ꓮ. ꓠꓳ(ꓮ ꓠꓳ.) ꓔꓶꓺ ꓚꓱ,

ꓮꓸ ꓠꓳ ꓬꓲ ꓚꓰꓺ ꓔꓶ ꓖꓴ ꓠꓬ ꓮ-ꓟꓯ-ꓣꓲ-ꓗ ꓖꓴ ꓟꓶꓸ ꓕꓲ ꓛꓱꓽ ꓐꓰ ꓔꓱꓹ ꓫꓵꓺ ꓕꓲ ꓔꓳꓸ ꓗꓪ ꓐꓰ ꓥ ꓡꓳ= Red Indian ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓜꓽ ꓫꓵꓽ ꓥ ꓟ ꓘꓶꓽ ꓢ (ꓳ ꓢ) ꓐꓰ ꓮꓸ ꓠꓳ ꓬꓲ ꓫꓵꓽ ꓬꓲ ꓙꓰꓽ ꓜꓽˍ ꓟ ꓥ ꓡꓳ= ꓮ-ꓟꓯ-ꓣꓲ-ꓗ ꓗꓴꓷꓼ ꓗꓪ Europe ꓗꓴꓷꓼ ꓢꓴ ꓐꓴ ꓓꓵꓽ ꓡ ꓢꓲ ꓮꓸ ꓠꓳ ꓕꓱ ꓟ ꓔꓯ ꓢꓷꓸ ꓡꓰ ꓕꓯ ꓬꓲ ꓪ ꓐꓴ ꓡꓰ Europe꓾ Africa ꓐꓰ Asia ꓗꓪ ꓟ ꓗꓴꓷꓼ ꓐꓴ ꓗꓪ ꓮꓸ ꓠꓳ ꓫꓵꓸ ꓔꓯ ꓔꓶꓺ ꓒꓬꓱꓻ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓮꓸ ꓠꓳ ꓔꓯ ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓐꓰ ꓟꓲ ꓠꓯ ꓗꓴꓷꓼ ꓐꓴ ꓗꓪ ꓔꓶꓺ ꓔꓬ ꓟ ꓥ ꓡꓳ=

ꓬꓲ ꓜꓲ ꓔꓯ ꓡꓳꓸ ꓢꓲ ꓠꓬꓲ ꓬꓲ ꓜꓲ ꓬꓲ ꓝꓳꓽ ꓔꓯ 3 ꓫꓵꓽ ꓢꓷꓸ ꓪ ꓓꓹ ꓡꓳ= ꓬꓲ ꓜꓲ ꓱˍ ꓟ꓾ ꓬꓲ ꓜꓲ ꓟꓴˍ ꓟ ꓐꓰ ꓬꓲ ꓜꓲ ꓓ ꓞꓳꓹ ꓖꓶˍ ꓟ ꓐꓯ ꓢꓲ 3 ꓫꓵꓽ ꓙꓳˍ ꓟ ꓥꓳ= ꓖꓳ ꓡꓱ ꓥˍ ꓟꓲ ꓟꓬꓽ ꓠꓬꓲ ꓠꓬ ꓢꓲꓹ ꓑꓳ ꓬꓲ ꓝꓳꓽ ꓐꓰ ꓬꓲ ꓜꓲ ꓓꓻ ꓞꓳꓹ ꓖꓶˍ ꓟ ꓬꓲ ꓝꓳꓽ ꓐꓯ ꓢꓲ ꓠꓬꓲꓽ ꓫꓵꓽ ꓘꓶꓽ ꓔ ꓡꓳ= ꓕꓱ ꓠꓬꓲꓽ ꓫꓵꓽ ꓘꓴꓽ ꓗꓪ ꓡꓰꓽ ꓬꓲ ꓕꓴꓽ ꓔꓯ ꓡꓳꓸ ꓢꓲ ꓠꓬꓲ ꓬꓲ ꓕꓴꓽ ꓡꓴꓸˍ ꓟ꓾ ꓬꓲ ꓕꓴꓽ ꓛꓬꓯꓸˍ ꓟ꓾ ꓬꓲ ꓕꓴꓽ ꓠꓬꓱꓸˍ ꓟ꓾ ꓬꓲ ꓕꓴꓽ ꓫꓵˍ ꓟ꓾ ꓬꓲ ꓠꓲꓹ ꓛꓵꓼ꓾ ꓬꓲ ꓧꓪꓽ ꓧꓪꓼ꓾ ꓬꓲ ꓠꓲꓺ ꓠꓲꓺ ꓕꓱ ꓟꓬ ꓫꓵꓽ ꓙꓳˍ ꓟ ꓥ ꓡꓳ=

ꓮ ꓠꓳꓸ ꓔꓯ ꓟꓵꓽ ꓘꓳꓼ ꓟꓽ ꓢꓲꓺ ꓢꓲꓺ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓒꓬꓱꓼ ꓡ ꓓˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓜꓲ ꓪꓴꓽ ꓡ ꓠꓹ ꓟ ꓐꓰ ꓬꓲ ꓕꓴꓽ ꓮ ꓟꓬꓹ ꓓꓱꓼ ꓡ ꓓꓴ ꓐꓱ ꓶ ꓠꓬ ꓟꓵꓽ ꓘꓳꓼ ꓙꓬˍ ꓟ ꓗꓪ ꓔꓶ ꓠꓯꓹ ꓡꓳ= ꓟꓶꓽ ꓛ ꓮ ꓘꓶꓸ ꓛ (ꓥ ꓠꓬ) ꓟꓶꓽ ꓦ ꓡꓲꓺ ꓟꓬꓽˍ ꓕꓯ ꓠꓽ ꓬꓲ ꓪꓰꓻ ꓬꓲ ꓢꓶꓽ ꓞꓰꓻ ꓡꓰ ꓗꓴˍ ꓡꓳ=

ꓔꓶ ꓓꓴ ꓐꓱ ꓶ ꓙ ꓖꓶˍ ꓕꓯ ꓬꓲ ꓟꓲ ꓧꓶꓸ ꓕꓯ ꓘꓪꓺ ꓗꓷ ꓢꓲ ꓩꓲꓸ-ꓛꓲꓻ ꓟꓵꓽ ꓛꓵꓽ ꓧꓳꓽ ꓖꓶ ꓗꓷ= ꓗ ꓠꓯꓸ ꓬꓲ ꓫꓵꓸ ꓫꓵꓸ ꓗꓷ= ꓬꓲ ꓫꓵꓸ ꓫꓵꓸˍ ꓕꓯ ꓬꓲ ꓙꓬꓻ ꓢꓯꓼ ꓮ ꓟꓬꓹ ꓙꓳˍ ꓠꓬ ꓬꓲ ꓫꓵꓸ ꓛꓵꓽ ꓡꓰ ꓗꓴˍ ꓡꓳ= ꓬꓲ ꓫꓵꓸ ꓠꓬ ꓩꓲꓸ-ꓛꓲꓻ ꓐꓰ ꓕꓲꓺ ꓡꓰ ꓕꓯ ꓛꓵꓽ ꓡꓰ ꓢˍ ꓟ ꓪꓴꓸ ꓠꓬꓲ ꓬꓲ ꓫꓵꓸ ꓔꓶꓺ ꓗꓷ ꓢꓲ ꓬꓲ ꓫꓵꓸ ꓐꓰ ꓩꓲꓸ-ꓛꓲꓻ ꓟꓽ ꓕꓲꓺ ꓡꓰ ꓠ ꓬꓲ ꓫꓵꓸ ꓕꓲ ꓚꓳꓺ ꓡꓳ ꓗꓪ ꓡꓰꓽ ꓩꓲꓸ-ꓛꓲꓻ ꓧꓳꓽ ꓖꓶ ꓠ ꓗꓹ ꓡꓳ= ꓬꓲ ꓜꓲ ꓓꓻ ꓞꓳꓹ ꓖꓶˍ ꓟ ꓬꓲ ꓝꓳꓽ ꓔꓯ ꓕꓲ ꓚꓬꓸ ꓐꓰ ꓕꓲ ꓚꓬꓸ 3' ꓗꓶꓹ ꓶꓽ ꓢꓲ꓾ ꓕꓲ ꓜꓲ ꓐꓰ ꓕꓲ ꓜꓲ 9” ꓗꓶꓹ ꓶꓽ ꓢꓲ ꓔꓶ ꓖꓶ ꓠꓯꓹ ꓡꓳ= ꓬꓲ ꓜꓲ ꓔꓲꓺ ꓗꓪ ꓬꓲ ꓓꓻ ꓞꓳꓹ ꓖꓶ ꓠꓯꓹ ꓡꓳ= ꓬꓲ ꓓꓻ ꓟꓽ ꓙꓳ ꓟ ꓟꓵꓽ ꓗꓪ ꓠꓬ ꓘꓶꓽ ꓢ ꓟꓲ ꓗꓪ ꓔꓶˍ ꓡꓳ= ꓖꓳ ꓡꓱ ꓔꓶ ꓖꓶˍ ꓟ ꓪꓴꓸ ꓠꓬꓲ ꓬꓲ ꓜꓲ ꓠꓬ ꓘꓶꓽ ꓢ ꓜꓲ ꓗꓪ ꓚ ꓓꓯꓻ ꓙꓰˍ ꓠꓬꓲ ꓬꓲ ꓓꓻ ꓔꓶꓺ ꓖꓶꓽ ꓟꓽ ꓛꓵ=

