ꓮ ꓒꓵꓽ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

(1) ꓟꓬꓽ ꓢꓶꓽ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓟ

ꓮꓸ ꓒꓵꓽ ꓢꓶꓽ ꓗꓪ Vitamin A ꓢꓯꓼ ꓙꓳˍ ꓟ ꓥ ꓢꓲ ꓟꓬ ꓢꓶꓽ ꓢꓯꓼ ꓔꓯ ꓪꓽ ꓠꓬꓲ ꓡꓰ ꓝꓲˍ ꓟ ꓥ ꓡꓳ= ꓟꓬ ꓢꓶꓽ ꓢꓯꓼ ꓠꓲꓸ ꓡꓰˍ ꓟ ꓔꓯ ꓗꓽ ꓕ ꓖꓶ ꓢꓴ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓥˍ ꓟꓲ ꓮꓸ ꓒꓵꓽ ꓢꓶꓽ ꓘꓴꓽ ꓗꓪ ꓮ ꓟꓬꓹ ꓙꓳˍ ꓟ ꓥ ꓡꓳ=

(2) ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡꓰ ꓝꓲˍ ꓟ

ꓮ ꓒꓵꓽ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓔꓯ ꓢꓯꓼ ꓙꓳ ꓡ ꓝꓲˍ ꓟ ꓥ ꓡꓳ= ꓮꓸ ꓒꓵꓽ ꓢꓶꓽ ꓘꓴꓽ ꓗꓪ ꓙꓳˍ ꓟ Vitamin A ꓾Vitamin C ꓐꓰ Vitamin E ꓢꓯꓼ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓢꓯꓼ ꓡꓴꓽ ꓖꓶˍ ꓡꓳ= Antioxidant ꓮ ꓟꓬꓹ ꓙꓳˍ ꓟ ꓥ ꓠꓬꓲ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓐ ꓡˍ ꓟ ꓥ ꓡꓳ=

(3) ꓦꓰꓼ ꓟ ꓜꓶꓻ ꓢˍ ꓟ

ꓮꓸ ꓒꓵꓽ ꓢꓶꓽ ꓗꓪ Fiber ꓢꓯꓼ ꓟꓬꓽ ꓠꓬꓲ ꓙꓳˍ ꓟ ꓥ ꓢꓲ ꓦꓰꓼ ꓟ ꓜꓶꓻ ꓢ ꓓꓴ ꓐꓱ ꓶ ꓙꓲˍ ꓟ ꓜꓽ ꓓꓴ ꓕꓲ ꓫꓵꓽ ꓥ ꓡꓳ= ꓜꓽ ꓧꓳꓽ ꓗꓷ ꓟ ꓜꓽ ꓫꓵꓽ ꓜꓽ ꓙꓰꓽ ꓗꓪ ꓙꓳˍ ꓟ ꓢꓯꓼ ꓐꓴ ꓔꓯ ꓚꓵꓹ ꓣꓴ ꓖꓶ ꓐ ꓡˍ ꓟ ꓪꓴꓸ ꓠꓬꓲ ꓣꓳ ꓧꓪꓽ ꓖꓳ ꓓꓱꓽ ꓔꓯ ꓟꓬꓽ ꓠꓬꓲ ꓔꓬꓹ ꓢ ꓡꓰ ꓝꓲˍ ꓡꓳ=

(4) ꓧꓪꓽ ꓖꓳ ꓓꓱꓽ ꓒꓸ ꓟ (ꓘꓪꓽˍ ꓟ) ꓗꓪ ꓐꓰ ꓝꓱ ꓡꓰ ꓝꓲˍ ꓟ

ꓮꓸ ꓒꓵꓽ ꓢꓶꓽ ꓠꓬ Calorie ꓢꓯꓼ ꓮ ꓔꓲꓸ ꓤ ꓡꓰꓽ ꓙꓳˍ ꓟ ꓥ ꓢꓲ fiber ꓐꓰ antioxidant ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓒꓸ ꓟ ꓘꓪꓽˍ ꓟ ꓬꓲ ꓞꓶꓻ ꓐꓴ ꓔꓯ ꓠꓲꓸ ꓡꓰ ꓠ ꓬꓰ ꓙ ꓖꓶˍ ꓡꓳ= ꓮꓸ ꓒꓵꓽ ꓢꓶꓽ ꓔꓯ ꓜꓽ ꓖꓶˍ ꓟ ꓠꓬ ꓦꓰꓼ ꓟ ꓗꓪ ꓟꓶ ꓤ ꓐꓲ ꓓꓹ ꓝꓲˍ ꓠꓬꓲ ꓕꓲ ꓑꓹ ꓕꓲ ꓑꓹ ꓦꓰꓼ ꓟꓷꓼ ꓡˍ ꓟ ꓔꓯ ꓗꓽ ꓕꓸ ꓐ ꓡˍ ꓡꓳ=

