ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓚꓺ ꓟꓲꓽ (Pope Francis Biography)

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓚꓺ ꓟꓲꓽ (Pope Francis Biography)

ꓔꓲꓺ ꓒ ꓪ ꓔꓲ ꓑꓳꓑꓰ ꓝꓣꓮꓠꓚꓲꓢ ꓠꓬ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓣꓳ‐ꓟ ꓗꓴꓷꓼ ꓦꓮꓔꓲꓚꓮꓠ ꓡꓳ ꓒꓱ ꓗꓪ ꓔꓬ ꓢꓲ ꓠꓬꓲ ꓧꓳꓽ ꓪꓴ. ꓟꓴ ꓔꓬ ꓢꓴ ꓥ ꓡꓳ꓿ ꓬꓲ ꓔꓯ 1936 ꓘꓳꓼ 12 ꓦ ꓟ 17 ꓠꓬꓲ ꓕꓯ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓐꓳꓴꓰꓠꓳꓢ ꓮꓲꓣꓰꓢ ꓡꓳ ꓒꓱ ꓗꓪ ꓲꓔꓮꓡꓬ ꓞꓳ ꓫꓵꓽ ꓐ, ꓐ ꓐꓰ ꓟ, ꓟ ꓐꓴ ꓗꓪ ꓐꓰ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓟꓬꓱꓺ ꓠꓬ ꓙꓳꓣꓖꓰ ꓟꓮꓣꓲꓳ ꓐꓰꓣꓖꓳꓖꓡꓲꓳ ꓥ ꓡꓳ꓿ ꓬꓲ ꓠꓬ ꓐ, ꓐ ꓢꓲ  ꓟ, ꓟ ꓠꓬ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓔꓬ ꓢꓴ ꓐꓴ ꓥ ꓡꓳ꓿