ꓢꓲꓹ ꓑꓳ ꓝꓳꓽ ꓔꓯ ꓕꓲ ꓚꓬꓸ ꓐꓰ ꓕꓲ ꓚꓬꓸ 2' ꓾ ꓕꓲ ꓜꓲ ꓐꓰ ꓕꓲ ꓜꓲ 2' ꓗꓶꓹ ꓶꓽ ꓢꓲ ꓔꓶˍ ꓡꓳ= ꓟꓶꓽ ꓦ ꓦˍ ꓟ ꓬꓲ ꓙꓵꓹ ꓗꓪ ꓠꓬ 6 ꓦ ꓐꓰ 9 ꓦ ꓗꓪ ꓛꓲꓺ ꓔꓶꓺ ꓐ ꓡˍ ꓟ ꓥ ꓢꓲ꓾ ꓝꓮꓲ ꓕꓲ ꓧꓪꓹ ꓠꓬ 1 ꓦ ꓗꓪ ꓐꓰ 2 ꓦ ꓗꓪ ꓛꓲꓺ ꓔꓶꓺ ꓐ ꓡˍ ꓟ ꓥ ꓡꓳ= ꓪꓽ ꓚꓲꓺ ꓟꓵꓽ ꓗꓪ ꓠꓬ 3 ꓦ ꓗꓪ ꓐꓰ 5 ꓦ ꓓꓵꓽ ꓡˍ ꓗꓪ ꓛꓲꓺ ꓔꓶˍ ꓡꓳ= ꓟꓵꓽ ꓘꓳꓼ ꓮ ꓘꓶꓸ ꓟꓽ ꓛꓺ ꓟꓽ ꓙꓬꓻ ꓟ ꓟꓵꓽ ꓗꓪ ꓠꓬ ꓕꓲ ꓘꓳꓼ ꓡꓱꓸꓼ ꓔꓶꓺ ꓐ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓛ ꓝꓲ ꓕꓯ ꓔꓶˍ ꓠꓬ ꓬꓲ ꓢꓶꓽ ꓮ ꓟꓬꓹ ꓟꓽ ꓓꓱꓼ=

