꓻ ꓟ ꓐꓶꓽ ꓓꓲꓻ ꓐꓴ ꓔꓯ ꓫꓬ ꓡꓰ ꓝꓲˍ ꓟ ꓪꓴꓸ ꓠꓬꓲ ꓦꓰꓼ ꓟ ꓐꓰ ꓬꓲ ꓪꓴꓻ ꓗꓪ ꓠꓻ ꓐꓶꓽ ꓓꓲꓻ ꓓꓵꓽ ꓡˍ ꓟ ꓐꓰ ꓦꓰꓼ ꓟ ꓜꓶꓺ ꓟꓽ ꓘꓴ ꓟ ꓔꓯ ꓗꓽ ꓔ ꓐ ꓡˍ ꓟ ꓥꓳ=

(2)ꓧꓪꓽ ꓖꓳ ꓓꓱꓽ ꓗꓪ ꓬꓲ ꓞꓶꓻ ꓟꓬꓽˍ ꓟ ꓘꓪꓽˍ ꓟ ꓗꓪ ꓐꓰ ꓝꓱꓺ ꓡꓰ ꓠ ꓬꓰ ꓙˍ ꓟ

ꓝꓱꓺ ꓡꓰ ꓠꓲꓹ ꓫꓵˍ ꓠꓬ calorie ꓮ ꓟꓬꓹ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓕꓯꓽ ꓢꓲ ꓪ ꓙꓲ ꓙꓲˍ ꓟ ꓠꓬ ꓮ ꓒꓵꓽ ꓟꓶ ꓢꓶꓽ ꓪꓳꓽ ꓬꓲꓻ ꓥ ꓡꓳ= ꓮ ꓒꓵꓽ ꓟꓶ ꓢꓶꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓮ ꓟꓬꓹ ꓐˍ ꓟ ꓙꓳˍ ꓟ ꓥ ꓢꓲ ꓬꓲꓻ ꓙꓬ ꓢꓯꓼ ꓥˍ ꓟꓲ ꓮ ꓟꓬꓹ (96%) ꓙꓳˍ ꓟ ꓥ ꓡꓳ=

(3)ꓠꓲꓹ ꓟ ꓘꓶ ꓡꓶꓽˍ ꓟ ꓠꓲꓹ ꓟ ꓟꓽ ꓢꓲꓺ ꓡꓲ ꓟ ꓔꓯ ꓓꓻ ꓡꓰ ꓝꓲˍ ꓟ

ꓮ ꓒꓵꓽ ꓟꓶ ꓢꓶꓽ ꓠꓬ ꓞꓳ ꓤ ꓡꓰ ꓟ ꓫꓬꓹ ꓔ ꓟ ꓬꓲ ꓔꓱꓹ ꓬꓲ ꓙꓳ ꓔꓬ ꓟ ꓠꓲꓹ ꓟ ꓢꓲꓺ ꓡꓲ ꓝꓲ ꓓꓴ ꓠꓯꓻ ꓞꓲꓼ ꓕꓲ ꓙꓰꓽ ꓡꓰ ꓐꓰ ꓠꓲꓹ ꓟ ꓓꓵꓽ ꓙ ꓘꓶ ꓡꓶꓽˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓬꓲꓹ ꓙꓴꓽ ꓚꓵˍ ꓟ꓾ ꓠꓲꓹ ꓟ ꓪꓴꓽ ꓧꓶˍ ꓟ꓾ ꓟꓶꓽ ꓘꓶꓽ ꓗꓪ ꓬꓲꓼ ꓟꓶ ꓟ ꓓ ꓟ꓾ ꓕꓱ ꓡꓱ ꓫꓵꓽ ꓐꓴ ꓔꓯ ꓓꓻ ꓡꓰ ꓠ ꓫꓬꓹ ꓟ ꓗꓪ ꓣꓱꓽ ꓬꓯꓼˍ ꓡꓳ= ꓮ ꓒꓵꓽ ꓟꓶ ꓢꓶꓽ ꓬꓲ ꓬꓲꓻ ꓔꓯ ꓕꓲ ꓠꓬꓲ ꓕꓲ ꓗꓶꓸ ꓓꓳˍ ꓠꓬ ꓠꓲꓹ ꓟ ꓓꓵꓽ ꓙ ꓪꓴꓽ ꓧꓶˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ=

