ꓮ-ꓠꓬꓲꓽ-ꓦꓰꓼ-ꓟ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓗꓪ ꓠꓬ ꓬꓲ ꓢꓶꓽ ꓗꓳꓹˍ ꓟ ꓐꓰ ꓬꓲ ꓢꓶꓽ ꓠꓬꓼ ꓡꓯꓼ ꓠꓬꓲꓽ ꓙꓰꓽ ꓙꓳˍ ꓟ ꓥ ꓢꓲ꓾ ꓬꓲ ꓢꓶꓽ ꓗꓪ ꓙꓳˍ ꓟ ꓧꓪꓽ ꓖꓳ ꓓꓱꓽ ꓔꓯ ꓙꓲꓻ ꓓꓴ ꓖꓶˍ ꓟ ꓬꓲ ꓢꓯꓼ ꓠꓬ ꓕꓲ ꓡꓰꓹ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓲꓹ ꓢꓶꓽ ꓕꓱ ꓟ ꓔꓯ ꓬꓲ ꓟꓲꓺ ꓡꓰꓽ ꓟꓽ ꓞꓲꓺ ꓬꓲ ꓢꓶꓽ ꓡꓯꓸ ꓟ ꓔꓯˍ ꓟꓲ ꓚꓬꓸ ꓢꓲ ꓪꓳꓽ ꓒꓬꓽ ꓫꓬꓹ ꓜꓽˍ ꓟˍ ꓟꓲ ꓬꓰ ꓙꓲꓻˍ ꓟ ꓥ ꓢꓲ ꓬꓲ ꓢꓶꓽˍ ꓡꓰꓽ ꓟꓽ ꓞꓲꓺ ꓬꓲ ꓠꓲꓹ ꓟ ꓔꓯˍ ꓟꓲ ꓚꓬꓸ ꓢꓲ ꓜꓽ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓮ ꓔꓳꓸ ꓗꓪ ꓞꓴ ꓢꓲꓸˍ ꓟꓲ ꓜꓽ ꓐ ꓡˍ ꓟ ꓥ ꓡꓳ=

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓗꓪ Protein ꓢꓯꓼ꓾ Carbohydrates ꓐꓰ ꓬꓲ ꓞꓶꓻ ꓢꓯꓼ (Fat)꓾ Fiber ꓢꓯꓼ꓾ ꓬꓲꓻ ꓙꓬ ꓢꓯꓼ꓾ Vitamin ꓐꓰ Minerals ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓞꓳ ꓤ ꓧꓪꓽ ꓖꓳ ꓓꓱꓽ ꓙꓲꓻ ꓓꓴ ꓐꓱ ꓶ ꓮ ꓟꓬꓹ ꓔꓳꓹ ꓙ ꓖꓶ ꓐ ꓡˍ ꓡꓳ=

ꓝꓮꓲ ꓮ ꓠꓬꓲꓽ ꓦꓰꓼ ꓟ ꓢꓶꓽ ꓗꓪ ꓢꓲꓹ ꓢꓶꓽ ꓐꓴ ꓗꓪ ꓐꓰ ꓟꓶˍ ꓟ Fratos ꓢꓯꓼ ꓐꓰ Sucrose ꓐꓯˍ ꓟ ꓞꓼ ꓛꓵ ꓢꓯꓼ ꓐꓹ ꓟ ꓑꓶꓸ ꓓꓴ꓾ ꓢꓲꓹ ꓢꓶꓽ ꓕꓱ ꓟ ꓜꓽ ꓗꓷ ꓕꓯ ꓡꓰ ꓖꓳ ꓓꓱꓽ ꓗꓪ ꓢꓷꓸ ꓢꓷꓸ ꓡꓰ ꓢꓯꓼ ꓙꓳ ꓡˍ ꓡꓳ꓾ ꓐꓰ ꓐꓯ ꓔ ꓡꓳ=

