ꓑꓴ-ꓡꓴ. ꓡꓳ ꓖꓪ ꓟ ꓗꓪ ꓮ ꓘꓶ. ꓟꓬꓱꓺ ꓓꓳꓽ ꓙꓳ ꓢꓴ David Backham ꓚꓱ,

ꓑꓴ-ꓡꓴ. ꓡꓳ ꓖꓪ ꓟ ꓗꓪ ꓮ ꓘꓶ. ꓟꓬꓱꓺ ꓓꓳꓽ ꓙꓳ ꓢꓴ David Backham ꓚꓱ, (David Backham)

ꓬꓲ ꓠꓬ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓟ ꓑꓴ ꓡꓳ ꓖꓪ ꓒꓽ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓟ ꓑꓴ ꓡꓴ. ꓑꓲ ꓒꓽ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ 1975 ꓘꓳꓼ 5 ꓦ ꓟ 2 ꓠꓬꓲ ꓕꓯ ꓰ‐ꓖ‐ꓡ ꓗꓴꓷꓼ Leytonstone London ꓗꓪ ꓦꓵꓻ ꓗꓷꓳ꓿ ꓬꓲ ꓐ, ꓐ ꓟꓬꓱꓺ ꓠꓬ David Edward Alan ꓥ ꓢꓲ ꓠꓬꓲ ꓬꓲ ꓟ, ꓟ ꓟꓬꓱꓺ ꓠꓬ Sandra Georgina ꓥ ꓡꓳ꓿ ꓬꓲ ꓐ, ꓐ ꓟꓬꓱꓽ ꓬꓰ ꓟ ꓔꓲ ꓠꓬ ꓜꓽ ꓜ ꓙꓲ ꓗꓪ ꓟꓬꓱꓽ ꓬꓰ ꓢꓴ ꓥ ꓢꓲ ꓠꓬꓲ ꓬꓲ ꓟ, ꓟ ꓠꓬ ꓳ. ꓞꓱ ꓞꓶꓼ ꓙꓲ ꓗꓪ ꓟꓬꓱꓽ ꓬꓰ ꓢꓴ ꓥ ꓡꓳ꓿ ꓓꓮꓦꓲꓓ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ Chase Lame ꓗꓪ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓳ ꓪ ꓡꓰꓳ꓿ ꓖꓳ ꓗ. ꓠꓯ ꓬꓲ ꓠꓬ Chingford Coundy ꓢꓳꓻ ꓦꓲꓻ ꓗꓪ ꓟꓲ ꓠꓯ ꓕꓳ ꓶ ꓔꓯ ꓢꓳꓻ ꓣꓴ ꓪ ꓡꓰꓳ꓿