(4)ꓪꓴꓸ ꓞꓱꓻ ꓐꓰ ꓒꓬꓱꓽ ꓟꓬ ꓐꓱ ꓶ ꓙꓲꓻ ꓓꓴ ꓙꓳˍ ꓟ

ꓮ ꓒꓵꓽ ꓟꓶ ꓢꓶꓽ ꓠꓬ ꓧꓪꓽ ꓗꓴꓹ ꓙꓲꓻ ꓐꓱ ꓶˍ ꓟꓲ ꓮ ꓘꓶꓸ ꓙꓲˍ ꓟ ꓥ ꓡꓳ= ꓮ ꓒꓵꓽ ꓟꓶ ꓢꓶꓽ ꓜꓶ ꓔ ꓟ ꓬꓲ ꓬꓲꓻ ꓔꓯ ꓬꓲ ꓝꓱꓺ ꓢꓶꓽ ꓐꓰ ꓑꓯꓸ ꓗꓷ ꓢꓲ ꓾ ꓥ ꓠꓬ꓾ ꓠꓱꓸ ꓐꓯ ꓒꓬꓱꓽ ꓟꓬ ꓗꓪ ꓟꓲ ꓓꓴ ꓕꓲ ꓓꓵꓽ ꓓꓵꓽ ꓐꓰ ꓑꓯꓸ ꓗꓷ ꓢꓲ ꓟꓲ ꓖꓶˍ ꓠꓬ ꓒꓬꓱꓽ ꓟꓬ ꓗꓪ ꓠꓯ ꓓꓹ ꓟ ꓔꓯ ꓠꓲꓹ ꓡꓰ ꓢꓲ ꓧꓪꓽ ꓗꓴꓹ ꓙꓲˍ ꓟꓲ ꓡꓬꓸ ꓡˍ ꓥꓳ=

(5) ꓟꓶꓽ ꓘꓶꓽ ꓗꓪ ꓬꓲꓼ ꓟꓶ ꓢˍ ꓟ

ꓮ ꓒꓵꓽ ꓟꓶ ꓢꓶꓽ ꓠꓬ ꓟꓶꓽ ꓘꓶꓽ ꓗꓪ ꓬꓲꓼ ꓟꓶ ꓟꓽ ꓓ ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓠꓲꓹ ꓟ ꓪꓴꓽ ꓧꓶˍ ꓟ꓾ ꓟꓬꓱꓽ ꓬꓰ ꓪꓴꓽ ꓧꓶˍ ꓟ꓾ ꓠꓲꓹ ꓟ ꓟꓽ ꓢ ꓟ ꓪꓴꓸ ꓠꓬꓲ ꓟꓶꓽ ꓘꓶꓽ ꓗꓪ ꓬꓲꓼ ꓟꓶ ꓟꓽ ꓓ ꓕꓯ ꓮ ꓒꓵꓽ ꓟꓶ ꓢꓶꓽ ꓔꓯ ꓮ ꓕꓯ ꓟꓲ ꓜꓽˍ ꓠꓬ ꓕꓱ ꓟ ꓮ ꓙꓵꓽ ꓔꓯ ꓓꓻ ꓡꓰ ꓝꓲˍ ꓡꓳ=

