ꓗꓴꓷꓼ ꓘꓴꓽ ꓗꓪ ꓟꓯꓼ ꓒꓽ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓚꓱ, (Country with no Army)

#rvalisu #Grenada #The country no Army #creditphoto

Monday, June 10, 2024

ꓗꓴꓷꓼ ꓘꓴꓽ ꓗꓪ ꓟꓯꓼ ꓒꓽ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓚꓱ, (Country with no Army)

ꓠꓬꓲ. ꓠꓬꓲ ꓠꓬ ꓗꓴꓷꓼ ꓘꓴꓽ ꓗꓪ ꓟꓯꓼ ꓒꓽ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓚꓱ, ꓔꓯ ꓚꓺ ꓟꓲꓽ ꓥ ꓡꓳ꓿ ꓲꓢꓮꓡꓬ ꓗꓴꓷꓼ ꓬꓰ‐ꓢꓷ‐ꓡꓲ ꓗꓴꓷꓼ ꓗꓪ ꓠꓬ ꓟꓲ ꓠꓯ ꓟꓯꓼ ꓒꓽ ꓮ ꓟꓬ, ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓢꓲ ꓠꓬꓲ ꓢꓲꓠꓖꓮꓑꓳꓣꓰ ꓗꓴꓷꓼ ꓥ ꓟꓲ ꓟꓲ ꓠꓯ ꓗꓪ ꓠ ꓐ ꓠꓬꓲꓽ ꓟꓯꓼ ꓒꓽ ꓐꓴ ꓮ ꓟꓬ, ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓡꓳ꓿

ꓴꓢꓮ ꓗꓴꓷꓼ ꓗꓴꓷꓼ ꓥ ꓟꓲ ꓟꓲ ꓠꓯ ꓮ ꓘꓶ. ꓛꓲ ꓢꓯꓼ ꓙꓳˍ ꓖꓴ ꓡꓰ ꓟ ꓠ ꓐ (1) ꓟꓯꓼ ꓒꓽ ꓐꓴ ꓮ ꓟꓬ, ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓟꓲ ꓥ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓟꓯꓼ ꓒꓽ ꓐꓴ ꓚꓱ, ꓥ ꓡꓳ꓿ ꓟꓯꓼ ꓒꓽ ꓐꓴ ꓠꓬ ꓬꓲ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓣꓱ ꓬꓯꓼ ꓢꓴ ꓐꓴ ꓥ ꓢꓲ ꓠꓬꓲ ꓝꓮꓲ ꓚꓲ. ꓛꓬ ꓗꓴꓷꓼ ꓐꓱ ꓶ ꓔꓯ ꓗꓽ ꓕꓽ ꓠ, ꓟ ꓣꓱ ꓬꓯꓼ ꓢꓴ ꓐꓴ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓟꓲ ꓠꓯ ꓗꓪ ꓟꓯꓼ ꓒꓽ ꓐꓴ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓔꓯ ꓡꓳ. ꓟꓳ ꓗꓷ ꓠꓬ ꓕꓱ ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓗ, ꓛꓲ ꓛ ꓢꓯ. ꓔꓬ ꓟ ꓔꓯ ꓡꓳ. ꓟꓳ ꓪ ꓡꓰꓳ꓿ ꓕꓱ ꓟ ꓟꓯꓼ ꓟꓽ ꓔꓬ ꓟ ꓗꓴꓷꓼ ꓚꓺ ꓟꓲꓽ ꓠꓬ ꓠꓱ ꓡꓴꓽ ꓐꓱ ꓘꓴꓽ ꓗꓪ ꓙꓳˍ ꓟ ꓬꓲ ꓗꓳ ꓡꓳ ꓟꓵꓽ ꓕꓲ ꓟꓵꓽ ꓥ ꓟ ꓖꓣꓰꓠꓮꓓꓮ ꓟꓬꓱꓺ ꓔ ꓟ ꓟꓵꓽ ꓕꓲ ꓟꓵꓽ ꓚꓱ, ꓥ ꓡꓳ꓿

