ꓮ ꓘꓶ. ꓞꓺ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓐꓰ ꓬꓰ ꓠꓯꓹ ꓡ꓾

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓟꓶ ꓠꓬ ꓕꓲ ꓘꓳꓼ ꓡꓲ ꓕꓲ ꓘꓳꓼ ꓮ ꓘꓶ. ꓞꓺ ꓟ ꓣꓳ ꓔꓳꓹ ꓜꓳ ꓡ ꓔꓬ ꓡꓳ꓾ ꓖꓳ ꓡꓱ ꓠꓬꓲ ꓮ ꓘꓶ. ꓞꓺ ꓟ ꓦꓬꓼ ꓠꓬꓲ ꓗꓪ ꓣꓳ ꓮ ꓡꓰ ꓐꓰ ꓬꓰ ꓠꓯꓹ ꓡ ꓟ: ꓬꓰ ꓠ ꓔ ꓟ ꓔꓯ ꓣꓳ ꓡꓳ. ꓠꓬꓲ ꓡꓯ꓾ꓮ ꓟꓶ ꓟꓵ: ꓘꓳꓼ ꓮ ꓘꓶ. ꓞꓺ ꓟ ꓑꓶ ꓓꓴ ꓞꓳ ꓟꓳ ꓤ ꓠꓱ ꓞꓳ ꓡꓯ. ꓟ: ꓐꓯ ꓮ ꓘꓶ. ꓫꓵꓻ ꓔꓬ ꓫꓵ ꓔꓬ ꓡꓳ= ꓕꓲ ꓘꓳꓼ ꓑꓶ. ꓕꓲ ꓘꓳꓼ ꓞꓺ ꓟ ꓑꓶ ꓓꓴ ꓫꓵꓻ ꓬꓰ ꓫꓵ ꓡ ꓞꓳ ꓥ ꓟꓲ ꓟꓬ ꓡ ꓔꓬ ꓡꓳ= ꓖꓳ ꓡꓱ ꓠꓬꓲ ꓮ ꓘꓶ. ꓞꓺ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓬꓰ ꓠ ꓔ ꓡ꓾ ꓕꓱ ꓡꓱ ꓟꓲ ꓟꓲ ꓮ ꓘꓶ. ꓞꓺ ꓡ ꓕꓯ ꓣꓳ ꓧꓪ ꓖꓳ ꓓꓱ ꓗꓪ ꓚꓵ. ꓬꓰ ꓓꓳ ꓟ ꓗ ꓡꓰ ꓗꓴˍ ꓡꓳ꓾ ꓕꓱ ꓡꓱ ꓐꓰ ꓗꓷ ꓡ ꓕꓯ ꓣꓳ ꓒꓬꓱ: ꓧꓪ ꓠꓬ ꓒꓴ ꓡꓰˍ ꓡꓳ= ꓣꓳ ꓠꓬ ꓫꓵ: ꓟ: ꓓꓯꓹ ꓟ ꓡꓰ ꓐꓰ ꓗꓷ ꓡꓰ ꓗꓴˍ ꓡꓳ꓾ ꓖꓳ ꓟ ꓡꓰ ꓐꓰ ꓢꓯꓼ ꓐ ꓡꓰˍ ꓡꓳ=ꓮ ꓘꓶ. ꓞꓺ ꓟ ꓑꓶ ꓓꓴ ꓢꓯꓼ ꓐ ꓡꓰ ꓫꓵ꓾ ꓒꓰꓼ ꓡꓰ ꓫꓵ꓾ ꓝꓮꓲ ꓪꓴ. ꓟꓶ ꓟꓶ ꓫꓵ꓾ ꓪꓴ. ꓓꓵ ꓠꓻ ꓫꓵ꓾ ꓡꓵ. ꓙꓰ ꓫꓵ ꓕꓱ ꓡꓱ ꓫꓵ ꓔꓳꓹ ꓜꓳ ꓡ ꓥꓳ꓾ ꓕꓱ ꓡꓱ ꓫꓵ ꓔꓳꓹ ꓜꓳ ꓡ ꓕꓯ ꓣꓳ ꓬꓰ ꓠ ꓔ ꓟ ꓬꓲ. ꓪꓴ. ꓕꓲ ꓟ ꓠꓬ꓾ ꓬꓲꓻ ꓙꓬ ꓮ ꓟꓬꓹ ꓓꓳ ꓠ ꓔ ꓡꓳ= ꓮ ꓡꓰꓳ ꓐꓯ ꓠꓬ ꓣꓳ ꓧꓪ ꓖꓳ ꓓꓱ ꓗꓪ 90 ꓩꓴ. ꓠꓬ ꓬꓲꓻ ꓙꓬ ꓗꓪ ꓐꓰ ꓢꓯ. ꓔꓬ ꓟ ꓥ ꓡꓳ꓾ ꓣꓳ ꓢꓲ ꓗꓪ ꓣꓳ ꓧꓪ ꓖꓳ ꓓꓱ ꓗꓪ ꓬꓲꓻ ꓙꓬ ꓡꓰ ꓥ ꓡꓳ꓾ ꓖꓳ ꓡꓱ ꓠꓬꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟꓬ ꓠꓬꓲ ꓬꓲꓻ ꓙꓬ ꓔꓯ ꓮ ꓔꓲ ꓔꓲ ꓓꓳ ꓢꓲ ꓕꓲ ꓑ ꓕꓲ ꓧꓪꓹ ꓓꓳ ꓠ ꓗꓹ ꓡꓳ= ꓬꓲ. ꓒꓳ ꓬꓲ ꓟꓯꓼ ꓓꓳ ꓫꓵ ꓟ: ꓥ ꓥ꓾ ꓮ ꓔꓲ ꓔꓲ ꓐꓰ ꓕꓲ ꓑ ꓕꓲ ꓧꓪꓹ ꓓꓳ ꓠꓹ ꓟ ꓣꓳ. ꓚꓵˍ ꓡꓳ= ꓧꓪ ꓖꓳ ꓓꓱ ꓗꓪ ꓬꓲꓻ ꓙꓬ ꓐꓲ ꓠꓹ ꓟ ꓬꓰ ꓠ ꓔ ꓡꓳ=
ꓝꓮꓲ ꓟꓶ ꓞꓺ ꓮ ꓘꓶ. ꓞꓺ ꓗꓪ ꓡꓳ ꓖꓪˍ ꓟ꓾ ꓐꓲ ꓡꓴ. ꓡꓳ ꓖꓪˍ ꓟ꓾ ꓟ: ꓬꓰ ꓬꓰ ꓐꓰ ꓗꓴ. ꓙꓳˍ ꓟ ꓗꓪ ꓔꓬ ꓟ ꓥ ꓡꓳ꓾ꓖꓳ ꓡꓱ ꓠꓬꓲ ꓞꓺ ꓗꓴ. ꓙꓳˍ ꓟ ꓢꓲꓹ ꓜꓲ꓾ ꓦꓲꓻ ꓘꓴ: ꓗꓪ ꓔꓬ ꓢꓲ ꓠꓬꓲ ꓟꓬꓱ: ꓬꓰ ꓠꓹ ꓟ꓾ꓢꓯꓼ ꓕꓵꓼ ꓠ ꓗꓹ ꓡꓳ=
ꓖꓳ ꓟ ꓡꓰ ꓐꓰ ꓤ ꓠꓱ ꓤ ꓔꓬ ꓢꓴ ꓥ ꓟꓲ ꓟꓬ ꓠꓬꓲ ꓙꓳꓺ ꓗ ꓠ ꓗꓹ ꓡꓳ= ꓤ ꓠꓱ ꓤ ꓐꓴ ꓠꓬ ꓞꓳ ꓪꓴ ꓢꓲ ꓟ: ꓞꓲ ꓬꓲ ꓧꓪ ꓖꓳ ꓓꓱ ꓗꓪ ꓓꓳ ꓡ ꓟ ꓞꓺ ꓢꓯꓼ ꓟꓬꓹ ꓡꓳ=ꓖꓳ ꓡꓱ ꓠꓬꓲ ꓐꓹ ꓐ ꓟꓹ ꓟ ꓐꓴ ꓣꓳ ꓤ ꓠꓱ ꓤ ꓐꓴ ꓔꓯ ꓟꓬ ꓠꓬꓲ ꓡꓳ. ꓠꓬꓲ ꓢꓲ ꓗꓪ ꓫꓵ ꓠ ꓗꓹ ꓡꓳ= ꓮ ꓟꓶ ꓞꓺ ꓝꓲ. ꓛꓲ ꓡ ꓕꓯ ꓣꓳ ꓡꓲ- ꓢꓴ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵ ꓚꓲ ꓛꓬ ꓔꓱ ꓚꓲ ꓛꓬ ꓙꓴ ꓗ ꓗꓴ. ꓐ ꓡ ꓢꓲ ꓞꓺ ꓝꓲ. ꓕꓱ ꓟ ꓔꓯ ꓐꓲ ꓐꓲ ꓜꓲꓼ ꓜꓲꓼ ꓡꓰ ꓗꓳ. ꓙ ꓙꓰ ꓐ ꓡ ꓝꓲ ꓐꓰ ꓣꓦꓮ ꓡꓲ-ꓢꓴ ꓗꓪ ꓐꓰ ꓢꓯꓼ ꓖꓶ ꓩꓴ ꓡ ꓥꓳ=