ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓪꓴ. ꓓꓵ ꓓꓶ ꓗꓷ ꓟ (John the Baptist)

ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓪꓴ. ꓓꓵ ꓓꓶ ꓗꓷ ꓟ (John the Baptist)

ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓠꓬ ꓢꓲꓺ ꓒ ꓬꓰ‐ꓢꓴ ꓫꓵꓽ ꓤ ꓪꓳꓽ ꓤ ꓥ ꓡꓳ꓿ ꓬꓲ ꓔꓯ ꓙꓴ‐ꓓꓲ‐ꓬ ꓟꓵꓽ ꓗꓪ ꓦꓵꓻ ꓗꓷ ꓟ ꓥ ꓢꓲ ꓠꓬꓲ ꓬꓲ. ꓐ, ꓐ ꓟꓬꓱꓽ ꓤ‐ꓘꓶ‐ꓡꓶ ꓐꓰ ꓬꓲ‐ꓡꓲ‐ꓫ‐ꓑꓶ ꓐꓴ ꓬꓲ. ꓤ ꓥ ꓡꓳ꓿ ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓬꓲ ꓞꓲꓼ (30) ꓘꓳꓼ ꓙꓳˍ ꓡꓰ ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓛꓲ ꓡ ꓟ ꓚꓱ, ꓙꓻ ꓖꓴ ꓫꓬ, ꓠ, ꓟ ꓟ. ꓖꓶ ꓚꓺ ꓟ. ꓖꓶ ꓢꓲ ꓠꓬꓲ ꓬꓴ‐ꓔ ꓬꓲꓻ ꓟ ꓒ ꓕꓲ ꓗꓪ ꓔꓬ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓬꓴ‐ꓔ ꓬꓲꓻ ꓟ ꓗꓪ ꓖꓳ ꓓꓱꓽ ꓔꓶ ꓖꓶ ꓗꓷ ꓟ ꓥ ꓡꓳ꓿

ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓢꓲꓺ ꓒ ꓬꓰ‐ꓢꓴ ꓔꓯ ꓖꓳ ꓓꓱꓽ ꓔꓲ ꓖꓶ ꓗꓷ ꓗ. ꓠꓯ ꓬꓲ. ꓟꓬꓱꓽ ꓬꓰ ꓓꓳꓻ ꓡꓰ ꓟ ꓥ ꓡꓳ꓿ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓩꓴ‐ꓡꓲ ꓪ ꓔꓲ ꓡꓰ ꓐꓱ ꓓꓵ ꓗꓪ ꓓꓵ ꓗꓷ ꓟ ꓥ ꓡꓳ꓿  ꓩꓴ‐ꓡꓲ ꓪ ꓔꓲ ꓠꓬ ꓬꓲ. ꓠꓬꓲ ꓤ ꓤ ꓟꓶ ꓩꓴ‐ꓡꓳ‐ꓓꓲ ꓔꓯ ꓫˍ ꓟ  ꓥ ꓡꓳ꓿ ꓕꓱ ꓡꓱ ꓬꓰ ꓟ ꓔꓯ ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓠꓬ ꓟꓽ ꓙꓲˍ ꓟ ꓟꓬꓱꓽ ꓥ ꓡꓳ ꓪ ꓔꓲ ꓔꓯ ꓟꓽ ꓙꓳꓺ ꓙꓳꓺ ꓐꓯ ꓟ. ꓖꓶ ꓟ ꓪꓴ. ꓠꓬꓲ ꓐꓱ ꓓꓵ ꓗꓪ ꓓꓵ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓩꓴ‐ꓡꓳ‐ꓓꓲ ꓠꓬ ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓔꓯ ꓢꓰꓼ ꓠꓲ, ꓫꓵˍ ꓟ ꓥ ꓡꓳ꓿

ꓮ ꓘꓶ. ꓗ. ꓘꓳꓽˍ ꓟ  ꓦꓬꓼ ꓠꓬꓲ ꓓꓽ ꓟ ꓕꓲꓽ ꓠꓬꓲ ꓛꓲ ꓡꓺ ꓳ꓿ ꓖꓳ ꓟ ꓠꓬ ꓩꓴ‐ꓡꓲ ꓦꓵꓻ ꓦꓬꓼ ꓠꓬꓲ  ꓥ ꓡꓳ꓿ ꓖꓳ ꓕꓲ ꓠꓬꓲ  ꓗꓪ ꓬꓲ ꓡꓰ ꓬꓲ ꓢꓲꓽ ꓒ  ꓐꓴ ꓐꓰ ꓟꓯꓼ ꓢꓲꓽ ꓒ ꓐꓴ ꓐꓰ ꓖ‐ꓡꓲ‐ꓡꓲ ꓟꓵꓽ ꓗꓪ ꓟ ꓞꓳ  ꓪꓴꓽ ꓞꓳ ꓔꓲ ꓐꓴ ꓔꓯ ꓜ ꓕꓲ ꓜꓽ ꓓꓴ ꓖꓶ ꓜꓽˍ ꓡꓳ꓿ ꓖꓳ ꓕꓲ ꓙꓵ, ꓗꓪ ꓩꓴ‐ꓡꓳ‐ꓓꓲ ꓬꓲ ꓮ ꓟꓲꓽ ꓓꓵꓽ ꓙꓰ ꓢꓲ ꓗꓪ ꓛꓰ, ꓗꓷ ꓠꓬ ꓩꓴ‐ꓡꓲ ꓮ ꓘꓶ. ꓠꓲ, ꓟ ꓢ ꓡꓰ ꓡꓳ꓿

ꓩꓴ‐ꓡꓲ ꓪ ꓔꓲ ꓡꓰ ꓮ ꓟꓲꓽ ꓤ ꓕꓯ ꓮ ꓫꓵꓽ ꓠꓲ, ꓫꓵˍ ꓟ ꓓꓰꓽ ꓐꓰ ꓐꓯ ꓘꓶꓽ ꓔꓯ ꓮ ꓟꓲꓽ ꓤ ꓠꓬ ꓬꓲ. ꓟ, ꓟ ꓔꓯ ꓠꓻ ꓠꓬꓲ ꓢꓲ ꓠꓬꓲ ꓖꓳ ꓓꓱꓽ ꓔꓲ ꓒꓽ ꓬꓳ‐ꓦ ꓪꓴ. ꓓꓵ ꓓꓰꓽ ꓬꓰ ꓐꓰ ꓐꓯ ꓗꓷ ꓡꓳ꓿ ꓩꓴ‐ꓡꓲ ꓠꓬ ꓠꓲ, ꓟ ꓟꓽ ꓢ ꓥ ꓟꓲ ꓖꓳ ꓓꓱꓽ ꓔꓲ ꓒ ꓬꓳ‐ꓦ ꓪꓴ. ꓓꓵ ꓔꓯ ꓔꓯ, ꓡ ꓝꓲ ꓟ ꓥ ꓡꓳ꓿ ꓬꓳ‐ꓦ ꓬꓲ ꓛꓳꓽ ꓒꓯ, ꓐꓴ ꓑ ꓙꓽ ꓗꓷ ꓠꓬ ꓬꓲ ꓪ ꓡ ꓢꓲ ꓠꓬꓲ ꓬꓲ ꓫꓵꓻ ꓟꓳꓻ ꓑꓱ. ꓔꓯ, ꓙꓰ ꓢꓲ ꓠꓬꓲ ꓔꓵ. ꓗꓷ ꓟ ꓥ ꓡꓳ