(5) ꓳˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓮꓸ ꓒꓵꓽ ꓢꓶꓽ ꓗꓪ ꓳˍ ꓟ ꓔꓯ ꓗꓽ ꓕ ꓖꓶˍ ꓟ ꓢꓯꓼ ꓮ ꓟꓬꓹ ꓙꓳˍ ꓡꓳ= Vitamin C ꓐꓰ vitamin E ꓢꓯꓼ ꓐꓴ ꓔꓯ ꓠꓲꓹ ꓟ ꓔꓯ ꓔꓬꓹ ꓢ ꓝꓲˍ ꓡꓳ=

(6) ꓫꓵꓽ ꓤꓶꓻ ꓙꓳ ꓡꓰ ꓝꓲˍ ꓟ

ꓮꓸ ꓒꓵꓽ ꓢꓶꓽ ꓗꓪ ꓠꓬ Potassium ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓢꓲ ꓫꓵꓽ ꓤꓶꓻ ꓙꓳ ꓡꓰ ꓝꓲˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ Vitamin A ꓐꓰ Vitamin C ꓙꓳˍ ꓟ ꓪꓴꓸ ꓠꓬꓲ ꓫꓵꓽ ꓤꓶꓻ ꓙꓳ ꓡꓰ ꓝꓲ ꓢꓲ ꓠꓲꓹ ꓟ ꓠꓻ ꓒꓬꓱꓼ ꓡˍ ꓟ ꓔꓯ ꓗꓽ ꓕꓸ ꓖꓶ ꓐ ꓡˍ ꓡꓳ=

(7) ꓪꓳꓽ ꓔꓳꓺ ꓢꓯꓼ ꓙꓳ ꓡꓰ ꓝꓲˍ ꓟ

ꓮꓸ ꓒꓵꓽ ꓢꓶꓽ ꓘꓴꓽ ꓗꓪ Phosphorus ꓐꓰ Magnesium ꓢꓯꓼ ꓐꓴ ꓒꓺ ꓐꓲ ꓙꓳˍ ꓟ ꓪꓴꓸ ꓠꓬꓲ ꓪꓳꓽ ꓔꓳꓺ ꓐꓴ ꓔꓯ ꓢꓯꓼ ꓙꓳ ꓡꓰ ꓝꓲˍ ꓡꓳ= ꓞꓲꓼ ꓪꓴꓽ ꓡ ꓕꓯ ꓒꓬꓱꓼ ꓗꓴˍ ꓟ ꓪꓳꓽ ꓔꓳꓺ ꓘꓳꓹ ꓡꓰ ꓢˍ ꓟ ꓔꓯ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶˍ ꓡꓳ=

ꓮ ꓘꓶꓸ ꓠꓲꓹ ꓛꓵꓼˍ ꓟ ꓮꓸ ꓒꓵꓽ ꓠꓬ ꓖꓳ ꓘꓶꓸ ꓛꓲꓺ ꓟꓽ ꓠꓲꓹ ꓛꓵꓼ ꓟ ꓮꓸ ꓒꓵꓽ ꓢꓶꓽ ꓕꓯꓽ ꓢꓲ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓮꓸ ꓒꓵꓽ ꓢꓶꓽ ꓙꓲꓻ ꓖꓴ ꓙꓳˍ ꓟ ꓔꓯ ꓠꓯꓻ ꓞꓲꓼ ꓟꓸ ꓒ ꓕꓲ ꓣꓳ ꓡꓰ ꓐꓯ ꓔ ꓟ ꓠꓬ ꓮꓸ ꓒꓵꓽ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓮ ꓘꓶꓸ ꓙꓲˍ ꓟ꓾ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓜꓽ ꓓꓴ ꓥ ꓟ ꓪꓴꓸ ꓠꓬꓲ ꓮ ꓕꓯ ꓟꓲ ꓜꓽ ꓠꓹ ꓟ ꓕꓵꓼ ꓪꓽ ꓖꓶ ꓔ ꓡꓳ= ꓮꓸ ꓒꓵꓽ ꓢꓶꓽ ꓔꓯ ꓜꓽˍ ꓕꓯ ꓟꓬ ꓢꓶꓽ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓰ ꓟꓬꓽ ꓢꓶꓽ ꓟꓽ ꓐꓬ ꓡꓰ ꓠ ꓮ ꓟꓬꓹ ꓔꓳꓹ ꓙ ꓖꓶ ꓟ ꓡꓰꓽ ꓟꓽ ꓞꓲꓺ ꓮꓸ ꓒꓵꓽ ꓫꓵꓸ ꓜꓽˍ ꓕꓯ ꓟꓲ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓞꓳꓻ ꓪꓴꓽ ꓤ ꓠꓱ ꓟꓽ ꓐꓯ ꓪꓴꓽ ꓪꓴꓽ ꓣꓳ ꓣꓳ ꓜꓽ ꓓꓴ ꓬꓰ ꓡꓯ ꓐꓰ Dr. Khin Maung Lwin ꓡꓰ ꓕꓵꓼ ꓪꓽ ꓖꓶ ꓔ ꓟ ꓙꓳˍ ꓡꓳ=