ꓖꓣꓰꓠꓮꓓꓮ ꓗꓴꓷꓼ ꓗꓪ ꓠꓬ ꓟꓲ ꓠꓯ ꓕꓯ ꓢꓲ ꓠꓬ ꓗꓴꓷꓼ ꓮ ꓟꓬ, ꓟꓽ ꓙꓳˍ ꓟ ꓗꓴꓷꓼ ꓕꓲ ꓗꓴꓷꓼ ꓗꓪ ꓖꓣꓰꓠꓮꓓꓮ ꓗꓴꓷꓼ ꓟꓲ ꓐ ꓢꓲ ꓬꓲ ꓪ ꓗꓴꓷꓼ ꓗꓪ ꓠꓬ ꓟꓯꓼ ꓟꓽ ꓔꓬ ꓟ ꓗꓴꓷꓼ ꓟꓲ ꓥ ꓡꓳ꓿ ꓣꓳ ꓓꓵ ꓙ ꓗꓷ ꓠꓬ ꓕꓱ ꓗꓴꓷꓼ ꓗꓪ ꓠꓬ ꓔꓬ ꓠ, ꓟ ꓟꓽ ꓙꓲ ꓐꓰ ꓣꓳ ꓓꓵ ꓙ ꓗꓴ ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓗꓴꓷꓼ ꓗꓪ ꓠꓬ ꓮ ꓘꓶ. ꓛꓲ ꓔꓬ ꓢ ꓢꓲ ꓠꓬꓲ ꓔꓬ ꓗ, ꓛꓲ ꓟ ꓥ ꓡꓳ꓿ ꓕꓱ ꓗꓴꓷꓼ ꓗꓪ ꓠꓬ ꓟꓯꓼ ꓒꓽ ꓐꓴ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓡꓳ꓿

ꓟꓲ ꓠꓯ ꓗꓪ ꓖꓣꓰꓠꓮꓓꓮ ꓗꓴꓷꓼ ꓠꓬ ꓟꓲ ꓠꓯ ꓮ ꓘꓶ. ꓛꓲ ꓔꓬ ꓢꓽ ꓟ ꓐꓰ ꓑ ꓫꓬ ꓐꓴ ꓐꓰ ꓠꓱ. ꓐꓯꓼ ꓗꓴꓷꓼ ꓗꓪ ꓐꓰ ꓛꓳ ꓗ ꓡ ꓢꓴ ꓐꓴ ꓐꓱ ꓶ ꓚꓴꓽ ꓙꓳˍ ꓢꓴ ꓟꓽ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓒꓬꓱꓼ ꓡ ꓟ ꓥ ꓡꓳ꓿ ꓕꓱ ꓗꓴꓷꓼ ꓗꓪ ꓠꓬ ꓟꓽ ꓙꓲˍ ꓟ ꓟꓬꓱꓽ ꓬꓰ ꓢꓴ ꓮ ꓘꓶ. ꓟꓽ ꓔꓬ ꓟ ꓗꓴꓷꓼ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓑ ꓫꓬ ꓕꓲ ꓣꓳ ꓡꓰ ꓐꓯ ꓔ ꓟ ꓠꓬ ꓬꓲ ꓠꓬ ꓬꓲ ꓔꓬ ꓦꓲꓻ ꓗꓽ ꓘꓶꓽ ꓔꓯ 2016 ꓘꓳꓼ ꓗꓪ ꓐꓰ ꓟꓽ ꓑꓲ. ꓑꓲ. ꓔꓬ ꓟ ꓠꓬꓲ. ꓠꓬꓲ ꓗꓪ ꓛꓲ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓑ ꓫꓬ ꓟꓯꓼ ꓥ ꓟꓲ ꓙꓻ ꓖꓴ ꓫꓱ. ꓔꓬ ꓕꓯ ꓡ ꓚꓴ ꓑꓳ ꓟꓽ ꓑ ꓑ ꓙ ꓖꓴ ꓫꓱ ꓔꓬ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓯꓼ ꓒꓽ ꓐꓴ ꓐꓱ ꓶ ꓣꓱ ꓟ ꓒꓴ ꓔꓯ ꓟꓲ ꓠꓯ ꓢꓷ. ꓠꓲ, ꓐꓰ ꓬꓲ ꓪ ꓗꓴꓷꓼ ꓗꓪ ꓙꓳˍ ꓟ ꓬꓲꓻ ꓡꓴ ꓐꓱ ꓗꓪ ꓮ ꓘꓶ. ꓛꓲ ꓡꓳ. ꓐꓲ ꓠ, ꓟ ꓗꓪ ꓣꓱ ꓟ ꓥ ꓡꓳ꓿ ꓬꓲ ꓪ ꓗꓴꓷꓼ ꓟꓯꓼ ꓒꓽ ꓐꓴ ꓬꓲ ꓛꓲ ꓬꓲꓻ ꓡꓴ ꓐꓱ ꓔꓯ ꓡꓳ. ꓟꓳ ꓪ ꓢꓲ ꓠꓬꓲ ꓕꓱ ꓬꓲꓻ ꓡꓴ ꓐꓱ ꓗꓪ ꓐꓰ ꓗꓴꓷꓼ ꓐꓱ ꓶ ꓒꓴ ꓫꓵꓽ ꓮ ꓟꓬ, ꓓꓵ ꓡ ꓟ ꓥ ꓡꓳ꓿ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓐꓰ ꓛꓳꓽ ꓗ ꓡ ꓢꓴ ꓐꓴ ꓗꓪ ꓐꓰ ꓒꓴ ꓮ ꓟꓬ, ꓓꓵ ꓡ ꓟ ꓥ ꓡꓳ꓿ ꓬꓲ ꓪ ꓠꓯ, ꓗꓪ ꓮ ꓘꓶ. ꓡꓳ. ꓐꓲ ꓟ ꓬꓲꓻ ꓡꓴ ꓐꓱ ꓐꓰ ꓢꓲ ꓠꓯ ꓙꓳˍ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓪ ꓗꓴꓷꓼ ꓗꓪ ꓒꓴ ꓓꓵ ꓡ ꓟ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓟꓬ, ꓙꓳˍ ꓡ ꓟ ꓥ ꓡꓳ꓿ ꓬꓲ ꓠꓬ ꓠꓯ, ꓗꓪ ꓟꓯꓼ ꓒꓴ ꓣꓱ ꓟ ꓢ‐ꓐꓳ ꓓꓰ‐ꓡꓲ ꓬꓲ ꓛꓲ ꓓꓰ‐ꓡꓲ ꓤ ꓙꓳˍ ꓟ ꓥ ꓡꓳ꓿ ꓛꓳ ꓗ. ꓡ ꓢꓴ ꓐꓴ ꓮ ꓟꓬ, ꓔꓬ ꓢꓲ ꓠꓬꓲ ꓬꓲꓻ ꓙꓬ ꓐꓱ ꓘꓶꓽ ꓗꓪ ꓠꓽ ꓡꓰ ꓠ, ꓟ ꓡꓳ ꓠꓬꓲ ꓠ, ꓟ ꓮ ꓟꓬ, ꓛꓲ ꓡ ꓟ ꓥ ꓡꓳ꓿