ꓖꓳ ꓗ. ꓠꓯ ꓬꓲ ꓠꓬ ꓬꓲ ꓢꓳꓻ ꓦꓲꓻ ꓗꓪ 12 ꓘꓳꓼ ꓙꓳ ꓢꓴ ꓐꓴ ꓑꓲ ꓡꓴ ꓡꓳ ꓖꓪ ꓜꓴꓻ ꓗꓪ ꓬꓲ ꓥ ꓟꓲ ꓐ ꓪ ꓡꓰꓳ꓿ ꓖꓳ ꓗ. ꓠꓯ ꓬꓲ ꓠꓬ Manchester United ꓑꓲ ꓡꓴ ꓡꓳ ꓖꓪ ꓜꓴꓻ ꓗꓪ ꓝꓮ ꓬꓳꓴꓔꓧ ꓚꓴꓑ ꓔꓯ ꓧꓪ. ꓡꓰ ꓠ, ꓟ ꓡꓳ ꓖꓪ ꓖꓶ ꓗꓷꓳ꓿ ꓖꓳ ꓗ. ꓠꓯ 1992 ꓘꓳꓼ ꓕꓯ ꓬꓲ ꓠꓬ ꓞꓲꓼ ꓪꓴꓽ ꓟ ꓟ‐ꓴ ꓑꓲ ꓡꓴ ꓡꓳ ꓖꓪ ꓜꓴꓻ ꓗꓪ ꓐ ꓪ ꓡꓰꓳ꓿ ꓖꓳ ꓕꓲ ꓘꓳꓼ ꓟ ꓕꓲ ꓦ ꓕꓯ ꓬꓲ ꓠꓬ Professional ꓑꓲ ꓡꓴ ꓡꓳ ꓖꓪ ꓠ, ꓟ ꓪꓽ ꓡꓯ ꓘꓳ, ꓗꓷꓳ꓿ ꓖꓳ ꓗ. ꓠꓯ ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓟ‐ꓴ ꓗꓪ ꓑꓲ‐ꓡꓴ ꓡꓳ ꓖꓪ ꓗꓷꓳ꓿ 1995 ꓘꓳꓼ ꓕꓯ ꓬꓲ ꓠꓬ ꓮ ꓘꓶ. ꓟꓲ ꓠꓯ ꓗꓪ ꓟꓬꓱꓽ ꓓꓳꓽ ꓙꓳ ꓟ ꓑꓲ ꓡꓴ ꓑꓲ ꓢꓴ ꓒꓬꓱꓼ ꓡ ꓪ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓬꓲ ꓔꓬ ꓟ ꓰꓠꓖꓡꓮꓠꓓ ꓗꓴꓷꓼ ꓐꓱ ꓶ ꓥ ꓟꓲ ꓑꓲ ꓡꓴ ꓡꓳ ꓖꓪ ꓖꓶ ꓠ, ꓟ ꓐꓱ ꓶ ꓐ ꓪ ꓡꓰꓳ꓿

ꓓꓮꓦꓲꓓ ꓮ ꓘꓶ. ꓢꓯꓼ ꓕꓵꓼ ꓟ ꓪꓴ. ꓠꓬꓲ  1999 ꓘꓳꓼ ꓕꓯ ꓟ‐ꓴ ꓑꓲ‐ꓡꓴ ꓑꓲ ꓜꓴꓻ ꓠꓬ ꓕꓲ ꓘꓳꓼ ꓘꓴꓽ ꓗꓪ ꓫꓵˍ ꓘꓪꓺ ꓢꓽ ꓟ FA Premier League UEFA Champion league ꓪ ꓡꓰ ꓟ ꓥ ꓡꓳ꓿ ꓓꓮꓦꓲꓓ ꓠꓬ ꓟꓲ ꓠꓯ ꓗꓪ ꓑꓲ ꓡꓴ ꓡꓳ ꓖꓪ ꓒꓽ ꓐꓴ ꓠꓯ, ꓗꓪ ꓐꓰ ꓮ ꓘꓶ. ꓟꓬꓱꓺ ꓓꓳꓽ ꓙꓳ ꓢꓴ ꓒꓬꓱꓼ ꓡ ꓡꓳ꓿ ꓬꓲ ꓠꓬ ꓟꓮꓠꓚꓧꓰꓔꓰꓣ ꓴꓠꓲꓔꓰꓓ ꓐꓱ ꓶ (262) ꓢꓶꓽ ꓑꓲ ꓗꓶ ꓗꓷ ꓟ ꓥ ꓡꓳ꓿ 1998 ꓘꓳꓼ ꓕꓯ ꓝꓣꓮꓠꓚꓰ ꓗꓴꓷꓼ ꓗꓪ ꓬꓰ ꓟ ꓪꓳꓣꓡꓓ ꓚꓴꓑ ꓗꓪ ꓡꓳ ꓖꓪ ꓪ ꓡꓰ ꓢꓲ ꓠꓬꓲ ꓕꓲ ꓢꓶꓽ ꓑꓲ ꓗꓶ ꓗꓷꓳ꓿