ꓮꓸ ꓠꓳ ꓜꓲ ꓣꓳ ꓓˍ ꓕꓯ ꓟꓳꓼ ꓜꓲ ꓫꓵꓸ ꓜꓲ ꓣꓱꓻ ꓡ ꓠꓬ ꓚꓵꓹ ꓡꓲꓸ ꓖꓶ ꓗꓷ꓾ ꓬꓲ ꓓꓻ ꓞꓳꓹ ꓖꓶ ꓗꓷ ꓗ ꓠꓯꓸ ꓕꓯ ꓚꓵꓹ ꓡꓲꓸ ꓖꓶ ꓫꓸ ꓡꓳ= ꓮꓸ ꓠꓳ ꓜꓲ ꓬꓲ ꓚꓰꓺ ꓔꓯ ꓟꓽ ꓕꓲꓺ ꓡꓰ ꓠ ꓤ ꓟꓳ ꓠ ꓔ ꓥ= ꓮꓸ ꓠꓳ ꓜꓲ ꓚꓰꓺ ꓗꓪ Nitrogen ꓢꓯꓼ ꓚꓵꓹ ꓣꓴ ꓐ ꓡˍ ꓟ ꓐꓶꓽ ꓓꓲꓻ ꓕꓲ ꓙꓰꓽ ꓔꓬ ꓡꓳ꓾ ꓐꓶ ꓓꓲꓻ ꓖꓳ ꓟ ꓠꓬ ꓬꓲ ꓜꓲ ꓐꓱ ꓶ ꓣꓱꓽ ꓞꓹ ꓟ Nitrogen ꓢꓯꓼ ꓖꓶ ꓐ ꓡˍ ꓟ ꓪꓴꓸ ꓠꓬꓲ ꓬꓲ ꓚꓰꓺ ꓔꓯ ꓟꓽ ꓕꓲꓺ ꓡꓰ ꓠ ꓤ ꓟꓳ ꓠ ꓔ ꓟ ꓥ ꓡꓳ=

ꓮꓸ ꓠꓳ ꓜꓲ ꓠꓬ ꓟꓵꓽ ꓘꓳꓼ ꓛˍ ꓟ ꓗꓪ ꓔꓶꓺ ꓒꓬꓱꓼ ꓡ ꓓˍ ꓐꓯ ꓥ ꓟꓲ ꓬꓲ ꓟꓲꓺ ꓮ ꓘꓶꓸ ꓙꓴꓺ ꓡꓰ ꓕꓯ ꓠꓽ ꓬꓲ ꓙꓬꓻ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓜꓲ ꓗꓪ ꓬꓲ ꓪꓰꓻ ꓪꓰ ꓡ ꓗ ꓠꓯ 2 ꓠꓽ 3 ꓠꓽ ꓙꓳ ꓡˍ ꓕꓯ ꓬꓲ ꓕꓴꓽ ꓧꓼ ꓓ ꓡꓺꓳ=

ꓬꓲ ꓫꓵꓸ ꓫ ꓓꓴ ꓐꓱ ꓶ ꓶꓼ ꓫˍ ꓕꓯ ꓬꓲ ꓜꓲ ꓗꓪ ꓬꓲ ꓕꓴꓽ ꓙꓴꓺ ꓡˍ ꓕꓯ ꓧꓼ ꓫ ꓗꓷ ꓠꓯꓹ ꓡꓳ= ꓕꓲ ꓐꓱ ꓠꓬ ꓬꓲ ꓜꓲ ꓚꓵꓹ ꓗꓷ ꓢꓲ ꓟꓶꓽ ꓛ ꓗꓪ ꓡꓱꓸ ꓗꓷ ꓢꓲ ꓠꓬꓲ ꓬꓲ ꓕꓴꓽ ꓧꓼ ꓫˍ ꓟ ꓙꓳˍ ꓡꓳ= ꓙꓴꓺ ꓡꓰ ꓟ ꓮꓸ ꓠꓳ ꓕꓴꓽ ꓔꓯ ꓬꓲ ꓗꓴꓹ ꓙꓲꓻ ꓟꓽ ꓕꓵꓼ ꓕꓵꓼ ꓫ ꓗꓷ ꓢꓲ ꓔꓶ ꓝꓲ ꓛꓲꓺ ꓡˍ ꓕꓯ ꓬꓲ ꓫꓵꓸ ꓢꓶꓽ ꓣꓴ ꓢꓲ ꓔꓶ ꓐ ꓡˍ ꓡꓳ= ꓟꓬꓽ ꓠꓬꓲ ꓠꓬ ꓮꓸ ꓠꓳ ꓢꓶꓽ ꓣꓴ ꓗꓷ ꓢꓲ ꓟꓶꓽ ꓛ ꓢꓯꓼ ꓗꓪ ꓡꓱꓸ ꓗꓷ ꓢꓲ ꓫˍ ꓡꓳ=