ꓬꓲ ꓟ, ꓟ ꓟꓬꓱꓺ ꓠꓬ ꓣꓰꓖꓲꓠꓮ ꓟꓮꓣꓲꓮ ꓐꓰ ꓐ, ꓐ ꓠꓬ ꓟꓮꓣꓲꓳ ꓙꓳꓢꓰ ꓐꓴ ꓥ ꓡꓳ꓿ ꓬꓲ ꓪ ꓠꓬꓲ ꓲꓔꓮꓡꓬ ꓗꓴꓷꓼ ꓔꓴꓣꓲꓠ ꓡꓳ ꓒꓱ ꓗꓪ ꓔꓬ ꓢꓴ ꓐꓴ ꓥ ꓡꓳ꓿ ꓬꓲ ꓪ ꓠꓬꓲꓽ ꓫꓵ. ꓠꓬ ꓲꓔꓮꓡꓬ ꓗꓴꓷꓼ ꓗꓪ ꓐꓰ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓟꓬꓱꓽ ꓬꓰ ꓠ, ꓟ ꓙꓰ ꓗꓷ ꓢꓴ ꓐꓴ ꓥ ꓡꓳ꓿ ꓬꓲ ꓪ ꓠꓬꓲꓽ ꓣꓳ ꓠꓬ 1935 ꓘꓳꓼ 12 ꓦ ꓕꓯ ꓜꓲꓼ ꓡꓯꓽ ꓘꓳ, ꓢꓲ ꓠꓬꓲ ꓗ. ꓠꓯ ꓕꓲ ꓘꓳꓼ ꓕꓯ ꓡꓯ ꓒꓯ, ꓝ. ꓗꓷꓳ꓿ ꓖꓳ ꓗ. ꓠꓯ ꓬꓲ ꓪ ꓬꓲ ꓤ ꓥ ꓟ ꓙꓳꓣꓖꓰ ꓔꓯ ꓒꓬꓱ ꓟꓳ ꓗꓷꓳ꓿ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓲꓔꓮꓡꓬ ꓞꓳ ꓫꓵꓽ ꓐꓰ ꓮꓣꓖꓰꓠꓔꓲꓠꓮ ꓞꓳ ꓫꓵꓽ ꓟꓲ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓠꓬ ꓔꓲꓺ ꓒ ꓰꓠꓣꓲꓚꓳ ꓡꓯ ꓒꓯ, ꓗꓪ ꓝꓴꓲ ꓔꓲ ꓟꓶ ꓡꓰ ꓟ ꓥ ꓡꓳ꓿ ꓝꓮꓲ ꓕꓱ ꓔꓲꓺ ꓒ ꓠꓬ  ꓢꓮꓡꓰꓢꓲꓮ ꓔꓲꓺ ꓒ ꓜꓴꓻ ꓗꓪ ꓔꓲꓺ ꓒ ꓕꓲ ꓪ ꓥ ꓢꓲ ꓠꓬꓲ ꓫ. ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓢꓴ ꓕꓲꓺ ꓒ ꓥ ꓡꓳ꓿ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓢꓲꓽ ꓫꓬ ꓑ, ꓑ ꓔꓯ 1944 ꓘꓳꓼ 1ꓳ ꓦ ꓬꓲ ꓞꓲ (7) ꓘꓳꓼ ꓕꓯ ꓘꓳ, ꓣꓴ ꓟꓶ ꓡꓰꓳ꓿ ꓝꓮꓲ ꓬꓲ ꓠꓬ ꓬꓲ ꓞꓲꓼ 12 ꓘꓳꓼ ꓙꓳˍ ꓡꓰ ꓟ ꓙꓵ, ꓕꓯ ꓚꓧꓰꓟꓲꓢꓔꓣꓬ ꓟꓲ ꓠꓯ ꓢꓷ. ꓠꓲ, ꓔꓯ ꓢꓮꓡꓰꓢꓲꓮꓠ ꓚꓳꓡꓡꓰꓖꓰ ꓟꓴ ꓔꓲ. ꓢꓳꓻ ꓦꓲꓻ ꓗꓪ ꓢꓳꓻ ꓣꓴ ꓪ ꓡꓰꓳ꓿ ꓬꓲ ꓠꓬ ꓬꓲ ꓮ‐ꓣ ꓗꓪ ꓐꓰ ꓪꓽ ꓘꓴ ꓘꓶꓽ 7 ꓘꓶꓽ ꓔꓯ ꓢꓳꓻ ꓣꓴ ꓪ ꓡꓰꓳ꓿ ꓕꓱ ꓪꓽ ꓘꓴ ꓘꓶꓽ ꓐꓴ ꓠꓬ(Jesus, make my heart more like yours.) ꓢꓲꓺ ꓒ ꓬꓰ‐ꓢꓴꓽꓳ ꓥꓪ ꓠꓲ, ꓟ ꓔꓯ ꓠꓴ ꓡꓰ  ꓐꓰ ꓪꓽ ꓡꓯ ꓘꓳ, ꓠ, ꓟ ꓫꓱ, ꓡꓯꓽ ꓘꓳ, ꓠ, ꓟ ꓬꓰ ꓙ ꓡꓯ ꓐꓰ ꓐꓯ ꓟ ꓪꓽ ꓘꓴ ꓘꓶꓽ ꓥ ꓡꓳ꓿