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓗꓪ Vitamin C, E ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓪꓽ ꓠꓬꓲ ꓡ ꓝꓲ ꓢꓲ꓾ ꓧꓪꓽ ꓗꓴꓹ ꓙꓲꓻ ꓔꓯ ꓥˍ ꓟꓲ ꓐꓲ ꓡ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓝꓮꓲ ꓠꓬ ꓮ ꓠꓬꓲꓽ ꓦꓰꓼ ꓟ ꓢꓶꓽ ꓗꓪ Magnesium ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ Calcium ꓢꓯꓼ ꓛꓵꓼ ꓣꓴˍ ꓟ ꓔꓯ ꓢꓯꓼ ꓖꓶˍ ꓟ ꓪꓴꓸ ꓠꓬꓲ ꓪꓳꓽ ꓔꓳ ꓐꓴ ꓔꓯ ꓕꓶꓺ ꓡꓰ ꓝꓲˍ ꓡꓳ=

Potassium ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓫꓵꓽ ꓢꓯꓼ ꓔꓯ ꓔꓲ ꓟꓴꓸˍ ꓗꓷ ꓡꓰ ꓝꓲ ꓢꓲ꓾ ꓞꓼ ꓐꓰ ꓫꓵꓽ ꓓꓯˍ ꓟ ꓫꓵꓽ ꓢꓯꓼ ꓬꓯꓼ ꓞꓰꓻ ꓡꓰˍ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲ ꓢꓲ꓾ ꓠꓲꓹ ꓟ ꓔꓬ ꓢꓻ ꓓꓴ ꓐꓱ ꓶ ꓬꓰ ꓙ ꓖꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ Iron ꓥ ꓟꓲ ꓙꓳˍ ꓟ ꓑꓶꓸ ꓓꓴ ꓫꓵꓽ ꓢꓯꓼ ꓠꓲꓸˍ ꓟ ꓔꓯˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓬꓲ ꓠꓲꓹ ꓟ ꓔꓯ ꓚꓬꓸ ꓜꓽˍ ꓕꓯ Protein꓾ Potassium꓾ Calcium꓾ꓐꓰ Iron ꓢꓯꓼ ꓥˍ ꓟꓲ ꓬꓲ ꓢꓶꓽ ꓜꓽˍ ꓟ ꓢꓶꓸ ꓟꓽ ꓞꓲꓺ ꓪ ꓜꓲ ꓟꓶˍ ꓡꓳ꓾ ꓐꓰ ꓮ ꓠꓬꓲꓽ ꓦꓰꓼ ꓟ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓟꓳꓸ ꓐꓳ ꓔ ꓟ ꓕꓳ ꓶ ꓕꓲ ꓟ ꓗꓪ ꓐꓯ ꓟꓸ ꓖꓶ ꓔ ꓡꓳ=

ꓡꓳꓹ ꓬꓰˍ ꓗꓪ ꓐꓯ ꓖꓶ ꓠꓲꓹ ꓫꓵˍ ꓟ ꓠꓬ ꓮ ꓠꓬꓲꓽ ꓦꓰꓼ ꓟ ꓢꓶꓽ ꓠꓬ ꓞꓼ ꓛꓵ ꓢꓯꓼ ꓮ ꓟꓬꓹ ꓙꓳ ꓢꓲ ꓛꓵˍ ꓟ ꓑꓶꓸ ꓓꓴ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓐꓴ ꓟꓽ ꓜꓽ ꓠꓬ ꓪ ꓜꓲ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓮ ꓠꓬꓲꓽ ꓦꓰꓼ ꓟ ꓢꓶꓽ ꓔꓯ ꓜꓽˍ ꓕꓯ ꓬꓲ ꓙꓲꓻ ꓖꓪꓽ ꓜꓽ ꓠ ꓗꓹ ꓡꓳ= ꓞꓼ ꓞꓼ ꓐꓰ ꓮ ꓟꓬꓹ ꓜꓽˍ ꓕꓯ ꓠꓽ ꓦꓰꓽ ꓛꓲꓽ ꓗꓪ ꓙꓲꓺ ꓟꓽ ꓐ ꓡ ꓟ ꓢꓲ ꓔꓬꓹ ꓫꓸ ꓡ ꓗꓴꓸˍ ꓡꓳ=

ꓝꓮꓲꓼ ꓦꓰꓽ ꓛꓲꓽ ꓠꓻ (ꓦꓰꓼ ꓟ ꓠꓻ) ꓙꓳ ꓢꓴ ꓐꓴˍ ꓟꓲ ꓮ ꓟꓬꓹ ꓜꓽ ꓟꓽ ꓓꓻ꓾ ꓐꓰ ꓢꓷꓸ ꓪ ꓡꓳ=