ꓮ ꓟꓴꓽ ꓛꓲ ꓓꓴ ꓪꓳꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓮ ꓟꓴ ꓛꓲ ꓓꓴ ꓪꓳꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡꓢ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ= ꓮ ꓟꓴꓽ ꓛꓲ ꓓꓴ ꓪꓳꓽ ꓘꓴꓽ ꓗꓪ ꓝꓲꓐꓰꓣ ꓢꓯꓼ꓾ ꓚꓮꓡꓚꓲꓴꓟ꓾ ꓲꓣꓳꓠ ꓢꓯꓼ꓾ ꓑꓳꓔꓮꓢꓢꓲꓴꓟ꓾ ꓦꓲꓔꓮꓟꓲꓠ ꓮ꓾ ꓦꓲꓔꓮꓟꓲꓠ ꓚ꓾ ꓦꓲꓔꓮꓟꓲꓠ ꓐ2 ꓐꓴ ꓐˍ ꓟ ꓥ ꓡꓳ=

ꓮ ꓟꓴꓽ ꓛꓲ ꓓꓴ ꓪꓳꓽ ꓠꓬ ꓮ ꓡꓰ ꓐꓰ ꓙꓲꓻ ꓖꓴ ꓙꓳˍ ꓡ?

(1) ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ꓾

ꓮ ꓟꓴꓽ ꓛꓲ ꓓꓴ ꓪꓳꓽ ꓠꓬ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡ ꓝꓲ ꓢꓲ ꓠꓲꓹ ꓟ ꓓꓵꓽ ꓙ ꓟꓬꓽˍ ꓟ ꓔꓯ ꓠꓲꓹ ꓡꓰ ꓝꓲˍ ꓟ ꓪꓴꓸ ꓠꓬꓲ ꓮ ꓫꓵꓽ ꓬꓰˍ ꓟꓲ ꓠꓲꓹ ꓟ ꓙꓳ ꓙꓳ ꓡꓰꓽ ꓬꓰ ꓐ ꓡ ꓢꓲ ꓟꓶ ꓤ ꓚꓲꓸ ꓟꓶ ꓡꓰ ꓝꓲˍ ꓟ ꓗꓪ ꓔꓳꓹ ꓙ ꓐ ꓡˍ ꓡꓳ= ꓮ ꓟꓴꓽ ꓛꓲ ꓓꓴ ꓪꓳꓽ ꓗꓪ ꓙꓳˍ ꓟ ꓮꓢꓲꓮꓔꓲꓚ ꓮꓚꓲꓓ ꓠꓬ ꓓꓵꓽ ꓙ ꓟꓬꓽˍ ꓟ ꓔꓯ ꓠꓲꓸ ꓡꓰ ꓝꓲ ꓢꓲ ꓪꓴꓸ ꓠꓶꓸ ꓟꓬꓱꓽ ꓬꓰˍ ꓟ ꓗꓪ ꓙꓲꓻ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ=

(2) ꓠꓲꓹ ꓟ ꓪꓴꓽ ꓧꓶˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾

ꓮ ꓟꓴꓽ ꓛꓲ ꓓꓴ ꓪꓳꓽ ꓗꓪ ꓙꓲꓻ ꓖꓴ ꓙꓳˍ ꓟ ꓝꓮꓲ ꓕꓲ ꓫꓵꓽ ꓠꓬ ꓪꓴꓸ ꓠꓶꓸ ꓟꓬꓱꓽ ꓬꓰˍ ꓟ ꓔꓯ ꓔꓲꓺ ꓟꓴꓸ ꓗꓷ ꓡꓰ ꓝꓲ ꓢꓲ ꓕꓲ ꓠꓬꓲ ꓡꓱꓸꓼ ꓗꓪ ꓔꓳꓹ ꓜꓳꓽ ꓪˍ ꓟ ꓓꓵꓽ ꓙ ꓪꓴꓽ ꓧꓶˍ ꓟ ꓔꓯ ꓜꓲꓽ ꓐ ꓡ ꓠꓹ ꓟ ꓐꓱ ꓶ ꓬꓰ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ ꓠꓲꓹ ꓟ ꓪꓴꓽ ꓧꓶˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ=

(3) ꓠꓲꓹ ꓟ ꓟꓽ ꓙꓬ ꓡꓰ ꓠꓹ ꓟ ꓬꓰ ꓙ ꓖꓶˍ ꓡꓳ꓾

ꓠꓲꓹ ꓟ ꓟꓽ ꓙꓬ ꓡꓰ ꓠ ꓗꓽ ꓕ ꓓꓴ ꓐꓱ ꓶ ꓮ ꓟꓴꓽ ꓛꓲ ꓓꓴ ꓪꓳꓽ ꓔꓯ ꓜꓽ ꓐ ꓡˍ ꓟ ꓥ ꓡꓳ= ꓠꓲꓹ ꓟ ꓙꓬ ꓔꓬ ꓢꓴ ꓐꓴ ꓔꓯ ꓠꓲꓹ ꓟ ꓙꓬˍ ꓟ ꓗꓪ ꓐꓰ ꓢ ꓡꓰ ꓓꓴ ꓐꓱ ꓶˍ ꓟꓲ ꓮ ꓟꓴꓽ ꓛꓲ ꓓꓴ ꓪꓳꓽ ꓜꓽ ꓠꓯꓹ ꓟ ꓥ ꓡꓳ=