ꓬꓲ ꓠꓬꓲ ꓬꓲ ꓞꓲꓼ (21) ꓘꓳꓼ ꓙꓳˍ ꓡꓰ ꓟ ꓙꓵ, ꓕꓯ ꓥ ꓟꓲ ꓟꓲ ꓠꓯ ꓢꓷ. ꓠꓲ, ꓙꓵꓽ ꓪꓴ. ꓛꓴꓽ ꓕꓲ ꓟ ꓝꓮꓲ ꓘꓳ, ꓣꓴ ꓟꓶ ꓡꓰꓳ꓿ ꓬꓲ ꓠꓯ ꓗꓪ ꓬꓲ ꓤ ꓬꓲ ꓟ (4) ꓣꓳ ꓔꓬ ꓟ ꓥ ꓡ ꓳ꓿ ꓬꓲ ꓠꓬ 1958 ꓘꓳꓼ  5 ꓦ ꓟ 11 ꓠꓬꓲ ꓕꓯ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓗꓪ ꓔꓲꓺ ꓒ ꓒꓬꓱꓼ ꓡ ꓠ, ꓟ ꓢꓳꓻ ꓦꓲꓻ ꓗꓪ ꓓꓵ ꓡꓰꓳ꓿ ꓝꓮꓲ 1960 ꓘꓳꓼ 5 ꓦ ꓟ `12 ꓠꓬꓲ ꓕꓯ ꓬꓲ ꓓꓽ ꓪꓴ. ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓗ, ꓫꓵˍ ꓔꓯ ꓛ ꓗꓷꓳ꓿ ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓚꓧꓲꓡꓰ ꓗꓴꓷꓼ ꓗꓪ ꓪꓴ‐ꓢ ꓐꓯ ꓘꓶꓽ ꓣꓳ ꓣꓴ ꓔꓬ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ 1961‐1963 ꓘꓳꓼ ꓗꓪ ꓑꓧꓲꓡꓲꓢꓳꓑꓧꓬ ꓓꓴ ꓙ ꓢꓪ ꓠꓬꓲ ꓓꓴ ꓢꓷ. ꓠꓲ, ꓔꓯ ꓣꓳ ꓣꓴ ꓗꓷꓳ꓿

ꓝꓮꓲ ꓬꓲ ꓠꓬ 1964‐1965 ꓘꓳꓼ ꓗꓪ ꓛꓲ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓡꓰ ꓒꓴ ꓔ ꓟ ꓟꓲ ꓠꓯ ꓢꓷ. ꓠꓲ, ꓢꓳꓻ ꓦꓲꓻ ꓗꓪ ꓕꓳ ꓶ ꓟ. ꓖꓶ ꓗꓷꓳ꓿ ꓝꓮꓲ ꓬꓲ ꓠꓬ 1966 ꓘꓳꓼ ꓕꓯ ꓥ ꓟꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓔꓯ ꓟ. ꓖꓶ ꓗꓷꓳ꓿ 1967‐1970 ꓘꓳꓼ ꓕꓯ ꓔꓧꓰꓳꓡꓳꓖꓬ ꓪꓴ‐ꓢ ꓚꓱ, ꓔꓯ ꓟꓳ. ꓢꓷ.ꓠꓲ, ꓔꓯ ꓢꓳꓻ ꓣꓴ ꓗꓷꓳ꓿ ꓬꓲ ꓠꓬ 1969 ꓘꓳꓼ 12 ꓦ ꓟ 13 ꓠꓬꓲ ꓕꓯ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓪ꓿ ꓝꓮꓲ ꓬꓲ ꓠꓬ 1970‐1971 ꓘꓳꓼ ꓗꓪ ꓢꓑꓮꓲꓠ ꓗꓴꓷ ꓼꓗꓪ ꓪꓴ‐ꓢ ꓟꓬꓱꓽ ꓟꓯ ꓗꓷꓳ꓿ ꓝꓮꓲ 1971‐1973 ꓘꓳꓼ ꓗꓪ ꓛꓲ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓪ꓿

1973 ꓘꓳꓼ ꓕꓯ ꓬꓲ ꓠꓬ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓠꓯ, ꓗꓪ ꓮ ꓘꓶ. ꓛꓲ ꓓꓽ ꓟ ꓔꓲꓺ ꓒ ꓕꓲ ꓣꓳ ꓒꓬꓱꓼ ꓡ ꓡꓳ꓿ 1973‐1979 ꓘꓳꓼ ꓕꓯ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓔꓬ ꓟ ꓙꓰꓴꓢꓲꓔ ꓔꓲꓺ ꓒ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓡꓳ꓿ 1979‐1985 ꓘꓳꓼ ꓕꓯ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓔꓧꓰꓳꓡꓳꓖꓬ ꓪꓴ‐ꓢ ꓚꓱ, ꓔꓯ ꓟ. ꓖꓶ ꓢꓴ ꓐꓴ ꓗꓪ ꓔꓲꓺ ꓒ ꓓꓽ ꓒꓬꓱꓼ ꓡ ꓡꓳ꓿ 1986 ꓘꓳꓼ ꓕꓯ ꓖꓰꓣꓟꓮꓠꓬ ꓗꓴꓓꓼ ꓗꓪ ꓙꓰ ꓢꓲ ꓠꓬꓲ ꓟꓲ ꓠꓯ ꓙꓵꓽ ꓪꓴ. ꓚꓴ ꓐꓱ ꓶ ꓔꓧꓰꓢꓲꓢ ꓐꓳ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓙꓵꓽ ꓪꓴ. ꓛꓴꓽ ꓘꓳ, ꓣꓴ ꓪ ꓡꓰꓳ꓿

1992 ꓘꓳꓼ 3 ꓦ ꓟ 27 ꓠꓬꓲ ꓠꓬꓲ ꓕꓯ ꓮꓣꓖꓰꓠꓔꓲꓠꓮ ꓔꓲꓺ ꓒ ꓓꓽ ꓙꓵꓽ ꓘꓳ, ꓣꓴ ꓟꓶ ꓡꓰ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷꓳ꓿ ꓝꓮꓲ 1997 ꓘꓳꓼ 3 ꓦ ꓟ 3 ꓠꓬꓲ ꓠꓬ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓡꓳ꓿ ꓝꓮꓲ 2001 ꓘꓳꓼ ꓕꓯ ꓢꓬꓠꓳꓓ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓓꓽ ꓒꓬꓱꓼ ꓡ ꓡꓳ꓿ 2001 ꓘꓳꓼ 2 ꓦ ꓟ 21 ꓠꓬꓲ ꓔꓯ ꓬꓲ ꓔꓯ ꓚꓮꓣꓓꓲꓠꓮꓡ ꓙꓵꓽ ꓪ ꓘꓳ, ꓣꓴ ꓟꓶ ꓡꓰꓳ꓿ 2005 ꓘꓳꓼꓕꓯ ꓬꓲ ꓠꓬ ꓔꓲꓺ ꓒ ꓪ ꓔꓲ ꓒꓬꓱꓼ ꓡ ꓟ ꓙꓵ, ꓕꓯ ꓬꓲ ꓠꓬ ꓔꓲꓺ ꓒ ꓪ ꓔꓲ ꓢꓲꓻ ꓟ ꓙꓵ, ꓔꓯ ꓠ‐ꓐ ꓠꓬꓲ ꓟꓯˍ ꓮ ꓟꓬ, ꓪ ꓡꓰꓳ꓿   