ꓖꓳ ꓡꓱ ꓥ ꓟꓲ ꓰꓠꓖꓡꓮꓠꓓ ꓑꓲ ꓡꓴ ꓡꓳ ꓖꓪ ꓜꓴꓻ ꓠꓬ ꓟꓽ ꓧꓪ. ꓡꓰ ꓥ ꓟꓲ ꓓꓮꓦꓲꓓ ꓔꓯ ꓡ ꓞꓳ ꓮ ꓟꓬ, ꓠꓲ, ꓠꓵ ꓡꓰ ꓟ ꓥ ꓡꓳ꓿ 1999 ꓘꓳꓼ 6 ꓦ ꓟ 2 ꓕꓯ ꓓꓮꓦꓲꓓ ꓠꓬ Victoria Adams ꓐꓰ ꓡꓯꓽ ꓒꓯ ꓝ. ꓪ ꓡꓰꓳ꓿ ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓬꓲ ꓞꓲ (24) ꓘꓳꓼ ꓙꓳ ꓡꓰ ꓟ ꓥ ꓡꓳ꓿ ꓬꓲ ꓪ ꓠꓬꓲ ꓫꓵ. ꓤ ꓠꓱ (4) ꓣꓳ ꓘꓳ, ꓣꓴ ꓟꓶ ꓡꓰ ꓟ ꓥ ꓡꓳ꓿ ꓓꓮꓦꓲꓓ ꓠꓬ 2000 ꓘꓳꓼ ꓗꓪ ꓰꓠꓖꓡꓮꓠꓓ ꓑꓲ ꓡꓴ ꓡꓳ ꓖꓪ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓕꓲ ꓘꓳꓼ ꓗꓪ ꓰꓠꓖꓡꓮꓠꓓ ꓑꓲ ꓡꓴ ꓜꓴꓻ ꓠꓬ ꓪꓳꓣꓡꓓ ꓚꓴꓑ ꓬꓲ ꓟꓶ 4 ꓜꓴꓻ ꓗꓪ ꓛꓲ ꓡꓰ ꓟ ꓥ ꓡꓳ꓿

2003 ꓘꓳꓼ ꓕꓯ ꓓꓮꓦꓲꓓ ꓠꓬ ꓢꓑꓮꓠꓲꓢꓧ ꓑꓲ ꓡꓴ ꓡꓳ ꓖꓪ ꓜꓴꓻ ꓣꓰꓮꓡ ꓟꓮꓓꓣꓲꓓ ꓗꓪ ꓡꓳ ꓖꓪ ꓗꓷꓳ꓿ ꓓꓮꓦꓲꓓ ꓠꓬ ꓣꓰꓮꓡ ꓟꓲꓓꓣꓲꓓ ꓗꓪ ꓟꓲ ꓠꓯ ꓗꓪ ꓟꓬꓱꓺ ꓓꓳꓽ ꓮ ꓟꓬ, ꓙꓳ ꓟ ꓑꓲ ꓡꓴ ꓡꓳ ꓖꓪ ꓒꓽ ꓐꓴ ꓮ ꓟꓬ, ꓐꓰ ꓕꓲ ꓪ ꓡꓳ ꓖꓪ ꓪ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓣꓰꓮꓡ ꓗꓪ 4 ꓘꓳꓼ ꓡꓳ ꓖꓪ ꓗꓷ ꓢꓲ ꓠꓬꓲ (13) ꓖꓳꓮꓡꓢ ꓑꓲ ꓗꓶ ꓟꓶ ꓡꓰꓳ꓿ ꓓꓮꓦꓲꓓ ꓠꓬ ꓪꓳꓣꓡꓓ ꓚꓴꓑ ꓔꓯ ꓖꓰꓣꓟꓮꓠꓬ ꓬꓲ ꓟꓶ 2006 ꓘꓳꓼ ꓕꓯ ꓡꓳ ꓖꓪ ꓗꓷ ꓟ ꓥ ꓡꓳ꓿ ꓓꓮꓦꓲꓓ ꓠꓬ ꓰꓠꓖꓡꓮꓠꓓ ꓗꓴꓷꓼ ꓐꓱ ꓶ (117) ꓧꓪ ꓡꓳ ꓖꓪ ꓖꓶ ꓗꓷ ꓢꓲ ꓠꓬꓲ (17) ꓖꓳꓮꓡꓢ ꓑꓲ ꓗꓶ ꓗꓷꓳ꓿