ꓬꓲ ꓪ ꓗꓴꓷꓼ ꓗꓪ ꓟꓯꓼ ꓐꓴ ꓣꓱ ꓟ ꓐꓳ ꓬꓲ ꓛꓵ. ꓚꓳꓚꓳ ꓢꓶꓽ ꓮ ꓟꓬ, ꓙꓳˍ ꓢꓲ ꓠꓬꓲ ꓚꓳꓚꓳ ꓢꓶꓽ ꓠꓬ ꓜ ꓓꓴ ꓚꓧꓳꓚꓳꓡꓮꓔꓰ ꓬꓰ ꓟ ꓗꓪ ꓣꓱ ꓟ ꓥ ꓡꓳ꓿ ꓬꓲ ꓪ ꓗꓴꓷꓼ ꓗꓪ ꓮ ꓘꓶ. ꓛꓲ ꓙꓲˍ ꓟ ꓚꓧꓳꓚꓳꓡꓮꓔꓰ ꓔꓯ ꓫꓬ, ꓢꓲ ꓠꓬꓲ ꓕꓲ ꓟꓲ ꓠꓯ ꓡꓱ ꓗꓪ ꓪꓴꓽ ꓜ ꓟ ꓗꓪ ꓐꓰ ꓒꓴ ꓫꓵꓽ ꓮ ꓟꓬ, ꓓꓵ ꓡ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓗꓴꓷꓼ ꓗꓪ ꓟꓲ ꓠꓯ ꓢꓷ. ꓠꓲ, ꓚꓱ, ꓗꓪ ꓮ ꓟꓬ, ꓮ ꓘꓶ. ꓙꓲˍ ꓟ ꓟꓲ ꓠꓯ ꓢꓷ. ꓠꓲ, ꓔꓯ ꓙꓳˍ ꓟ ꓐꓴ ꓔꓯ ꓟ. ꓖꓶ ꓟ ꓥ ꓡꓳ꓿ ꓝꓮꓲ ꓖꓣꓰꓠꓮꓓꓮ ꓗꓴꓷꓼ ꓗꓪ ꓙꓳˍ ꓟ ꓠꓯꓼ ꓞꓲꓼ ꓢꓷ. ꓠꓲ, ꓢꓳꓻ ꓦꓲꓻ ꓗꓪ ꓟꓲ ꓠꓯ ꓗꓪ ꓠ‐ꓐ 1 ꓙꓲ ꓡꓳˍ ꓬꓰ ꓟ ꓙꓳ ꓦꓲꓻ ꓟꓲ ꓥ ꓡꓳ꓿ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓐꓰ ꓢꓳꓻ ꓤ ꓮ ꓟꓬ, ꓕꓱ ꓗꓪ ꓡ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓔꓯ ꓢꓳꓻ ꓣꓴ ꓡ ꓢꓲ ꓠꓬꓲ ꓠꓯꓼ ꓞꓲꓼ ꓟ. ꓒꓽ ꓓꓽ ꓐꓴ ꓒꓬꓱꓼ ꓡꓰꓳ ꓟ ꓥ ꓡꓳ꓿