ꓝꓮꓲ 2005 ꓘꓳꓼ ꓗꓪ ꓐꓰ 2011 ꓘꓳꓼ ꓔꓯ ꓬꓲ ꓠꓬ ꓮꓣꓖꓰꓠꓔꓲꓠꓮ ꓗꓴꓷꓼ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓗꓪ ꓐꓰ ꓖꓪꓽ ꓙꓱ ꓜꓲꓼ ꓓꓴ ꓮ ꓟꓬ, ꓔꓯ ꓬꓰ ꓗꓷꓳ꓿  2013 ꓘꓳꓼ 3 ꓦ ꓟ 13 ꓠꓬꓲ ꓕꓯ ꓬꓲ ꓠꓬ ꓓꓽ ꓪꓴ. ꓡꓮꓔꓲꓠ ꓮꓟꓰꓣꓲꓚꓮꓠ ꓟꓵꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓒꓬꓱꓼ ꓡ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓬꓲ ꓞꓲ ꓠꓬ (76) ꓘꓳꓼ ꓙꓳˍ ꓡꓰ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓝꓣꓮꓠꓚꓲ ꓠꓬ ꓝꓲ ꓓꓴ ꓒꓲ‐ꓕꓱ ꓗꓪ ꓐꓰ ꓝ. ꓢꓲ ꓠꓬꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ 266 ꓪ ꓟ ꓔꓲꓺ ꓒ ꓪ ꓔꓲ ꓥ ꓡꓳ꓿ ꓬꓲ ꓠꓬ ꓙꓲꓻ ꓫꓬ ꓢꓴ ꓢꓔ. ꓝꓣꓮꓠꓚꓲꓢ ꓳꓝ ꓮꓢꓢꓲꓢ ꓟꓬꓱꓺ ꓔꓯ ꓣꓴ ꓔ ꓟ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓠꓵꓻ ꓠꓲ, ꓙꓳˍ ꓢꓴ ꓐꓰ ꓫ. ꓢꓴ ꓟꓷ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓢꓴ ꓔꓲꓺ ꓒ ꓪ ꓔꓲ ꓥꓡꓳ꓿

ꓬꓲ ꓫ. ꓕꓱ ꓗꓴ. ꓟ ꓥꓳꓽ ꓫꓵꓽ ꓠꓬ ꓢꓑꓮꓲꓠ꓾ ꓲꓔꓮꓡꓬ꓾ ꓰꓠꓖꓡꓲꓢꓧ꓾ ꓐꓲ‐ꓔꓲ ꓥꓳꓽ ꓖꓰꓣꓟꓮꓠ ꓥꓳꓽ ꓫꓵꓽ ꓐꓴ ꓥ ꓡꓳ꓿ꓬꓲ ꓠꓬ ꓫ. ꓢꓴ ꓟꓷ ꓢꓴ ꓐꓴ ꓔꓬ ꓟ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓟ. ꓖꓶ ꓢꓴ ꓐꓰ ꓬꓰ ꓙ ꓔꓳ, ꓙ ꓢꓴ ꓥ ꓡꓳ꓿ꓬꓲ ꓠꓬ ꓙꓵꓻ ꓠꓲ, ꓮ ꓟꓬ, ꓙꓳˍ ꓢꓴ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓙ ꓣꓴ ꓢꓴ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓐꓰ ꓐꓴꓢ ꓔꓯ ꓡꓰ ꓣꓱ ꓢꓲ ꓠꓬꓲ ꓙꓰ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜ ꓓꓴ ꓓꓳ ꓓꓴ ꓔꓯ ꓬꓲ ꓚꓲ. ꓛꓬ ꓡꓰ ꓝ. ꓢꓲ ꓠꓬ ꓜꓽ ꓢꓴ ꓥ ꓡꓳ꓿ ꓬꓲ ꓠꓬ ꓫ. ꓢꓴ ꓟꓷ ꓢꓴ ꓐꓴ ꓡꓰ ꓞꓳ ꓙꓳ ꓢꓯ. ꓔꓬ ꓢꓴ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓥ ꓡꓳ꓿