2007 ꓘꓳꓼ ꓕꓯ ꓓꓮꓦꓲꓓ ꓠꓬ ꓴꓢꓮ ꓗꓴꓷꓼ ꓗꓪ ꓙꓳ ꓟ ꓟꓮꓙꓳꓣ ꓡꓰꓮꓖꓴꓰ ꓡꓮ ꓖꓮꓡꓮꓫꓬ ꓑꓲ ꓡꓴ ꓡꓳ ꓖꓪ ꓜꓴꓻ ꓗꓪ ꓚꓲ. ꓙꓰꓳ꓿ ꓕꓱ ꓗꓪ ꓬꓲ ꓠꓬ 5 ꓘꓳꓼ ꓛꓲ ꓡꓳ ꓖꓪ ꓖꓶ ꓗꓷꓳ꓿ ꓬꓲ ꓮꓲ ꓖꓮꓡꓮꓫꓬ ꓐꓱ ꓶ (98) ꓧꓪ ꓗꓪ (18) ꓖꓳꓮꓡ ꓑꓲ ꓗꓶ ꓗꓷꓳ꓿ 2013 ꓘꓳꓼ ꓗꓪ ꓓꓮꓦꓲꓓ ꓠꓬ ꓝꓣꓰꓠꓚꓧ ꓗꓴꓷꓼ ꓗꓪ ꓙꓳ ꓟ (ꓑꓢꓖ) ꓑꓲ ꓡꓴ ꓡꓳ ꓖꓪ ꓜꓴꓻ ꓗꓪ ꓚꓲ. ꓙꓰꓳ꓿ ꓑꓢꓖ ꓗꓪ ꓬꓲ ꓠꓬ ꓦ‐ꓐ 5 ꓦ ꓡꓳ ꓖꓪ ꓠ, ꓟ ꓪꓽ ꓡꓯꓽ ꓘꓳ ꓡꓰꓳ꓿ ꓖꓳ ꓡꓱ ꓐꓰ ꓬꓲ ꓠꓬ ꓦ‐ꓐ 5 ꓦ ꓖꓴ ꓡꓰ ꓗ. ꓠꓯ ꓬꓲ ꓠꓬ ꓑꓲ ꓡꓴ ꓡꓳ ꓖꓪ ꓟ ꓗꓪ ꓐꓰ ꓠꓽ ꓡꓰ ꓠ, ꓟ ꓓꓳꓽ ꓐꓯ ꓗꓷꓳ꓿

ꓕꓱ ꓕꓲ ꓘꓳꓼ ꓗꓪ ꓬꓲ ꓠꓬ ꓑꓲ ꓡꓴ ꓡꓳ ꓖꓪ ꓜꓴꓻ ꓕꓲ ꓜꓴꓻ ꓔꓯ ꓪꓴꓽ ꓗꓷ ꓟ ꓥ ꓡꓳ꓿ ꓓꓮꓦꓲꓓ ꓡꓰ ꓫ. ꓕꓱ ꓔ ꓟ ꓠꓬ ꓡ ꓞꓳ ꓮ ꓟꓬ, ꓠꓬ ꓠꓴ ꓔꓯ ꓟꓽ ꓙꓲ ꓫꓵꓽ ꓮ ꓟꓬ, ꓫꓵꓽ ꓗꓪ ꓐꓰ ꓫ. ꓕꓱ ꓐꓯ ꓔꓬ ꓟ ꓥ ꓡꓳ꓿ ꓥꓪ ꓠꓬ ꓥꓪ ꓚꓲ. ꓛꓬ ꓕꓱ ꓟꓽ ꓙꓲ ꓐꓯ ꓔꓬ ꓢꓴ ꓔꓯ ꓔꓳ ꓡꓯꓽ ꓟ ꓙꓲ ꓟ ꓕꓲ ꓒꓳ, ꓗꓪ ꓐꓰ ꓟꓬꓱꓽ ꓬꓰ ꓕꓯ ꓧꓪ. ꓡꓰ ꓟ ꓟꓶ ꓡꓰ ꓟ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ ꓠ ꓡꓳ ꓖꓶ ꓡ ꓢꓴ ꓮ ꓙꓵꓽ ꓔꓯ ꓫ. ꓟꓳ ꓪ꓿