(6)ꓤꓲꓽ ꓮ ꓟꓬꓹ ꓓꓳꓻ ꓡ ꓢˍ ꓟ꓾ ꓬꓲ ꓐꓽ ꓗꓪ ꓬꓲꓻ ꓙꓬ ꓧꓳꓸ ꓢˍ ꓟ

ꓛ ꓝꓲ ꓕꓯ ꓚꓵꓸ ꓬꓲꓻ ꓮ ꓟꓬꓹ ꓓꓳˍ ꓟ ꓪꓴꓸ ꓠꓬꓲ ꓧꓪꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓠꓲꓸ ꓡꓰ ꓗꓴˍ ꓡꓳ= ꓖꓳ ꓡꓱ ꓠꓬꓲ ꓤꓲꓽ ꓠꓲˍ ꓟ(ꓬꓲ ꓐꓽ ꓗꓪ ꓬꓲꓻ ꓙꓬ ꓧꓳꓸ ꓓꓴ ꓮ ꓟꓬꓹ ꓟꓽ ꓙꓳ) ꓐꓰ ꓒꓬꓱꓼ ꓡ ꓗꓴˍ ꓡꓳ= ꓮ ꓒꓵꓽ ꓟꓶ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓬꓲꓻ ꓙꓬ ꓢꓯꓼ ꓧꓳꓽ ꓡꓴꓽ ꓖꓶˍ ꓟ ꓪꓴꓸ ꓠꓬꓲ ꓤꓲꓽ ꓮ ꓟꓬꓹ ꓙꓳ ꓡˍ ꓟ꓾ ꓬꓲ ꓐꓽ ꓗꓪ ꓬꓲꓻ ꓙꓬ ꓧꓳꓸ ꓠꓲꓹ ꓫꓵ ꓝꓲˍ ꓟ ꓗꓪ ꓐꓰ ꓬꓲ ꓘꓴꓽ ꓗꓪ ꓦꓯꓼ ꓗꓺ ꓑꓳˍ ꓟ ꓔꓯ ꓗꓽ ꓕ ꓐ ꓡˍ ꓡꓳ=

ꓧꓷꓹ ꓚ ꓢꓲ ꓐꓯ ꓠꓬ ꓮ ꓒꓵꓽ ꓟꓶ ꓢꓶꓽ ꓜˍ ꓟ ꓗꓪ ꓐꓰ ꓦꓰꓼ ꓟ ꓗꓪ ꓠꓻ ꓓꓴ ꓓꓴˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓐꓰ ꓬꓲꓸ ꓪꓴꓻ ꓘꓴꓽ ꓗꓪ ꓟ ꓐꓶꓽ ꓓꓲꓻ ꓐꓴ ꓫꓬ ꓡꓰ ꓝꓲ꓾ ꓧꓪꓽ ꓖꓳ ꓓꓱꓽ ꓗꓪ ꓬꓲ ꓞꓶꓻ ꓟꓬꓽˍ ꓟ ꓘꓪꓽˍ ꓟ ꓗꓪ ꓐꓰ ꓝꓱꓺ ꓡꓰ ꓠ ꓬꓰ ꓙ꓾ ꓠꓲꓹ ꓟ ꓘꓶ ꓡꓶꓽˍ ꓟ ꓠꓲꓹ ꓟ ꓟꓽ ꓢꓲꓺ ꓡꓲ ꓟ ꓔꓯ ꓓꓻ ꓡꓰ ꓝꓲ꓾ ꓪꓴꓸ ꓞꓱꓻ ꓐꓰ ꓒꓬꓱꓽ ꓟꓬ ꓐꓱ ꓶ ꓙꓲꓻ ꓓꓴ ꓙꓳ꓾ ꓟꓶꓽ ꓘꓶꓽ ꓗꓪ ꓟꓲ ꓬꓲꓼ ꓟꓶ ꓢ꓾ ꓤꓲꓽ ꓮ ꓟꓬꓹ ꓓꓳꓻ ꓡ ꓢˍ (ꓬꓲ ꓐꓽ ꓗꓪ ꓬꓲꓻ ꓙꓬ ꓧꓳꓸ ꓢ) ꓕꓱ ꓟꓬ ꓫꓵꓽ ꓙꓲꓻ ꓓꓴ ꓙꓳˍ ꓟ ꓥ ꓡꓳ=

ꓮ ꓟꓶ ꓐꓯ ꓟꓳꓸ ꓖꓶ ꓗꓷ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱꓹ ꓗꓪ ꓐꓰ ꓮ ꓒꓵꓽ ꓟꓶ ꓢꓶꓽ ꓙꓲꓻ ꓓꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓟ ꓥ ꓡꓳ= ꓕꓱ ꓟ ꓚꓱꓹ ꓔꓯ ꓠꓬ ꓲꓠꓔꓰꓣꓠꓰꓔ ꓗꓪ ꓧꓪ ꓟꓰꓹ ꓠꓬꓲ ꓢꓲ ꓐꓯ ꓖꓶ ꓩꓴ ꓡˍ ꓟ ꓥꓳ=