(4) ꓫꓵꓽ ꓚꓳˍ ꓟ ꓔꓯ ꓙꓲꓻ ꓖꓴ ꓖꓶˍ ꓡꓳ꓾

ꓮ ꓟꓴꓽ ꓛꓲ ꓓꓴ ꓪꓳꓽ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓟ ꓫꓵꓽ ꓙꓴꓽ ꓐꓴ ꓔꓯ ꓚꓳꓻ ꓙꓰˍ ꓟ ꓗꓪ ꓢꓻ ꓡꓰ ꓓꓴ ꓐꓱ ꓶ ꓬꓰ ꓙ ꓖꓶ ꓐ ꓡˍ ꓡꓳ= ꓟꓶ ꓤ ꓠꓻ ꓔꓬ ꓟ ꓛꓲ ꓒꓯꓹ ꓫꓵꓽ ꓙꓴꓽ ꓠꓻ ꓠꓻ ꓔꓬ ꓢꓴ ꓐꓱ ꓶˍ ꓟꓲ ꓫꓵꓽ ꓬꓲˍ ꓟ ꓔꓯ ꓟꓬꓽ ꓠꓬꓲ ꓔꓳꓹ ꓙ ꓐ ꓡˍ ꓡꓳ꓾ ꓐꓰ ꓠꓯ ꓞꓲꓼ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓡꓰ ꓐꓯ ꓑꓶ ꓔ ꓡꓳ= ꓫꓵꓽ ꓬꓲˍ ꓟ ꓫꓵꓽ ꓚꓳ ꓙꓰˍ ꓟ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟ ꓪꓴꓸ ꓠꓬꓲ ꓠꓲꓹ ꓟ ꓫꓵꓽ ꓙꓴꓽ ꓣꓳˍ ꓟ꓾ ꓞꓼ ꓐꓰ ꓠꓲꓹ ꓟ ꓠꓽ ꓡꓰ ꓟ ꓟꓽ ꓒꓬꓱꓼ ꓡꓰ ꓠꓹ ꓟ ꓐꓱ ꓶ ꓬꓰ ꓙ ꓖꓶˍ ꓟ ꓥ ꓡꓳ=

(5) ꓫꓵꓽ ꓓꓯꓻ ꓠꓻ ꓔꓯ ꓥˍ ꓟꓲ ꓞꓰ ꓡꓰ ꓝꓲˍ ꓟ ꓥ ꓡꓳ꓾

ꓮ ꓟꓴꓽ ꓛꓲ ꓓꓴ ꓪꓳꓽ ꓕꓲ ꓒꓬꓱꓽ ꓡꓰ ꓕꓲ ꓒꓬꓽ ꓔꓯ ꓖꓪꓽ ꓜꓽˍ ꓟ꓾ ꓥ ꓠꓬ꓾ ꓬꓲ ꓪꓳꓽ ꓬꓲꓻ ꓫꓬꓹ ꓗꓷ ꓢꓲ ꓤꓲ ꓖꓴ 3 ꓤꓲ ꓖꓴ (3 ꓮ ꓙꓴ) ꓓꓳꓻ ꓖꓶˍ ꓟ ꓗꓪ ꓐꓰ ꓫꓵꓽ ꓓꓯꓻˍ ꓟ ꓔꓯ ꓞꓰ ꓡꓰ ꓝꓲˍ ꓡꓳ= ꓫꓵꓽ ꓘꓴꓽ ꓗꓪ ꓟ ꓬꓲꓸ ꓓꓳꓼ ꓐꓴ ꓔꓯ ꓥˍ ꓟꓲ ꓫꓬ ꓡꓰ ꓝꓲ ꓢꓲ꓾ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓟ ꓪꓴꓸ ꓠꓬꓲ ꓓꓲꓮꓐꓰꓔꓰꓢ ꓠꓻ ꓔꓯ ꓥˍ ꓟꓲ ꓗꓽ ꓕꓸ ꓐ ꓡˍ ꓟ ꓥ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓠꓱꓸ ꓐꓯ ꓙꓲꓻ ꓖꓴ ꓥˍ ꓟꓲ ꓮ ꓟꓬꓹ ꓙꓳˍ ꓢꓰꓽ ꓟ ꓥꓳ= ꓠꓻ ꓓꓴ ꓬꓲ ꓑ ꓐꓴ ꓔꓯ ꓞꓼ ꓞꓼ ꓟꓲ ꓡꓰ ꓠꓹ ꓟ꓾ ꓓꓻ ꓡꓰ ꓝꓲ ꓠꓹ ꓟ ꓢꓯꓼ ꓥˍ ꓟꓲ ꓙꓳˍ ꓡꓳ= ꓠꓻ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓖꓶ ꓐ ꓡˍ ꓟ ꓢꓯꓼ ꓙꓳˍ ꓟ ꓥ ꓡꓳ=