ꓗꓴꓷꓼ ꓕꓲ ꓗꓴꓷꓼ ꓐꓱ ꓶ ꓥ ꓟꓲ ꓟꓯꓼ ꓒꓽ ꓐꓴ ꓠꓬ ꓮ ꓘꓶ. ꓛꓲ ꓣꓳ ꓚꓵ ꓟ ꓟꓽ ꓔꓬ ꓟꓽ ꓓꓽ ꓕꓲ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓚꓲ. ꓛꓬ ꓐꓱ ꓶ ꓡꓰ ꓪꓴꓽ ꓟꓴ ꓡ ꓚꓱ, ꓡꓰ ꓬꓰ ꓟ ꓟꓯꓼ ꓒꓽ ꓐꓴ ꓟꓲ ꓠꓯ ꓗꓪ ꓮ ꓟꓬ, ꓔꓬ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓑ ꓫꓬ ꓐꓴ ꓐꓱ ꓶ ꓪꓴꓽ ꓟꓴ ꓚꓱ, ꓗꓪ ꓬꓰ ꓙ ꓔ ꓙ ꓢꓴ ꓟꓯꓼ ꓐꓴ ꓣꓱ ꓬꓯꓼ ꓔꓬ ꓟ ꓥ ꓡꓳ꓿

ꓟꓯꓼ ꓒꓽ ꓐꓴ ꓮ ꓘꓶ. ꓙꓲ ꓠꓬ ꓟꓯꓼ ꓢꓰꓼ ꓡꓯ ꓘꓳ, ꓟ ꓔꓯ ꓟꓽ ꓠꓲ, ꓫꓵˍ ꓟ ꓥ ꓡꓳ꓿ ꓣꓳ ꓡꓱ ꓥ ꓟꓲ ꓣꓳ ꓡꓳ. ꓟꓳ ꓗꓷ ꓟ ꓗꓴꓷꓼ ꓘꓴꓽ ꓗꓪ ꓟꓯꓼ ꓒꓽ ꓐꓴ ꓟꓽ ꓙꓲˍ ꓟ ꓗꓴꓷꓼ ꓥ ꓟꓲ ꓖꓣꓰꓠꓮꓓꓮ ꓗꓴꓷꓼ ꓗꓪ ꓮ ꓘꓶ. ꓛꓲ ꓓꓵ ꓙ ꓟꓶ ꓓꓴ ꓗꓴꓷꓼ ꓥ ꓡꓳ꓿ ꓡ ꓞꓳ ꓮ ꓘꓶ. ꓠꓴ ꓠꓲ, ꓙꓳˍ ꓢꓴ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓗꓴ. ꓟ ꓬꓰˍ ꓙ ꓗꓴ ꓢꓴ ꓒꓬꓱꓼ ꓡ ꓝꓲ ꓡꓯ꓿ ꓙꓲ ꓖꓴ ꓙꓳˍ ꓟ ꓢꓯ. ꓐꓬꓱꓼ ꓮ ꓟꓬ, ꓬꓰ ꓐ ꓡ ꓠ, ꓟ ꓡꓲꓗꓰ ꓢꓧꓮꓣꓰ ꓚꓳꓟꓟꓰꓠꓔ ꓮ ꓟꓬ, ꓖꓶ ꓓꓴ ꓬꓰ ꓡꓯ꓿