ꓬꓲ ꓔꓯ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓥ ꓟꓲ ꓮ ꓘꓶ. ꓠꓲ, ꓠꓵ ꓟ ꓔꓲꓺ ꓒ ꓪ ꓔꓲ ꓥ ꓡꓳ꓿ ꓬꓲ ꓠꓬ ꓟꓲ ꓠꓯ ꓗꓪ ꓫ. ꓢꓴ ꓟꓷ ꓢꓴ ꓐꓴ ꓗꓴꓷꓼ ꓮ ꓟꓬ, ꓔꓯ ꓮ ꓘꓶ. ꓛꓲ ꓬꓰ ꓙ ꓔꓳ, ꓙ ꓪꓽ ꓘꓴ ꓙ ꓢꓴ ꓟꓲ ꓥ ꓡꓳ꓿ ꓫ. ꓢꓴ ꓟꓷ ꓢꓴ ꓐꓴ ꓪ ꓙꓵꓽ ꓪ ꓔꓯ ꓥ ꓟꓲ ꓑꓶ. ꓑꓶ. ꓡꓰ ꓫ. ꓕꓱ ꓖꓶ ꓢꓴ ꓥ ꓡꓳ꓿ ꓬꓲ ꓮ ꓘꓶ. ꓛꓲ ꓠꓲ ꓠꓵ ꓟ ꓜ ꓫꓵꓽ ꓠꓬ ꓑꓲꓜꓜꓮ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓬꓲ ꓠꓬ ꓐꓳ ꓡꓴ ꓡꓳ ꓖꓪ ꓫꓵꓽ ꓔꓯ ꓟꓲ ꓬꓲ ꓮ ꓘꓶ. ꓛꓲ ꓠꓲ, ꓠꓵ ꓟ ꓡꓳ ꓖꓪ ꓫꓵꓽ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓠꓬ ꓦꓮꓔꓲꓚꓮꓠ ꓗꓴꓷꓼ ꓗꓪ ꓔꓲꓺ ꓒ ꓪ ꓔꓲ ꓐꓴ ꓐꓱ ꓶ ꓔꓬ ꓠ, ꓟ ꓦꓲꓻ ꓗꓪ ꓟꓽ ꓔꓬ ꓢꓲ ꓠꓬꓲ ꓬꓲ ꓠꓬꓲ ꓮ ꓘꓶ. ꓛꓲ ꓫ. ꓔ ꓟ ꓡꓳ ꓒꓱ ꓤ ꓗꓪ ꓙꓳˍ ꓟ ꓪꓽ ꓘꓴ ꓦꓲꓻ ꓤ ꓕꓲ ꓟ ꓗꓪ ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓔꓬ ꓢꓴ ꓥ ꓡꓳ꓿

 ꓬꓲ ꓠꓬ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓥ ꓟꓲ ꓬꓲ ꓚꓲ. ꓛꓬ ꓐꓱ ꓶ ꓮ ꓟꓬ, ꓥ ꓟꓲ ꓟꓽ ꓛ ꓔ ꓢꓴ ꓝꓮꓲ ꓪꓴ‐ꓢ ꓠꓵꓻ ꓠꓲ, ꓔꓯ ꓫ. ꓢꓴ ꓟꓷ ꓢꓴ ꓐꓴ ꓔꓯ ꓝꓮꓲ ꓣꓱ ꓬꓯ ꓣꓱ ꓞ ꓔꓬ ꓢꓴ ꓐꓴ ꓔꓯ ꓟ. ꓖꓶ ꓢꓴ ꓥ ꓡꓳ꓿ ꓪꓴ‐ꓢ ꓟꓬꓱꓽ ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓴ ꓥ ꓡꓳ꓿ ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓪꓽ ꓘꓴ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓟꓬ‐ꓟ ꓗꓴꓷꓼ ꓗꓪ ꓥ ꓟꓲ 2017 ꓘꓳꓼ 9 ꓦ ꓟ 29 ꓠꓬꓲ ꓕꓯ ꓥ ꓟꓲ ꓟꓬ‐ꓟ ꓗꓴꓷꓼ ꓗꓪ ꓡ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓟꓬ‐ꓟ ꓗꓴꓷꓼ ꓗꓪ ꓓꓽ ꓪꓴ. ꓔꓲꓺ ꓒ ꓪ ꓔꓲ ꓐꓴ ꓗꓳ ꓡꓳ ꓗꓪ ꓐꓰ ꓡ ꓢꓴ ꓕꓲ ꓒ ꓪ ꓔꓲ ꓥ ꓡꓳ꓿ ꓫ. ꓟꓳ ꓪ꓿